“Intlokoma Yabo Yaphuma Yaya Kuwo Wonke Umhlaba”
‘Nibenze abafundi abantu beentlanga zonke, nibabhaptize egameni loYise neloNyana nelomoya oyingcwele.’—MATEYU 28:19.
1, 2. (a) UYesu wabayalela ukuba benze ntoni abafundi bakhe? (b) Yintoni eyabangela amaKristu enkulungwane yokuqala akwazi ukwenza umsebenzi omkhulu kangaka?
KUNGEKUDALA ngaphambi kokunyukela kwakhe ezulwini, uYesu wabayala abalandeli bakhe. Wabaxelela: ‘Yenzani abafundi abantu beentlanga zonke, nibabhaptize egameni loYise neloNyana nelomoya oyingcwele.’ (Mateyu 28:19) Hayi indlela owawumkhulu ngayo loo msebenzi!
2 Khawufan’ ucinge! NgePentekoste yowama-33 C.E., abafundi abanokuba li-120 bamkela umoya oyingcwele baza baqalisa ukuthobela loo myalelo ngokuxelela abanye ukuba uYesu wayenguMesiya, ekwakukudala elindelwe ababenokusindiswa ngaye abantu. (IZenzo 2:1-36) Iqela elincinane kangako lalinokubafikelela njani ‘abantu beentlanga zonke’? Abantu babengenakukwazi ukukwenza oko, kodwa “kuThixo izinto zonke zinako ukwenzeka.” (Mateyu 19:26) AmaKristu okuqala ayexhaswa ngumoya oyingcwele kaYehova, yaye lo msebenzi ayewugqala njengongxamisekileyo. (Zekariya 4:6; 2 Timoti 4:2) Ngenxa yoko, kumashumi nje ambalwa eminyaka, umpostile uPawulos wayenokuthi iindaba ezilungileyo zazivakaliswe “kwindalo yonke ephantsi kwezulu.”—Kolose 1:23.
3. Yintoni eyabangela ukuba “ingqolowa” ebubuKristu bokwenyaniso igqunyelelwe?
3 Ukutyhubela phantse yonke inkulungwane yokuqala, unqulo lokwenyaniso lwaqhubeka lusanda. Noko ke, uYesu wayeprofete esithi ixesha liyeza xa uSathana eya kuhlwayela “ukhula” yaye amaKristu okwenyaniso “ingqolowa” aya kugqunyelelwa angabonakali kangangeenkulungwane ezininzi de kube lixesha lokuvuna. Emva kokufa kwabapostile, oko kwenzeka.—Mateyu 13:24-39.
Ulwando Olukhawulezayo Namhlanje
4, 5. Ukususela ngowe-1919, nguwuphi umsebenzi amaKristu athanjisiweyo aqalisa ukuwenza, yaye kutheni lo yayingumsebenzi omkhulu?
4 Ngowe-1919, kwakulixesha lokuba ingqolowa ebubuKristu bokwenyaniso yahlulwe kukhula. AmaKristu athanjisiweyo ayesazi ukuba umyalelo kaYesu obalulekileyo usasebenza. Ayeqinisekile ukuba ayephila ‘kwimihla yokugqibela’ yaye ayesazi isiprofeto sikaYesu esithi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (2 Timoti 3:1; Mateyu 24:14) Ewe, ayesazi ukuba kwakukho umsebenzi omkhulu ofanele wenziwe.
5 Sekunjalo, njengabafundi ngowama-33 C.E., loo maKristu athanjisiweyo ayejamelene nomsebenzi omkhulu. Ayeliqaqobana nje lamawaka ehlala kumazwe ambalwa. Ayenokukwazi njani ukushumayela iindaba ezilungileyo “kuwo wonke umhlaba omiweyo”? Khumbula ukuba, abantu abaphilayo emhlabeni babandile mhlawumbi ukususela kubantu abazizigidi ezingama-300 ngexesha looKesare ukusa kumawaka amabini ezigidi emva kwemfazwe yokuqala yehlabathi. Yaye ukutyhubela inkulungwane yama-20, babeya kuqhubeka besanda ngokukhawuleza.
6. Umsebenzi wokusasaza iindaba ezilungileyo wawusele uhambele phambili kangakanani ngeminyaka yee-1930?
6 Sekunjalo, abakhonzi bakaYehova abathanjisiweyo, njengabazalwana babo benkulungwane yokuqala, bawuqalisa lo msebenzi benokholo olupheleleyo kuYehova, yaye umoya wakhe wawunabo. Phakathi kwiminyaka yee-1930, abahambisi bevangeli abanokuba ngama-56 000 babevakalise inyaniso yeBhayibhile kumazwe ali-115. Ukuza kuthi ga ngoku, mninzi umsebenzi osele wenziwe, kodwa usemninzi oseleyo.
7. (a) AmaKristu athanjisiweyo ayejamelene nawuphi umsebenzi omtsha nonzima? (b) Ngokuxhaswa ‘zezinye izimvu,’ umsebenzi wokuhlanganisa uye wenza inkqubela engakanani?
7 Ngelo xesha, indlela ecace ngakumbi yokuqondwa ‘kwesihlwele esikhulu’ esikhankanywe kwiSityhilelo 7:9 yabangela ingxaki entsha yaye kwakhona yenza loo maKristu azibhokoxayo anethemba lokufumana uncedo. Isihlwele esingenakubalwa samakholwa ‘ezinye izimvu,’ esinethemba lokuphila emhlabeni, kwafuneka sihlanganiswe siphuma “kuzo zonke iintlanga nezizwe nezizwana neelwimi.” (Yohane 10:16) Aba baya ‘kunikela inkonzo engcwele kuYehova imini nobusuku.’ (ISityhilelo 7:15) Loo nto ithetha ukuba babeya kunceda emsebenzini wokushumayela nowokufundisa. (Isaya 61:5) Ngenxa yoko, amaKristu athanjisiweyo ayakuvuyela ukubona inani labashumayeli lisanda ngamashumi amawaka yaye emva koko ngezigidi. Ngowama-2003, incopho entsha yabavakalisi abazizi-6 429 351 baye banenxaxheba kumsebenzi wokushumayela—inkoliso yabo bengabesihlwele esikhulu.a AmaKristu athanjisiweyo ayalubulela gqitha olu ncedo, yaye abezinye izimvu bayalibulela eli lungelo lokuxhasa abazalwana babo abathanjisiweyo.—Mateyu 25:34-40.
8. AmaNgqina kaYehova ajamelana njani nengcinezelo ebudeni bemfazwe yesibini yehlabathi?
8 Xa udidi lwengqolowa lwaphinda lwabonakala, uSathana walwa nalo ngamandla. (ISityhilelo 12:17) Wenza ntoni xa isihlwele esikhulu sasiqala ukubonakala? Waba nogonyamelo olukhulu! Ngaba sinokuthandabuza ukuba nguye owayephembelela ukuhlaselwa konqulo lokwenyaniso emhlabeni wonke ebudeni bemfazwe yehlabathi yesibini? Kulo lonke olo hlaselo, amaKristu ayesengxakini. Abazalwana noodade abaninzi bajamelana neemvavanyo ezininzi, abanye bafa ngenxa yokholo lwabo. Sekunjalo, bavakalisa amazwi anjengawomdumisi athi: “Ndikunye noThixo ndiya kulidumisa ilizwi lakhe. Ndikholose ngoThixo; andiyi koyika. Inokundenza ntoni na inyama?” (INdumiso 56:4; Mateyu 10:28) AmaKristu athanjisiweyo nezinye izimvu ahlala emanyene ngenxa yokuba omelezwa ngumoya kaYehova. (2 Korinte 4:7) Ngenxa yoko, “ilizwi likaThixo laqhubeka likhula.” (IZenzo 6:7) Ngowe-1939, xa kwaqalisa imfazwe, amaKristu athembekileyo angama-72 475 anikela ingxelo yomsebenzi wokushumayela. Noko ke, ingxelo engaphelelanga yowe-1945, imfazwe eyaphela ngawo, yatyhila ukuba amaNgqina angama-156 299 akhutheleyo ayesasaza iindaba ezilungileyo. Hayi indlela awayekatye ngayo uSathana!
9. Ziziphi izikolo ezibini ezaqaliswa ebudeni beMfazwe Yehlabathi II?
9 Ngokucacileyo, izidubedube zemfazwe yesibini yehlabathi zange zibangele ukuba abakhonzi bakaYehova bathandabuze ukuba umsebenzi wokushumayela uya kugqitywa. Enyanisweni, ngowe-1943, xa imfazwe yayifikelela incopho yayo, kwaqaliswa izikolo ezibini. Esokuqala, ngoku esibizwa ngokuba siSikolo Sobulungiseleli Sobuthixo, sasiza kuqhutywa kuwo onke amabandla ukuze kuqeqeshwe iNgqina ngalinye ekushumayeleni nasekwenzeni abafundi. Esinye, iSikolo seBhayibhile seWatchtower saseGiliyadi, sasilungiselelwe ukuqeqesha abavangeli basemazweni ababeza kuqalisa umsebenzi wokushumayela kumazwe asemzini. Ewe, ukuphela kwemfazwe, amaKristu okwenyaniso ayelungele umsebenzi ongakumbi.
10. Inzondelelo yabantu bakaYehova ibonakale njani ngowama-2003?
10 Hayi indlela omhle ngayo umsebenzi eziwenzileyo ezi zikolo! Beqeqeshwe kwiSikolo Sobulungiseleli Sobuthixo—abaselula nabakhulileyo, abazali nabantwana, kwanemilwelwe—baye banenxaxheba yaye basaqhubeka benayo ekuthobeleni umyalelo obalulekileyo kaYesu. (INdumiso 148:12, 13; Yoweli 2:28, 29) Ngowama-2003, ngomlinganiselo nyanga nganye abangama-825 185 baye babonakalisa ukuba lo msebenzi bawugqala njengongxamisekileyo, ngokuba ngoovulindlela abangabancedani okanye abathe ngxi. Kwakuloo nyaka, amaNgqina kaYehova achithe iiyure ezili-1 234 796 477 ethetha nabanye ngeendaba ezilungileyo zoBukumkani. Ngokuqinisekileyo uYehova uyavuyiswa yinzondelelo yabantu bakhe!
Kwintsimi Yamanye Amazwe
11, 12. Yiyiphi imizekelo ebonisa ingxelo entle yabavangeli basemazweni?
11 Ekuhambeni kweminyaka, abaphumelele eGiliyadi nabathe, mvanje baphumelela kwiSikolo Sokuqeqesha Abalungiseleli, baye bazenzela igama elihle. Ngokomzekelo, eBrazil, kwakukho abavakalisi abangaphantsi nje kwabangama-400 ukuqalisa ukufika kwabavangeli basemazweni ngowe-1945. Aba bavangeli basemazweni nabanye abafika emva kwabo baye bazibhokoxa ndawonye nabazalwana baseBrazil abanenzondelelo, yaye uYehova uye wayisikelela kakhulu imizamo yabo. Hayi indlela ekuchulumancisa ngayo kwaba bayikhumbulayo loo mihla yangaphambili ukubona iBrazil inencopho entsha yabavakalisi abangama-607 362 ngowama-2003!
12 Khawucinge nje ngeJapan. Ngaphambi kwemfazwe yesibini yehlabathi, kwakukho abashumayeli boBukumkani abanokuba likhulu kwelo lizwe. Ebudeni bemfazwe, intshutshiso ekrakra yalinciphisa elo nani, yaye ekupheleni kwemfazwe, ngamaNgqina ambalwa kuphela awayephilile ngokomoya nangokwenyama. (IMizekeliso 14:32) Abo bagcini bengqibelelo babalaseleyo nabambalwa ngokuqinisekileyo bavuya xa ngowe-1949 bamkela abavangeli basemazweni abaqeqeshwe eGiliyadi abali-13, yaye abo bavangeli kungekudala baqalisa ukubathanda abo bazalwana bakhutheleyo baseJapan nabanomoya wokwamkel’ iindwendwe. Kwiminyaka engaphezu kwama-50 kamva, ngowama-2003, iJapan yayinabavakalisi abangama-217 508! UYehova uye wabasikelela gqitha abantu bakhe kwelo lizwe. Namanye amazwe anengxelo efanayo. Abo bakwaziyo ukushumayela kwamanye amazwe baye banegalelo elikhulu ekusasazeni iindaba ezilungileyo, kangangokuba ngowama-2003 ziye zafikelela kumazwe, kwiziqithi nakwimimandla engama-235. Ewe, isihlwele esikhulu siphuma kuzo “zonke iintlanga.”
‘Siphuma Kuzo Zonke Izizwe Nezizwana Neelwimi’
13, 14. UYehova wabonisa njani ukubaluleka kokushumayela iindaba ezilungileyo ‘ngazo zonke iilwimi’?
13 Emva kokuthanjiswa kwabafundi ngomoya oyingcwele ngePentekoste yowama-33 C.E., ummangaliso wokuqala ekuthiwa bawenza kukuthetha ngeelwimi kwizihlwele ezazihlanganisene apho. Bonke ababelapho kusenokwenzeka ukuba babethetha ulwimi olwalusaziwa ngokubanzi, mhlawumbi isiGrike. Ekubeni babengabantu “aboyik’ uThixo” kwakhona kusenokwenzeka ukuba babeziqonda iinkonzo ezazisenziwa ngesiHebhere etempileni. Kodwa ngokwenene bachukumiseka xa baziva iindaba ezilungileyo ngeelwimi zabo zomthonyama.—IZenzo 2:5, 7-12.
14 Nanamhlanje, kumsebenzi wokushumayela kusetyenziswa iilwimi ezininzi. Kwaprofetwa ukuba isihlwele esikhulu sasiya kuphuma kungekuphela nje kwiintlanga kodwa kwakhona ‘nakwizizwe nezizwana neelwimi.’ Ngokuvumelana noku, uYehova ngoZekariya waprofeta esithi: “Amadoda alishumi aphuma kuzo zonke iilwimi zeentlanga aya kubamba, ewe, okunene aya kubamba isondo lendoda engumYuda, esithi: ‘Siza kuhamba nani, kuba sivile ukuba uThixo unani.’” (Zekariya 8:23) Nangona amaNgqina kaYehova engasenazo iziphiwo zokuthetha ngeelwimi, ayakwazi ukubaluleka kokufundisa abantu ngeelwimi zabo.
15, 16. Abavangeli basemazweni nabanye bawusingathe njani umsebenzi onzima wokushumayela ngeelwimi zasekuhlaleni?
15 Liyinyaniso elokuba, namhlanje zikho iilwimi ezisetyenziswa ngokubanzi, njengesiNgesi, isiFrentshi neSpanish. Noko ke, abo bashiye amazwe abo beye kushumayela kwamanye amazwe bazama ukufunda iilwimi zaloo mazwe ukuze iindaba ezilungileyo bazenze zamkeleke ngakumbi kwabo “banotyekelo olufanelekileyo ngobomi obungunaphakade.” (IZenzo 13:48) Oko kusenokuba nzima. Xa abazalwana abangamaTuvalu eMzantsi Pasifiki babefuna iincwadi ngolwimi lwabo, omnye wabavangeli basemazweni wazimisela ukuwenza loo msebenzi. Ekubeni kwakungekho sichazi-magama, waqalisa ukuzakhela uluhlu lwamagama esiTuvalu. Ekuhambeni kwexesha, incwadi ethi Unokuphila Ngonaphakade KwiParadisi Esemhlabenib yapapashwa ngesiTuvalu. Xa abavangeli basemazweni bafika eCuraçao, zazingekho iincwadi zokufunda iBhayibhile yaye kwakungekho nesichazi-magama solwimi lwalapho, isiPapiamento. Yaye kwakukho impikiswano enkulu ngendlela yokulubhala olo lwimi. Sekunjalo, kungaphelanga neminyaka emibini befikile abavangeli basemazweni bokuqala, kwapapashwa iphecana leBhayibhile lokuqala lamaKristu ngolo lwimi. Namhlanje, isiPapiamento lolunye lweelwimi ezili-133 IMboniselo epapashwa ngazo kwangaxeshanye nesiNgesi.
16 ENamibia abavangeli basemazweni bokuqala abazange bakwazi ukufumana iNgqina lalapho ukuze libancede ekuguquleleni ulwimi lwalapho, isiNama. Ngaphezu koko, iilwimi zalapho zazingenawo amagama aqhelekileyo anjengelithi “ukufezeka.” Omnye umvangeli wasemazweni uthi: “Abafundisi-ntsapho ababefundisisa iBhayibhile benza umsebenzi wokuguqulela. Ekubeni babengayazi kangako inyaniso, kwakufuneka ndihlale nabo ukuze ndiqinisekise ukuba isivakalisi ngasinye sichanile.” Sekunjalo, ekugqibeleni iphecana elithi Ubomi Kwihlabathi Elitsha laguqulelwa ngeelwimi ezine zaseNamibia. Namhlanje, IMboniselo ipapashwa ngokuthe rhoqo ngesiKwanyama nesiNdonga.
17, 18. Ziziphi iingxaki ekujanyelwana nazo eMexico nakwamanye amazwe?
17 EMexico, olona lwimi luthethwayo siSpanish. Noko ke, ngaphambi kokufika kwabemi baseSpeyin, apho kwakuthethwa iilwimi ezininzi, yaye kusenjalo nangoku. Ngenxa yoko, iincwadi zamaNgqina kaYehova zazifumaneka ngeelwimi ezisixhenxe zaseMexico nangoLwimi Lwezandla lwaseMexico. UBulungiseleli BoBukumkani besiMaya yimpapasho yokuqala efumaneka ngolwimi lwesi-Indiya saseMerika. Enyanisweni, abemi abangamawaka aliqela abangamaMaya, ama-Aztec, nabanye babalwa phakathi kwabavakalisi boBukumkani baseMexico abangama-572 530.
18 Mvanje, izigidi zabantu ziye zabalekela kwamanye amazwe njengeembacu, okanye zafudukela kwamanye amazwe ngenxa yeemeko zezoqoqosho. Ngenxa yoko, okwesihlandlo sokuqala amazwe amaninzi ngoku anentsimi enkulu yolunye ulwimi. AmaNgqina kaYehova aye alwamkela olu celomngeni. Ngokomzekelo, eItali, kukho amabandla namaqela athetha iilwimi ezingama-22 ngaphandle kwesiTaliyane. Ukuze kuncedwe abazalwana bashumayele kubantu abathetha ezinye iilwimi, kutshanje kuye kwaqaliswa iiklasi ukuze kufundiswe iilwimi ezili-16, kuquka noLwimi Lwezandla LwaseItali. Kwamanye amazwe amaninzi, amaNgqina kaYehova enza umzamo ofanayo ukuze afikelele abantu abaninzi abasuka kwamanye amazwe. Ewe, ngoncedo lukaYehova, isihlwele esikhulu ngokwenene siphuma kwiilwimi ezininzi.
“Kuwo Wonke Umhlaba”
19, 20. Ngawaphi amazwi kaPawulos azaliseka ngendlela engummangaliso namhlanje? Cacisa.
19 Ngenkulungwane yokuqala, umpostile uPawulos wabhala: “Abazange basilele ukuva, andibi kunjalo? Kaloku, enyanisweni, ‘intlokoma yabo yaphuma yaya kuwo wonke umhlaba, namazwi abo aya kwiziphelo zomhlaba omiweyo.’” (Roma 10:18) Ukuba oko kwenzeka ngenkulungwane yokuqala, kwenzeka kakhulu namhlanje! Izigidi—mhlawumbi ngaphezu kunanini na ngaphambili—zithi: “Ndiya kumbonga uYehova ngamaxesha onke; indumiso yakhe iya kuba semlonyeni wam rhoqo.”—INdumiso 34:1.
20 Ngaphezu koko, umsebenzi awuhlehleli emva. Inani labavakalisi boBukumkani liya lisanda. Kuchithwa ixesha elingakumbi kumsebenzi wokushumayela. Kwenziwa amabuyelo azizigidi yaye kuqhutywa izifundo zeBhayibhile ezingamakhulu amawaka. Yaye bayanda abantu ababonakalisa umdla. Kunyaka ophelileyo, kwabakho incopho entsha yabantu abazizi-16 097 622 abeza kwiSikhumbuzo sokufa kukaYesu. Ngokucacileyo, mninzi umsebenzi ekusafuneka wenziwe. Ngamana singaqhubeka sixelisa ingqibelelo yabazalwana bethu abaye banyamezela intshutshiso ekrakra. Yaye ngamana singabonisa inzondelelo eyaboniswa ngabo bonke abazalwana bethu abathi ukususela ngowe-1919 bazibhokoxa enkonzweni kaYehova. Ngamana sonke singavakalisa amazwi afanayo athethwa ngumdumisi xa wathi: “Yonk’ into ephefumlayo—mayidumise uYa. Dumisani uYa!”—INdumiso 150:6.
[Imibhalo esemazantsi]
a Bona ingxelo yonyaka kwiphepha 18 ukusa kwiphepha 21 leli phephancwadi.
b Ipapashwe ngamaNgqina kaYehova.
Ngaba Unokucacisa?
• Nguwuphi umsebenzi abazalwana abaqalisa ukuwenza ngowe-1919, yaye yintoni eyawenza yangumsebenzi omkhulu?
• Ngoobani abahlanganiswa ukuze baxhase umsebenzi wokushumayela?
• Abavangeli basemazweni nabanye abashumayela kwamanye amazwe bazenzele liphi igama?
• Bubuphi ubungqina onokwalatha kubo ukubonisa ukuba uYehova uyawusikelela umsebenzi wabantu bakhe namhlanje?
[Isicangca esikwiphepha 18-21]
INGXELO YONYAKA WENKONZO WAMA-2003 YAMANGQINA KAYEHOVA EHLABATHINI LONKE
(Bona imiqulu)
[Imifanekiso ekwiphepha 14, 15]
Izidubedube ezenzeka ngemfazwe yesibini yehlabathi azizange ziwenze amaKristu athandabuze ukuba iindaba ezilungileyo ziya kushunyayelwa
[Inkcazelo]
Ugqabhuko-dubulo:Umfanekiso weU.S. Navy; eminye: Umfanekiso weU.S. Coast Guard
[Imifanekiso ekwiphepha 16, 17]
Isihlwele esikhulu sasiya kuphuma kuzo zonke izizwe neelwimi