UbuKristu Bokwenyaniso Buhambela Phambili
UBULUNGISELELI bukaYesu Kristu baba negalelo elikhulu emhlabeni ngenkulungwane yokuqala. Isigidimi sakhe sasibahlaziya, sibakhanyisela, yaye sibachukumisa ngendlela emangalisayo abantu. Abaninzi kwabo bamvayo ethetha bachukunyiswa gqitha ngamazwi akhe.—Mateyu 7:28, 29.
Ngenkalipho uYesu wakugatya ukubandakanyeka kwinkqubo ecinezelayo yonqulo neyezobupolitika yomhla wakhe, kodwa wazenza wafumaneka kuwonke wonke. (Mateyu 11:25-30) Wayivuma ngokuphandle impembelelo enamandla yoomoya abangendawo emhlabeni, waza wabonakalisa amandla awanikwe nguThixo okubongamela abo moya bangendawo. (Mateyu 4:2-11, 24; Yohane 14:30) UYesu wayicacisa indlela ukubandezeleka okuhlobene ngayo nesono, waza ngothando walatha kuBukumkani bukaThixo njengesicombululo. (Marko 2:1-12; Luka 11:2, 17-23) Wasisusa ngokupheleleyo isigqubuthelo sobumnyama ebesisithe ubuntu bokwenene bukaYise kangangethuba elide, waza walazisa igama likaThixo kubo bonke abo babenomdla wokuba nolwalamano lobuqu kunye Naye.—Yohane 17:6, 26.
Ngoko ayimangalisi into yokuba abafundi bakaYesu basisasaza ngokukhawuleza kangaka isigidimi sakhe esinamandla, phezu kwako nje ukutshutshiswa kwabo ngokuqatha ngabameli bonqulo nabezobupolitika. Kwisithuba nje seminyaka emalunga nama-30, kwasekwa amabandla obuKristu eAfrika, eAsia, naseYurophu. (Kolose 1:23) Inyaniso elula awayifundisayo uYesu yabakhanyisela abantu abathobekileyo, nabantliziyo zilungileyo kulo lonke elaseRoma.—Efese 1:17, 18.
Kodwa ke, babeza kukwazi njani bonke aba bafundi batsha ukumanyana ngokwenene ‘kukholo olunye,’ njengokutsho kukaPawulos, nakubeni benemvelaphi eyahlukeneyo ngokwezoqoqosho, ngezithethe, ngeelwimi, nangokonqulo? (Efese 4:5) Yintoni eyayiza kubenza ‘bathethe ngokuvumelanayo’ ukuze kungabikho yantlukwano phakathi kwabo? (1 Korinte 1:10) Ngenxa yokungabikho komanyano phakathi kwabo bathi bangamaKristu namhlanje, kuya kuba kuhle ukuba sihlolisise oko uYesu wakufundisayo.
Isiseko Somanyano LobuKristu
Xa wayesematyaleni phambi kukaPontiyo Pilato, uYesu wachaza isiseko somanyano lobuKristu. Wathi: “Ndizalelwe oku, yaye ndizele oku ehlabathini, ukuze ndiyingqinele inyaniso. Wonk’ ubani ongakwicala lenyaniso uyaliphulaphula ilizwi lam.” (Yohane 18:37) Ngoko ke, ukwamkela iimfundiso zikaYesu kwanalo lonke iLizwi eliphefumlelweyo likaThixo, iBhayibhile, kunempembelelo enamandla nebamanyanisayo abafundi bokwenene bakaKristu.—1 Korinte 4:6; 2 Timoti 3:16, 17.
Kambe ke, abafundi bakaYesu babeza kuba nayo imibuzo okanye bangavumelani maxa wambi. Yintoni eyayiza kubanceda? UYesu wachaza wathi: “Xa efika yena, umoya wenyaniso, uya kunikhokelela kuyo yonke inyaniso, kuba akayi kuthetha ngokwentshukumisa yakhe, kodwa uya kuthetha izinto azivileyo, yaye uya kuvakalisa kuni izinto ezizayo.” (Yohane 16:12, 13) Ngoko umoya oyingcwele kaThixo wawuza kubanceda abafundi bokwenene bakaYesu ukuba bayiqonde inyaniso njengoko yayityhilwa ngakumbi nangakumbi nguThixo. Kwakhona, loo moya wawuza kuvelisa iziqhamo, ezinjengothando, uvuyo, noxolo, ezaziza kwenza kubekho umanyano phakathi kwabo.—IZenzo 15:28; Galati 5:22, 23.
UYesu akazange avumele ukungavisisani neeyantlukwano phakathi kwabafundi bakhe; yaye akazange abayalele ukuba batolike inyaniso yobuthixo ukuze ivumelane nezithethe zonqulo lwabo babeza kudibana nabo. Kunoko, ngobusuku bakhe bokugqibela kunye nabo, wathandaza ngokunyanisekileyo esithi: “Ndenza isicelo, kungekhona ngaba kuphela, kodwa nangabo bakholwayo kum ngelizwi labo; ukuze bonke babe banye, kanye njengoko wena, Bawo, umanyene nam yaye nam ndimanyene nawe, ukuze nabo bamanyane nathi, ukuze ihlabathi libe nokukholelwa ukuba ndithunywe nguwe.” (Yohane 17:20, 21) Ngoko kwasekuqaleni nje ukuza kufikelela kwixesha lethu, abafundi bakaKristu babeza kuphawulwa ngokumanyana kwabo ngokomoya nangenyaniso. (Yohane 4:23, 24) Kanti zona iicawa zanamhlanje azimanyananga, kunoko zahlukene. Kubangelwa yintoni oko?
Isizathu Sokuba Iicawa Zahlukane
Ngokuphandle nje singathi ukwahlukahlukana kweenkolelo neemfundiso zabo bazibiza ngokuba bangamaKristu namhlanje kubangelwa kukuba abakhange banamathele kwiimfundiso zikaYesu. Omnye umbhali wathi: “Njengoko kwakunjalo mandulo, nanamhlanje amaKristu amkela iinxalenye zeBhayibhile azithandayo—aze aziyeke ezo zingavumelaniyo nezithethe zawo zonqulo.” Oku koko kanye uYesu nabapostile bakhe bathi kwakuza kwenzeka.
Ngokomzekelo, umpostile uPawulos waphefumlelwa ukuba abhalele uTimoti owayengumveleli, esithi: “Kuya kubakho ixesha laxa bengayi kuyinyamezela imfundiso ephilileyo, kodwa basuke ngokweminqweno yabo baziqwebele abafundisi bokubanyumbaza iindlebe; baya kuyifulathela inyaniso, baphambukele kumabali obuxoki.” Ngaba ayeza kulahlekiswa onke amaKristu? Akunjalo. UPawulos wahlabela mgama esithi: “Ke wena, hlala uthe qwa, nyamezela ububi, yenza umsebenzi womvangeli, bufeze ngokupheleleyo ubulungiseleli bakho.” (2 Timoti 4:3-5; Luka 21:8; IZenzo 20:29, 30; 2 Petros 2:1-3) UTimoti namanye amaKristu athembekileyo basithobela eso siluleko siphefumlelweyo.
AmaKristu Okwenyaniso Asamanyene
NjengoTimoti, amaKristu okwenyaniso namhlanje ahlala ethe qwa ngokuthi agatye iingcamango zabantu aze amkele kuphela igunya leZibhalo njengomthombo weenkolelo zawo ezisisiseko. (Kolose 2:8; 1 Yohane 4:1) Exelisa amaKristu enkulungwane yokuqala, amaNgqina kaYehova afeza ubulungiseleli bawo kumazwe angaphezu kwama-230, esisa isigidimi seendaba ezilungileyo zoBukumkani kubantu abakuzo zonke iindawo. Khawuhlolisise ezi ndlela zibalulekileyo zine zilandelayo axelisa ngazo uYesu ngokumanyeneyo naqhelisela ngazo ubuKristu bokwenyaniso naphi na apho ahlala khona.
Iinkolelo zawo zisekelwe eLizwini likaThixo. (Yohane 17:17) Omnye umfundisi wecawa waseBelgium wabhala wathi ngokuphathelele wona: “Into esinokuyifunda kuwo [amaNgqina kaYehova] yile yokuba ekulungele ukuphulaphula iLizwi likaThixo aze athethe ngalo ngenkalipho.”
Akhangele kuBukumkani bukaThixo njengesicombululo seengxaki zehlabathi. (Luka 8:1) EBarranquilla, eKholombiya, elinye iNgqina lathetha noAntonio, ongumxhasi ophambili weqela lezobupolitika. Eli Ngqina alizange limngqinele okanye lixhase iingcamango zelinye iqela lezobupolitika. Kunoko, lacela ukumqhubela isifundo seBhayibhile sesisa uAntonio kunye noodadewabo. Kungekudala uAntonio waqonda ukuba ngokwenene buBukumkani bukaThixo kuphela obulithemba labantu abahlwempuzekileyo eKholombiya nakwihlabathi liphela.
Azukisa igama likaThixo. (Mateyu 6:9) Xa amaNgqina kaYehova adibana okokuqala noMaria, ongumKatolika onyanisekileyo ohlala eOstreliya, wawavumela ukuba ambonise igama likaThixo eBhayibhileni. Wasabela njani? “Ndantywizisa iinyembezi ndakubona igama likaThixo okokuqala eBhayibhileni. Ndachukunyiswa gqitha kukwazi igama likaThixo nokulisebenzisa.” UMaria waqhubeka efundisisa iBhayibhile, yaye okokuqala ngqa ebomini bakhe, waqonda ukuba uYehova uluhlobo olunjani lomntu waza wakha ulwalamano oluhlala luhleli kunye naye.
Amanyaniswe luthando. (Yohane 13:34, 35) Inqaku lomhleli wephephancwadi iThe Ladysmith-Chemainus Chronicle, eKhanada, lathi: “Enoba ungowaluphi na unqulo, okanye akukholwa, umele uwancome amaNgqina kaYehova angama-4 500 aye asebenza imini nobusuku kwiiveki ezimbini ezinesiqingatha ezidlulileyo esakha iHolo yeNdibano ezizikwemitha ezingama-2 300 eCassidy . . . Ukwenza oku ngovuyo, kungekho kuphikisana nokungavisisani okanye ukufuna udumo, kuluphawu lobuKristu bokwenyaniso.”
Ngoko khawucingisise ngobu bungqina. Ngoxa abefundisi, abavangeli namarhamente eNgqobhoko, beqhubeka besilwa nokungavisisani okukhoyo ezicaweni zabo, ubuKristu bokwenyaniso buyaqhubeka busanda ehlabathini lonke. Eneneni, amaKristu okwenyaniso ayaqhubeka nobulungiseleli bawo bokushumayela nokufundisa ngeLizwi likaThixo. (Mateyu 24:14; 28:19, 20) Ukuba uphakathi kwabo “bancwinayo nabagcumayo” ngenxa yezinto ezicekisekayo ezenzekayo ngoku yaye ukhathazwa kukungabikho komanyano kwiinkonzo zeNgqobhoko, siyakumema ukuba uthelele amaNgqina kaYehova kunqulo olumanyeneyo lobuKristu lokuphela koThixo wokwenyaniso, uYehova.—Hezekile 9:4; Isaya 2:2-4.