Ibali Lobomi

Ulwaneliseko Lobuthixo Luye Lwandomeleza

NGOKUBALISWA NGUBENJAMIN IKECHUKWU OSUEKE

Emva nje kokuba ndiqalise ubulungiseleli bobuKristu bexesha elizeleyo, ndatyelela abazali bam. Uthe akundibona utata, wanditsala ngehempe, sel’ ethukisa esithi, “Selandini!” Wandibetha ngomva wesabile. Bathe bakuva ingxolo, abanye abahlali baloo lali bathontelana ukuza ekhaya. Ndandibe ntoni? Makhe ndinabe.

NDAZALWA ngowe-1930, kwilali yaseUmuariam ekumzantsi-mpuma weNigeria, yaye ndilizibulo kubantwana basekhaya abasixhenxe. Umafungwashe wasekhaya wafa eneminyaka eli-13 ubudala. Abazali bam babehamba kwicawa yaseTshetshi. UTata wayengumfama, uMama yena eqhuba ishishini elincinane. Wayebetha ngezikaTshiwo kangangeekhilomitha ezingama-30 esiya kuthenga inkonkxa yamafutha enziwe ngesundu kwiivenkile zasekuhlaleni, aze abuye matshona kwangolo suku. Kwakusithi ke ngentseni elandelayo, aphinde angene endleleni esiya kwidolophu ekufutshane nesikhululo sikaloliwe nekumgama weekhilomitha ezingama-40, apho wayewathengisa khona amafutha akhe. Ukuba wenze ingeniso, eyayidla ngokungadluli kwirandi, wayethenga ukutya kwentsapho ngaphambi kokuba agoduke. Wayenza ke loo nto kangangeminyaka eli-15 de kwasekufeni kwakhe ngowe-1950.

Ndayiqala imfundo yam yamabanga aphantsi kwalapho elalini kwisikolo esasiphantsi kweCawa yaseTshetshi, kodwa ndaya kuyigqibezela esinaleni, esasikumgama weekhilomitha ezingama-35. Ekubeni abazali bam babengenayo imali yokuqhubeka bendifundisa, ndanyanzeleka ukuba ndifune umsebenzi. Ndaqala ndaqeshwa ngunogada wesikhululo sikaloliwe endlwini yakhe eLagos, ekwintshona yeNigeria, ndaza emva koko ndaqeshwa ngumsebenzi wakwarhulumente eKaduna, ekumantla eNigeria. Ndaphinda ndasebenza njengomabhalana wegqwetha kwisiXeko saseBenin, esikumbindi-ntshona weNigeria, ndaza ekuhambeni kwethuba ndasebenza kumzi-mveliso owenza amaplanga. Ukusuka apho ndaya eCameroon ngowe-1953 ndaza ndahlala nomza wam, owandifumanela umsebenzi kumzi-mveliso wemithi yokwenza irabha. Ndandisamkela iirandi ezingama-62 ngenyanga. Nakuba ndandisenza imisebenzi ephantsi, kodwa ndandisaneliswa nje kukufumana ukutya okwaneleyo.

Ihlwempu Lindinika Ubutyebi

USilvanus Okemiri, endandisebenza naye, wayeliNgqina likaYehova. Wasebenzisa onke amathuba okwabelana nam ngolwazi lweBhayibhile ngoxa sasigeca ingca size siyibeke phakathi kwemithi yokwenza irabha. Nangona ndandimphulaphula, kodwa ndandingakunanzanga kangako oko wayekuthetha. Sekunjalo, wathi umza wam akufumanisa ukuba ndinento yokwenza namaNgqina, wazama ngandlela zonke ukundidimaza. Wandilumkisa esithi: “Benji, ingathi ngowuyeka ukutyelela uMnu. uOkemiri. Ungomnye waba bantu bakaYehova yaye ulihlwempu. Nabani na ozinxulumanisa naye uya kuba njengaye.”

Ekuqaleni kowe-1954, loo msebenzi wawuqoba ngeyona ndlela wandoyisa ndaza ndagoduka. Ngaloo maxesha iCawa yaseTshetshi yayinemilinganiselo engqongqo yokuziphatha. Ngenxa yoko ndakhula ndikuthiyile ukuziphatha okubi. Noko ke, akubanga thuba lide ndacatshukiswa kukuhanahanisa kwamanye amarhamente. Nangona ayesithi alandela imilinganiselo yeBhayibhile, indlela awayephila ngayo yayiphikisana noko. (Mateyu 15:8) Sasisoloko siphikisana notata, waza akandithanda ngenxa yoko. Ngobunye ubusuku ndemka ekhaya.

Ndafudukela eOmoba, eyidolophu encinane ekufuphi nesikhululo sikaloliwe. Apho ndaphinda ndaqhagamshelana namaNgqina kaYehova. UPriscilla Isiocha, owayekade ehlala kwilali yasekhaya, wandinika incwadana ethi “Ezi Ndaba Zilungileyo ZoBukumkani” nethi After Armageddon—God’s New World.a Ndakhwela kuzo zisuka nje, ndiqinisekile ukuba ndiyifumene inyaniso. Kwicawa endandikhonza kuyo sasingayifundisisi iBhayibhile; kodwa eyona nto yayiphambili zizithethe zabantu. Kodwa lona uncwadi lwamaNgqina lwalucaphula rhoqo eBhayibhileni.

Kungaphelanga nenyanga, ndabuza uMzalwana noDade Isiocha ukuba ingena nini na icawa yabo. Xa ndafika okokuqala kwiintlanganiso zamaNgqina kaYehova, ndandingaqondi kwanto eyayithethwa. Kwakufundisiswa inqaku leMboniselo elithetha ngokuhlasela ‘kukaGogi wakwaMagogi,’ okhankanywe kwisiprofeto sikaHezekile. (Hezekile 38:1, 2) Ndandingawazi amagama amaninzi awayesetyenziswa apho, kodwa ndachukunyiswa gqitha yindlela abandamkela ngobubele ngayo kangangokuba ndagqiba ekubeni ndiye kwakhona ngeCawa elandelayo. Kuloo ntlanganiso yesibini, ndeva kuthethwa ngokushumayela. Ngoko ndabuza uPriscilla ukuba bashumayela nini. NgeCawa yesithathu, ndahamba nabo, ndiphethe iBhayibhile encinane. Ndandingenayo ibhegi yokushumayela kwanoncwadi lweBhayibhile. Sekunjalo, ndaba ngumvakalisi woBukumkani ndaza ndafaka ingxelo yenkonzo yasentsimini ekupheleni kwaloo nyanga!

Andizange ndiqhutyelwe isifundo seBhayibhile, kodwa qho xa ndityelele abakwaIsiocha, ndandifumana amazwi andikhuthazayo nandomelezayo elukholweni asekelwe eZibhalweni, yaye ndandifumana neencwadi eziliqela ezisekelwe eBhayibhileni. NgoDisemba 11, 1954, kwindibano yesithili eyayiseAba, ndafuzisela uzahlulelo lwam kuYehova ngokubhaptizwa emanzini. Umza wam endandihlala kuye nendandimsebenzela ngoxa wayendiqeqeshela ubugcisa, wayeka ukundinika ukutya nokundiqeqesha, waza akandinika nesenti emdaka ngokumsebenzela kwam. Kodwa andizange ndibe nanqala ngakuye; ndandivuyiswa nje kukuba nolwalamano lobuqu noThixo. Oku kwandithuthuzela kwaza kwandinika uxolo lwengqondo. Ndancedwa ngamaNgqina asekuhlaleni. AbakwaIsiocha bandinika ukutya, baza abanye bandiboleka imali ukuze ndiqalise ishishini elincinane. Phakathi kowe-1955, ndathenga ibhayisikile endala, ndaza ngoMatshi 1956 ndangenela ubuvulindlela obuthe ngxi. Ngokukhawuleza emva koko, ndakwazi ukuhlawula amatyala am. Ingeniso endandiyenza ngeli shishinana lam yayincinane kakhulu, kodwa ke noko ndandingalali ndingatyanga. Oko uYehova wayendinike kona kwakundanele.

“Ukuba” Abantwana Basekhaya

Ndathi ndakufumana indawo yam yokuhlala, ndazimisela ukunceda abantwana basekhaya ngokomoya. Ngenxa yokuba wayendichasa yaye engandithembi, uTata akazange ayithande into yokuba liNgqina kwam. Ngoko, ndandinokubanceda njani abantwana basekhaya ukuba bafunde inyaniso yeBhayibhile? Ndacela ukumxhasa ngokwemali umntakwethu omncinane uErnest, ngoko uTata wamvumela ukuba ahlale nam. UErnest wakhawuleza wayamkela inyaniso waza wabhaptizwa ngowe-1956. Oku kwamenza wachasa ngakumbi utata. Noko ke, nodadewethu owayesele etshatile, wayamkela inyaniso nomyeni wakhe. Xa ndacela ukuba udadewethu wesibini, uFelicia, aze kuchitha iiholide zesikolo kunye nam, uTata wavuma ebukrikriza. Kungekudala, naye uFelicia wabhaptizwa waza waba ngomnye wamaNgqina kaYehova.

Ngowe-1959, ndaya ekhaya ukuya kuthabatha udadewethu wesithathu, uBernice, ukuze ahlale noErnest. Lelo xesha kanye awandihlasela ngalo uTata, esithi ndiba abantwana bakhe. Wayengayiqondi into yokuba babezenzele ngokwabo isigqibo sokukhonza uYehova. UTata wafunga esithi akasokuze amvumele uBernice ukuba ahambe nam. Kodwa isandla sikaYehova asizange sibe sifutshane, kuba ngonyaka olandelayo, uBernice weza kuchitha iiholide zesikolo kunye noErnest. Kanye njengoodadewabo, naye wayamkela inyaniso waza wabhaptizwa.

‘Ukufunda Imfihlelo’

NgoSeptemba 1957 ndaqalisa ukuba nguvulindlela okhethekileyo, ndichitha malunga neeyure ezili-150 emsebenzini wokushumayela nyanga nganye. Mna noSunday Irogbelachi sasishumayela kwintsimi enkulu yaseAkpu-na-abuo, e-Etche. Kwindibano yokuqala yesiphaluka esaya kuyo apho, kwabhaptizwa abantu abali-13 kwiqela esasilifundisa. Kusivuyisa gqitha ukubona ngoku kukho amabandla angama-20 kuloo mmandla!

Ngowe-1958 ndadibana noChristiana Azuike, uvulindlela othe ngxi weBandla laseAba East. Ndachukunyiswa gqitha yinzondelelo yakhe, saza ngoDisemba waloo nyaka satshata. Ekuqaleni kowe-1959 ndamiselwa njengomveleli ohambahambayo, ndityelela ndize ndomeleze amabandla abazalwana bethu bokomoya. Ukususela ngoko ukusa kowe-1972, mna nomfazi wam sasisele sityelele phantse onke amabandla abantu bakaYehova empuma nakumbindi-ntshona weNigeria.

Amabandla ayegqagqene kakhulu, yaye ubukhulu becala sasihamba ngebhayisikile. Xa sityelela amabandla akwiidolophu ezinkulu, abazalwana babeqesha iteksi yokusisa kwibandla elilandelayo. Maxa wambi sasihlala kumagumbi anomgangatho orhidwe ngodaka nangenayo isilingi. Sasilala kwiibhedi ezenziwe ngeepali zesundu. Ezinye iibhedi zaziba noomatrasi abenziwe ngengca baze bagqunywe ngeemethi; kanti ezinye zazingenabo kwamatrasi abo. Yayingeyongxaki kuthi into yokuba sitya ukutya okunjani okanye okungakanani. Ekubeni sasiziqhelise ukwaneliseka kokuncinane esasinako, sasinandipha nakuphi na ukutya esinikwa kona, yaye abazalwana babekuxabisa oko. Kwezinye izixeko kwakungekho mbane ngaloo maxesha, ngoko sasiphatha ufinyafuthi osebenza ngeparafini. Phezu kwazo nje ezo meko zinzima, sasiba namaxesha amaninzi amyoli emabandleni.

Ebudeni baloo minyaka, sakuqonda ukubaluleka kwamazwi ompostile uPawulos athi: “Ukuba sinesixhaso nesambatho, masaneliswe zezo zinto.” (1 Timoti 6:8) Ebunzimeni, uPawulos wafunda imfihlelo eyamncedayo ukuba ahlale anelisekile. Yiyiphi loo mfihlelo? Uchaza esithi: “Ndiyazi ukuba kunjani ukuhlwempuzeka, ndiyazi ukuba kunjani ukuba nentabalala. Kuzo zonke izinto nakuzo zonke iimeko ndiye ndayifunda imfihlelo yokuba kunjani ukuhlutha nokulamba, neyokuba kunjani ukuba nentabalala nokuswela.” Nathi sifunde imfihlelo efanayo. Kwakhona uPawulos uthi: “Ezintweni zonke ndinamandla ngenxa yalowo [uThixo] undomelezayo.” (Filipi 4:12, 13) Oko kube yinyaniso ngokwenene kwimeko yethu! Siye sanandipha ukuba nolwaneliseko, ukuba nenxaxheba epheleleyo emsebenzini owakhayo wobuKristu, saza saba noxolo lwengqondo.

Ukutyelela Amabandla Njengentsapho

Ngasekupheleni kowe-1959 kwazalwa unyana wethu wamazibulo, uJoel, kwaza ngowe-1962 kwalandela unyana wesibini, uSamuel. Mna noChristiana saqhubeka nomsebenzi wokuhambahamba, sityelela amabandla kunye nala makhwenkwe. Ngowe-1967 kwavuka imfazwe yamakhaya eNigeria. Izikolo zavalwa ngenxa yokuhlasela kweenqwelo-moya. Umfazi wam wayengutitshalakazi ngaphambi kokuba singenele umsebenzi wokuhambahamba, ngoko ebudeni bemfazwe wabafundisela ekhaya abantwana bethu. Xa uSamuel wayeneminyaka emithandathu, wayesele ekwazi ukufunda nokubhala. Xa waya esikolweni emva kwemfazwe, wayephambili ngamabanga amabini kunoontanga bakhe.

Ngelo xesha, sasingayiqondi ngokupheleleyo indlela ekunzima ngayo ukukhulisa abantwana ngoxa sikumsebenzi wokuhambahamba. Noko ke, ukwabelwa kwethu ukuba sikhonze njengoovulindlela abakhethekileyo ngowe-1972 kwasinceda gqitha. Oku kwenza ukuba sihlale kwindawo enye ukuze sikwazi ukunika intsapho yethu ingqalelo eyaneleyo ngokomoya. Sabafundisa besebancinane oonyana bethu ukubaluleka kokuba nolwaneliseko lobuthixo. Ngowe-1973 uSamuel wabhaptizwa, waza yena uJoel waba nguvulindlela othe ngxi kwangawo loo nyaka. Bobabini oonyana bethu batshate noodade abathandekayo abangamaKristu yaye ngoku bakhulisela ezabo iintsapho enyanisweni.

Ubunzima Obubangelwe Yimfazwe Yamakhaya

Ukuqala kwemfazwe yamakhaya ndandingumveleli wesiphaluka, yaye ndityelele ibandla laseOnitsha, ndikunye nentsapho yam. Loo mfazwe yayibethelela ngakumbi kum into yokuba ngamampunge kokuziqwebela ubutyebi bezinto eziphathekayo nokuthembela kubo. Ndibone abantu bebaleka ukuze basindise ubomi babo—beshiya impahla yabo exabisekileyo ezitratweni.

Njengoko imfazwe yayiba shushu ngakumbi, onke amadoda anyanzelwa ukuba aye emkhosini. Abazalwana abaninzi abangazange bavume ukuya bathuthunjiswa. Sasingakwazi ukuhambahamba ngokukhululekileyo. Enye into eyadala intlungu engakumbi kwelo lizwe, yaba kukunqongophala kokutya. Ixabiso lesiqingatha sekhilogram secassava, lantinga ukusuka kuma-48 eesenti ukusa kuma-96 eerandi, laza elekomityi yetyuwa lantinga ukusuka kuma-55 eerandi ukuya kutsho kuma-290 eerandi. Ubisi, ibhotolo, neswekile, zazingekho kwaphela. Ukuze sikwazi ukuphila, sasisila ipapaya engekavuthwa size siyixube nentwana yomgubo wecassava. Sasisitya neentothoviyane, amaxolo ecassava, amagqabi ehibiscus, kwanengca—nantoni nje eligqabi eyayifumaneka. Inyama yayinqabile, ngoko ndandibamba amacikilishe size siwaphekele abantwana. Kodwa ke, kungakhathaliseki ukuba zazimbi kangakanani na iimeko, uYehova wayesoloko esixhasa.

Noko ke, eyona nto yayiyingozi nangakumbi yayikukulamba ngokomoya okwakubangelwa yimfazwe. Abazalwana abaninzi babaleka imfazwe baya kuzimela emahlathini okanye kwezinye iilali, yaye ngelo xesha balahlekelwa phantse lulo lonke uncwadi lwabo lweBhayibhile. Ukongezelela, ukuvalwa kweendlela yimikhosi karhulumente kwenza ukuba abazalwana bangakwazi ukungenisa uncwadi olutsha lweBhayibhile kummandla waseBiafra. Nangona inkoliso yamabandla yayizama ukuqhuba iintlanganiso, abazalwana babetsala nzima ngokomoya kuba babengakwazi ukufumana ulwalathiso oluvela kwiofisi yesebe.

Ukumelana Nendlala Yokomoya

Abaveleli abahambahambayo benza okusemandleni abo ukuze batyelele bandla ngalinye. Ekubeni abazalwana abaninzi babesabile kwezo dolophu, ndabakhangela naphi na apho babenokufumaneka khona. Ngesinye isihlandlo, ndashiya umfazi wam nabantwana kwindawo ekhuselekileyo ndaza ndahamba ndedwa kangangeeveki ezintandathu, ndisiya kwiilali ezahlukeneyo nasemahlathini, ndikhangela abazalwana.

Ngoxa ndandityelele ibandla laseOgbunka, ndeva ukuba kwakukho iqela lamaNgqina kummandla waseIsuochi okwisithili saseOkigwe. Ngoko ndathumela umyalezo wokuba abazalwana kuloo ngingqi bahlanganisane kumasimi eenqoba akwilali yaseUmuaku. Ndahamba nomnye umzalwana okhulileyo ngebhayisikile kangangeekhilomitha ezili-15 ukuya kuloo masimi, apho kwakuhlanganisene khona amaNgqina amalunga nama-200, kuquka abafazi nabantwana. Ngokuncedwa ngomnye udade onguvulindlela, ndakwazi ukufumana elinye iqela lamaNgqina amalunga nekhulu, awayezimele kumahlathi aseLomara.

ULawrence Ugwuegbu wayengomnye weqela labazalwana abakhaliphileyo ababehlala kwidolophu yaseOwerri eyayidlakazwe yimfazwe. Wandichazela ukuba kwakukho amaNgqina aliqela kummandla waseOhaji. Ayengakwazi ukuhambahamba ngokukhululekileyo, njengoko kwakukho amajoni kuloo ndawo. Satyelela apho ngobusuku saza safumana amaNgqina amalunga ne-120 kwiyadi yomnye umzalwana. Kwakhona sasebenzisa elo thuba ukuze sityelele namanye amaNgqina awayezimele kwezinye iindawo.

Umzalwana uIsaac Nwagwu wabeka ubomi bakhe esichengeni ukuze andincede ndifumane abanye abazalwana ababekwezinye iindawo. Wandiweza ngephenyane kuMlambo iOtamiri ukuze ndidibane namaNgqina angaphezu kwe-150 awayehlanganisene e-Egbu-Etche. Omnye umzalwana apho wadanduluka wathi: “Le yeyona mini ibalulekileyo ebomini bam! Andizange ndiyicinge into yokuba ndakuze ndiphinde ndimbone umveleli ohambahambayo. Nokuba ndingafa kule mfazwe, ndanelisekile.”

Ndandisengozini yokubanjwa ndisiwe emkhosini ngenkani, kodwa uYehova wayesoloko endikhusela. Ngenye imva kwemini, njengoko ndandibuyela kwindawo endandihlala kuyo, emva kokuba ndidibene nabazalwana abamalunga nama-250, ndamiswa liqela lamajoni awayevale indlela. Andibuza: “Kutheni ungayanga emkhosini?” Ndawachazela ukuba ndingumvangeli oshumayela ngoBukumkani bukaThixo. Ndaqonda ukuba azimisele ukundibamba. Emva kokuba ndithandazele ngaphakathi, ndathi kumphathi wawo, “Ndicela undikhulule.” Okumangalisayo kukuba waphendula wathi, “Ngaba uthi masikuyeke uhambe?” Ndathi, “Ewe, ndikhulule.” Wathi, “Ungakhululeka.” Akukho nalinye ijoni elakha lavul’ umlomo.—INdumiso 65:1, 2.

Ukwaneliseka Kuzisa Iintsikelelo Ezingakumbi

Emva kokuphela kwemfazwe ngowe-1970, ndaqhubeka ndingumveleli wesiphaluka. Kube lilungelo ukunceda ekulungelelaniseni amabandla kwakhona. Emva koko, mna noChristiana siye sakhonza njengoovulindlela abakhethekileyo de kwangowe-1976, nyaka lowo endaphinda ndamiselwa ngawo njengomveleli wesiphaluka. Phakathi kuloo nyaka, ndamiselwa njengomveleli wesithili. Kwiminyaka esixhenxe kamva, mna nomfazi wam samenywa ukuba sisebenze kwiofisi yesebe yamaNgqina kaYehova yaseNigeria, apho sihlala khona ngoku. Apha esebeni, kusoloko kusizisela uvuyo olukhulu ukuphinda sibone abazalwana noodade esadibana nabo ebudeni bemfazwe yamakhaya nangezinye izihlandlo, nabasaqhubeka bekhonza uYehova ngokuthembeka.

Ebudeni bayo yonke le minyaka, uChristiana uye wandixhasa ngendlela engathethekiyo. Ukuzimisela kwakhe, nakuba ebekhathazwa yimpilo ukususela ngowe-1978, kuye kwandomeleza gqitha. Siye sazibonela ngokwethu ukuchana kwamazwi omdumisi athi: “UYehova uya kumxhasa emandlalweni wokugula.”—INdumiso 41:3.

Xa ndikhangela emva kuyo yonke le minyaka ndikwinkonzo yobuthixo, ndimbulela ngokwenene uYehova ngeentsikelelo zakhe ezimangalisayo. Ndiye ndonwaba ngokwenene ngenxa yako konke oko andinike kona. Ukubona abantwana basekhaya, abantwana bam, neentsapho zabo, bonke bekhonza uYehova kunye nam nomfazi wam, kuyintsikelelo engathethekiyo. UYehova uye wandisikelela ngobomi obanelisayo nobunenjongo. Akukho namnye umnqweno wam ongazange uzalisekiswe.

[Umbhalo osemazantsi]

[Ibhokisi ekwiphepha 27]

Ilungiselelo Elifike Ngexesha Elililo Linceda Abazalwana

Phakathi ngeminyaka yee-1960, ubutshaba obabuphakathi kwabantu bohlanga olukumantla nolukwimpuma yeNigeria badala uqhushululu, imvukelo, ulwaphulo-mthetho, nogonyamelo. Oku kwabangela uxinezeleko olukhulu kumaNgqina kaYehova, awayezimisele ukungathabathi cala konke konke kuloo mbambano. Amalunga nama-20 kuwo abulawa. Inkoliso yawo yaphulukana nayo yonke impahla yayo.

NgoMeyi 30, 1967 amazwe akwimpuma yeNigeria arhoxa kulawulo lwamazwe amanyeneyo alapho, aza abumba iRiphabliki yaseBiafra. Kwahlanganiswa umkhosi wamazwe amanyeneyo, ukuze ulwe namazwe aseMpuma. Oko kwaphumela kwimfazwe yamakhaya ekwaphalala igazi elininzi kuyo.

Ukungathabathi cala kwamaNgqina kaYehova akummandla waseBiafra kwawenza aba zizisulu zokuhlaselwa. Amaphephandaba apapasha amanqaku aphembelela intiyo yabantu nxamnye nawo. Kodwa uYehova waqinisekisa ukuba abakhonzi bakhe bayakufumana ukutya kokomoya. Njani?

Ekuqaleni kowe-1968 umsebenzi wakwarhulumente wabelwa eYurophu waza omnye wabelwa kwisikhululo esincinane seenqwelo-moya eBiafra. Bobabini aba basebenzi babengamaNgqina. Le misebenzi yabo yababeka kwiincam ezimbini ezinxibelelanisa iBiafra namazwe angaphandle. La maNgqina mabini azinikela ngokuzithandela ukuba enze umsebenzi oyingozi wokuba lijelo lokungenisa ukutya kokomoya eBiafra. Anceda nasekuthumeleni izinto zokunceda abazalwana ababethwaxwa ziimeko ezimaxongo. Aba bazalwana babini baqhubeka neli lungiselelo ebudeni bayo yonke loo mfazwe, eyaphela ngowe-1970. Kamva omnye wabo wathi, “Eli lungiselelo lingaphaya kwayo nantoni na ebinokucetywa ngumntu.”

[Umfanekiso okwiphepha 23]

Ngowe-1956

[Umfanekiso okwiphepha 25]

Ngowe-1965, sikunye noonyana bethu, uJoel noSamuel

[Umfanekiso okwiphepha 26]

Kuyintsikelelo ngokwenene ukukhonza uYehova njengentsapho!

[Umfanekiso okwiphepha 27]

Ngoku mna noChristiana sikhonza kwisebe laseNigeria