Imibuzo Evela Kubafundi
Ekubeni abaLevi babengenalifa kuSirayeli wamandulo, kwakunokwenzeka njani ukuba uHanameli ongumLevi athengisele umza wakhe uYeremiya ongumLevi intsimi, njengoko kuchazwe kuYeremiya 32:7?
Ngokuphathelele abaLevi, uYehova wamxelela oku uAron: “Akuyi kuba nalifa, yaye akuyi kuba nasabelo phakathi [kukaSirayeli].” (Numeri 18:20) Noko ke, abaLevi banikwa izixeko ezingama-48 kunye namadlelo, awayekulo lonke iLizwe Lesithembiso. Ikhaya likaYeremiya lalikwidolophu yaseAnatoti, esesinye sezixeko ezabelwa “oonyana baka-Aron, ababingeleli.”—Yoshuwa 21:13-19; Numeri 35:1-8; 1 Kronike 6:54, 60.
KwiLevitikus 25:32-34, sifumanisa ukuba uYehova wanikela imiyalelo engqalileyo ngokuphathelele ‘ilungelo lokuthenga ngentlawulelo’ umhlaba wabaLevi. Kuyabonakala ukuba, iintsapho zabaLevi zazinamalungelo omhlaba ezaziwuzuza njengelifa. Oko kuthetha ukuba zazinako ukuthenga nokuthengisa umhlaba.a Kwiimeko ezininzi, amalungelo omhlaba ababenawo abaLevi ayefana nawamanye amaSirayeli.
Kusenokwenzeka ukuba, le mihlaba yayidluliselwa kubaLevi njengelifa. Noko ke, ngabaLevi kuphela ‘ababenelungelo lokuthenga ngentlawulelo.’ Kodwa ke, kubonakala ukuba ngumhlaba osezixekweni kuphela owawunokuthengwa uze uthengiswe, ngenxa yokuba “umhlaba wedlelo lezixeko zabo” wawungamele uthengiswe kuba “ulilifa labo kuse kwixesha elingenammiselo.”—Levitikus 25:32, 34.
Ngoko kuyabonakala ukuba intsimi uYeremiya awayithenga ngentlawulelo kuHanameli yayiyileyo wayenelungelo lokuyithenga. Kucacile ukuba yayisesixekweni. UYehova naye wayiqinisekisa into yokuba le “ntsimi” yayiyekaHanameli yaye uYeremiya ‘wayenelungelo lentlawulelo lokuyithenga.’ (Yeremiya 32:6, 7) UYehova wayisebenzisa le ntengiselwano ukuze aqinisekise isithembiso sakhe sokuba amaSirayeli ayeza kuphinda alizuze njengelifa ilizwe lawo emva kokuba ekhululiwe ekuthinjweni eBhabhiloni.—Yeremiya 32:13-15.
Akukho nto ibonisa ukuba uHanameli wayengenalo ilungelo lokuba nomhlaba eAnatoti. Kungekho nanto ibonisa ukuba waphula umthetho kaYehova xa wamema uYeremiya ukuba athenge le ntsimi iseAnatoti okanye ebonisa ukuba uYeremiya walisebenzisa kakubi ilungelo lakhe lokuyithenga ngentlawulelo.—Yeremiya 32:8-15.
[Umbhalo osemazantsi]
a Ngenkulungwane yokuqala yeXesha Eliqhelekileyo, uBharnabhas ongumLevi wathengisa umhlaba wakhe waza wanikela ngemali yawo ukuze kuncedwe abalandeli bakaKristu abahlwempuzekileyo eYerusalem. Kusenokwenzeka ukuba lo mhlaba wawusePalestina okanye eSipro. Okanye yayingumhlaba wamangcwaba owawufunyenwe nguBharnabhas eYerusalem.—IZenzo 4:34-37.