Imibuzo Evela Kubafundi
Ngaba kuvumelekile ngokweZibhalo ukuba umKristu abeke isandla sakhe phezu kweBhayibhile aze afunge ukuba uza kuthetha inyaniso epheleleyo enkundleni?
Mntu ngamnye ufanele azenzele isigqibo kule nkalo. (Galati 6:5) Noko ke, iBhayibhile ayikwaleli ukwenza isifungo sokuba uza kuthetha inyaniso enkundleni.
Ukwenza isifungo yinto eyenziwa kuzo zonke iindawo. Ngokomzekelo, kumaxesha amandulo amaGrike ayephakamisa isandla okanye abambe isibingelelo ngoxa esenza isifungo. Xa umRoma esenza isifungo, wayephatha ilitye ngesandla aze afunge esithi: “Ukuba ngabom ndiyakhohlisa, ngoxa ekhusela isixeko nenqaba yesixeko, ngamana [uthixo] uJupiter angazishenxisa zonke izinto ezilungileyo ebomini bam, njengoko ndisenjenjalo kweli litye.”—Cyclopedia of Biblical, Theological, and Ecclesiastical Literature, nguJohn McClintock noJames Strong, uMqulu VII, iphepha 260.
Izenzo ezinjalo zazibonisa ukuba abantu babekholelwa ukuba kukho uthixo okubonayo oko kwenziwa ngabantu noya kubaphendulisa ngezenzo zabo. Ukususela ngamaxesha amandulo, abanquli bokwenyaniso bakaYehova babeqonda ukuba wayekwazi oko bakuthethayo nababekwenza. (IMizekeliso 5:21; 15:3) Kwakufana nokungathi babesenza isifungo uThixo ekho okanye elingqina. Ngokomzekelo, oku kwenziwa nguBhohazi, uDavide, uSolomon noZedekiya. (Rute 3:13; 2 Samuweli 3:35; 1 Kumkani 2:23, 24; Yeremiya 38:16) Kwakhona abanquli boThixo wokwenyaniso baye bavumela abanye ukuba babenzise isifungo. Oko kwakunjalo kwimeko ka-Abraham noYesu Kristu.—Genesis 21:22-24; Mateyu 26:63, 64.
Umntu owenza isifungo kuYehova maxa wambi wayesenza isenzo esithile. UAbram (uAbraham) wathi kukumkani waseSodom: “Ndiyasiphakamisa isandla sam ukuze ndifunge kuYehova ongOyena Thixo Uphakamileyo, uMvelisi wezulu nomhlaba.” (Genesis 14:22) Ingelosi ithetha nomprofeti uDaniyeli “yayiphakamisela isandla sayo sokunene nesasekhohlo emazulwini yaza yafunga Lowo uphila ixesha elingenammiselo.” (Daniyeli 12:7) KwanoThixo ngokufuziselayo kubhekiselwa kuye njengophakamisa isandla sakhe esenza isifungo.—Duteronomi 32:40; Isaya 62:8.
IZibhalo azikwaleli ukwenza isifungo. Noko ke, umKristu akanyanzelekanga ukuba enze isifungo ukungqinela yonke into ayithethayo. UYesu wathi: “Ke uEwe makabe nguEwe, uHayi wenu, abe nguHayi; kuba okugqithe koko kuvela kongendawo.” (Mateyu 5:33-37) Umfundi uYakobi wathetha ingongoma efanayo. Xa wathi “musani ukufunga,” wayelumkisa ngezifungo ezingenantsingiselo. (Yakobi 5:12) UYesu okanye uYakobi akazange athi kuphosakele ukwenza isifungo sokuthetha inyaniso enkundleni.
Ngoko ke, kuthekani ukuba enkundleni umKristu ucelwa afunge ukuba uza kuthetha inyaniso? Usenokuvakalelwa kukuba unokusenza isifungo esinjalo. Kungenjalo, unokuvunyelwa ukuba aqinisekise ukuba akaxoki.—Galati 1:20.
Xa inkqubo yasenkundleni iquka ukuphakamisa isandla okanye ukusibeka phezu kweBhayibhile xa ubani efunga, umKristu unokukhetha ukwenza ngaloo ndlela. Usenokucinga ngemizekelo yeZibhalo ephathelele ukwenziwa kwesifungo ngokwenza isenzo esithile. KumKristu, eyona nto ibaluleke ngakumbi kunokwenza kukabani isenzo esithile xa efunga, kukukhumbula ukuba ufunga phambi koThixo ukuba uza kuthetha inyaniso. Isifungo esinjalo singumbandela onzulu. Ukuba umKristu uvakalelwa kukuba unako yaye ufanele aphendule imibuzo ayibuzwayo kwimeko enjalo, ngoko ufanele akhumbule ukuba uphantsi kwesifungo sokuthetha inyaniso, nto leyo umKristu asoloko eyithetha ngalo lonke ixesha.