Izithembiso Onokuzithemba

UMPROFETI kaThixo uMika wayesazi ukuba abantu badla ngokungazifezi izithembiso zabo. Ngomhla wakhe, wawungenakuthemba kwanomntu osondele kuwe. Ngoko uMika walumkisa ngelithi: “Musa ukukholwa liqabane lakho. Musa ukukholosa ngomhlobo osenyongweni. Nakulowo olala esifubeni sakho kulinde ukuvuleka komlomo wakho.”—Mika 7:5.

Ngaba le meko yabangela uMika akakholelwa zonke izithembiso? Akunjalo! Wathi uzithembe ngokupheleleyo izithembiso zikaThixo wakhe, uYehova. UMika wabhala wathi: “Kodwa mna ke, ndiza kuhlala ndikhangele kuYehova. Ndiza kubonisa isimo sengqondo sokulindela kuThixo wosindiso lwam.”—Mika 7:7.

Yintoni eyabangela uMika wanethemba eliqine ngolu hlobo? Kungenxa yokuba wayesazi ukuba uYehova usoloko ezigcina izithembiso zakhe. Zonke izinto uThixo awazithembisa ookhokho bakaMika, zazaliseka. (Mika 7:20) Ukunyaniseka kukaYehova ngaphambili kwenza uMika wanokholo lokuba uza kukuphumeza konke akuthethileyo.

“Akusilelanga Nalinye Ilizwi”

UMika wayesazi ukuba uYehova wakhulula amaSirayeli kubukhoboka baseYiputa. (Mika 7:15) UYoshuwa, owayephakathi kwabantu abakhululwayo wakhuthaza amanye amaSirayeli ukuba abe nokholo kuzo zonke izithembiso zikaThixo. Ngoba? UYoshuwa wawakhumbuza: “Niyazi kakuhle ngeentliziyo zenu zonke nangemiphefumlo yenu yonke ukuba akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni. Onke abe yinyaniso kuni. Akusilelanga nalinye ilizwi kuwo.”—Yoshuwa 23:14.

AmaSirayeli ayezazi kakuhle izinto ezintle awayezenzelwe nguYehova. Wasigcina isithembiso awasenza kukhokho wawo owayesoyika uThixo uAbraham sokuba inzala yakhe yayiza kuba ninzi njengeenkwenkwezi yaye yayiza kuhlala kwilizwe laseKanan. Kwakhona, uYehova waxelela uAbraham ukuba inzala yakhe yayiza kubandezeleka kangangeminyaka engama-400 kodwa “kwesesine isizukulwana” yayiza kubuyela eKanan. Konke oku kwazaliseka.—Genesis 15:5-16; Eksodus 3:6-8.

Ngemihla kaYosefu unyana kaYakobi, amaSirayeli amkelwa ngezandla ezishushu eYiputa. Kamva amaYiputa awaphatha kakubi njengamakhoboka, kodwa njengoko uThixo wayethembisile, emva kwezizukulwana ezine iseYiputa, le nzala ka-Abraham yakhululwa kubukhoboka baseYiputa.a

Kwiminyaka engama-40 eyalandelayo, amaSirayeli aphinda afumana ubungqina obungakumbi bokuba uYehova uyazigcina izithembiso zakhe. Xa ama-Amaleki ayehlasela amaSirayeli, uThixo wabalwela abantu bakhe waza wabakhusela. Kuyo yonke loo minyaka ingama-40 besentlango, wazanelisa zonke iimfuno zabo zokwenyama de baya kufika kwiLizwe Lesithembiso. Xa uYoshuwa wayehlola indlela uYehova aqhubana ngayo nenzala ka-Abraham, ngelunda wathi: “Akukho sithembiso sasilelayo kuzo zonke izithembiso ezilungileyo uYehova awayezenzile kwindlu kaSirayeli; zonke zaba yinyaniso.”—Yoshuwa 21:45.

Kholosa Ngezithembiso ZikaThixo

Unokuluhlakulela njani ukholo kwizithembiso zikaYehova njengoko uMika noYoshuwa benzayo? Yintoni ekwenza uthembe abanye abantu? Kukubazi kangangoko kunokwenzeka. Ngokomzekelo, usenokwazi indlela abathembeke ngayo ngokujonga imigudu abayenzayo ukuze baphumeze izithembiso zabo. Okukhona uya usiba nolwazi ngabo, kokukhona uya ubathemba. Oku kunokukunceda uhlakulele ukholo nakwizithembiso zikaThixo.

Enye indlela onokukwenza ngayo oku kukujonga indalo nemithetho eyilawulayo. Izazinzulu ziyayithemba le mithetho, njengemithetho elawula ukuphindaphindeka kweseli yomzimba ide ibe zizigidi ngezigidi. Eneneni, imithetho elawula indalo imele ukuba yamiselwa nguMmisi-mthetho onokuthenjwa. Ngokuqinisekileyo unokuzithemba izithembiso zakhe, njengoko uyithemba imithetho elawula indalo yakhe.—INdumiso 139:14-16; Isaya 40:26; Hebhere 3:4.

Esebenzisa umprofeti uIsaya, owayephila ngexesha likaMika, uYehova wasebenzisa amaxesha onyaka nemvula ukubonisa ukuthembeka kwelizwi lakhe. Nyaka ngamnye yayisina imvula. Iwunyakamise umhlaba baze abantu balime bafumane ukutya. Ngokuphathelele le nkalo uYehova wathi: “Njengokuba kusihla imvula nekhephu emazulwini, yaye zingabuyeli kuwo zingawunyakamisanga umhlaba, ziwenze uvelise kwaye uhlume, umnike imbewu umhlwayeli, umnike nesonka odlayo, ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:10, 11.

Isithembiso Separadesi

Xa sihlolisisa indalo sinokubona ukuba uMdali unokuthenjwa, kodwa kufuneka okungakumbi xa sifuna ukufunda ngezithembiso eziyinxalenye ‘yelizwi eliphuma emlonyeni wakhe.’ Ukuze ufunde ngezi zithembiso uze ube nethemba kuzo, kufuneka uhlolisise ingxelo yeZibhalo ephefumlelwe nguThixo uze ubone injongo yakhe ngomhlaba nendlela aqhubana ngayo nabantu.—2 Timoti 3:14-17.

Umprofeti uMika wayenokholo kwizithembiso zikaYehova. Ngoku kukho ingxelo ephefumlelwe nguThixo eninzi kunaleyo yayikho ngexesha likaMika. Njengoko ufunda iBhayibhile yaye ucamngca ngoko ukufundayo, nawe unokuba nokholo lokuba izithembiso zikaThixo ziya kuzaliseka. Ezi zithembiso, zichaphazela kungekuphela nje inzala ka-Abraham kodwa lonke uluntu. UYehova wathembisa lo solusapho wayenentlonelo ngoThixo wathi: “Ngokuqinisekileyo ziya kuzisikelela ngembewu yakho zonke iintlanga zomhlaba kuba uliphulaphule ilizwi lam.” (Genesis 22:18) Ngokuyintloko ‘imbewu’ okanye inzala ka-Abraham nguMesiya, uYesu Kristu.—Galati 3:16.

Esebenzisa uYesu Kristu, uYehova uya kuqinisekisa ukuba bonke abantu abathobelayo bafumana iintsikelelo. Yintoni uThixo athembisa ukuba uza kuyenza ngexesha lethu? UMika 4:1, 2 uphendula ngala mazwi esiprofeto: “Kuya kuthi ke ekupheleni kwemihla intaba yendlu kaYehova imiselwe ngokuqinileyo encotsheni yeentaba, yaye ngokuqinisekileyo iya kuphakanyiswa ngaphezu kweenduli; kwaye zonke izizwana zimele zibe ngumsinga ukuya kuyo. Ngokuqinisekileyo iintlanga ezininzi ziya kuhamba zize zithi: ‘Yizani, masinyuke siye entabeni kaYehova nasendlwini kaThixo kaYakobi; yaye uya kusiyalela ngeendlela zakhe, kwaye siza kuhamba emendweni wakhe.’”

Abo bafunda ngeendlela zikaYehova ‘bakhanda amakrele abo abe ngamakhuba nemikhonto yabo ibe zizikere zokuthena imithi.’ Luyaphela utyekelo lwemfazwe kubo. Kungekudala, umhlaba uza kuzaliswa ngabantu abangamalungisa, yaye akuyi kubakho mntu ubangcangcazelisayo okanye uboyikisayo. (Mika 4:3, 4) Ewe, iLizwi likaThixo lithembisa ukuba phantsi koBukumkani obulawulwa nguYesu Kristu, uYehova uya kutshabalalisa bonke abantu abacinezelayo.—Isaya 11:6-9; Daniyeli 2:44; ISityhilelo 11:18.

Kwanabo baye babandezeleka baze bafa ngenxa yokuvukela kwabantu uThixo, baya kuvuswa benethemba lokuphila ngonaphakade emhlabeni. (Yohane 5:28, 29) USathana needemon zakhe, oonobangela bobungendawo, baya kube bengekho, yaye ngentlawulelo yedini likaYesu, imiphumo yesono sika-Adam iya kupheliswa. (Mateyu 20:28; Roma 3:23, 24; 5:12; 6:23; ISityhilelo 20:1-3) Baya kuphila njani abantu abathobelayo? Kaloku, baya kusikelelwa ngobomi obungunaphakade kwiparadesi esemhlabeni yaye baya kube befezekile!—INdumiso 37:10, 11; Luka 23:43; ISityhilelo 21:3-5.

Ezinjani ukumangalisa izithembiso! Kodwa ngaba unokuzithemba? Ewe unako. Ezi asizozithembiso zabantu abaneenjongo ezintle kodwa abangenamandla okuziphumeza. Zizithembiso zikaThixo onguSomandla, ongenakuze axoke yaye ‘ongacothiyo ngokuphathelele isithembiso sakhe.’ (2 Petros 3:9; Hebhere 6:13-18) Unokuba nokholo ngokupheleleyo kuzo zonke izithembiso eziseBhayibhileni, kuba zizithembiso ‘zikaYehova uThixo wenyaniso.’—INdumiso 31:5.

[Umbhalo osemazantsi]

[Amagama acatshulweyo akwiphepha 6]

“Akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni.”—YOSHUWA 23:14

[Imifanekiso ekwiphepha 4, 5]

UYehova wazigcina zonke izithembiso eziphathelele uSirayeli awazenza kuLwandle Olubomvu nasentlango

[Imifanekiso ekwiphepha 7]

UYehova wasizalisekisa isithembiso awasenza kuAbraham. IMbewu yakhe, uYesu Kristu, uya kuzisela uluntu iintsikelelo