Imibuzo Evela Kubafundi
UYehova wabavumela abakhonzi bakhe bamandulo, amaSirayeli, ukuba babe nesithembu, kodwa akasivumeli namhlanje. Ngaba imigaqo yakhe itshintshile?
UYehova akayitshintshanga indlela asijonga ngayo isithembu. (INdumiso 19:7; Malaki 3:6) Kwasekuqaleni akazange alungiselele ukuba abantu babe nesithembu, yaye oko kusenjalo nanamhlanje. Xa wadala uEva njengomfazi ka-Adam, uYehova wawuchaza umgaqo wakhe wokuba indoda ifanele ibe nomfazi omnye. “Kungenxa yoko le nto indoda iya kumshiya uyise nonina, inamathele emfazini wayo baze babe nyama-nye.”—Genesis 2:24.
Xa uYesu Kristu wayesemhlabeni, waphinda wakugxininisa oku xa wayephendula abo babebuza ngokuqhawula umtshato nokuphinda utshate. Wathi: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’? Ngako oko abasebabini, kodwa banyama-nye.” UYesu wongezelela esithi: “Ndithi kuni nabani na oqhawula umtshato nomfazi wakhe, ngaphandle kwangesizathu sohenyuzo, aze atshate nomnye uyakrexeza.” (Mateyu 19:4-6, 9) Kucacile ke ngoko ukuba, ukuthabatha abafazi abaninzi kukukrexeza.
Ngoko ke, kwakutheni ukuze isithembu sivunyelwe mandulo? Khumbula ukuba asingoYehova owaqalisa lo mkhwa. Owokuqala ukukhankanywa eBhayibhileni owayenesithembu yayinguLameki, unyana kaKayin. (Genesis 4:19-24) Xa uYehova wazisa uMkhukula ngomhla kaNowa, uNowa wayenomfazi omnye yaye kwakunjalo nangoonyana bakhe abathathu. Bonke ababenabafazi abaninzi batshabalala ngoMkhukula.
Kwiinkulungwane kamva xa uYehova wayekhetha amaSirayeli ukuba abe ngabantu bakhe, amanye kuwo ayesele enesithembu, nangona kubonakala ukuba kwakuyinto eqheleke ngakumbi ukuba nomfazi omnye. UThixo akazange ayalele ukuba iintsapho ezazinesithembu zahlukane. Kunoko, wabeka imithetho engqongqo yokulawula isithembu.—Eksodus 21:10, 11; Duteronomi 21:15-17.
Ukubonisa ukuba isithembu sasivunyelwe okwexeshana, asingoYesu nje kuphela owathetha ngomgaqo kaYehova wantlandlolo ngomtshato kodwa noPawulos wenjenjalo ngoxa wayephefumlelwe ngumoya oyingcwele kaThixo. Wathi: “Ndoda nganye mayibe nowayo umfazi yaye umfazi ngamnye abe neyakhe indoda.” (1 Korinte 7:2) Kwakhona uPawulos waphefumlelwa ukuba abhale athi nayiphi na indoda emiselwa njengomveleli okanye isicaka solungiselelo kwibandla lamaKristu imele ibe ‘yindoda yamfazi mnye.’—1 Timoti 3:2, 12; Tito 1:6.
Ngaloo ndlela, uYehova wasiphelisa isithembu ngexesha lokusekwa kwebandla lamaKristu kwiminyaka enokuba ngama-2 000 eyadlulayo. Ngelo xesha, umgaqo womtshato wabuyela kwinto owawuyiyo ekuqaleni xa uThixo wadala indoda nomfazi: umyeni omnye, nomfazi omnye. Lowo ngumgaqo abantu bakaThixo abawulandelayo namhlanje kulo lonke ihlabathi.—Marko 10:11, 12; 1 Korinte 6:9, 10.