Unokuzenza Njani Izigqibo Zobulumko?

“UMNTU osisilumko uya kuphulaphula aze angenise uyalelo olungakumbi,” watsho njalo uSolomon, ukumkani wakwaSirayeli wamandulo. Inkoliso yethu ikhe yazenza izigqibo ezingezozabulumko kuba nje siye sakutyeshela ukuphulaphula icebiso labanye.—IMizekeliso 1:5.

Loo mazwi kaSolomon kamva abhalwa eBhayibhileni, kunye neminye “imizekeliso engamawaka amathathu” awayibhalayo. (1 Kumkani 4:32) Ngaba sinokuzuza ekwazini nasekuthobeleni amazwi akhe obulumko? Ewe. Kuba asinceda ‘sazi ubulumko nengqeqesho, siqonde amazwi okuqonda, sifumane ingqeqesho enika ingqiqo, ubulungisa nomgwebo nokuthe tye.’ (IMizekeliso 1:2, 3) Makhe siqwalasele imigaqo emihlanu esekelwe eBhayibhileni enokusinceda ekwenzeni izigqibo zobulumko.

Cinga Ngemiphumo Eya Kuhlala Ixesha Elide

Ezinye izigqibo ziya kuba nemiphumo ebalulekileyo. Ngoko ke, zama kusengaphambili ukufumanisa ukuba yiyiphi loo miphumo. Lumka ungakhohliswa ziinzuzo zokwexeshana, nto leyo enokubangela ungayiboni imiphumo eya kuhlala ixesha elide. IMizekeliso 22:3 iyalumkisa: “Onobuqili ubona intlekele azifihle, kodwa abangenamava bayadlula baze bafumane isohlwayo.”

Kusenokuba luncedo ukubhala phantsi imiphumo yokwexeshana neya kuhlala ixesha elide. Ukukhetha umsebenzi othile ohlawula imali engakumbi nowonwabisayo kusenokuba yimiphumo yokwexeshana. Kodwa ngaba imiphumo eya kuhlala ixesha elide iquka ukuba nomsebenzi ongenakwenza nkqubela kuwo? Ngaba lo msebenzi unokufuna ukuba ufudukele kwenye indawo, mhlawumbi kude nabahlobo okanye intsapho? Ngaba uza kukubangela ube kwindawo engafanelekanga okanye engabangel’ umdla ize ikwenze uzive udimazekile? Cingisisa nzulu ngalo mbandela, uze ugqibe ngoko kuza kuqala.

Ziphe Ixesha Elaneleyo

Izigqibo ezenziwe ngokungxama ngokulula zisenokuba ayizizo ezobulumko. IMizekeliso 21:5 iyalumkisa: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” Ngokomzekelo, abakwishumi elivisayo abanentabatheko bafanele baziphe ixesha ngaphambi kokuba benze isigqibo sokutshata. Kungenjalo, basenokuwangqina eyinyaniso amazwi kaWilliam Congreve, umbhali wemidlalo yesiNgesi ngakusekuqaleni kwenkulungwane ye-18, owathi: “Ukutshata ngokungxama, kusenokusenza sizisole ithuba elide.”

Noko ke, ukuzipha ixesha elaneleyo akuthethi ukuzilazila. Ezinye izigqibo zibaluleke kakhulu kangangokuba kububulumko ukuzenza ngokukhawuleza kangangoko kunokwenzeka. Ukuzilazila ngokungeyomfuneko kunokuba yingozi kuthi nakwabanye. Ukukubekel’ amangomso ukwenza isigqibo nako kusenokuba sisigqibo—ekusenokwenzeka ukuba ayisiso esobulumko.

Lamkele Icebiso

Ekubeni iimeko zingafani, kusenokwenzeka ukuba abantu ababini basenokungenzi sigqibo esifanayo xa bejamelene nengxaki efanayo. Sekunjalo, kuluncedo ukuva indlela abanye abaye basenza ngayo isigqibo kwimibandela efana neyethu. Babuze indlela abasijonga ngayo isigqibo abasenzileyo. Ngokomzekelo, xa ukhetha umsebenzi wokuziphilisa, cela abo sele bewenza lo msebenzi bakuxelele izinto ezintle nezimbi ngawo. Ziziphi iinzuzo abaye bazifumana ngenxa yokhetho abalwenzileyo yaye baye bajamelana nawaphi amanzithinzithi okanye iingozi?

Nasi isilumkiso: “Amacebo ayatshitsha apho kungekho gqugula, kodwa ngobuninzi babacebisi kukho okufezwayo.” (IMizekeliso 15:22) Kakade ke, xa sifuna icebiso size sifunde nakwabanye, simele senjenjalo sisazi ukuba sithi abamele benze isigqibo yaye kwakhona siya kumelana nemiphumo yokhetho lwethu.—Galati 6:4, 5.

Siphulaphule Isazela Esiqeqeshwe Kakuhle

Isazela sinokusinceda senze izigqibo ezivisisana nemigaqo esisiseko esikhetha ukuphila ngayo. UmKristu ufanele aqeqeshe isazela sakhe ukuze sivisisane neengcamango zikaThixo. (Roma 2:14, 15) ILizwi likaThixo liyasixelela: “Uze umgqale yena ezindleleni zakho zonke, kwaye uya kuwenza uthi tye umendo wakho.” (IMizekeliso 3:6) Kakade ke, kwezinye iimeko abantu ababini—abanezazela eziqeqeshwe kakuhle—banokwenza izigqibo ezingafaniyo.

Noko ke, xa isazela siqeqeshwe kakuhle asisayi kuvumelana nezenzo ezigatywa ngokucacileyo liLizwi likaThixo. Ngokomzekelo, isazela esingaqeqeshwanga ngemigaqo yeBhayibhile sinokubangela indoda nebhinqa bahlale kunye ngaphambi kokuba batshate kuba befuna ukubona enoba bayafanelana kusini na. Basenokucinga ukuba benze isigqibo sobulumko, besithi oko kuya kubathintela ukuba bangangxami batshate nomntu ongafanelekanga. Isazela sabo sisenokungabakhathazi. Sekunjalo, nabani na onembono kaThixo ngesini nomtshato unokugqiba kwelokuba angabandakanyeki kwilungiselelo lokwexeshana elinjalo nelokuziphatha okubi.—1 Korinte 6:18; 7:1, 2; Hebhere 13:4.

Indlela Izigqibo Zakho Ezibachaphazela Ngayo Abanye

Ngamaxesha amaninzi, izigqibo zakho zinokubachaphazela abanye. Ngoko ke ungaze ngabom wenze isigqibo esingesosabulumko—mhlawumbi nesibubuyatha—esinokonakalisa ulwalamano lwakho oluxabisekileyo nabahlobo nezalamane, okanye nangaphezu kwako konke noThixo. IMizekeliso 10:1 ithi: “Unyana olumkileyo umenza abe nemihlali uyise, unyana osisiyatha uyintlungu kanina.”

Kwelinye icala, yazi ukuba ngamanye amaxesha kuya kufuneka ukhethe obona buhlobo bubalulekileyo. Ngokomzekelo, unokugqiba kwelokuba uzishiye iimbono zangaphambili zonqulo ozaziyo ngoku ukuba azivisisani neZibhalo. Okanye unokugqiba kwelokuba wenze utshintsho olukhulu kubuntu bakho kuba ufuna ukuphila ngemigaqo kaThixo oye wayamkela. Isigqibo sakho sisenokungabakholisi abanye babahlobo okanye izalamane zakho, kodwa nasiphi na isigqibo esikholisa uThixo sisigqibo sobulumko.

Ngobulumko Yenza Esona Sigqibo Sibalulekileyo

Nangona abantu abaninzi bengazi, wonke ubani namhlanje umele enze isigqibo esithetha ubomi okanye ukufa. AmaSirayeli amandulo awayemise iintente kumda weLizwe Lesithembiso ngowe-1473 B.C.E. ayekwimeko efanayo. Esisithethi sikaThixo, uMoses wathi kuwo: “Ndibeke phambi kwakho ubomi nokufa, intsikelelo nesiqalekiso; nyula ke ubomi ukuze uphile, wena nenzala yakho, ngokuthi umthande uYehova uThixo wakho, uliphulaphule ilizwi lakhe, unamathele kuye; ngokuba ububomi bakho nokolulwa kwemihla yakho, ukuze uhlale emhlabeni lowo uYehova awafunga kookhokho bakho uAbraham, uIsake noYakobi ukuba wobanika wona.”—Duteronomi 30:19, 20.

Iziprofeto nobalo-maxesha lweBhayibhile zibonisa ukuba siphila ‘kumaxesha amanqam ekunzima ukujamelana nawo’ kwaye “imeko yeli hlabathi iyatshintsha.” (2 Timoti 3:1; 1 Korinte 7:31) Le nguqu ixelwe kwangaphambili iya kufikelela kwincopho ngokutshatyalaliswa kwenkqubo yabantu ephelelwe yimigaqo yokuziphatha, eya kuthatyathelw’ indawo lihlabathi elitsha likaThixo lobulungisa.

Sisemgubasini welo hlabathi litsha. Ngaba uya kungena ukuze afumane ubomi obungunaphakade emhlabeni kuBukumkani bukaThixo? Okanye uya kutshatyalaliswa emhlabeni xa inkqubo kaSathana itshatyalaliswa? (INdumiso 37:9-11; IMizekeliso 2:21, 22) Ngoku umele wenze isigqibo ngoko ukukhethayo, yaye eso sisigqibo esibandakanya ubomi nokufa. Ngaba uyafuna ukuncedwa ukuze wenze isigqibo esifanelekileyo, esibubulumko?

Ukwenza isigqibo esiya kukukhokelela ebomini kuquka ukuqala ufunde ngemilinganiselo kaThixo. Ubukhulu becala iicawa ziye zasilela ukufundisa ngokuchanileyo ngale milinganiselo. Iinkokeli zazo ziye zalahlekisa abantu ukuba bakholelwe kubuxoki baze benze izinto ezingamkholisiyo uThixo. Ziye zakutyeshela ukucacisa ukubaluleka kokwenza isigqibo sobuqu sokukhonza uThixo “ngomoya nenyaniso.” (Yohane 4:24) Yiloo nto abantu abaninzi bengakwenzi oko. Kodwa phawula oko uYesu wakuthethayo: “Lowo ungekho ngakum unxamnye nam, nalowo ungahlanganisi kunye nam uyachithachitha.”—Mateyu 12:30.

AmaNgqina kaYehova ayakuvuyela ukunceda abantu bafumane ulwazi olungakumbi ngeLizwi likaThixo. Aqhuba izifundo zeBhayibhile nabantu okanye namaqela ngexesha nakwindawo ebalungeleyo. Abantu abafuna ukulixhakamfula eli thuba bafanele baqhagamshelane namaNgqina asekuhlaleni okanye babhalele kubapapashi beMboniselo.

Kakade ke, kusenokwenzeka ukuba abanye sebenolwazi olusisiseko ngoko uThixo akufunayo. Kusenokwenzeka ukuba bayaqiniseka ukuba iBhayibhile inyanisile kwaye inokuthenjwa. Sekunjalo, abaninzi baye bazilazila ukwenza isigqibo sokuzahlulela kuThixo. Ngoba? Kusenokwenzeka ukuba banezizathu ezahlukahlukeneyo.

Ngaba kunokwenzeka ukuba abakuboni ukubaluleka kokwenjenjalo? Ngokucacileyo uYesu wathi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.” (Mateyu 7:21) Ulwazi lweBhayibhile lulodwa alwanele; kufuneka isenzo. Ibandla lokuqala lamaKristu lamisela umzekelo. Sifunda oku ngabanye benkulungwane yokuqala: “Xa bamkholelwayo uFilipu, owayevakalisa iindaba ezilungileyo zobukumkani bukaThixo nezegama likaYesu Kristu, babhaptizwa, amadoda nabafazi.” (IZenzo 2:41; 8:12) Ngoko ke, ukuba umntu ulamkele ngentliziyo yakhe yonke iLizwi likaThixo, uyalikholelwa, yaye uphila ngokwemilinganiselo kaThixo, yintoni emthintela ukuba abhaptizwe efuzisela uzahlulelo lwakhe? (IZenzo 8:34-38) Kakade ke, ukuze ubani amkeleke kuThixo, ufanele athabathe eli nyathelo ngokuzithandela yaye evuya.—2 Korinte 9:7.

Abanye basenokuvakalelwa kukuba abanalwazi lwaneleyo ukuze bahlulele ubomi babo kuThixo. Kodwa nabani na oqala into entsha ebomini akabi nalwazi lwaneleyo ngaloo nto. Yiyiphi ingcali enokuthi into eyaziyo ngoku yayisele iyazi xa yayiqala ukwenza umsebenzi wayo? Ukwenza isigqibo sokukhonza uThixo kufuna ulwazi olusisiseko lweemfundiso nemigaqo yeBhayibhile, kwakunye nomnqweno wokuphila ngayo.

Ngaba abanye bayazilazila ukwenza isigqibo kuba besoyika ukuba abasayi kuphila ngokwesigqibo sabo? Kwizinto ezininzi abantu baba nexhala elifanelekileyo lokuba banokusilela kwinto ethile. Umntu ogqibe kwelokuba atshate aze abe nentsapho usenokungazithembi ngandlel’ ithile, kodwa ukwenza isibhambathiso kusenokumenza azimisele ukwenza okusemandleni akhe. Ngokufanayo, umntu oselula osandul’ ukufumana iphepha-mvume lokuqhuba unokuba noloyiko lokwenza ingozi—ingakumbi xa esazi ukuba inani leengozi ezenziwa ngabantu abaselula liphakamile kunelabantu abadala. Noko ke, olu lwazi lunokumnceda, lumbangele ukuba aqhube kakuhle. Akusayi kumnceda ukuhlala nje angalifumani iphepha-mvume lokuqhuba!

Yenza Isigqibo Esiya Kukukhokelela Ebomini!

IBhayibhile ibonisa ukuba le nkqubo ikhoyo yezobupolitika, yezoqoqosho, neyonqulo nabo bayixhasayo kungekudala baza kutshatyalaliswa emhlabeni. Sekunjalo, abantu abaye benza isigqibo sobulumko esiya kubakhokelela ebomini nabaphila ngokuvisisana naso, baya kuphila. Njengesiseko sebutho lehlabathi elitsha, baya kuba nenxaxheba ekwenzeni umhlaba ube yiparadesi, njengoko uThixo wayefuna. Ngaba, xa usalathiswa nguThixo, uya kukuvuyela ukuba nenxaxheba kulo msebenzi uvuyisayo?

Ukuba kunjalo, yenza isigqibo sokufundisisa iLizwi likaThixo. Yenza isigqibo sokufunda ngoko uThixo akufunayo ukuze umkholise. Yenza isigqibo ngokwenza oko akufunayo. Ngaphezu kwako konke, yenza isigqibo sokuphila ngokwesigqibo sakho kude kube sekupheleni. Ngamafutshane, yenza isigqibo esiya kukukhokelela ebomini!

[Imifanekiso ekwiphepha 4]

Ziphe ixesha elaneleyo lokwenza izigqibo ezibalulekileyo

[Umfanekiso okwiphepha 5]

Lamkele icebiso xa ukhetha umsebenzi wokuziphilisa

[Imifanekiso ekwiphepha 7]

Abo benza isigqibo sokukhonza uThixo ngoku baya kuba nenxaxheba ekwenzeni umhlaba ube yiparadesi