Yomeleza Izandla Zakho
EBHAYIBHILENI, igama elithi isandla likhankanywe ngaphezu kwezihlandlo ezili-1 800. Izaci ezithetha ngesandla zisetyenziswa ngeendlela ezahlukahlukeneyo. Ngokomzekelo, isandla esihlambulukileyo sithetha ubumsulwa. (2 Samuweli 22:21; INdumiso 24:3, 4) Isandla esivulekileyo sithetha ukuba nesisa kwabanye. (Duteronomi 15:11; INdumiso 145:16) Umntu obeka ubomi bakhe esichengeni kuthiwa ubeka umphefumlo lwakhe esandleni sakhe. (1 Samuweli 19:5) Xa izandla zikabani ziwile kuthetha ukudimazeka. (2 Kronike 15:7) Yaye ukomeleza isandla sikabani kuthetha ukumkhuthaza nokumomeleza ukuze enze okuthile.—1 Samuweli 23:16.
Namhlanje kufuneka ngamandla ukuba someleze izandla zethu. Siphila ‘kumaxesha amanqam ekunzima ukujamelana nawo.’ (2 Timoti 3:1) Xa sidimazekile, sityekele ekunikezeleni, ukuvumela izandla zethu ziwe. Kuyinto eqhelekileyo ukubona abantwana beshiya isikolo, amadoda eshiya iintsapho, yaye oomama belahla abantwana babo. NjengamaKristu, sifanele someleze izandla zethu ukuze sinyamezele iimvavanyo esijamelana nazo ekukhonzeni uThixo. (Mateyu 24:13) Xa senjenjalo, sivuyisa intliziyo kaYehova.—IMizekeliso 27:11.
Iindlela Ezomelezwa Ngayo Izandla
AmaYuda omhla kaEzra ayefuna ukomelezwa izandla ukuze agqibe umsebenzi wokwakha itempile kaYehova eYerusalem. Zaziza komelezwa njani izandla zawo? Le ngxelo ithi: “Baqhubeka besenza umthendeleko wamaqebengwana angenagwele iintsuku ezisixhenxe benemihlali; kuba uYehova wababangela banemihlali, wayijika nentliziyo kakumkani waseAsiriya yangakubo ukuba azomeleze izandla zabo emsebenzini wendlu kaThixo oyinyaniso, uThixo kaSirayeli.” (Ezra 6:22) Kucacile ukuba, yayingamandla kaYehova asebenzayo enza ukuba ‘ukumkani waseAsiriya’ avumele abantu bakaThixo bagoduke, ebakhuthaza aba bantu ukuba bagqibe umsebenzi ababewuqalile.
Kamva, xa iindonga zaseYerusalem zazifuna ukulungiswa, uNehemiya wazomeleza izandla zabazalwana bakhe ukuze benze lo msebenzi. Sifunda oku: “Ndahlabela mgama ndibaxelela ngesandla sikaThixo wam, indlela ebesilunge ngayo kum, kwanamazwi kakumkani awathethileyo kum. Baza bona bathi: ‘Masisukume, sakhe.’ Ngoko izandla zabo bazomelezela umsebenzi olungileyo.” Ngezandla ezomeleleyo, uNehemiya namanye amaYuda akwazi ukuphinda akhe iindonga zaseYerusalem ngeentsuku nje ezingama-52!—Nehemiya 2:18; 6:9, 15.
Ngokufanayo, uYehova womeleza izandla zethu kumsebenzi wokushumayela iindaba ezilungileyo zoBukumkani. (Mateyu 24:14) Ukwenza oko ‘ngokusixhobisela ngento yonke elungileyo ukuze senze ukuthanda kwakhe.’ (Hebhere 13:21) Uye wasinika ezona zixhobo zifanelekileyo. SineBhayibhile neencwadi ezisekelwe eBhayibhileni, amaphephancwadi, iincwadana ezinemifanekiso, amaphecana, neekhasethi neevidiyo ezishicilelweyo ukuze sizisebenzise ekufikeleleni abantu emhlabeni wonke. Eneneni, iimpapasho zethu zifumaneka ngeelwimi ezinokuba ngama-380. Ngaphezu koko, ngeentlanganiso zebandla, iindibano ezinkulu nezincinane, uYehova usinika imfundo noqeqesho lwakhe ngendlela yokusebenzisa ezi zixhobo zifanelekileyo ekuphumezeni ubulungiseleli bethu.
Nangona uYehova esomeleza izandla zethu ngeendlela ezininzi, ulindele ukuba sizibhokoxe. Cinga ngoko umprofeti uElisha wakuxelela uKumkani uYehowashe, owayeze kucela uncedo kuElisha ukuze alwe nomkhosi wamaSiriya. UElisha waxelela ukumkani ukuba athathe iintolo aze abethe emhlabeni. Ingxelo yeBhayibhile ithi: “Wabetha kathathu waza wayeka. Yaye umntu kaThixo oyinyaniso wacaphuka; kungoko wathi: ‘Bekufanele ukuba lubethe izihlandlo ezihlanu okanye ezithandathu! Ngaloo ndlela ubuya kuba uyixabele wayigqiba ngokuqinisekileyo iSiriya, kodwa ngoku uya kuyixabela izihlandlo ezithathu iSiriya.’” (2 Kumkani 13:18, 19) Kuba engazibhokoxanga ngenzondelelo, uYehowashe akazange aphumelele ngokupheleleyo ukulwa namaSiriya.
Lo mgaqo uyasebenza nakuthi ukuba sifuna ukuphumeza oko uYehova asinike kona. Kunokuba sizikhathaze ngemiqobo ephambi kwethu okanye ngendlela umsebenzi othile osenokuba nzima ngayo, sifanele siwenze ngenzondelelo nangentliziyo iphela. Sifanele sizomeleze izandla zethu size sifune uncedo lukaYehova.—Isaya 35:3, 4.
UYehova Uya Kuzomeleza Izandla Zethu
UYehova akasoze asilele ukusinceda nokomeleza izandla zethu ukuze senze ukuthanda kwakhe. Kakade ke, uThixo akayi kwenza mmangaliso aze asenzele yonke into. Ulindele ukuba sifeze indima yethu—ukufunda iBhayibhile imihla ngemihla, ukulungiselela nokuya kwiintlanganiso rhoqo, ukuba nenxaxheba kubulungiseleli kangangoko kunokwenzeka, nokuthandaza kuye rhoqo. Ukuba siphumeza indima yethu ngokuthembeka nangenkuthalo ngoxa sisenethuba, uYehova uya kusinika amandla ukuze senze oko akulindeleyo kuthi.—Filipi 4:13.
Cinga ngomnye umKristu owafelwa ngumfazi nonina ngonyaka nje omnye. Wayesandul’ ukwehlelwa yile ntlungu xa umolokazana wakhe washiya unyana wakhe waza walahla nendlela yobuKristu. Lo mzalwana wathi: “Ndiye ndafunda ukuba akukwazi ukuzikhethela izilingo, okanye ixesha emazenzeke ngalo okanye zibe ngakanani.” Uwafumana phi amandla okuqhubeka? “Ndiye ndomelezwa ngumthandazo nofundisiso lobuqu. Yaye inkxaso yabazalwana noodade bokomoya iye yandithuthuzela kakhulu. Ngaphezu koko, ndiye ndakuqonda ukubaluleka kokuba nolwalamano oluhle noYehova ngaphambi kokuba uhlelwe ziingxaki.”
Enoba yintoni ojamelana nayo ebomini, zimisele ukuthembela ngokupheleleyo kuYehova uze usebenzise kakuhle onke amalungiselelo awenzele ukomeleza izandla zakho. Ngoko ke uya kukwazi ukunikela inkonzo exabisekileyo kuYehova uze ngaloo ndlela uzise indumiso nozuko kwigama lakhe elixabisekileyo.—Hebhere 13:15.
[Umfanekiso okwiphepha 31]
Ngenxa yokusilela ukuzibhokoxa ngenzondelelo, uYehowashe akazange awoyise ngokupheleleyo amaSiriya