UKristu Ukhokela Ibandla Lakhe
“Khangelani! ndinani yonke imihla de kube sekuphelisweni kwenkqubo yezinto.”—MATEYU 28:20.
1, 2. (a) Xa wayenikela umyalelo wokwenza abafundi, uYesu ovusiweyo wabathembisa ntoni abalandeli bakhe? (b) UYesu walikhokela njani ibandla lokuqala lamaKristu?
NGAPHAMBI kokuba anyukele ezulwini, uYesu Kristu, iNkokeli yethu evusiweyo, wazibonakalisa kubafundi bakhe waza wathi: “Linikwe mna lonke igunya ezulwini nasemhlabeni. Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona. Yaye, khangelani! ndinani yonke imihla de kube sekuphelisweni kwenkqubo yezinto.”—Mateyu 23:10; 28:18-20.
2 UYesu akazange anele nje kukunika abafundi bakhe isabelo sokwenza umsebenzi osindisa ubomi wokwenza abafundi abangakumbi, kodwa wabathembisa nokuba uya kuba nabo. Imbali yamaKristu okuqala, njengoko ibhalwe kwincwadi yeBhayibhile yeZenzo, ingqina ukuba uKristu wasebenzisa igunya alinikiweyo lokuba akhokele ibandla elalisandul’ ukusekwa. Wathumela “umncedi” owayethenjisiwe—umoya oyingcwele—ukuba womeleze abalandeli bakhe nokuze ubakhokele kwimigudu yabo. (Yohane 16:7; IZenzo 2:4, 33; 13:2-4; 16:6-10) UYesu ovusiweyo wasebenzisa iingelosi ukuxhasa abalandeli bakhe. (IZenzo 5:19; 8:26; 10:3-8, 22; 12:7-11; 27:23, 24; 1 Petros 3:22) Ngaphezu koko, iNkokeli yethu yanikela ulwalathiso ebandleni ngokulungiselela amadoda afanelekayo ukuba akhonze njengequmrhu elilawulayo.—IZenzo 1:20, 24-26; 6:1-6; 8:5, 14-17.
3. Yiyiphi imibuzo eza kuxutyushwa kweli nqaku?
3 Noko ke, kuthekani ngexesha lethu ‘lokupheliswa kwenkqubo yezinto’? UYesu Kristu ulikhokela njani ibandla lamaKristu namhlanje? Yaye sinokubonisa njani ukuba siyalwamkela ukhokelo lwakhe?
INkosi Inekhoboka Elithembekileyo
4. (a) Liyilwa ngoobani “ikhoboka elithembekileyo neliyingqondi”? (b) INkosi ilithume ukuba linyamekele ntoni ikhoboka?
4 Xa wayeprofeta ngomqondiso wobukho bakhe, uYesu wathi: “Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo? Linoyolo elo khoboka ukuba inkosi yalo yakufika ilifumana lisenjenjalo! Inene ndithi kuni, Iya kulimisela phezu kwayo yonke impahla yayo.” (Mateyu 24:45-47) “Inkosi” yiNkokeli yethu, uYesu Kristu, yaye iye yamisela “ikhoboka elithembekileyo neliyingqondi”—iqumrhu lamaKristu athanjisiweyo asemhlabeni—ukuze linyamekele zonke izilangazelelo zakhe emhlabeni.
5, 6. (a) Kumbono owabonwa ngumpostile uYohane, zifanekisela ntoni ‘iziphatho zezibane zegolide ezisixhenxe’ ‘neenkwenkwezi ezisixhenxe’? (b) Isibakala sokuba ‘iinkwenkwezi ezisixhenxe’ zikwisandla sasekunene sikaYesu sibonisa ntoni?
5 Incwadi yeBhayibhile yeSityhilelo ibonisa ukuba ikhoboka elithembekileyo neliyingqondi lilawulwa ngokuthe ngqo nguYesu Kristu. Kumbono ‘wemini yeNkosi,’ umpostile uYohane wabona “iziphatho zezibane zegolide ezisixhenxe, naphakathi kweziphatho zezibane uthile onjengonyana womntu,” ophethe ‘esandleni sakhe sasekunene iinkwenkwezi ezisixhenxe.’ Ecacisa lo mbono kuYohane, uYesu wathi: “Yona ke imfihlelo engcwele yeenkwenkwezi ezisixhenxe owazibonayo esandleni sam sasekunene, neyeziphatho zezibane zegolide ezisixhenxe yile: Iinkwenkwezi ezisixhenxe zithetha iingelosi zamabandla asixhenxe, yaye iziphatho zezibane ezisixhenxe zithetha amabandla asixhenxe.”—ISityhilelo 1:1, 10-20.
6 ‘Iziphatho zezibane zegolide ezisixhenxe’ zifanekisela onke amabandla amaKristu okwenyaniso akhoyo ‘ngemini yeNkosi,’ eyaqala ngowe-1914. Kodwa kuthekani ‘ngeenkwenkwezi ezisixhenxe’? Ekuqaleni, zazifuzisela bonke abaveleli abazelwe ngomoya, nabathanjisiweyo ababenyamekela amabandla ngenkulungwane yokuqala.a Aba baveleli babekwisandla sokunene sikaYesu—phantsi kolawulo nolwalathiso lwakhe. Ewe, uKristu Yesu wayekhokela onke amalungu ayila udidi lwekhoboka. Noko ke, ngoku abaveleli abathanjisiweyo bambalwa gqitha. Ukhokelo lukaKristu lufikelela njani kumabandla angama-93 000 amaNgqina kaYehova emhlabeni wonke?
7. (a) UYesu ulisebenzisa njani iQumrhu Elilawulayo ukunikela ukhokelo emabandleni emhlabeni wonke? (b) Kutheni kunokuthiwa abaveleli abangamaKristu bamiselwa ngumoya oyingcwele?
7 Njengakwinkulungwane yokuqala, iqela elincinane lamadoda afanelekayo phakathi kwabaveleli abathanjisiweyo ngoku likhonza njengeQumrhu Elilawulayo, limela ikhoboka elithembekileyo neliyingqondi. INkokeli yethu isebenzisa eli Qumrhu Lilawulayo ukumisela amadoda afanelekayo—enoba athanjiswe ngomoya okanye akunjalo—njengabadala kumabandla asekuhlaleni. Ngokuphathelele oku, umoya oyingcwele, uYehova aye wanika uYesu igunya lokuwusebenzisa, ubaluleke kakhulu. (IZenzo 2:32, 33) Okokuqala, aba baveleli bamele bafikelele imilinganiselo echazwe kwiLizwi likaThixo, eliphefumlelwe ngomoya oyingcwele. (1 Timoti 3:1-7; Tito 1:5-9; 2 Petros 1:20, 21) Banconyelwa baze bamiselwe emva kokuba kwenziwe umthandazo kuze kulandelwe ukhokelo lomoya oyingcwele. Ngaphezu koko, abo bantu bamiselweyo bamele bavelise isiqhamo salo moya. (Galati 5:22, 23) Ngoko ke, isiluleko sikaPawulos sisebenza ngendlela efanayo kubo bonke abadala, enoba bathanjisiwe okanye akunjalo: “Zilumkeleni nina nawo wonke umhlambi, ekuthe phakathi kwawo umoya oyingcwele wanimisela nangabaveleli.” (IZenzo 20:28) La madoda amiselweyo afumana ulwalathiso oluvela kwiQumrhu Elilawulayo yaye alusa ibandla ngokuzithandela. Ngale ndlela, uKristu unathi ngoku yaye ukhokela ibandla.
8. UKristu uzisebenzisa njani iingelosi ekwalathiseni abalandeli bakhe?
8 UYesu usebenzisa neengelosi zokoqobo ukukhokela abalandeli bakhe namhlanje. Ngokuvisisana nomzekeliso wengqolowa nokhula, ixesha lokuvuna laliza kufika “ekuphelisweni kwenkqubo yezinto.” INkosi yayiza kusebenzisa bani ukuvuna? UKristu wathi: “Abavuni ziingelosi.” Wongezelela esithi: “UNyana womntu uya kuthumela iingelosi zakhe, ziqokelele zikhuphe ebukumkanini bakhe zonke izikhubekiso nabantu abenza okuchasene nomthetho.” (Mateyu 13:37-41) Ngaphezu koko, njengoko ingelosi yalathisa uFilipu ukuze afumane ithenwa elingumTiyopiya, ngoko kukho ubungqina obuninzi bokuba uKristu usebenzisa iingelosi zakhe ukuze alathise umsebenzi wamaKristu okwenyaniso ekufumaneni abantliziyo zinyanisekileyo.—IZenzo 8:26, 27; ISityhilelo 14:6.
9. (a) UKristu ulikhokela njani ibandla lamaKristu namhlanje? (b) Nguwuphi umbuzo esifanele siwuqwalasele ukuba sifuna ukungenelwa kukhokelo lukaKristu?
9 Hayi indlela ekomeleza ngayo ukwazi ukuba uYesu Kristu ukhokela abalandeli bakhe namhlanje esebenzisa iQumrhu Elilawulayo, umoya oyingcwele neengelosi! Nokuba abanquli bakaYehova bebenokwahlukaniswa okwethutyana neQumrhu Elilawulayo ngenxa yentshutshiso okanye ezinye izizathu ezinjalo, uKristu ebeya kubakhokela ngomoya oyingcwele nangeengelosi. Noko ke, singenelwa kukhokelo lwakhe kuphela xa silwamkela. Sinokubonisa njani ukuba siyalwamkela ukhokelo lukaKristu?
“Bathobeleni . . . Nibalulamele”
10. Sinokulubonakalisa njani uxabiso ngabadala bebandla abamiselweyo?
10 INkokeli yethu iye yanika amabandla “izipho ezingabantu”—‘bambi ngabavangeli, bambi ngabalusi nabafundisi.’ (Efese 4:8, 11, 12) Isimo sethu sengqondo nezenzo zethu zibonisa ngokucacileyo enoba siyalwamkela kusini na ukhokelo lukaKristu. Simele ‘sibe nombulelo’ ngamadoda afanelekileyo ngokomoya aye wasinika wona uKristu. (Kolose 3:15) Nawo ayifanele intlonelo yethu. Umpostile uPawulos wabhala: “Amadoda amakhulu awongamela ngendlela entle makabalelwe ekuthini afanelwe yimbeko ephindiweyo.” (1 Timoti 5:17) Sinokuwubonisa njani umbulelo noxabiso ngamadoda amakhulu—abadala, okanye abaveleli—bebandla? UPawulos uyaphendula: “Bathobeleni abo bakhokelayo phakathi kwenu nize nibalulamele.” (Hebhere 13:17) Ewe, sifanele sibathobele yaye sibalulamele.
11. Kutheni ukuhlonela ilungiselelo labadala kungumbandela wokuphila ngokuvisisana nobhaptizo lwethu?
11 INkokeli yethu ifezekile. Amadoda esinike wona njengezipho akafezekanga. Ngoko anokwenza iziphoso maxa wambi. Sekunjalo, kubalulekile ukuba sihlale sithembekile kwilungiselelo likaKristu. Enyanisweni, ukuphila ngokuvisisana nozahlulelo nobhaptizo lwethu kuthetha ukuba siyawamkela umthetho wegunya elimiselwe ngomoya ebandleni size sizithobe kulo. Ukubhaptizwa kwethu ‘egameni lomoya oyingcwele’ sisibhengezo sasekuhleni sokuba siyawamkela umoya oyingcwele yaye siyayiqonda indima onayo kwiinjongo zikaYehova. (Mateyu 28:19) Ubhaptizo olunjalo lubonisa ukuba siyasebenzisana nomoya yaye siyakuphepha ukwenza nantoni na ephazamisa indlela osebenza ngayo phakathi kwabalandeli bakaKristu. Ekubeni umoya oyingcwele unendima ebalulekileyo ekuncomeleni nasekumiselweni kwabadala, ngaba sinokuba sithembeke ngokwenene kuzahlulelo lwethu ukuba asisebenzisani nelungiselelo labadala ebandleni?
12. UYude ucaphula yiphi imizekelo ngokuphathelele ukungalihloneli igunya, yaye isifundisa ntoni?
12 IZibhalo ziqulethe imizekelo esifundisa ukubaluleka kwentobelo. Ebhekisela kwabo babethetha kakubi ngamadoda amiselweyo ebandleni, umfundi uYude walumkisa ngemizekelo emithathu, esithi: “Yeha ke bona, ngenxa yokuba baye bahamba ngomendo kaKayin, yaye baye bagxalathelana ukuya kwikhondo lesiphoso sikaBhileham ngenxa yomvuzo, yaye baye batshabalala kwintetho yemvukelo kaKora!” (Yude 11) UKayin wasityeshela isiluleko sikaYehova sothando waza wakhetha ukufukama intiyo eyakhokelela ekubulaleni. (Genesis 4:4-8) Nangona walunyukiswa ngokuphindaphindiweyo nguThixo, uBhileham wazama ukuqalekisa abantu bakaThixo ngenxa yomvuzo wemali. (Numeri 22:5-28, 32-34; Duteronomi 23:5) UKora wayenembopheleleko enkulu kwaSirayeli, kodwa akazange anele koko. Wavukela umkhonzi kaThixo uMoses, eyona ndoda yayilulamile emhlabeni. (Numeri 12:3; 16:1-3, 32, 33) UKayin, uBhileham noKora bahlelwa yintlekele. Hayi indlela le mizekelo esifundisa ngokucace ngayo ukuba sisiphulaphule isiluleko sabo baphathiswe imbopheleleko nguYehova size sibahlonele!
13. Ziziphi iingenelo ezaxelwa kwangaphambili nguIsaya ezaziya kufunyanwa ngabo bathobela ilungiselelo labadala?
13 Ngubani obengayi kufuna ukungenelwa kwilungiselelo elizukileyo lokongamela, elo iNkokeli yethu eye yalimisela ebandleni lamaKristu? Umprofeti uIsaya waxela kwangaphambili iingenelo zalo, esithi: “Khangela! Ukumkani uya kulawula ngobulungisa; zona iinkosana, ziya kulawula njengeenkosana zokusesikweni. Kwaye ngamnye uya kuba njengendawo yokuzimela umoya nendawo yokuzifihla esiphangweni, abe njengemisinga yamanzi kwilizwe elingumqwebedu, nanjengomthunzi wengxondorha enkulu kwilizwe elibharhileyo.” (Isaya 32:1, 2) Ngamnye wabadala ufanele abe “njengendawo” yenkuselo. Kwanokuba sikufumanisa kunzima kangakanani na ukuthobela igunya, masizimisele ukuthobela nokululamela igunya elimiselwe nguThixo ebandleni.
Indlela Abadala Abazithoba Ngayo Kukhokelo LukaKristu
14, 15. Abo bakhokelayo ebandleni babonisa njani ukuba bayazithoba kukhokelo lukaKristu?
14 MKristu ngamnye—ingakumbi abadala—umele alandele ukhokelo lukaKristu. Abaveleli, okanye abadala, banomlinganiselo othile wegunya ebandleni. Kodwa abafanele bafune ukuba ‘ziinkosi phezu kokholo lwabakholwa kunye nabo’ ngokuzama ukulawula ubomi babo. (2 Korinte 1:24) Abadala bathobela amazwi kaYesu athi: “Niyazi ukuba abalawuli beentlanga baba ziinkosi phezu kwazo yaye abo bazizikhulu basebenzisa igunya phezu kwazo. Makungabi njalo phakathi kwenu.” (Mateyu 20:25-27) Njengoko abadala bephumeza imbopheleleko yabo, bazama ngokunyanisekileyo ukukhonza abanye.
15 AmaKristu ayabongozwa: “Bakhumbuleni abo bakhokelayo phakathi kwenu, . . . yaye njengoko nisondela impumelelo yehambo yabo xelisani ukholo lwabo.” (Hebhere 13:7) Oku akubangelwa kukuba abadala beziinkokeli. UYesu wathi: “Inye iNkokeli yenu, uKristu.” (Mateyu 23:10) Lukholo lwabadala olumelwe luxeliswe kuba bexelisa iNkokeli yethu yokwenene, uKristu. (1 Korinte 11:1) Khawuqwalasele ezinye iindlela abadala abazabalazela ngazo ukuba njengoKristu kulwalamano lwabo nabanye ebandleni.
16. Nakuba uYesu wayenegunya, wayebaphatha njani abalandeli bakhe?
16 Nakuba uYesu wayebalasele ngazo zonke iindlela kunabantu abangafezekanga yaye enegunya elingenakuthelekiswa nanto elivela kuYise, wayebaphatha ngesidima abafundi bakhe. Akazange abadide abaphulaphuli bakhe eqhayisa ngolwazi analo. UYesu wayebonakalisa uvelwano nemfesane kubalandeli bakhe, ecingela iimfuno zabo. (Mateyu 15:32; 26:40, 41; Marko 6:31) Wayengafuni okungaphezu koko abalandeli bakhe babenokukwenza, yaye wayengabaniki umthwalo ababengenamandla okuwuthwala. (Yohane 16:12) UYesu ‘wayenomoya wobulali yaye ethobekile ngentliziyo.’ Ngoko ke, akumangalisi ukuba abaninzi bamfumanisa ehlaziya.—Mateyu 11:28-30.
17. Abadala bafanele bakubonakalise njani ukuthozama okunjengokukaKristu kulwalamano lwabo nabanye ebandleni?
17 Ukuba uKristu iNkokeli yabonakalisa ukuthozama, kubeka phi ke kwabo bakhokelayo ebandleni! Ewe, bafanele bakulumkele ukulisebenzisa kakubi naliphi na igunya abalinikiweyo. Yaye ‘abagqithiseli ngentetho,’ bezama ukucel’ injezu kwabanye. (1 Korinte 2:1, 2) Kunoko, bazama ukuthetha amazwi enyaniso yeZibhalo ngokulula nangokunyaniseka. Ngaphezu koko, abadala bazama ukuba ngabasengqiqweni koko bakulindele kwabanye nokuba nolwazelelelo ngeentswelo zabo. (Filipi 4:5) Bekuqonda ukuba wonke umntu uneentsilelo, ngothando bahlala bekucinga oku kwiinkqubano zabo nabazalwana babo. (1 Petros 4:8) Yaye ngaba abadala abathobekileyo nabanobulali abahlaziyi? Eneneni bayahlaziya.
18. Abadala banokufunda ntoni kwindlela uYesu awayebaphatha ngayo abantwana?
18 UYesu wayengeneka, nakwabancinane. Cinga ngendlela awasabela ngayo xa abafundi bakhe bakhalimela abantu ‘ngokuzisa abantwana abaselula.’ UYesu wathi: “Bayekeni abantwana abaselula beze kum; ningabaleli.” Wandula ke “wabawola aba bantwana waza wabasikelela, ebabeka izandla.” (Marko 10:13-16) UYesu wayenobubele, yaye abanye babetsaleleka kuye. Abantu babengamoyiki uYesu. Nabantwana babekhululeka xa ekho. Nabadala bayangeneka, yaye njengoko bebonakalisa uthando olufudumeleyo nobubele, abanye—kwanabantwana—bayakhululeka kubo.
19. Kuquka ntoni ukuba ‘nengqondo kaKristu,’ yaye oku kufuna wuphi umgudu?
19 Abadala banokumxelisa uKristu Yesu ngokomkhamo abamazi ngawo. UPawulos wabuza: “Ngubani na oyaziyo ingqondo kaYehova, ukuze amyalele?” Wandula ke wongezelela esithi: “Kodwa sinayo ingqondo kaKristu.” (1 Korinte 2:16) Ukuba nengqondo kaKristu kuquka ukwazi indlela acinga ngayo nazo zonke iinkalo zobuntu bakhe ukuze sazi oko ebeya kukwenza kwimeko ethile. Khawuzithelekelele uyazi kakuhle kangako iNkokeli yethu! Ewe, kufuneka sinikele ingqalelo kwiingxelo zeVangeli size sizalise iingqondo zethu ngokuthe rhoqo ngolwazi oluphathelele ubomi bukaYesu nomzekelo wakhe. Xa abadala bezabalazela ukulandela ukhokelo lukaKristu ukusa kuloo mkhamo, abo basebandleni batyekela ekuxeliseni ukholo lwabo. Yaye abadala bayaneliseka kukubona abanye belandela ngovuyo emanyathelweni eNkokeli.
Qhubeka Uthobela Ukhokelo LukaKristu
20, 21. Njengoko sikhangele phambili kwihlabathi elitsha elithenjisiweyo, simele sizimisele ukwenza ntoni?
20 Kubalulekile ukuba sonke sihlale sizithoba kukhokelo lukaKristu. Njengoko sisondela esiphelweni sale nkqubo yezinto, imeko yethu ifana naleyo yamaSirayeli kumaThafa akwaMowabhi ngowe-1473 B.C.E. Ayesemnyango weLizwe Lesithembiso, yaye esebenzisa umprofeti uMoses, uThixo wathi: “Nguwe [Yoshuwa] oya kungenisa esi sizwana kulo ilizwe awafungayo uYehova kookhokho bakho ukuba wobanika lona.” (Duteronomi 31:7, 8) UYoshuwa wayemiselwe njengenkokeli. Ukuze angene kwiLizwe Lesithembiso, amaSirayeli ayefanele azithobe kukhokelo lukaYoshuwa.
21 IBhayibhile ithi kuthi: “Inye iNkokeli yenu, uKristu.” NguKristu kuphela oya kusikhokelela kwihlabathi elitsha elithenjisiweyo apho kumi ubulungisa. (2 Petros 3:13) Ngoko ke masizimisele ukuzithoba kukhokelo lwakhe kuzo zonke iinkalo zobomi.
[Umbhalo osemazantsi]
a Apha ‘iinkwenkwezi’ azifuziseli iingelosi zokoqobo. Ngokuqinisekileyo, uYesu ebengayi kusebenzisa umntu ukuze abhalele izidalwa zokomoya ingxelo. Ngoko ke ‘iinkwenkwezi’ zimele ukuba zifanekisela abaveleli okanye abadala abangabantu emabandleni, abagqalwa njengabathunywa bakaYesu. Inani elisisixhenxe limela ukuphelela ngokwemilinganiselo kaThixo.
Ngaba Usakhumbula?
• UKristu walikhokela njani ibandla lokuqala?
• UKristu ulikhokela njani ibandla lakhe namhlanje?
• Kutheni sifanele sizithobe kwabo bakhokelayo ebandleni?
• Abadala banokubonakalisa ngaziphi iindlela ukuba uKristu uyiNkokeli yabo?
[Umfanekiso okwiphepha 15]
UKristu ukhokela ibandla lakhe yaye esandleni sakhe sasekunene unabaveleli
[Imifanekiso ekwiphepha 16]
“Bathobeleni abo bakhokelayo phakathi kwenu nize nibalulamele”
[Umfanekiso okwiphepha 18]
UYesu wayenobubele yaye engeneka. Abadala abangamaKristu bazabalazela ukuba njengaye