Ibali Lobomi
Unoyolo Lowo UThixo Wakhe UnguYehova
KUBALISA UTOM DIDUR
Iholo yasekuhlaleni yayisele iqeshiwe. Kwakulindeleke ukuba kuze abantu abanokuba ngama-300 endibanweni ePorcupine Plain, eSaskatchewan, eKhanada. NgoLwesithathu laqalisa ukukhithika, yaye ngoLwesihlanu ikhephu lalisele livalile. Iqondo lobushushu lehla laya kutsho kuma-40 ngaphantsi kweqondo lomkhenkce ngokukaCelsius. Kweza abantu abangama-28, kuquka neqela labantwana. Le yayiyindibano yam yokuqala njengomveleli wesiphaluka osemtsha, yaye ndandineminyaka engama-25 ubudala, ndinexhala gqitha. Ngaphambi kokuba ndikuxelele okwenzekayo, makhe ndikubalisele indlela endaqalisa ngayo ukufumana eli lungelo likhethekileyo lenkonzo.
KUMAKHWENKWE asibhozo, mna ndingowesixhenxe. Omdala nguBill, ulandelwa nguMetro, uJohn, uFred, uMike noAlex. Mna ndazalwa ngowe-1925, yaye uWally lithunjana. Sasihlala kufuphi nedolophu yaseUkraina, eManitoba, apho abazali bam uMichael noAnna Didur, babenefama encinane khona. UTata wayesebenza esiporweni. Ekubeni izindlu zabantu abasebenza esiporweni zazikude nedolophu, zazingeyondawo iphucukileyo yokukhulisela intsapho enkulu, ngoko sahlala efama. Ixesha elininzi uTata wayengabikho ekhaya, ngoko uMama wayenomsebenzi wokusikhulisa. Ngamaxesha athile, wayesishiya aye kuhlala noTata kangangeveki okanye ngaphezulu, kodwa waqala wasifundisa ukupheka, ukubhaka, neminye imisebenzi yasekhaya. Yaye ekubeni sasingamalungu eCawa yamaKatolika yamaGrike, enye yezinto uMama awasifundisa zona sisebancinane yayikukucengceleza imithandazo nokwenza ezinye izithethe zonqulo.
Ukufumana Inyaniso YeBhayibhile
Ndaba nomdla wokwazi iBhayibhile ndiselula. Omnye ummelwane owayeliNgqina likaYehova, wayesityelela rhoqo ukuze asifundele iinxalenye ezithile zeBhayibhile ezithetha ngoBukumkani bukaThixo, iArmagedon, neentsikelelo zehlabathi elitsha. UMama wayengenamdla kwaphela, kodwa abantu ababenomdla yayinguMike noAlex. Eneneni, oko babekufunda kwabenza abavuma ukuya emkhosini ebudeni bemfazwe yehlabathi yesibini. Ngenxa yoko uMike wagwetywa ixesha elifutshane entolongweni, ngoxa yena uAlex wathunyelwa kwinkampu ekusetyenzwa nzima kuyo eOntario. Ekuhambeni kwexesha, uFred noWally nabo bayamkela inyaniso. Noko ke, abakhuluwa bam abathathu abazange bayamkele. Kangangeminyaka emininzi, uMama wayeyichasile inyaniso kodwa kamva wasimangalisa sonke ngokwenza isigqibo sokukhonza uYehova. Wabhaptizwa eneminyaka engama-83 ubudala. UMama wafa eneminyaka engama-96. Ngaphambi kokuba uTata afe naye wayesele eyithanda inyaniso.
Xa ndandineminyaka eli-17 ubudala, ndaya eWinnipeg ukuya kufuna umsebenzi nokuze ndinxulumane nabo babenokundinceda ndifundisise iBhayibhile. Ngelo xesha umsebenzi wamaNgqina kaYehova wawuvaliwe, kodwa iintlanganiso zaziqhutywa rhoqo. Intlanganiso yokuqala endaya kuyo yayiqhutyelwa kwelinye ikhaya. Ekubeni ndandikhuliselwe kunqulo lwamaKatolika lwamaGrike, ekuqaleni, oko ndandikuva kwakuvakala kungaqhelekanga. Noko ke, ngokuthe ngcembe, ndasiqonda isizathu sokuba ilungiselelo lokubakho kwabefundisi namarhamente lalingasekelwanga Zibhalweni nesizathu sokuba uThixo akuchase ukuthandazela imfazwe kwabefundisi. (Isaya 2:4; Mateyu 23:8-10; Roma 12:17, 18) Ukuphila kumhlaba oyiParadesi kwakuvakala kuyeyona nto isengqiqweni kunokuya kuphila ngonaphakade kwindawo ethile ekude.
Ndiqinisekile ukuba le yinyaniso, ndazahlulela kuYehova ndaza ndabhaptizwa ngowe-1942 eWinnipeg. Ngowe-1943 umsebenzi wamaNgqina kaYehova wavulwa eKhanada, yaye umsebenzi wokushumayela wahambela phambili. Inyaniso yeBhayibhile nayo yayingena nzulu entliziyweni yam. Ndafumana ilungelo lokusebenza njengesicaka sebandla nelokuba nenxaxheba kwiphulo lokunikela iintetho kwiintlanganiso zesidlangalala nokusebenza kumhlaba ongabelwanga bani. Ukuya kwiindibano ezinkulu eUnited States kwaba negalelo elikhulu ekukhuleni kwam ngokomoya.
Ukwandisa Inkonzo Yam KuYehova
Ngowe-1950, ndaba nguvulindlela, yaye ngoDisemba waloo nyaka, ndamenywa ukuba ndibe ngumveleli wesiphaluka. Ndaba nelungelo lokuya kufuphi naseToronto ukuze ndiqeqeshwe nguCharlie Hepworth, umzalwana onamava nonyanisekileyo. Kwakhona ndakuvuyela ukuchitha iveki yam yokugqibela yolo qeqesho kunye nomkhuluwa wam uAlex, owayesele ekumsebenzi wesiphaluka eWinnipeg.
Indibano yam yokuqala yesiphaluka, njengoko ichazwe ekuqaleni, andisayi kuze ndiyilibale. Ndandingaqinisekanga enoba izinto zaziza kuhamba kakuhle kusini na. Phofu ke, umveleli wethu wesithili uMzalwan’ uJack Nathan, wasigcina sixakekile yaye sonwabile. Sashwankathela ucwangciso lwendibano yaye abo babenenxaxheba kulo, babekho. Sonke sasibalisa amava, siqhelisela iintshumayelo zasentsimini, indlela yokubuyela, sibonisa nendlela yokuqhuba izifundo zeBhayibhile. Sasicula iingoma zoBukumkani. Ukutya kwakudlal’ abantwana. Sasiphunga ikofu size sitye ipayi phantse rhoqo kwiiyure ezimbini. Bambi balala ezitulweni naseqongeni, ngoxa abanye balala phantsi. NgeCawa kwathi qabu kancinane ukukhithika kangangokuba kwakukho abantu abangama-96 kwintetho yesidlangalala. Oku kwandifundisa indlela yokujamelana neemeko ezinzima.
Isabelo sam sesibini sasikumntla weAlberta, eBritish Columbia, naseYukon Territory, apho ilanga lingatshoniyo khona. Ukuhamba loo mixawuka yeAlaska Highway ukusuka eDawson Creek, eBritish Columbia, ukuya eWhitehorse, eYukon (umgama oziikhilomitha ezili-1 477), nokuhamba ushumayela kwakufuna unyamezelo nobulumko. Imfumba yekhephu, iintaba ezimtyibilizi nezingamathambeka, nokungaboni kakuhle ngenxa yokukhithika kwakulucelomngeni ngokwenene.
Kwandimangalisa ukubona indlela inyaniso eyangena ngayo eFar North. Ngenye imini, mna noWalter Lewkowicz saya kwindlu encinane kufuphi naseLower Post, eBritish Columbia, kwiAlaska Highway kufuphi nomda waseYukon Territory. Sasiqonda ukuba kukho umntu ohlala kule ndlu kuba sasibona isibane siloziza ngefestile encinane. Kwakumalunga nentsimbi yesithoba ebusuku, yaye sankqonkqoza. Indoda eyayingaphakathi yathi masingene, ngoko sangena. Samangaliswa kukubona indoda esele ikhulile ingqengqe ebhedini yayo izifundela iphephancwadi IMboniselo! Eneneni, yayinenkupho entsha kunezo sasiziphethe. Yasixelela ukuba iposi yayo iyithunyelelwa ngenqwelo-moya. Ekubeni ngeli xesha sasineentsuku ezingaphezu kwezisibhozo simkile ebandleni, sasingenawo amaphephancwadi amatsha. Le ndoda yathi inguFred Berg, yaye nangona yayirhumela kangangeminyaka, yayiqala ukutyelelwa ngamaNgqina kaYehova. UFred wasicela ukuba silale. Sakwazi ukumchazela iinyaniso ezininzi zeZibhalo saza salungiselela ukuba amanye amaNgqina adlula rhoqo kule ndawo amtyelele.
Kangangeminyaka emininzi ndiye ndasebenza kwiziphaluka ezithathu ezincinane. Ezi ziphaluka zazisusela eGrande Prairie, eAlberta, empuma ukusa eKodiak, eAlaska, entshona, umgama ongaphezu kweekhilomitha ezingama-3 500.
Kwandivuyisa gqitha ukufumanisa ukuba, kwiindawo ezisemaphandleni, njengakwezinye iindawo, uYehova ubonakalisa ububele bakhe obungasifanelanga kubo bonke abantu nokuba umoya kaThixo uchukumisa iingqondo neentliziyo zabo banotyekelo olufanelekileyo ngobomi obungunaphakade. Omnye umntu owayenjalo yayinguHenry Lepine waseDawson City, eYukon, ngoku ebizwa ngokuba yiDawson. UHenry wayehlala kude nedolophu. Enyanisweni, akazange akhe aphume kumgodi wegolide kangangeminyaka engaphezu kwama-60. Noko ke, umoya kaYehova wenza ukuba le ndoda ineminyaka engama-84 ubudala ihambe iikhilomitha ezingaphezu kwe-1 600 ukuya kwindibano yesiphaluka eAnchorage, nangona yayingazange ikhe iye kwintlanganiso yebandla. Yakuvuyela ukubakho kolo cwangciso nokunxulumana nabanye. Emva kokubuya kwakhe eDawson City, uHenry wahlala ethembekile de wafa. Abaninzi ababemazi uHenry babenomdla wokwazi ngoko kwenza le ndoda yalupheleyo ihambe uhambo olude kangaka. Lo mdla wakhokelela ekubeni iqela labantu abasele baluphele bamkele inyaniso. Ngandlel’ ithile, uHenry wakwazi ukunikela ubungqina obuhle.
Ndafumana Ububele BukaYehova Obungasifanelanga
Ngowe-1955, kwandivuyisa gqitha ukufumana isimemo sokuya kwiklasi yama-26 kwiSikolo seBhayibhile seWatchtower saseGiliyadi. Olu qeqesho lomeleza ukholo lwam lwaza lwandinceda ndasondela ngakumbi kuYehova. Emva kokuba ndiphumelele, ndafumana isabelo sokuqhubeka nomsebenzi wesiphaluka eKhanada.
Ndiye ndasebenza ithuba elingangonyaka kwiphondo laseOntario. Kwakhona ndiye ndafumana isabelo sokuya kummandla omhle waseMntla. Ndisenombono weendlela ezintle ezigudle amachibi neentaba eziphakamileyo ezigqunywe likhephu. Ehlotyeni, kwezo ntlambo nakuloo mathafa kuthi qhakra ziintyatyambo ezimibalabala. Kubetha impepho epholileyo yaye namanzi acocekile. Iibhere, iingcuka, amaxhama nezinye iinyamakazi zasendle zidakasa ngaphandle kokuphazanyiswa.
Noko ke, ukusebenza rhoqo eAlaska kulucelomngeni—kungekhona nje kuphela ngenxa yemozulu eguquguqukayo kodwa kwanangenxa yemigama emide. Isiphaluka endandisebenza kuso sasingumgama oziikhilomitha ezingama-3 200 ukusuka empuma ukuya entshona. Ngezo mini, lalingekho ilungiselelo lokuba umveleli wesiphaluka anikwe imoto. Ngokuzithandela abazalwana basekuhlaleni babendisa kwibandla elilandelayo ngeemoto zabo. Noko ke, maxa wambi kwakuye kufuneke ndihambe ndicela ukukhweliswa ngabaqhubi beelori okanye abakhenkethi.
Ngenye imini ndahamba umgama omde kwiAlaska Highway phakathi kweTok Junction, eAlaska, neMile 1202, okanye ingingqi yaseScotty Creek. Iiofisi ezikumda ophakathi kwale mimandla zaziqelelene ngeekhilomitha ezimalunga ne-160. Ndadlula kwiofisi yaseUnited States eseTok ndaza ndakhweliswa sesinye isithuthi umgama omalunga neekhilomitha ezingama-50. Emva koko akuzange kubekho moto idlulayo, ndaza ndahamba ngeenyawo malunga neeyure ezilishumi umgama ongaphezu kweekhilomitha ezingama-40. Ndafumanisa kamva ukuba kungekudala emva kokuba ndidlule ezo ofisi, zonke iimoto zamiswa ngenxa yemfumba yekhephu elaliwe kude kufuphi nalapho. Ezinzulwini zobusuku iqondo lobushushu lehla laya kutsho kuma-23 ngaphantsi kweqondo lomkhenkce ngokukaCelsius, yaye kwakusafuneka ndihambe malunga neekhilomitha ezingama-80 ukuya kwindawo endinokufihla kuyo intloko. Ndandiyifuna ngamandla indawo endinokuphumla kuyo.
Njengoko ndandihamba ndijingxela, ndabona imoto eshiywe ecaleni kwendlela, eyayigqunywe likhephu. Ndandicinga ukuba xa ndandinokungena ngaphakathi ndize ndilale esitulweni, ndandinokufudumala kobu busuku buqhaqhazelisa amazinyo. Ndakwazi ukususa ikhephu ukuze ndivule ucango, xa ndingena ndafika kungekho kwazitulo ezo. Okuvuyisayo kukuba, kude kufuphi, ndafumana ixhobongwana elingenamntu. Emva komgudu ndizama ukungena nokubasa umlilo, ndakwazi ukuphumla iiyure ezimbalwa. Ekuseni, ndakhweliswa sesinye isithuthi ukuya kwenye indawo endandiza kuhlala kuyo, apho ndafumana ukutya endandikufuna gqitha ndaza ndabopha iminwe yam eyayenzakele.
UYehova Wenza Umsebenzi Uhambele Phambili EMntla
Utyelelo lwam lokuqala eFairbanks lwalukhuthaza ngokwenene. Sashumayela ngokuphumelelayo entsimini, yaye kweza abantu abanokuba ngama-50 kwintetho yesidlangalala ngaloo Cawa. Sasihlanganisene kwikhaya labavangeli basemazweni elincinane apho uVernor noLorraine Davis babehlala khona. Abantu babekrobe ekhitshini, kwindlu yokulala nasepasejini ukuze baphulaphule le ntetho. Oku kwasenza saqonda ukuba xa kunokubakho iHolo yoBukumkani, umsebenzi wokushumayela uya kuhambela phambili eFairbanks. Ngoko ngoncedo lukaYehova, sathenga isakhiwo esikhulu, esasifudula siyiholo yokudanisa, saza sasifudusela kwindawo efanelekileyo. Kwembiwa iqula, kwaza kwakhiwa izindlu zangasese kwafakwa nezinto zokufudumeza indlu. Kwisithuba nje esingangonyaka, iHolo yoBukumkani yaseFairbanks yayisele isetyenziswa. Emva kokuba ifakelwe ikhitshi, ngowe-1958 le holo yasetyenziselwa indibano yesithili, ekweza kuyo abantu abangama-330.
Kwihlobo lowe-1960, ndahamba uhambo olude ngemoto ndisinge kwikomkhulu lehlabathi lamaNgqina kaYehova eNew York kwisikolo sabo bonke abaveleli abahambahambayo baseUnited States naseKhanada. Ngoxa ndandilapho, uMzalwan’ uNathan Knorr nabanye abazalwana abakhokelayo babuza uluvo lwam ngokuphathelele ukumiselwa kweofisi yesebe eAlaska. Kwiinyanga ezimbalwa kamva, kwasivuyisa ukuva ukuba ukususela ngoSeptemba 1, 1961, iAlaska iza kuba neofisi yayo yesebe. UMzalwan’ uAndrew K. Wagner wabelwa ukuba anyamekele eli sebe. Yena nomfazi wakhe, uVera, babesebenze iminyaka engama-20 eBrooklyn yaye benamava nangomsebenzi wokuhambahamba. Ukumiselwa kweofisi yesebe eAlaska kwaba luncedo gqitha, kuba kwanciphisa umsebenzi owawusenziwa ngumveleli ohambahambayo kwaza kwamenza wakwazi ukunikela ingqalelo kwiingxaki ezithile zamabandla nakwimihlaba ekwanti.
Ihlobo lowe-1962 yayisisihlandlo semigcobo eMntla. Kwanikezelwa isebe laseAlaska, yaye kwakukho nendibano yesithili eJuneau, eAlaska. Kwakhiwa iiHolo zoBukumkani ezintsha eJuneau naseWhitehorse, eYukon, yaye kwamiselwa amaqela akwanti amatsha.
Ukubuyela EKhanada
Kangangeminyaka emininzi, ndandibhalelana noMargareta Petras waseKhanada. UReta, njengoko wayebizwa njalo, waqalisa ukuba nguvulindlela ngowe-1947, ngowe-1955 waphumelela eGiliyadi waza wanguvulindlela kwimpuma yeKhanada. Ndamcela ukuba sitshate, yaye wavuma. Satshata ngoFebruwari 1963 eWhitehorse. Kwakuloo nyaka, ekwindla, ndafumana isabelo sokuya kwintshona yeKhanada, yaye sakuvuyela ukusebenza apho iminyaka engama-25.
Ngenxa yempilo, ngowe-1988 safumana isabelo sokuba ngoovulindlela abakhethekileyo eWinnipeg, eManitoba. Oku kwakuquka ukunyamekela iHolo yeNdibano kangangeminyaka emihlanu. Kangangoko kusemandleni ethu, siba nenxaxheba kulo msebenzi uvuyisayo wokwenza abafundi. Kumsebenzi wesiphaluka, sasiqalisa izifundo zeBhayibhile ezininzi zize ziqhutywe ngabanye. Ngoku, ngenxa yobubele bukaYehova obungasifanelanga, siyaziqalisa yaye kusivuyisa ngakumbi ukubona ezi zifundo zisenza inkqubela de zizahlulele zize zibhaptizwe.
Ndiqinisekile ukuba ukukhonza uYehova yeyona ndlela ibalaseleyo ebomini. Kunentsingiselo yaye kuyanelisa, yaye suku ngalunye kulwenza nzulu uthando lwethu ngoYehova. Oku kuzisa ulonwabo lokwenene. Enoba sifumene siphi isabelo sobuthixo, okanye sikwiyiphi na indawo, siyavumelana nomdumisi owathi: “Banoyolo abantu abaThixo wabo unguYehova!”—INdumiso 144:15.
[Umfanekiso okwiphepha 24, 25]
Kumsebenzi wesiphaluka
[Umfanekiso okwiphepha 25]
Sityelele uHenry Lepine eDawson City. Mna ndingasekhohlo
[Umfanekiso okwiphepha 26]
IHolo yoBukumkani yokuqala yaseAnchorage
[Umfanekiso okwiphepha 26]
Mna noReta, ngowe-1998