Ibali Lobomi
UYehova Wasifundisa Ukunyamezela Nokuzingisa
NGOKUBALISWA NGUARISTOTELIS APOSTOLIDIS
Kwiinduli ezikumantla eeNtaba iiCaucasus kukho iPyatigorsk, isixeko saseRashiya esidume ngemithombo yamanzi nemozulu entle. Ndazalelwa apha ngabantu abaziimbacu ezingamaGrike ngowe-1929. Kwiminyaka elishumi kamva, emva kwenkqubo yabaxhasi bakaStalin, yoloyiko nokutshatyalaliswa kohlanga, saphinda saba ziimbacu, njengoko sanyanzelwa ukuba sifudukele eGrisi.
EMVA kokuba sifudukele ePiraiévs, eGrisi, igama elithi “iimbacu” lalinentsingiselo entsha kuthi. Sasivakalelwa kukuba singabasemzini. Nangona mna nomkhuluwa wam sasinamagama ezithandi zobulumko zamaGrike ezidumileyo ezimbini, uSocrates noAristotle, sasingafane siweve loo magama esetyenziswa. Wonk’ umntu wayesibiza ngokuba singamaRashiya amancinane.
Kungekudala emva kokuqhambuka kweMfazwe Yehlabathi II, umama wam endimthandayo wafa. Wayesoloko engumntu onendima ebalulekileyo ekhayeni lethu, yaye ukulahlekelwa nguye kwakudandathekisa kakhulu. Ekubeni wayegula kangangexeshana, wandifundisa ukwenza imisebenzi emininzi yasekhaya. Olu qeqesho lwandinceda gqitha kamva ebomini.
Imfazwe Nenkululeko
Imfazwe, ukuthinjwa ngamaNazi, nokuhlaselwa ngokungathethekiyo yimikhosi eManyeneyo kwakusenza usuku ngalunye lube ngathi lelokugqibela. Kwakugquba ubuhlwempu, indlala yaye abantu besifa. Ukususela kwixesha endandineminyaka eli-11 ubudala, kwakufuneka ndisebenze nzima kunye notata ukuze sizixhase thina sobathathu. Andizange ndiqhube kakuhle esikolweni ngenxa yokungalwazi kakuhle ulwimi lwesiGrike, ubukho bemfazwe nemiphumo yayo.
IGrisi yakhululeka ekuthinjweni ngamaJamani ngo-Oktobha 1944. Kungekudala emva koko, ndaqhagamshelana namaNgqina kaYehova. Xa ngelo xesha ndandiphelelwe lithemba yaye ndisentlungwini, ithemba leBhayibhile lekamva eliqaqambileyo phantsi koBukumkani bukaThixo landichukumisa. (INdumiso 37:29) Isithembiso sikaThixo sobomi obungapheliyo phantsi kweemeko eziseluxolweni apha emhlabeni sandipholisa amanxeba. (Isaya 9:7) Ngowe-1946 mna notata sabhaptizwa, sifuzisela uzahlulelo lwethu kuYehova.
Kunyaka olandelayo, ndavuyiswa kukufumana isabelo sam sokuqala njengesicaka sokubhengeza (kamva esabizwa ngokuba sisicaka samaphephancwadi) kwibandla lesibini ePiraiévs. Intsimi yethu yayisusela ePiraiévs iye kutsho e-Eleusis, umgama omalunga neekhilomitha ezingama-50. Ngelo xesha, ebandleni lethu kwakukho amaKristu amaninzi athanjiswe ngomoya. Ndaba nelungelo lokusebenza nawo nokufunda kuwo. Ndandikunandipha ukunxulumana nawo kuba ayenamava angapheliyo ngomgudu ofunekayo ukuze ubani aqhubeke nomsebenzi wokushumayela. Xa uqwalasela indlela awayephila ngayo, kwakucacile ukuba ukuze ubani akhonze uYehova ngokuthembekileyo, kufuneka umonde nokuzingisa okukhulu. (IZenzo 14:22) Hayi indlela endinovuyo ngayo kuba namhlanje kukho amabandla amaNgqina kaYehova angaphezu kwangama-50 kule ngingqi!
Ucelomngeni Olungalindelekanga
Ekuhambeni kwexesha, ndaqhelana noEleni, ibhinqa elingumKristu eliselula, elihle nelinenzondelelo kwisixeko sasePatras. Sathembisana ekupheleni kowe-1952. Noko ke, emva kweenyanga ezimbalwa, uEleni wagula kakhulu. Oogqirha bafumanisa ukuba unethumba ebuchotsheni, yaye imeko yakhe yayimbi. Kwakufanele atyandwe ngokukhawuleza. Emva kweenzame, sakwazi ukufumana ugqirha eAthens owathi—phezu kwako nje ukunqongophala kwezinto ngelo xesha—wavuma ukumtyanda ngaphandle kokusebenzisa igazi ngokuvisisana neenkolelo zethu zonqulo. (Levitikus 17:10-14; IZenzo 15:28, 29) Emva kotyando, oogqirha babengafuni ukuba nethemba ngalowo uza kuba ngumfazi wam, kodwa bachaza ukuba kusenokwenzeka agule kwakhona.
Ndandiza kwenza ntoni kule meko? Ngenxa yeemeko eziguqukileyo, ngaba ndandifanele ndaphule isithembiso sethu? Akunjalo! Esi yayisisithembiso, yaye ndandifuna uewe wam abe nguewe. (Mateyu 5:37) Andizange ndizivumele nakancinane ukuba ndicinge nto yimbi. Xa wayenyanyekelwa ngudade wabo omdala, uEleni wachacha kancinane, yaye satshata ngoDisemba 1954.
Kwiminyaka emithathu kamva, uEleni waphinda wagula, yaye kwalaa gqirha mnye kwafuneka enze olunye utyando. Ngesi sihlandlo kwafuneka asike nzulu ebuchotsheni ukuze alisuse ngokupheleleyo elo thumba. Ngenxa yoko, umfazi wam washiyeka efe amalungu athile omzimba, yaye oko kwayichaphazela kakhulu indlela yakhe yokuthetha. Ngoku sobabini sajamelana neengxaki ezininzi ezintsha. Nemisebenzi elula yaba ngumqobo omkhulu kumfazi wam othandekayo. Ngenxa yemeko yakhe eyayisiba maxongo, kwafuneka senze utshintsho kwimisebenzi yethu yemihla ngemihla. Ngaphezu koko, kwakufuneka sinyamezele size sizingise.
Kungeli xesha ke eyaba luncedo ngayo imfundiso endayifumana kumama. Ntsasa nganye, ndandilungiselela zonke izinto eziza kuphekwa, aze uEleni apheke. Ngokufuthi sasimema abantu, kuquka abalungiseleli bexesha elizeleyo, abantu esasifunda iBhayibhile nabo, namaKristu asweleyo ebandleni. Bonke babevuma ukuba ezi zidlo zazimnandi kakhulu! Mna noEleni sasisebenzisana nakweminye imisebenzi yasekhaya, ukuze ikhaya lethu licoceke. Le meko inzima kakhulu yayiza kuqhubeka iminyaka engama-30 elandelayo.
Inzondelelo Phezu Kwako Nje Ukugula
Mna nabanye sasichukumiseka ukuphawula ukuba akukho nto enokuthomalalisa uthando lomfazi wam ngoYehova nenzondelelo yakhe ngenkonzo yakhe. Ekuhambeni kwexesha, nokwenza umgudu ngokuzingisileyo, uEleni wakwazi ukuthetha amazwi ambalwa. Wayethanda ukuya ebantwini esitratweni athethe ngeendaba ezilungileyo eziseBhayibhileni. Xa ndandihambela ezoshishino, ndandihamba naye ndize ndimise inqwelo-mafutha kwindawo ephithizelayo. Wayevula ifestile yenqwelo-mafutha aze anike abantu imibhalo yeMboniselo noVukani! Ngesinye isihlandlo, wahambisa imibhalo engama-80 ngeeyure ezimbini. Ngokufuthi wayesebenzisa onke amaphephancwadi amadala asebandleni. UEleni wayeba nenxaxheba ngokuthe rhoqo nakwezinye iindlela zokushumayela.
Ebudeni bayo yonke iminyaka umfazi wam ongumlwelwe, wayesoloko enam kwiintlanganiso. Akazange aphose nanye indibano, nangona kwakufuneka siye kwelinye ilizwe ngenxa yokutshutshiswa kwamaNgqina kaYehova eGrisi. Phezu kwazo nje iimeko zakhe ezazimenza angakwazi ukwenza yonk’ into, wakuvuyela ukuya kwiindibano eOstriya, eJamani, eCyprus nakwamanye amazwe. UEleni akazange akhalaze okanye afune ingqalelo eninzi, naxa iimbopheleleko ezandayo kwinkonzo kaYehova zazisenza izinto zingahambi lula kuye maxa wambi.
Kum, le meko yandinika imfundiso eyathabatha ixesha yokuba ndinyamezele yaye ndizingise. Ngamaxesha amaninzi uYehova wayendinceda. Abazalwana noodade babezincama kakhulu ukuze basincede nangayiphi na indlela ababenokukwazi ngayo, yaye oogqirha basixhasa ngobubele. Ebudeni bayo yonke loo minyaka inzima, asizange siswele nto, nangona iimeko zethu ezinzima zenza kwaba nzima ukuba ndisebenze ngokusisigxina. Izilangazelelo zikaYehova nenkonzo zazisoloko zisiza kuqala.—Mateyu 6:33.
Abaninzi baye basibuza ngento eyayisomeleza ebudeni baloo maxesha anzima. Njengoko ndikhangela emva, ndiyaqonda ukuba ufundisiso lobuqu lweBhayibhile, ukuthandaza kuThixo ngokusuka entliziyweni, ukuya rhoqo kwiintlanganiso zamaKristu nokuba nenxaxheba ngenzondelelo kumsebenzi wokushumayela kwasomeleza ukuze sinyamezele yaye sizingise. Sasisoloko sikhunjuzwa ngamazwi akhuthazayo akwiNdumiso 37:3-5 athi: “Kholosa ngoYehova wenze okulungileyo; . . . Ziyolise ngokugqibeleleyo ngoYehova . . . Yiqengqele kuYehova indlela yakho, uze uthembele ngaye, kwaye yena uya kwenza.” Enye indinyana eyayixabisekile kuthi yayiyiNdumiso 55:22 ethi: “Umthwalo wakho wulahlele kuYehova, yaye yena wokuxhasa.” Njengonyana omthembe ngokupheleleyo uyise, asizange silahlele imithwalo yethu kuYehova nje kuphela, kodwa sasiyishiya kuye.—Yakobi 1:6.
NgoAprili 12, 1987, ngoxa umfazi wam wayeshumayela phambi kwekhaya lethu, ucango olunzima lwentsimbi lwavaleka, lwaza lwambetha lwamphosa ecaleni kwendlela, lwaza lwamonzakalisa kakhulu. Ngenxa yoko, akazange abe sezingqondweni iminyaka emithathu elandelayo. Wafa ekuqaleni kowe-1990.
Ukukhonza UYehova Ngamandla Am Onke
Ngowe-1960, ndamiselwa ukukhonza njengesicaka sebandla eNikaia, ePiraiévs. Ukususela ngoko, ndaba nelungelo lokukhonza kwiqela lamanye amabandla ePiraiévs. Nangona ndingazange ndibe nabantwana abangabam, ndiye ndakuvuyela ukunceda abantwana bam bokomoya baqine enyanisweni. Ngoku abanye babo bakhonza njengabadala bamabandla, izicaka zolungiselelo, abalungiseleli abangoovulindlela namalungu entsapho yaseBheteli.
Emva kokuba ulawulo lwedemokrasi lubuyiselwe eGrisi ngowe-1975, amaNgqina kaYehova akwazi ukuba neendibano zawo ngokukhululekileyo, kungekho mfuneko yakuzimela emahlathini kwakhona. Amava awafunyanwa ngabanye bethu ngoxa belungiselela iindibano kwelinye ilizwe ngoku aluncedo gqitha. Ngaloo ndlela, ndakuvuyela ukuba nelungelo lokukhonza kwiikomiti ezahlukahlukeneyo zendibano kangangeminyaka emininzi.
Kwandula ke, ngowe-1979, kwenziwa amalungiselelo okwakha iHolo yeNdibano yokuqala eGrisi, emaphandleni aseAthens. Ndabelwa ukuba ndilungiselele yaye ndinyamekele lo msebenzi mkhulu wolwakhiwo. Lo msebenzi wawufuna unyamezelo nokuzingisa. Ukusebenza iminyaka emithathu nabazalwana noodade abaninzi abanomoya wokuzincama kwasenza sathandana saza samanyana ngokwenene. Oko ndikukhumbulayo kulo msebenzi kuya kuhlala kusentliziyweni yam.
Ukwanelisa Iintswelo Zokomoya Zamabanjwa
Kwiminyaka embalwa kamva, kwavuleka ithuba elitsha. Kufuphi nentsimi yebandla lethu, eKorydallos, kukho enye yeentolongo ezinkulu zaseGrisi. Ukususela ngoAprili 1991, ndabelwa ukuba ndityelele le ntolongo veki nganye njengomlungiseleli wamaNgqina kaYehova. Apho ndiyavunyelwa ukuba ndiqhube izifundo zeBhayibhile neentlanganiso zamaKristu namabanjwa anomdla. Amaninzi kuwo aye enza iinguqu, oko kunikela ubungqina bamandla angummangaliso eLizwi likaThixo. (Hebhere 4:12) Oku kuye kwabachukumisa abantu abasebenza entolongweni namanye amabanjwa. Amanye amabanjwa endiye ndafundisisa nawo iBhayibhile aye akhululwa yaye ngoku angabavakalisi beendaba ezilungileyo.
Kangangexesha elithile ndaye ndafunda nabantu abathathu abadume kakubi ngokuthengisa iziyobisi. Njengoko babesenza inkqubela ngokomoya, babesiza kwisifundo sabo seBhayibhile bechebe iindevu, iinwele zikanywe kakuhle, yaye benxibe ihempe neqhina phakathi kuAgasti—enye yezona nyanga zishushu kakhulu eGrisi! Umphathi wentolongo, umphathi wamabanjwa, nabanye abasebenzi baya bethontelana kwiiofisi zabo beze kubona lo mmangaliso. Babengakukholelwa oko babekubona!
Amanye amava akhuthazayo enzeka kwicala lentolongo lamabhinqa. Kwaqaliswa isifundo seBhayibhile nebhinqa elaligwetyelwe ukuhlala apho lide life ngenxa yokubulala. Lalisaziwa ngokuvukela. Noko ke, inyaniso yeBhayibhile elaliyifunda yenza iinguqu eziphawulekayo kangangokuba abaninzi bathi lalinjengengonyama eguquke yayimvana! (Isaya 11:6, 7) Ngokukhawuleza lahlonelwa laza lathenjwa ngumphathi wentolongo. Ndavuya ndakulibona lisenza inkqubela entle yokomoya laza lafikelela ekubeni lizahlulele kuYehova.
Ukunceda Abagulayo Nabalupheleyo
Ukubona umfazi wam egula ixesha elide kwandenza ndakwazi ukuziqonda ngakumbi iintswelo zabagulayo nabalupheleyo abaphakathi kwethu. Ngalo lonke ixesha iimpapasho zethu ziba namanqaku akhuthaza ukuba senze umgudu wokubanceda ngothando abantu abanjalo, ndandiba nomdla koko. Ndandiwaxabisa ndize ndiwagcine amanqaku anjalo. Emva kweminyaka eliqela, ndiye ndaqokelela ifayile enamaphepha angaphezu kwekhulu—eqala ngenqaku elithi “Ukunikela Ingqalelo Kwabalupheleyo Nabagulayo,” elikwinkupho yeMboniselo yesiNgesi kaJulayi 15, 1962. Uninzi lwala manqaku abonisa ukuba kuyingenelo kwibandla ngalinye ukunikela uncedo kwabo bagulayo nabalupheleyo.—1 Yohane 3:17, 18.
Abadala balungiselela iqela labazalwana noodade abazenza bafumaneka ukuze banyamekele iintswelo zabagulayo nabalupheleyo ebandleni lethu. Salungiselela amatsha-ntliziyo angamaqela awahlukahlukeneyo—njenganokunceda ebudeni bemini, amanye ancede ebusuku, lawo ayenokunceda ngezithuthi zawo nalawo ayenokufumaneka nanini na efuneka. La amva yayingabazalwana ababekulungele ukunceda ngokukhawuleza nanini na xa kuyimfuneko.
Imiphumo yemigudu enjalo iye yaba yekhuthazayo. Ngokomzekelo, ngesinye isihlandlo omnye udade ogulayo owayehlala yedwa nowayetyelelwa rhoqo wafunyanwa elele phantsi engekho zingqondweni. Saxelela udade owayehlala kufuphi nowayenenqwelo-mafutha. Engaphozisanga maseko wambalekisa kwisibhedlele esikufuphi ngemizuzu nje embalwa—imizuzu elishumi kuphela! Oogqirha bathi oku kwabusindisa ubomi bakhe.
Kuyanelisa ukuva indlela abanombulelo ngayo abagulayo nabalupheleyo kweli qela. Kuyachukumisa ukwazi ukuba sinethemba lokuphila naba bazalwana noodade kwinkqubo kaThixo entsha phantsi kweemeko ezahlukileyo. Yaye nokwazi ukuba baye bancedwa banyamezela ngenxa yenkxaso abayifumanayo ebudeni bokubandezeleka kwabo kungomnye umvuzo.
Ukuzingisa Kuye Kwazisa Imivuzo
Ngoku ndikhonza njengomdala kwelinye lamabandla asePiraiévs. Phezu kwako nje ukwaluphala neengxaki zempilo, ndiyavuya kuba ndisakwazi ukuba nesabelo ngokukhutheleyo kwimisebenzi yebandla.
Ukutyhubela iminyaka, ukuba phantsi kweemeko ezinzima, ucelomngeni olunzima, iimeko ezingalindelekanga kuye kwandenza ndanenyameko egqithiseleyo nenzondelelo. Sekunjalo, uYehova ubesoloko endinika amandla endiwafunayo ukuze ndeyise ezi ngxaki. Kaninzi, ndiye ndabona ukuchana kwamazwi omdumisi athi: “Xa ndithe: ‘Ngokuqinisekileyo unyawo lwam luya kutyibilika,’ ububele bakho bothando, Yehova, buqhubeka bundixhasa. Xa iingcamango zam eziphazamisayo zaba ninzi ngaphakathi kwam, intuthuzelo yakho yaqalisa ukuthuthuzela umphefumlo wam.”—INdumiso 94:18, 19.
[Umfanekiso okwiphepha 25]
Ndinomfazi wam, uEleni, emva kotyando lwesibini, ngowe-1957
[Umfanekiso okwiphepha 26]
Kwindibano eNuremberg, eJamani, ngowe-1969
[Umfanekiso okwiphepha 28]
Iqela labazalwana noodade ababenceda abagulayo nabalupheleyo