Ibali Lobomi

Ukufundiswa NguYehova Ukususela Ebutsheni Bam

KUBALISA URICHARD ABRAHAMSON

“Owu Thixo, undifundise ukususela ebutsheni bam, yaye kude kube ngoku ndiqhubeka ndixela imisebenzi yakho emangalisayo.” Makhe ndikuchazele isizathu sokuba loo mazwi eNdumiso 71:17 enentsingiselo ekhethekileyo kum.

NGOWE-1924 uMama, uFannie Abrahamson, watyelelwa ngaBafundi beBhayibhile, njengoko amaNgqina kaYehova ayebizwa ngaloo ndlela. Ndandinonyaka kuphela ubudala. Njengoko uMama wayefundiswa iinyaniso zeBhayibhile, wayesiya kubamelwane bakhe aze abaxelele ngezinto azifundileyo, kwakhona wayefundisa mna, umkhuluwa wam nodadewethu. Ngaphambi kokuba ndikwazi ukufunda, wandifundisa ukwazi ngentloko izibhalo ezininzi ezingeentsikelelo zoBukumkani bukaThixo.

Ekupheleni kweminyaka yee-1920 iqela lethu laBafundi beBhayibhile eLa Grande, kwiphondo laseOregon, eUnited States apho ndazalelwa ndaza ndakhulela khona, lalineqaqobana lamabhinqa nabantwana. Nangona sasikwanti, sasityelelwa kanye okanye kabini ngonyaka ngabalungiseleli abahambahambayo, ababesaziwa ngokuba ngabahambi ngezonqulo. Babenikela iintetho ezilukhuthazo, behamba nathi kubulungiseleli bendlu ngendlu yaye benomdla ebantwaneni. Phakathi kwabo bathandekayo yayinguShield Toutjian, uGene Orrell noJohn Booth.

Ngowe-1931 akukho namnye kwiqela lethu owakwaziyo ukuya kwindibano eyayiseColumbus, eOhio, apho aBafundi beBhayibhile bamkela igama elithi amaNgqina kaYehova. Kodwa amaqela, njengoko amabandla ayebizwa ngaloo ndlela, namaqela akwanti angazange akwazi ukuya kule ndibano ahlanganisana ekuhlaleni ngaloo Agasti ukuze amkele eli gama. Iqela lethu elincinane eLa Grande lenza okufanayo. Kwandula ke, kwiphulo langowe-1933 lokusasazwa kwencwadana ethi The Crisis, ndagcina ngentloko intshumayelo yeBhayibhile ndaza ndanikela ubungqina kwindlu ngendlu okwesihlandlo sokuqala.

Ebudeni beminyaka yee-1930, inkcaso yayisanda kumsebenzi wethu. Ukuze sikwazi ukujamelana noku, amaqela ahlanganiswa angamacandelo, awayesiba neendibano ezincinane kanye okanye kabini ngonyaka aze abe namaphulo okushumayela ngokwamaqela, awayesaziwa ngokuba ngamaphulo amacandelo. Kwezi ndibano, sasifundiswa indlela yokushumayela nendlela yokusebenzisana ngentlonelo namapolisa awayesiphazamisa. Ekubeni amaNgqina ayedla ngokusiwa kumphathi wamapolisa okanye kwinkundla yamatyala, sasiye siqhelisele amazwi abhalwe kuxwebhu olubizwa ngokuthi Indlela Yokusingatha Amatyala. Oko kwasenza sakwazi ukumelana nentshutshiso.

Ukukhula Kolwazi Lwenyaniso YeBhayibhile

Uxabiso lwam lwalukhula ngakumbi ngeenyaniso zeBhayibhile nethemba elisekelwe eBhayibhileni lokuphila emhlabeni ngonaphakade phantsi koBukumkani bukaThixo basezulwini. Ngelo xesha, ubhaptizo lwalungagxininiswa kangako kwabo bangenathemba lokulawula noKristu ezulwini. (ISityhilelo 5:10; 14:1, 3) Sekunjalo, ndaxelelwa ukuba, ukuba ndigqibe entliziyweni yam ukwenza ukuthanda kukaYehova, kuya kuba kuhle ukuba ndibhaptizwe. Ngoko ke ndenjenjalo ngoAgasti 1933.

Xa ndandineminyaka eli-12 ubudala, utitshalakazi wam waphawula ukuba ndinesiphiwo sokuthetha esidlangalaleni, ngoko wacenga uMama ukuba enze ilungiselelo lokuba ndifumane uqeqesho olungakumbi. UMama wacinga ukuba oku kwakunokundinceda ndikhonze uYehova kakuhle nangakumbi. Ngoko ke izifundo zam wayezihlawula ngemali awayeyifumana ngokuhlamba kangangonyaka iimpahla zikatitshalakazi owayendifundisa. Olu qeqesho lwaba luncedo kubulungiseleli bam. Xa ndandineminyaka eli-14 ubudala, ndaba nesifo samathambo, esandilalisa phantsi isithuba esingaphezu konyaka.

Ngowe-1939 umlungiseleli wexesha elizeleyo uWarren Henschel weza kummandla wethu.a Ngokomoya, wayengumkhuluwa kum, ehamba nam imini yonke entsimini. Kungekudala wandinceda ukuba ndiqalise inkonzo yobuvulindlela obuthe ngxi bokwexeshana. Ngelo hlobo, salungelelaniswa saliqela. UWarren wamiselwa njengesicaka seqela, yaye mna ndamiselwa njengomqhubi weSifundo seMboniselo. Emva kokuba uWarren eye eBheteli, kwikomkhulu lehlabathi lonke lamaNgqina kaYehova eBrooklyn, eNew York, ndaba sisicaka seqela.

Ukuqalisa Inkonzo Yexesha Elizeleyo

Imbopheleleko eyongezelelekileyo yokuba sisicaka seqela yawomeleza ngakumbi umnqweno wam wokuba kwinkonzo yexesha elizeleyo, nto leyo endayenzayo xa ndandineminyaka eli-17 ubudala emva kokugqiba unyaka wam wesithathu kwisikolo samabanga aphakamileyo. Utata wayengakholwa, kodwa wayesondla yaye esiqeqesha kakuhle. Wayefuna ndiye ekholejini. Noko ke, wathi ndingenza nantoni na endiyifunayo ukuba nje andizi kuyifuna kuye imali yendawo yokuhlala neyokutya. Ngoko ngoSeptemba 1, 1940 ndaba nguvulindlela.

Xa ndandihamba ekhaya, umama wathi mandifunde IMizekeliso 3:5, 6 ethi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.” Yaye eneneni, ukusoloko ndithembele ngoYehova kuye kwandinceda gqitha.

Kungekudala, ndasebenza kubulungiseleli kunye noJoe noMargaret Hart emntla wombindi weLizwana laseWashington. Lo mmandla wawunezinto ezahlukahlukeneyo—iifama zeenkomo nezeegusha, indawo ehlala amaIndiya, kuquka needolophana ezininzi. Ngentwasahlobo yowe-1941, ndamiselwa njengesicaka seqela kwibandla laseWenatchee, eWashington.

Kwenye yeendibano zethu eWalla Walla, eWashington, ndandingumlindi, ndisamkela abo babengena eholweni. Ndabona omnye umzalwana oselula exakekile ezama ukulungisa isandisi-lizwi. Ndamcebisa ukuba enze isabelo sam yaye mna ndiza kwenza esakhe. Xa uAlbert Hoffman, osisicaka senqila, wabona ukuba ndisishiyile isabelo sam, wandichazela enoncumo lobuhlobo ukubaluleka kokuba ubani ahlale kwisabelo sakhe de anikwe esinye. Isiluleko sakhe ndisasikhumbula nanamhlanje.

NgoAgasti 1941, amaNgqina kaYehova aceba ukuba nendibano enkulu eSt. Louis, eMissouri. AbakwaHart babeka uphahla baza bafaka izitulo kwilori yabo. Sahamba singoovulindlela abasithoba iikhilomitha ezingama-2 400 ukuya eSt. Louis ngaloo lori. Sathabatha iveki ukuya neveki ukubuya. Endibanweni, elinye ipolisa laqikelela ukuba incopho yababezile yayili-115 000. Nangona ababezile basenokuba babengaphantsi kwelo nani, ngokuqinisekileyo babengaphezu kwenani lamaNgqina aseUnited States, awayemalunga nama-65 000 ngelo xesha. Le ndibano yasomeleza ngokwenene ngokomoya.

Ukukhonza KwiBheteli YaseBrooklyn

Emva kokubuyela eWenatchee, ndafumana ileta eyayindicela ukuba ndiye kukhonza kwiBheteli yaseBrooklyn. Ekufikeni kwam ngo-Oktobha 27, 1941, ndasiwa kwiofisi kaNathan H. Knorr, umveleli wesebe lokushicilela. Ngobubele wandichazela ukuba iBheteli yindawo enjani waza wagxininisa into yokuba ukunamathela ngokusondeleyo kuYehova yinto ebalulekileyo ukuze ubani aphumelele apho. Emva koko ndasiwa kwiSebe Lokuthumela ndaza ndanikwa umsebenzi wokubophelela iibhokisi zokuthumela iincwadi.

NgoJanuwari 8, 1942, kwafa uJoseph Rutherford, owayekhokela amaNgqina kaYehova ehlabathini lonke. Kwiintsuku ezintlanu kamva abalathisi boMbutho banyula uMzalwan’ uKnorr ukuba angene endaweni yakhe. Xa uW. E. Van Amburgh, onexesha elide engunobhala okwangunondyebo woMbutho wayexelela intsapho yaseBheteli oku, wathi: “Ndisakhumbula xa kwafa uC. T. Russell [ngowe-1916] kwaza kwangena uJ. F. Rutherford ezihlangwini zakhe. INkosi yaqhubeka iwalathisa yaye iwusikelela umsebenzi Wayo. Ngoku, njengokuba umongameli inguNathan H. Knorr ndilindele ukuba umsebenzi uhambele phambili kuba lo ngumsebenzi weNkosi, kungekhona owomntu.”

NgoFebruwari 1942, kwenziwa isaziso sokuba kuza kuqaliswa “iZifundo Ezikumgangatho Ophakamileyo kuBulungiseleli Bobuthixo.” Zazilungiselelwe ukuba ziqeqeshe abo baseBheteli ukuze baphucule indlela abenza ngayo uphando kwimixholo yeBhayibhile, ukulungiselela kakuhle inkcazelo yabo nokuyinikela ngokuphumelelayo. Ngenxa yokuncedwa luqeqesho endalufumanayo lokuthetha esidlangalaleni, ndakwazi ukwenza inkqubela ngokukhawuleza kolu cwangciso.

Kungekudala, ndafumana isabelo sokusebenza kwiSebe Lenkonzo, elalathisa ubulungiseleli bamaNgqina aseUnited States. Kamva ngaloo nyaka, kwagqitywa kwelokuba kuphindwe kuqaliswe ucwangciso lokuba abalungiseleli batyelele amaqela amaNgqina. Ekuhambeni kwexesha, aba balungiseleli bahambahambayo, ababebizwa ngokuba zizicaka ezikhonza abazalwana, baye babizwa ngokuba ngabaveleli besiphaluka. Ebudeni behlobo lowe-1942, eBheteli kwalungiselelwa izifundo zokuqeqesha abazalwana bokwenza lo msebenzi, yaye ndafumana ilungelo lokuba phakathi kwabo bafumana olo qeqesho. Ndisakhumbula ngokukhethekileyo uMzalwan’ uKnorr, owayengomnye wabaqeqeshi, ebethelela le ngongoma: “Musani ukuzama ukukholisa abantu. Ekugqibeleni akukho mntu niya kumkholisa. Kholisani uYehova, yaye niya kukholisa bonke abo bathanda uYehova.”

Ngo-Oktobha 1942 kwaqaliswa umsebenzi wokuhambahamba. Abanye bethu eBheteli babeba nenxaxheba kuwo ngeempela-veki ezithile, betyelela amabandla aziikhilomitha ezingama-400 akwisiXeko saseNew York. Sasihlola ingxelo yebandla yomsebenzi wokushumayela neyamanani abo baza kwiintlanganiso, sibe nentlanganiso nabo banembopheleleko yokunyamekela ibandla, sinikele intetho enye okanye ezimbini size sisebenze entsimini kunye namaNgqina asekuhlaleni.

Ngowe-1944, ndandiphakathi kwabo bavela kwiSebe Lenkonzo abathunyelwa kumsebenzi wokuhambahamba kangangeenyanga ezintandathu, eDelaware, eMaryland, ePennsylvania naseVirginia. Kamva kangangeenyanga eziliqela, ndatyelela amabandla aseConnecticut, eMassachusetts, nakwisiQithi saseRhode. Ekubuyeleni kwam eBheteli, ndasebenza okwexeshana eofisini noMzalwan’ uKnorr nonobhala wakhe uMilton Henschel, apho ndaye ndaqhelana nomsebenzi wethu owenziwa ehlabathini lonke. Kwakhona ndasebenza okwexeshana kwiOfisi kaNondyebo phantsi kolwalathiso lukaW. E. Van Amburgh nomncedisi wakhe, uGrant Suiter. Kwaza ke, ngowe-1946, ndenziwa umveleli wamasebe amaninzi eBheteli.

Iinguqulelo Ezinkulu Ebomini Bam

Ngoxa ndityelela amabandla ngowe-1945, ndaqhelana noJulia Charnauskas eProvidence, kwisiQithi saseRhode. Phakathi kowe-1947 saceba ukuba sitshate. Ndandikuthanda gqitha ukusebenza eBheteli, sekunjalo ngelo xesha, lalingekho ilungiselelo lokuba iqabane lomtshato nalo lize kukhonza apho. Ngoko ke ngoJanuwari 1948, ndahamba eBheteli, yaye mna noJulia (Julie) satshata. Ndafumana umsebenzi wesingxungxo evenkileni eProvidence, yaye saqalisa umsebenzi wethu wobuvulindlela kunye.

NgoSeptemba 1949, ndamenyelwa kumsebenzi wesiphaluka emntla-ntshona weWisconsin. Kwakulucelomngeni olukhulu kum noJulie ukushumayela kwiidolophana nasemaphandleni elo lizwe lineefama zobisi ezininzi. Ubusika balapho babuthabatha ixesha elide yaye kwakuqengqeleka iiveki kukho ikhephu elikhatshwa ziingqele eziqhaqhazelisa amazinyo. Sasingenayo imoto. Noko ke, kwakusoloko kukho umntu osisa kwibandla elilandelayo.

Kungekudala emva kokuba ndiqalise umsebenzi wesiphaluka, saba nendibano yesiphaluka. Ndikhumbula ndikhangela ngenyameko ukuba yonke imisebenzi yayinyanyekelwa, nto leyo eyayisenza abanye baxhalabe kancinane. Ngoko umveleli wesithili, uNicholas Kovalak, ngobubele wandixelela ukuba abazalwana basekuhlaleni baqhele ukwenza izinto ngendlela yabo yaye andifanele ndizixhalabise ngayo yonke into. Elo cebiso liye landinceda ekwenzeni izabelo ezininzi ukususela ngoko.

Ngowe-1950, ndafumana isabelo sokwexeshana—sokuba ngumveleli wokufuna amagumbi eendwendwe ezize kwezinye zeendibano zethu ezinkulu eYankee Stadium kwisiXeko saseNew York. Le ndibano yayisemagqabini ukususela kusuku lokuqala ukusa kwelokugqibela, kukho iindwendwe ezivela kumazwe angama-67 yaye incopho yabantu ababekho yayili-123 707! Emva kwendibano, mna noJulie saqalisa ubulungiseleli bethu bokuhambahamba. Sasonwabe gqitha kumsebenzi wesiphaluka. Sekunjalo, sasikulungele ukungenela naluphi na uhlobo lwenkonzo yexesha elizeleyo. Ngoko ke, nyaka ngamnye sasizalisa izicelo zokuya eBheteli nakwinkonzo yobuvangeli basemazweni. Ngowe-1952 savuyiswa gqitha kukufumana isimemo sokuya kwiklasi yama-20 yeSikolo seBhayibhile seWatchtower saseGiliyadi, apho safumana uqeqesho lomsebenzi wobuvangeli basemazweni.

Ukukhonza Kwamanye Amazwe

Emva kokuthweswa kwethu izidanga ngowe-1953, sathunyelwa eBritani, apho ndandikumsebenzi wesithili emazantsi eNgilani. Emva kokuba sinethuba elingaphantsi konyaka kulo msebenzi, esasiwunandipha gqitha noJulie, kwasothusa ukufumana isabelo sokuba siye eDenmark. Kwakufuneka umveleli omtsha kwiofisi yesebe eDenmark. Ekubeni ndandikufuphi yaye ndifumene uqeqesho lwalo msebenzi eBrooklyn, ndathunyelwa ukuba ndiye kunceda. Sahamba ngesikhitshane ukuya eNetherlands, yaye ukusuka apho sakhwela uloliwe oya eCopenhagen, eDenmark. Safika ngoAgasti 9, 1954.

Enye yeengxaki ekwakufuneka zilungiswe, yayingabathile ababekwizigxina zembopheleleko ababengalwamkeli ulwalathiso oluvela kwikomkhulu eBrooklyn. Kwakhona, abathathu kwabane ababeguqulela iimpapasho zethu kwisiDanish bahamba eBheteli baza ekugqibeleni bayeka ukunxulumana namaNgqina kaYehova. Kodwa uYehova wayiphendula imithandazo yethu. Oovulindlela ababini, uJørgen noAnna Larsen, ababeguqulela ngamathuba athile, bavuma ukusebenza ngokusisigxina. Ngenxa yoko ukuguqulelwa kwamaphephancwadi ethu kwisiDanish kwaqhubeka ngaphandle kokuphazamiseka. AbakwaLarsen basekwiBheteli yaseDenmark, yaye uJørgen ungumveleli weKomiti yeSebe.

Ebudeni baloo minyaka sasikhuthazwa gqitha kukutyelelwa rhoqo nguMzalwan’ uKnorr. Wayezipha ixesha lokuthetha nomntu ngamnye, ebalisa amava akwenza uqonde indlela yokucombulula iingxaki. Ebudeni botyelelo ngowe-1955, kwagqitywa ekubeni sakhe isebe elitsha elinoomatshini bokushicilela ukuze sishicilele amaphephancwadi aseDenmark. Kwafunyanwa umhlaba kumantla aseCopenhagen, yaye ngehlobo lowe-1957, safudukela kwisakhiwo esitsha. UHarry Johnson, nomfazi wakhe uKarin, ababesandul’ ukufika eDenmark emva kokuphumelela kwiklasi yama-26 yaseGiliyadi, basinceda ekudibaniseni umatshini wethu wokushicilela ukuze usebenze.

Sayiphucula indlela esizilungiselela ngayo iindibano ezinkulu eDenmark, yaye amava endawafumana ngoxa ndandisebenza ngeendibano eUnited States aba luncedo. Ngowe-1961 indibano yethu enkulu yezizwe ngezizwe eCopenhagen yayineendwendwe ezivela kumazwe angaphezu kwama-30. Incopho yababekho yayingama-33 513. Ngowe-1969, saba neyona ndibano inkulu kuzo zonke ezazibanjelwe eScandinavia, eyaba nencopho yabantu abangama-42 073!

Ngowe-1963, ndamenyelwa kwiklasi yama-38 yaseGiliyadi. Ezi yayizizifundo ezilungelelanisiweyo ezithabatha iinyanga ezilishumi ezenzelwe ngokukhethekileyo ukuqeqesha abasebenzi bamasebe. Kwakuluvuyo ukuphinda ndibe kunye nentsapho yakwiBheteli yaseBrooklyn kwanokuzuza kumava abo basebenze kangangeminyaka emininzi benyamekela umsebenzi owenziwa kweli komkhulu.

Emva kwezi zifundo, ndabuyela eDenmark ukuze ndiqhubeke ndinyamekela umsebenzi apho. Ukongezelela, ndafumana ilungelo lokukhonza njengomveleli wecandelo, ndityelela amasebe asentshona nasemantla eYurophu ukuze ndikhuthaze abasebenzi ndize ndibancede baphumeze iimbopheleleko zabo. Kutshanje lo msebenzi ndiye ndawenza eNtshona Afrika nakwiCaribbean.

Ekupheleni kweminyaka yee-1970, abazalwana baseDenmark baqalisa ukukhangela indawo ekunokwakhiwa kuyo isakhiwo esikhulu ngenxa yomsebenzi wokuguqulela nowokushicilela owawusanda. Kwafunyanwa umhlaba omhle malunga neekhilomitha ezingama-60 entshona yeCopenhagen. Ndaba ngomnye wabo babezoba iplani yesi sakhiwo sitsha, yaye mna noJulie sasijonge phambili ukuhlala nentsapho yaseBheteli kwikhaya layo elihle nelitsha. Noko ke, izinto azizange zihambe ngaloo ndlela.

Ukubuyela EBrooklyn

NgoNovemba 1980, mna noJulie samenywa ukuba siye kukhonza kwiBheteli yaseBrooklyn, apho safika ebutsheni bukaJanuwari 1981. Ngelo xesha sasisele siyigabhule iminyaka engama-50 ubudala, yaye emva kokuba sikhonze phantse isiqingatha sobomi bethu kunye nabazalwana bethu noodade abathandekayo eDenmark, kwakungelula ukuba sibuyele eUnited States. Sekunjalo, asizange sihlale sicinga ngendawo esithanda ukuba kuyo kodwa sazama ukunikel’ ingqalelo kwizabelo zethu ezitsha nalo naluphi na ucelomngeni lwazo.

Safika eBrooklyn kwaza kwasekhaya. UJulie wayesebenza kwisebe lezemali, esenza umsebenzi ofana nalowo wayewenza eDenmark. Mna ndasebenza kwiSebe Lokubhala ukuze ndincedise ekwenzeni ucwangciso lweempapasho zethu. Ebutsheni beminyaka yee-1980 yaba lixesha lokutshintsha kwendlela esisebenza ngayo eBrooklyn, njengoko sayeka ukusebenzisa oomatshini bokuchwetheza nokushicilela ngelothe eshushu saza sasebenzisa ikhompyutha nomatshini wokushicilela oyioffset. Ndandingenalwazi ngeekhompyutha kodwa ndandiyiqonda inkqubo yentlangano nendlela yokusebenza nabantu.

Kungekudala emva koko, kwabakho imfuneko yokulungelelanisa indlela yokusebenza kwiSebe Lobugcisa njengoko ngoku sasisebenzisa umatshini oshicilela ngemibalabala. Nangona ndandingenabuchule ekuzobeni, ndandinokunceda ekulungelelaniseni izinto. Ngoko ke ndaba nelungelo lokuba ngumveleli welo sebe kangangeminyaka esithoba.

Ngowe-1992, ndafumana isabelo sokuncedisa iKomiti Yokupapasha yeQumrhu Elilawulayo ndaza emva koko ndasebenza kwiOfisi kaNondyebo. Ndisasebenza kweli sebe lijongene neemali zamaNgqina kaYehova.

Ukukhonza Ukususela Ebutsheni Bam

Ukususela kwiminyaka yam yobutsha nasebudeni beminyaka engama-70 yenkonzo yokuzinikela, ngomonde uYehova uye wandifundisa ngeLizwi lakhe, iBhayibhile nangabazalwana abaluncedo kule ntlangano yakhe imangalisayo. Ndiye ndakunandipha ukuba kubulungiseleli bexesha elizeleyo kangangeminyaka engaphezu kwama-63, yaye engaphezu kwama-55 kuloo minyaka ndikunye nomfazi wam onyanisekileyo, uJulie. Ngokwenene, ndiziva ndisikelelwe kakhulu nguYehova.

Emva phayaa ngowe-1940 xa ndemka ekhaya ukuze ndingenele inkonzo yobuvulindlela, utata wahlekisa ngesigqibo sam waza wathi: “Nyana, njengokuba ushiya ikhaya ukuya kwenza le nto, ungacingi ukuba uza kuza ubaleka ufuna uncedo lwam.” Ukutyhubela iminyaka, akuzange kufuneke ndenjenjalo. UYehova uye wazinyamekela iintswelo zam, ngokusoloko esebenzisa amanye amaKristu aluncedo. Kamva, utata wawuxabisa umsebenzi wethu, wada wenza nenkqubela ekufundeni inyaniso yeBhayibhile ngaphambi kokuba afe ngowe-1972. UMama, owayenethemba lokuphila ezulwini, waqhubeka ekhonza uYehova ngokuthembeka de kwasa ekufeni kwakhe ngowe-1985, eneminyaka eli-102 ubudala.

Nangona kuye kuvele iingxaki kwinkonzo yexesha elizeleyo, mna noJulie asizange sicinge ngokushiya isabelo sethu. UYehova ebesoloko esixhasa kwesi sigqibo. Kwanaxa abazali bam babesaluphala yaye befuna ukuncedwa, udade wethu uVictoria Marlin, wanikela uncedo waza ngobubele wabanyamekela. Siluxabisa gqitha uncedo lwakhe lothando, oluye lwasenza saqhubeka sikubulungiseleli bexesha elizeleyo.

UJulie uye wandixhasa ngokunyanisekileyo kuzo zonke izabelo zethu, ekujonga oku njengenxalenye yokuzinikela kwakhe kuYehova. Yaye nangona ngoku ndineminyaka engama-80 ubudala yaye ndineengxaki zempilo, ndiziva ndisikelelwe gqitha nguYehova. Undikhuthaza gqitha umdumisi owathi emva kokuba echaze ukuba uThixo uye wamfundisa ukususela ebutsheni, wambongoza esithi, ‘Owu Thixo, musa ukundishiya ndide ndibe mdala, de ndixelele abo baza kuza, ngamandla akho.’—INdumiso 71:17, 18.

[Umbhalo osemazantsi]

[Umfanekiso okwiphepha 20]

Ndikunye noMama ngowe-1940, xa ndandiqalisa ukuba nguvulindlela

[Umfanekiso okwiphepha 21]

Ndikunye noJoe noMargaret Hart, endandinguvulindlela kunye nabo

[Umfanekiso okwiphepha 23]

Ngosuku lwethu lomtshato ngoJanuwari 1948

[Umfanekiso okwiphepha 23]

Ngowe-1953, nesasikunye nabo kwiklasi yaseGiliyadi. Ukususela ekhohlo ukuya ekunene: UDon noVirginia Ward, uGeertruida Stegenga, uJulie nam

[Umfanekiso okwiphepha 23]

Ndikunye noFrederick W. Franz noNathan H. Knorr eCopenhagen, eDenmark, ngowe-1961

[Umfanekiso okwiphepha 25]

Ndikunye noJulie namhlanje