Imibuzo Evela Kubafundi
Ngaba ukungafezeki kwentombi enyulu enguMariya kwabangela ukuphazamiseka okuthile ekukhawulweni kukaYesu?
Ngokuphathelele “ukuzalwa kukaYesu,” ingxelo ephefumlelweyo ithi: “Ngoxa unina uMariya wayethembisene ngomtshato noYosefu, wafunyanwa emithi ngomoya oyingcwele ngaphambi kokuba bamanyane.” (Mateyu 1:18) Eneneni, umoya oyingcwele kaThixo waba nendima ebalulekileyo ekukhulelweni kukaMariya.
Noko ke, kuthekani ngoMariya? Ngaba kukho indima elaba nayo iqanda lakhe ekukhulelweni kwakhe? Xa siqwalasela izithembiso zikaThixo awazenza kuAbraham, uIsake, uYakobi, uYuda noKumkani uDavide—ookhokho bakaMariya—loo mntwana wayeza kuzalwa kwakuza kufuneka abe yinzala yabo yokwenene. (Genesis 22:18; 26:24; 28:10-14; 49:10; 2 Samuweli 7:16) Yiyiphi enye indlela umntwana kaMariya ebenokuba yindlalifa efanelekileyo ngayo ngokuvisisana nezithembiso ezenziwa nguThixo? Kwakuza kufuneka abe ngunyana wakhe wokwenene.—Luka 3:23-34.
Ingelosi kaYehova yabonakala kwintombi enyulu enguMariya, isithi: “Musa ukoyika, Mariya, kuba ukholekile kuThixo; yaye, khangela! uya kukhawula esibelekweni sakho uze uzale unyana, umbize ngokuba nguYesu igama lakhe.” (Luka 1:30, 31) Ukuze ubani akhawule kufuneka iqanda lakhe likulungele ukuvelisa inzala. Kuyabonakala ukuba, uYehova uThixo walenza lachuma iqanda elalisesibelekweni sikaMariya, yaye wakwenza oku ngokufudusa ubomi boNyana wakhe okuphela kwamzeleyo kummandla wokomoya wabuzisa emhlabeni.—Galati 4:4.
Ngaba umntwana owayekhawulwe ngale ndlela libhinqa elingafezekanga, wayenokufezeka aze abe sisidalwa esingenasono? Inokusebenza njani imizila yemfuza apho kudityaniswe imfezeko nokungafezeki? Khumbula ukuba, kwasetyenziswa umoya oyingcwele ukufudusa amandla obomi obufezekileyo ukuze kukhawulwe uNyana kaThixo. Oko kwakuphelisa konke ukungafezeki okwakuseqandeni likaMariya, laza ngaloo ndlela lavelisa imizila yemfuza efezekileyo.
Enoba kuyintoni na, sinokuqiniseka ukuba ukusebenza komoya oyingcwele kaThixo ngelo xesha kwaqinisekisa ukuba injongo kaThixo iyaphumelela. Ingelosi egama linguGabriyeli yathi kuMariya: “Umoya oyingcwele uya kukufikela, namandla Oyena Uphakamileyo aya kukusibekela. Ngenxa yeso sizathu kwanoko kuzalwayo kuya kubizwa ngokuba kungcwele, uNyana kaThixo.” (Luka 1:35) Ewe, ngokungathi kunjalo, umoya oyingcwele kaThixo wayila udonga olukhuselayo ukuze kungabikho kungafezeki okanye siphako esasinokudyobha imveku engekazalwa ukususela ekukhawulweni kwayo.
Ngokucacileyo, ubomi bukaYesu obufezekileyo babakho ngenxa kaYise osemazulwini, kungekhona ngenxa yomntu. UYehova ‘wamlungiselela umzimba,’ yaye uYesu—ukususela ekukhawulweni kwakhe—ngokwenene, ‘wayengadyobhekanga, wayahluliwe kuboni.’—Hebhere 7:26; 10:5.
[Umfanekiso okwiphepha 19]
“Uya kukhawula esibelekweni sakho uze uzale unyana”