Ibali Lobomi

Ukufuna Kuqala Ubukumkani—Ubomi Obunqabisekileyo Nobonwabisayo

NGOKUBALISWA NGUJETHA SUNAL

Emva kwesidlo sakusasa seva esi sibhengezo kunomathotholo: “AmaNgqina kaYehova akamkelekanga ngokusemthethweni, yaye umsebenzi wawo uvaliwe.”

KWAKUNGOWE-1950, yaye thina singamabhinqa amane akwiminyaka yama-20 ubudala sasingabavangeli basemazweni amaNgqina kaYehova eDominican Republic. Sasifike apho kunyaka ophelileyo.

Ukuba ngumvangeli wasemazweni bekungasoloko kulusukelo lwam ebomini. Liyinyaniso elokuba, ndandihamba icawa ndisengumntwana. Noko ke, utata wayeka ukuya ecaweni ebudeni beMfazwe Yehlabathi I. Ngosuku lokuphehlelelwa kwam kwiCawa yase-Episcopal ngowe-1933, ubhishophu wafunda indinyana enye eBhayibhileni, emva koko waqalisa ukuthetha ngezobupolitika. Umama wayekhathazeke kangangokuba akazange aphinde aye ecaweni.

Indlela Yethu Yokuphila Yaguquka

Abazali bam, uWilliam Karl noMary Adams, babenabantwana abahlanu. Amakhwenkwe yayinguDon, uJoel noKarl. Udadewethu uJoy wayelithunjana, mna ndingumafungwashe. Kusenokuba ndandineminyaka eli-13 ubudala xa ngenye imini ukubuya kwam esikolweni, ndafumana uMama efunda incwadana eyayipapashwe ngamaNgqina kaYehova. Yayinomxholo othi The Kingdom, the Hope of the World. UMama wathi kum: “Le yinyaniso.”

UMama wayethetha nathi sonke ngezinto awayezifunda eBhayibhileni. Ngamazwi nangomzekelo, wabethelela kuthi ukubaluleka kwesiluleko sikaYesu esithi: ‘Funani kuqala ubukumkani nobulungisa bakhe.’—Mateyu 6:33.

Ndandingasoloko ndiphulaphula ngoxabiso. Ngenye imini ndathi kuye, “Mama, yeka ukusoloko undishumayeza okanye andisayi kuphinda ndikusulele izitya.” Kodwa ngobuchule akazange ayeke ukuthetha nathi. Wayedla ngokuhamba nathi rhoqo ngoxa sasiselula esiya kwizifundo zeBhayibhile ezaziqhutyelwa kwikhaya likaClara Ryan, owayehlala kufuphi nasekhaya e-Elmhurst, eIllinois, eUnited States.

UClara wayefundisa nokudlala ipiyano. Xa abafundi bakhe babedlala ipiyano ekupheleni konyaka, wayesebenzisa eli thuba ukuthetha nabo ngoBukumkani bukaThixo nangethemba lovuko. Ngenxa yokuba ndandinomdla kumculo, ekubeni ndandifunde ukudlala ivayolin ukususela kwixesha endandineminyaka esixhenxe ubudala, ndamphulaphula uClara.

Kungekudala thina singabantwana saqalisa ukuya kwiintlanganiso zebandla kunye noMama ngasentshona yeChicago. Sasihamba ixesha elide ngebhasi nangenqwelana ehamba esiporweni, kodwa olu yayiyinxalenye yoqeqesho lwethu koko kuthethwa kukufuna kuqala uBukumkani. Ngowe-1938, kwiminyaka emithathu emva kokubhaptizwa kukaMama, ndahamba naye ukuya kwindibano yamaNgqina kaYehova eChicago. Esi yayisesinye sezixeko ezingama-50 ezaziqhagamshelwe ngocingo ukwenzela eso sihlandlo. Endakuvayo apho kwandichukumisa gqitha.

Sekunjalo, ndandingawuthandi nje umculo ndandisus’ amaphepha. Ndagqiba kwisikolo samabanga aphakamileyo ngowe-1938, yaye uTata walungiselela ukuba ndiye kufunda kwiAmerican Conservatory of Music eChicago. Ngoko ke, kwiminyaka emibini eyalandelayo, ndafunda umculo, ndadlala kwiiokhestra ezimbini, yaye ndandicinga ngokuwenza umsebenzi wam osisigxina.

Umqeqeshi wam wevayolin, uHerbert Butler, wayesuka eYurophu eze kuhlala eUnited States. Ngoko ndamnika incwadana eyayisithi Refugees,a ndicinga ukuba angayifunda. Eneneni wayifunda, yaye emva wezifundo kwiveki elandelayo, wathi: “Jetha, udlala kakuhle, yaye ukuba uyaqhubeka ufunda, uya kufumana umsebenzi kwiokhestra kanomathotholo okanye ufundise umculo.” Wahlabela mgama njengoko esalatha kwincwadana endandimnike yona esithi: “Kodwa ndicinga ukuba intliziyo yakho ikulo msebenzi. Kutheni ungenzi lo msebenzi ngokusisigxina?”

Ndacingisisa nzulu ngoko. Kunokuba ndihambele phambili nesikolo, ndamkela isicelo sikaMama sokuya kwindibano yamaNgqina kaYehova eDetroit, eMichigan, ngoJulayi 1940. Sahlala ezintenteni kwisixeko seenqwelo ezirhuqwayo. Kakade ke, ndandiyiphethe ivayolin yam, yaye ndadlala kwiokhestra yendibano. Kodwa kwisixeko seentente, ndadibana noovulindlela abaninzi (abashumayeli bexesha elizeleyo). Bonke babonwabile. Ndagqiba kwelokuba ndibhaptizwe ndize ndifake isicelo sokuba nguvulindlela. Ndathandaza kuYehova ukuze andincede ndikwazi ukuqhubeka ndinguvulindlela wexesha elizeleyo ubomi bam bonke.

Ndaqala ukuba nguvulindlela kwidolophu yasekhaya. Kamva, ndaya kusebenza eChicago. Ngowe-1943, ndafudukela eKentucky. Ehlotyeni, ngaphambi nje kwendibano yesithili, ndamenywa ukuba ndiye kwiklasi yesibini yeSikolo saseGiliyadi, apho ndandiza kuqeqeshelwa ukuba ngumvangeli wasemazweni. Le klasi yayiza kuqalisa ngoSeptemba 1943.

Ebudeni baloo ndibano yasehlotyeni, ndahlala neNgqina elandinika nantoni na endandiyifuna kwiimpahla zentombi yalo. Intombi yalo yayiye emkhosini, yaye yayixelele unina ukuba aphise ngazo zonke izinto zayo. Kum, ezi zinto yayikukuzaliseka kwesithembiso sikaYesu esithi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” (Mateyu 6:33) Iinyanga ezintlanu eGiliyadi zakhawuleza zaphela, yaye emva kokugqiba kwethu ngoJanuwari 31, 1944 ndandingxamele ukuya kuqalisa kumsebenzi wobuvangeli basemazweni.

Nabo Bakhetha Inkonzo Yexesha Elizeleyo

UMama wayeqalise ukuba nguvulindlela ngowe-1942. Ngelo xesha, abantakwethu abathathu nodadewethu bebesafunda. UMama wayedla ngokubahlangabeza emva kokuphuma kwesikolo aze aye nabo entsimini. Kwakhona wabafundisa nemisetyenzana yasekhaya. Yena wayesebenza kude kube sebusuku eayina esenza neminye imisebenzi efunekayo ukuze akwazi ukuya entsimini ebudeni bemini.

NgoJanuwari 1943, ndandinguvulindlela eKentucky, umntakwethu uDon naye waqalisa ukuba nguvulindlela. Oku kwamdanisa uTata, owayenethemba lokuba bonke abantwana bakhe baya kuba nemfundo enomsila, njengokuba yena noMama babenjalo. Emva kokuba nguvulindlela kangangeminyaka enoba mibini, uDon wamenywa ukuba ahlale ekwinkonzo yexesha elizeleyo njengenxalenye yentsapho yekomkhulu lehlabathi lamaNgqina kaYehova eBrooklyn, eNew York.

UJoel waqalisa ukuba nguvulindlela ngoJuni 1943 ngoxa wayesahlala ekhaya. Ebudeni belo xesha akazange aphumelele kwimigudu yakhe yokumema uTata aye endibanweni. Noko ke, emva kokuba uJoel ezamile kodwa wawa phantsi ekuqaliseni isifundo seBhayibhile kwingingqi yethu, uTata wavuma ukuba aqhube isifundo kunye naye kwincwadi ethi “The Truth Shall Make You Free.” Wayeyiphendula ngokulula yonke loo mibuzo, kodwa wayesoloko efuna ubungqina obuvela kwiZibhalo ngento yonke ethethwa kuloo ncwadi. Oko kwamnceda uJoel ukuze azixabise iinyaniso zeBhayibhile.

UJoel wayenethemba lokuba iSelective Service Board eyayimngxengxezele uDon ukuba angayi emkhosini kuba engumfundisi wezakwalizwi iza kwenza okufanayo nakuye. Kodwa xa eli qumrhu laphawula indlela wayekhangeleka emncinane ngayo Joel, alizange livume ukumgqala njengomfundisi laza lamthumelela isaziso sokuya kuqala emkhosini. Xa engazange avume ukuya apho, wathenjiswa ngokubanjwa. Emva kokuba iFBI imfumene, wathunyelwa kwintolongo yaseCook County kangangeentsuku ezintathu.

UTata wanikezela ngekhaya lethu njengesibambiso ukuze akhululwe. Emva koko, wenza into efanayo nakumanye amaNgqina aselula awayejamelene nemeko efanayo. Kwamcaphukisa utata ukungabikho kobulungisa okulolu hlobo, yaye waya noJoel eWashington, D.C., ukuze aye kubhena. Ekugqibeleni, uJoel wagqalwa njengomfundisi, yaye ityala lakhe lachithwa. Utata wandibhalela ndikwinkonzo yobuvangeli basemazweni esithi, “ndicinga ukuba nguYehova owenze ukuba eli tyala lichithwe!” Ekupheleni kuka-Agasti 1946, naye uJoel wamenyelwa eBrooklyn ukuze abe lilungu lentsapho yalapho.

UKarl waba nguvulindlela ebudeni bokuvalwa kwezikolo izihlandlo ezininzi ngaphambi kokuba agqibe kumabanga aphakamileyo ekuqaleni kowe-1947 waza waqalisa ukuba nguvulindlela othe ngxi. Impilo kaTata yayisiya isiba nkenenkene, ngoko ke uKarl wamncedisa kwishishini lakhe kangangexesha elithile ngaphambi kokuba ahambe aye kuba nguvulindlela kwenye indawo. Ngasekupheleni kowe-1947, uKarl waqalisa ukuya kusebenza noDon noJoel kwikhomkhulu laseBrooklyn njengelungu lentsapho yaseBheteli.

Wathi uJoy akugqiba esikolweni samabanga aphakamileyo, waqalisa ukuba nguvulindlela. Wandula ke ngowe-1951, waya kusebenza nabantakwabo eBheteli. Wasebenza kwiSebe labacoci nakwelemiRhumo. Ngowe-1955 watshata noRoger Morgan, elinye ilungu lentsapho yaseBheteli. Kwiminyaka enokuba sixhenxe kamva, bekhethe ukuba nentsapho yabo, bayishiya iBheteli. Emva kwexesha, bakhulisa abantwana ababini, nabo abakhonza uYehova.

Xa bonke abantwana babekwinkonzo yexesha elizeleyo, uMama wamkhuthaza uTata, kangangokuba wazahlulela kuYehova waza wabhaptizwa ngowe-1952. Kangangeminyaka eli-15, de wafa, wayeneendlela zakhe ezichuliweyo zokuthetha nabanye ngenyaniso yoBukumkani, nangona wayengasenamandla ngenxa yokugula.

Emva kokuyeka ixeshana elifutshane ngenxa yokugula kukaTata, uMama waqhubeka enguvulindlela de wafa. Akazange abe nayo imoto, yaye wayengakhweli nebhayisikile. Nakuba wayemfutshane, akukho ndawo angazange aye kuyo, ngamaxesha amanzi esiya kwiindawo ezikude emaphandleni, ukuya kuqhuba izifundo zeBhayibhile.

Kwintsimi Yobuvangeli Basemazweni

Emva kokugqiba kwiSikolo saseGiliyadi, abaliqela kuthi saya kuba ngoovulindlela kwisiXeko saseNew York kangangonyaka de safumana amaphepha-mvume okuhamba awayefuneka. Ekugqibeleni, ngowe-1945 sanduluka sisiya kwisabelo sethu, eCuba, apho saqalisa ngokuthe ngcembe ukuqhelana nobomi obutsha. Abantu babephulaphula xa sishumayela, yaye kungekudala sonke sasiqhuba izifundo zeBhayibhile ezininzi. Sasebenza apho kangangeminyaka eliqela. Sandula ke sabelwa eDominican Republic. Ngenye imini ndadibana nelinye ibhinqa elandicenga ukuba ndiye kubona umntu owayedla ngokuthenga kulo, lo yayingumfazi waseFransi uSuzanne Enfroy, owayefuna uncedo ukuze ayazi iBhayibhile.

USuzanne wayengumYuda, yaye xa uHitler wahlasela iFransi, umyeni wakhe wamfudusela kwelinye ilizwe nabantwana babo ababini. Kungekudala uSuzanne wathetha nabanye ngezinto awayezifunda. Waqala wathetha nebhinqa elalicele ukuba ndiye kuthetha naye, emva koko noBlanche, umhlobo wakhe waseFransi. Bobabini benza inkqubela de babhaptizwa.

“Yintoni endinokuyenza ukunceda abantwana bam?” USuzanne wandibuza loo mbuzo. Unyana wakhe wayefundela ubugqirha, yaye intombi yakhe yayifunda iballet, inethemba lokudanisa eRadio City Music Hall eNew York. USuzanne wabathumelela umrhumo weMboniselo nokaVukani! Ngenxa yoku, unyana kaSuzanne, umfazi wakhe, nodade bomfazi wakhe oliwele lakhe bonke baba ngamaNgqina. Umyeni kaSuzanne, uLouis wayesoyika kuba umfazi wakhe enomdla kumaNgqina kaYehova ekubeni urhulumente waseDominican Republic wayewuvalile umsebenzi wethu. Kodwa emva kokuba intsapho yonke ifudukele eUnited States, ekugqibeleni naye waba liNgqina.

Umsebenzi Uvaliwe Kodwa Sisasebenza

Nangona umsebenzi wamaNgqina kaYehova wawuvaliwe eDominican Republic kungekudala emva kokuba sabelwe apho ngowe-1949, sasizimisele ukuthobela uThixo njengoMlawuli kunabantu. (IZenzo 5:29) Saqhubeka sifuna uBukumkani bukaThixo ngokwazisa iindaba ezilungileyo, njengokuba uYesu wayalela abalandeli bakhe ukuba benjenjalo. (Mateyu 24:14) Noko ke, safunda ‘ukulumka njengeenyoka ukanti sibe msulwa njengamahobe,’ njengoko sasishumayela. (Mateyu 10:16) Ngokomzekelo, ivayolin yam yayiluncedo gqitha. Ndandihamba nayo xa ndiye kuqhuba izifundo zeBhayibhile. Abantu endandibafundisa abazange babe ngabadlali bevayolin, kodwa iintsapho eziliqela zaba ngabakhonzi bakaYehova!

Emva kokuvalwa komsebenzi, thina singamantombazana amane—mna, uMary Aniol, uSophia Soviak, noEdith Morgan—safuduswa kwikhaya labavangeli basemazweni eSan Francisco de Macorís sasiwa kwelinye elakhiwe kwisebe lalapha eSanto Domingo, ikomkhulu lalapha. Kodwa nyanga nganye, ndandihamba ndiye kwisabelo sethu sangaphambili ukuze ndiye kufundisa umculo. Oku kwakundinceda ukuze ndikwazi ukufaka kwibhokisi yam yevayolin ukutya kokomoya ndize ndikuphathele abazalwana bethu abangamaKristu ndize ndibuye neengxelo zabo zomsebenzi wokunikela ubungqina.

Xa abazalwana baseSan Francisco de Macorís babevalelwe entolongweni eSantiago ngenxa yokuba bengamaKristu angoondilele, ndacelwa ukuba ndibaphathele imali, yaye ukuba kwakunokwenzeka, iiBhayibhile, yaye ndize kuchazela iintsapho zabo indlela abaphila ngayo. Kwintolongo yaseSantiago, xa abalindi bebona ibhokisi yam yevayolin, babedla ngokubuza, “Yeyokwenza ntoni loo nto?” Ndandidla ngokuphendula ndithi: “Yeyokubonwabisa.”

Phakathi kweengoma endandidla ngokuzidlala yileyo yayibhalwe liNgqina elithile ngoxa lalikwinkampu yoxinaniso yamaNazi. Ngoku leyo yingoma 29 kwiculo lamaNgqina kaYehova. Ndandiyidlala ngendlela yokuba abazalwana bethu abasentolongweni bafunde ukuyicula.

Ndeva ukuba amaNgqina amaninzi aye afuduselwa kwifama kaTrujillo, umlawuli karhulumente. Ndaxelelwa ukuba le ndawo ayikude nendlela yebhasi. Ngoko emini emaqanda, ndehla ebhasini ndaza ndabuza indlela. Umnini wevenkilana yalapho walatha ngaphaya kodederhu lweentaba waza wandiboleka ihashe lakhe nenkwenkwe yokundibonisa indlela ukuba nje ndandinokushiya ivayolin yam njengesibambiso.

Ngaphaya kweentaba, kwafuneka sinqumle umlambo, sobabini sasikhwele kwihashe ngoxa lidada. Apho sabona igquba lezikhwenene, zitsho ngezo ntsiba zazo ziqaqambileyo ziluhlaza nezimzuba zikhanyiswe lilanga. Hayi indlela ezazintle ngayo! Ndathandaza ndisithi: “Ndiyakubulela Yehova, ngokuzenza zibe ntle ngale ndlela.” Ekugqibeleni, ngentsimbi yesine emva kwemini, safika kule fama. Ijoni elalilapho landivumela ukuba ndithethe nabazalwana, yaye landivumela ukuba ndibanike izinto endandibaphathele zona, kuquka iBhayibhile encinane.

Kwindlela ebuyayo, ndandisoloko ndithandaza, kuba ngoku kwakumnyama. Safika kuloo venkile, simanzi tixi yimvula. Ekubeni ibhasi yokugqibela yosuku yayisele ihambile, ndamcela unovenkile ukuba andimisele ilori edlulayo. Ucinga ukuba ndandiza kuba nesibindi sokuhamba namadoda amabini kuloo lori? Enye yawo yandibuza: “Uyamazi uSophie? Wayefunda nodadewethu.” Ndagqiba kwelokuba le yindlela uYehova awuphendula ngayo umthandazo wam! Ndakhwela ndaza ndahamba kakuhle ukuya kufika eSanto Domingo.

Ngowe-1953, ndandiphakathi kwabo basuka eDominican Republic ababekho kwindibano yezizwe ngezizwe yamaNgqina kaYehova eYankee Stadium eNew York. Yonke intsapho yasekhaya yayikho, kuquka notata. Emva kokunikela ingxelo ngendlela umsebenzi wokushumayela oqhuba ngayo eDominican Republic, mna neqabane lam kubuvangeli basemazweni, uMary Aniol, saba nenxaxheba ixesha nje elifutshane kucwangciso sibonisa indlela esishumayela ngayo ngoxa umsebenzi wethu uvaliwe.

Uvuyo Olukhethekileyo Kumsebenzi Wokuhambahamba

Ngelo hlobo ndadibana noRudolph Sunal, owaba ngumyeni wam kunyaka olandelayo. Intsapho yakowabo yaba ngamaNgqina eAllegheny, ePennsylvania, kungekudala emva kweMfazwe Yehlabathi I. Emva kokuvalelwa entolongweni ngenxa yobundilele bamaKristu ebudeni beMfazwe Yehlabathi II, waqalisa kwinkonzo yaseBheteli eBrooklyn, eNew York. Kungekudala emva kokuba sitshatile, wabelwa ukuba atyelele amabandla njengomveleli ohambahambayo. Kangangeminyaka eli-18 elandelayo, ndahamba naye kumsebenzi wesiphaluka.

Umsebenzi wethu wasisa phakathi kwezinye iindawo ePennsylvania, eWest Virginia, eNew Hampshire naseMassachusetts. Ngokuqhelekileyo sasihlala nabazalwana bethu abangamaKristu kumakhaya abo. Kwakuvuyisa gqitha ukubazi kakuhle nokukhonza uYehova kunye nabo. Uthando nobubele ababebubonakalisa babunyanisekile. Emva kokuba uJoel watshata nowayesakuba liqabane lam kubuvangeli basemazweni, uMary Aniol, bachitha iminyaka emithathu kumsebenzi wokujikeleza, betyelela amabandla ePennsylvania naseMichigan. Emva koko, ngowe-1958, uJoel waphinda wamenywa ukuze abe lilungu lentsapho yaseBheteli, ngoku ekunye noMary.

UKarl wayeseBheteli kangangeminyaka enoba sixhenxe xa wabelwa kumsebenzi wesiphaluka kangangeenyanga ezimbalwa ukuze afumane amava. Emva koko waba ngumqeqeshi kwiSikolo saseGiliyadi. Ngowe-1963 watshata noBobbie, oye wakhonza ngokuthembeka eBheteli de wafa ngo-Oktobha 2002.

Ebudeni beminyaka emininzi eseBheteli, uDon ngamathuba athile wayesiya kwamanye amazwe ukuya kukhuthaza abo basebenza kwamanye amasebe nabavangeli basemazweni. Kwisabelo sakhe uye waya eMpuma, eAfrika, eYurophu nakwimimandla eyahlukahlukeneyo yaseMerika. Umfazi kaDon othembekileyo, uDolores, udla ngokuhamba naye.

Iimeko Zethu Zaguquka

Emva kokugula ixesha elide, utata wafa, kodwa ngaphambi kokufa kwakhe wandixelela ukuba uvuya gqitha kuba eye wakhetha ukukhonza uYehova uThixo. Wathi siye safumana iintsikelelo ezingakumbi kunezo ngesasizifumene ukuba sasiqhubele phambili kwimfundo yakwanokholeji awayesilungiselele yona. Emva kokuba ndincedise uMama ukuba afudukele kufuphi nodadewethu, uJoy, mna nomyeni wam samkela isabelo sokuba ngoovulindlela eNew England ukuze sibe kufuphi nonina, ngoku ofuna uncedo lwethu. Emva kokufa kukanina, umama wachitha iminyaka eli-13 kunye nathi. Wandula ke, ngoJanuwari 18, 1987, waligqiba ikhondo lakhe lasemhlabeni eneminyaka engama-93 ubudala.

Xa abahlobo bemncoma ngokukhulisa bonke abantwana bakhe ukuze bathande ukukhonza uYehova, ngokuthozama uMama wayedla ngokuphendula athi: “Ndibe nethamsanqa nje lokuba nomhlaba ‘omhle’ endifanele ndisebenze kuwo.” (Mateyu 13:23) Hayi indlela ekuye kwayintsikelelo ngayo ukuba nabazali abahlonel’ uThixo nabamisela umzekelo omhle wenkuthalo nokuthobeka!

UBukumkani Busaza Kuqala

Siye saqhubeka sibeka uBukumkani bukaThixo kuqala ebomini bethu yaye kwakhona siye salinga ukusebenzisa isiluleko sikaYesu sokwabelana nabanye. (Luka 6:38; 14:12-14) Kwakhona uYehova uye wazinyamekela kakuhle gqitha iintswelo zethu. Siye saphila ubomi obunqabisekileyo nobonwabisayo.

Mna noRudy sisawuthanda umculo. Ngamaxesha olonwabo xa abanye nabo abawuthandayo besityelele ekhayeni lethu sidlala sonke izixhobo zomculo. Kodwa umculo awuzange ube ngumsebenzi ophambili kubomi bam. Yenye nje into endenza ndonwabe. Ngoku mna nomyeni wam sivuyiswa kukubona iziqhamo zomsebenzi wethu wobuvulindlela, abantu esiye sabanceda kwiminyaka emininzi edluleyo.

Phezu kwazo nje iingxaki esinazo zempilo, ndinokuthi ubomi bethu buye bonwabisa yaye banqabiseka kule minyaka ingaphezu kwama-60 sikwinkonzo yexesha elizeleyo. Ntsasa nganye ndivuka, ndiyambulela uYehova ngokuphendula umthandazo wam xa ndaqalisa kwinkonzo yexesha elizeleyo kwiminyaka emininzi edluleyo, yaye ndiye ndicinge, ‘Bethu, ndingabufuna njani uBukumkani kuqala namhlanje?’

[Umbhalo osemazantsi]

[Umfanekiso okwiphepha 24]

Intsapho yasekhaya ngowe-1948 (ekhohlo ukusa ekunene): uJoy, uDon, uMama, uJoel, uKarl, mna noTata

[Umfanekiso okwiphepha 25]

UMama wamisela umzekelo wokukhuthala entsimini

[Umfanekiso okwiphepha 26]

Mna noKarl, noDon, noJoel, noJoy namhlanje, ngaphezu kweminyaka engama-50 kamva

[Umfanekiso okwiphepha 27]

Ekhohlo ukusa ekunene: Mna, uMary Aniol, uSophia Soviak noEdith Morgan njengabavangeli basemazweni eDominican Republic

[Umfanekiso okwiphepha 28]

Ndikunye noMary (ngasekhohlo) eYankee Stadium, ngowe-1953

[Umfanekiso okwiphepha 29]

Ndikunye nomyeni wam xa wayekumsebenzi wesiphaluka