Nikela Ngako Konke Onako

“ENOBA unokundibiza ngokuthi ndingumngqibi; oko akundikhathazi. Ndingumngqibi kaYesu.” Loo mazwi omfundisi ongumProtestanti abonisa imbambano ebandakanya indlela unqulo oluxhaswa ngayo ngemali. Iicawa ezaziwayo zibonakala ziphumelela kuphela xa zifumana imali eninzi. Abefundisi bafanele bahlawulwe, kufanele kwakhiwe izindlu zecawa zize zinyanyekelwe, yaye kufuneka imali yomsebenzi wokushumayela. Iza kuvela phi le mali ifunekayo?

Kwiicawa ezininzi, ifumaneka ngezishumi.a Omnye umfundisi ogama linguNorman Robertson uthi: “Izishumi yindlela uThixo abuxhasa ngayo ngemali ubukumkani Bakhe emhlabeni. Yindlela yakhe yokufumana imali ukuze iVangeli ishunyayelwe.” Engenazintloni zokukhumbuza abalandeli bakhe ngembopheleleko yabo yokunikela, ugxininisa esithi: ‘Akunikeli izishumi kuba nje unako. Esi sisenzo sokuthobela. Ukuba akuzinikeli izishumi waphula imithetho kaThixo. Obo bubusela.’—Tithing—God’s Financial Plan.

Kusenokuba uyavuma ukuba ukunikela kufanele kube yinxalenye yonqulo lwamaKristu. Noko ke, ngaba kuya kuphazamisa okanye kude kukukhathaze ukuhlala ufunwa imali? Umfundi wezakwalizwi waseBrazil uInácio Strieder utyhola iicawa ngokusebenzisa izishumi ukuze “zicombulule iingxaki zazo” yaye ukuchaza oko ngokuthi “akukho mthethweni, kukuxhaphaza nokuphambuka kwimfundiso yonqulo.” Uthi, ngenxa yoko “abantu abangaphangeliyo, abahlolokazi, abantu abahlala ematyotyombeni, nabo bangazikisiyo ukucinga bagqiba kwelokuba uThixo ubalahlile yaye kunyanzelekile ukuba banikele kakhulu ‘kumfundisi’ de iintsapho zabo zibulawe yindlala.”

Usenokuzibuza: ‘Ngaba iicawa ezinyanzelisa izishumi zisebenzisa iZibhalo ngokuchanileyo? Okanye ngaba ezinye iicawa zigrogrisa abantu ngokuhlwaywa nguThixo ukuze ziphange amarhamente azo? Eneneni, ngaba uThixo ufuna sinikele ngako konke esinako, njengoko abanye besenokutsho?’

[Umbhalo osemazantsi]