Indlela Iziphene Eziya Kupheliswa Ngayo

CINGA nje ngemfama ibona, isithulu sisiva, isimumu sicula ngovuyo, nesiqhwala sikwazi ukuhamba! Apha asithethi ngokuphumelela kwezonyango, kodwa sithetha ngoko kuza kwenzeka xa uThixo ehlangula uluntu. IBhayibhile iyaprofeta: “Ngelo xesha aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco.” (Isaya 35:5, 6) Kodwa sinokuqiniseka njani ukuba esi siprofeto simangalisa ngokwenene siya kuzaliseka?

Okokuqala, xa uYesu Kristu wayesemhlabeni, waphilisa abantu abanezifo ngezifo neziphene. Ngaphezu koko, inkoliso yemimangaliso yakhe yabonwa ngamangqina amaninzi—kwanaziintshaba zakhe. Enyanisweni, ubuncinane isihlandlo esinye, abachasi ababengamkholelwa baphanda ngokucokisekileyo ngokuphilisa kukaYesu ukuze bambek’ amabala. Kodwa hayi indlela abaphoxeka ngayo, xa bawungqina ummangaliso wakhe uyinyaniso. (Yohane 9:1, 5-34) Emva kokuba uYesu enze omnye ummangaliso ongenakukhanyelwa, benomsindo bathi: “Yintoni na emasiyenze, ngenxa yokuba lo mntu wenza imiqondiso emininzi?” (Yohane 11:47) Noko ke, abantu abaqhelekileyo babengaqaqadekanga ngolo hlobo, kuba abaninzi baqalisa ukukholwa kuYesu.—Yohane 2:23; 10:41, 42; 12:9-11.

Imimangaliso KaYesu Yayitshayelela Ukuphiliswa Emhlabeni Wonke

Imimangaliso kaYesu yayingangqini nje kuphela ukuba uYesu unguMesiya nokuba unguNyana kaThixo. Yayinikela isiseko sokholo kwizithembiso zeBhayibhile zokuba abantu abathobelayo baya kuphiliswa kwixesha elizayo. Ezi zithembiso ziquka isiprofeto esikuIsaya isahluko 35, esikhankanywe kwisiqendu sokuqala. UIsaya 33:24 uthi ngempilo yexesha elizayo yabantu aboyika uThixo: “Akakho ummi wakhona oya kuthi: ‘Ndiyagula.’” Ngokufanayo, ISityhilelo 21:4 siyathembisa: “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili [izilingo neembandezelo zanamhlanje] zidlule.”

Abantu basoloko bethandazela ukuzaliseka kwezi ziprofeto xa bephindaphinda umthandazo kaYesu ongumzekelo, othi ngokuyinxalenye: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Ewe, ukuthanda kukaThixo kuchaphazela umhlaba nabantu. Izifo neziphene, nangona zivunyelwe ngenxa yesizathu esithile, kungekudala ziza kuphela; aziyi konakalisa “isihlalo seenyawo” zikaThixo ngonaphakade.—Isaya 66:1.a

Ukuphiliswa Ngaphandle Kweentlungu Okanye Iindleko

Kungakhathaliseki inkxwaleko abantu ababekuyo, uYesu wayebaphilisa ngaphandle kokubavisa iintlungu, engakhange alibazise nangaphandle kweendleko. Ngokuqinisekileyo, zanwenwa ngokukhawuleza iindaba ngoku kwenzekayo, yaye kungekudala “kweza kuye izihlwele ezikhulu, zinabantu ababeqhwalela, izilima, iimfama, izimumu, nabanye abaninzi, zababeka ezinyaweni zakhe, waza wabaphilisa.” Basabela njani abantu? Ingxelo yengqina lokuzibonela uMateyu, iqhubeka isithi: “Isihlwele sathi manga njengoko sasibona izimumu zithetha neziqhwala zihamba neemfama zibona, saza samzukisa uThixo kaSirayeli.”—Mateyu 15:30, 31.

Phawula ukuba uYesu akazange abakhethe kweso sihlwele abo wabaphilisayo—iqhinga elisetyenziswa ngabakhohlisi. Kunoko, izalamane nabahlobo abaninzi babo bagulayo ‘bababeka ezinyaweni zikaYesu, waza wabaphilisa.’ Ngoku makhe sihlolisise eminye imizekelo yamandla kaYesu okuphilisa.

Ubumfama: Ngoxa eseYerusalem, uYesu waphilisa umntu “owayeyimfama kwasekuzalweni.” Lo mntu wayesaziwa kwesi sixeko njengemfama eyayingqiba. Ngoko unokuthelekelela indlela abantu abavuya ngayo nokuxokozela okwakulapho xa bembona ehamba yaye ebona! Sekunjalo, asingabo bonke ababevuya. Ecatshukiswe kukubhencwa nguYesu ngaphambilana, wambi amalungu ehlelo elaziwayo nelidumileyo lamaYuda elibizwa ngokuba ngabaFarisi lalifuna ngamandla ukumbambisa uYesu. (Yohane 8:13, 42-44; 9:1, 6-31) Ngenxa yoko, lancina lo mntu uphilisiweyo, laza kamva laya kubazali bakhe, landula labuyela kuye. Kodwa uphando lwabaFarisi lwawungqina ummangaliso kaYesu uyinyaniso, nto leyo eyabacaphukisayo. Edidekile bububi baba bahanahanisi bonqulo, lo mntu uphilisiweyo wathi: “Kwakudala akuzange kuviwe ukuba nabani na wavula amehlo alowo uzelwe eyimfama. Ukuba lo mntu ebengaveli kuThixo, ebengenakwenza nto konke konke.” (Yohane 9:32, 33) Ngenxa yokuvakalisa ukholo lwakhe ngokunyanisekileyo nangokusengqiqweni, abaFarisi ‘bamkhuphela ngaphandle,’ nto leyo ethetha ukuba bayigxotha le ndoda eyayiyimfama kwindlu yesikhungu.—Yohane 9:22, 34.

Ukungeva: Ngoxa uYesu wayeseDekapoli, kummandla okwimpuma yoMlambo iYordan, abantu “bamzisela isithulu esithintithayo.” (Marko 7:31, 32) UYesu akazange amphilise nje kuphela lo mntu, kodwa wabonisa ukuziqonda ngokunzulu iimvakalelo zongevayo, owayesenokuba neentloni phakathi kwezihlwele. IBhayibhile isixelela ukuba uYesu wasithabatha esi sithulu “wasisusa esihlweleni wasisa ngasese” waza wasiphilisa. Kwakhona, amangqina okuzibonela ‘ayesithi khamnqa ngeyona ndlela ingaqhelekanga,’ esithi: “Wenze kakuhle zonke izinto. Wenza kwanezithulu zive nabangathethiyo bathethe.”—Marko 7:33-37.

Ukufa kwamalungu omzimba: Ngoxa uYesu wayeseKapernahum, abantu baya kuye nomntu ofe amalungu omzimba owayelele emandlalweni. (Mateyu 9:2) Indinyana 6 ukusa kweyesi-8 ichaza oko kwenzekayo. “[UYesu] wathi kofe umzimba: ‘Sukuma, thabatha umandlalo wakho, uhambe ugoduke.’ Yaye wasukuma wagoduka. Zakukubona oku izihlwele zangenwa luloyiko, zaza zamzukisa uThixo, onike abantu igunya elingaka.” Nalo mmangaliso wenziwa phambi kwabafundi bakaYesu neentshaba zakhe. Phawula ukuba abafundi bakaYesu, bengamfanyekiswanga yintiyo nekhethe, ‘bamzukisa uThixo’ ngoko bakubonayo.

Izifo: “Kweza oneqhenqa kuye [uYesu], embongoza ede waguqa ngedolo, esithi kuye: ‘Ukuba nje uyathanda, unako ukundenza ndihlambuluke.’ Ngako oko waba nosizi, waza wasolula isandla sakhe wamchukumisa, wathi kuye: ‘Ndiyathanda. Hlambuluka.’ Lathi shwaka ngoko nangoko iqhenqa kuye.” (Marko 1:40-42) Phawula ukuba uYesu akazange aphilise lo mntu ekrokra kodwa wamphilisa ngenxa yemfesane yokwenene. Khawuzithelekelele uneqhenqa. Ubunokuvakalelwa njani ukuba ubunokuphiliswa ngesiquphe ungevanga zintlungu kwesi sigulo soyikekayo nesikwenza umlwelwe nekheswa kwibutho labantu? Ngokungathandabuzekiyo unokusiqonda isizathu sokuba omnye oneqhenqa owaphiliswa ngommangaliso ‘wawa ngobuso ezinyaweni zikaYesu.’—Luka 17:12-16.

Ukwenzakala: Ummangaliso kaYesu wokugqibela ngaphambi kokubanjwa kwakhe aze abethelelwe wawukukuphilisa. Engxamele ukulwa nabo bafuna ukubamba uYesu, umpostile uPetros, “njengoko wayenekrele, walithi rhuthu waza waxabela ikhoboka lombingeleli omkhulu, walinqumla indlebe yalo yasekunene.” (Yohane 18:3-5, 10) Ingxelo efanayo kaLuka isixelela ukuba uYesu “wayichukumisa indlebe waza waliphilisa.” (Luka 22:50, 51) Kwakhona, esi senzo semfesane senziwa phambi kwabahlobo neentshaba zikaYesu—kwesi sihlandlo, abo bambambayo.

Ewe, okukhona siyiqwalasela imimangaliso kaYesu, kokukhona siya siqonda indlela eyinyaniso ngayo. (2 Timoti 3:16) Yaye njengoko kukhankanywe ngaphambilana, ufundisiso olunjalo lufanele lomeleze ukholo lwethu kwisithembiso sikaThixo sokuphilisa abantu abathobelayo. IBhayibhile ichaza ukholo lwamaKristu isithi “lulindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Ngokucacileyo, uThixo ukhuthaza, kungekhona ukukholelwa nje ngaphandle kokuqiniseka okanye ube nethemba nje lokuba ezi zinto ziya kuzaliseka, kodwa ukhuthaza ukholo oluqinileyo olusekelwe kubungqina. (1 Yohane 4:1) Njengoko sizuza ukholo olunjalo, siyomelela ngakumbi ngokomoya, siba sempilweni yaye sonwabe ngakumbi.—Mateyu 5:3; Roma 10:17.

Ukuphiliswa Ngokomoya Kufanele Kuze Kuqala!

Abantu abaninzi abasempilweni emzimbeni abonwabanga. Bambi bade bazame ukuzibulala kuba bengenathemba ngekamva okanye beziva besonganyelwa ziingxaki. Eneneni, banesiphene ngokomoya—imeko elusizi kakhulu emehlweni kaThixo kunokuba nesiphene emzimbeni. (Yohane 9:41) Kwelinye icala, abaninzi abanesiphene emzimbeni, njengoChristian noJunior abakhankanywe kwinqaku elandulelayo, baphila ubomi obonwabisayo nobunenjongo. Ngoba? Kuba baphilile ngokomoya yaye bomelezwa lithemba eliqinisekileyo elisekelwe eBhayibhileni.

Ebhekisela kwimfuno yethu ekhethekileyo njengabantu, uYesu wathi: “Akaphili ngasonka sodwa umntu, uphila ngamazwi onke aphuma emlonyeni kaYehova.” (Mateyu 4:4) Ewe, ngokungafaniyo nezilwanyana, abantu bafuna okungaphezu kwezinto eziphathekayo. Sidalwe “ngokomfanekiso” kaThixo, sifuna ukutya kokomoya—ulwazi ngoThixo nendlela esibandakanyeka ngayo kwinjongo yakhe nokwenza ukuthanda kwakhe. (Genesis 1:27; Yohane 4:34) Ulwazi ngoThixo lwenza ubomi bethu bube nenjongo kwaye lusishukumisela ukuba simkhonze ngenzondelelo. Lukwasinika isiseko sobomi obungunaphakade kwiparadesi esemhlabeni. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.

Kuphawuleka ukuba abantu bexesha likaYesu abazange bambize ngokuthi “Mphilisi” kodwa ngokuthi “Mfundisi.” (Luka 3:12; 7:40) Ngoba? Kuba uYesu wayefundisa abantu ngesicombululo esihlala sihleli kwiingxaki zoluntu—uBukumkani bukaThixo. (Luka 4:43; Yohane 6:26, 27) Lo rhulumente wasezulwini osezandleni zikaYesu Kristu uya kulawula umhlaba wonke uze uzalisekise zonke izithembiso zeBhayibhile eziphathelele ukuhlaziywa okupheleleyo nokusisigxina kwabantu abalungileyo nekhaya labo elingumhlaba. (ISityhilelo 11:15) Kungeso sizathu le nto uYesu wanxulumanisa ukuza koBukumkani nokwenziwa kokuthanda kukaThixo emhlabeni kumthandazo wakhe ongumzekelo.—Mateyu 6:10.

Kubantu abaninzi abaneziphene, ukufunda ngeli themba lichukumisayo kuye kwabangela iinyembezi zabo zokudakumba zaba ziinyembezi zovuyo. (Luka 6:21) Enyanisweni, uThixo uya kwenza okungaphezulu kunokuphelisa ukugula neziphene; uya kususa unobangela wokubandezeleka koluntu—isono ngokwaso. Eneneni, uIsaya 33:24 noMateyu 9:2-7, izibhalo ezikhankanywe ngaphambilana, zinxulumanisa ukugula nemeko yethu yokuba nesono. (Roma 5:12) Ngenxa yoko, xa isono siphelisiwe, ekugqibeleni uluntu luya kufumana ‘inkululeko ezukileyo yabantwana bakaThixo,’ inkululeko equka ukufezeka kwengqondo nomzimba.—Roma 8:21.

Abo basempilweni banokuyithabatha lula imeko yabo. Kodwa akunjalo kwabo babandezeleka ngenxa yesiphene esithile. Bazi kakuhle indlela impilo nobomi obuxabiseke ngayo nendlela izinto ezinokuguquka ngayo ngesiquphe. (INtshumayeli 9:11) Ngenxa yoko, sinethemba lokuba abaneziphene phakathi kwabo bafunda eli phephancwadi baya kuziqwalasela ngenyameko izithembiso zikaThixo ezivuyisayo ezibhalwe eBhayibhileni. UYesu wanikela ngobomi bakhe ukuze aqiniseke ukuba ziyazaliseka. Ngaba sikho esinye isithembiso esibhetele kunesi?—Mateyu 8:16, 17; Yohane 3:16.

[Umbhalo osemazantsi]