‘Ikhoboka Elithembekileyo’ Liyaluphumelela Uvavanyo!

“Ngokuba lixesha lokuba umgwebo uqale ngendlu kaThixo.”—1 PETROS 4:17.

1. Yintoni eyafunyaniswa nguYesu xa wayehlola “ikhoboka”?

NGEPENTEKOSTE yowama-33 C.E., uYesu wamisela “ikhoboka” elaliza kulungiselela amalungu ‘empahla yendlu’ yakhe ukutya ngexesha elifanelekileyo. Ngowe-1914, uYesu wabekwa etroneni njengoKumkani, yaye lakhawuleza lafika ixesha lokuba lihlolwe eli “khoboka.” Ubukhulu becala, wafumanisa ukuba eli “khoboka” lizingqine ‘lithembekile yaye liyingqondi.’ Ngoko, walimisela ‘phezu kwayo yonke impahla yakhe.’ (Mateyu 24:45-47) Kodwa ke, lalikho nekhoboka elingathembekanga lingeyiyo nengqondi.

“Elo Khoboka Linobubi”

2, 3. Lalivela phi “elo khoboka linobubi,” yaye laphelela phi?

² UYesu wathetha ngekhoboka elinobubi ngokukhawuleza emva kokuchaza “ikhoboka elithembekileyo neliyingqondi.” Wathi: “Ukuba elo khoboka linobubi lingakhe lithi entliziyweni yalo, ‘Inkosi yam iyalibala,’ lize liqale ukubetha amakhoboka angamadlelane alo yaye lidle lize lisele namanxila aziwayo, inkosi yelo khoboka iya kuza ngemini elingayilindelanga nangelixa elingalaziyo, kwaye iya kulohlwaya ngokona kuqatha kakhulu ize ilabele nabahanahanisi. Apho kuya kubakho ukulila nokutshixiza kwamazinyo alo.” (Mateyu 24:48-51) Ibinzana elithi “elo khoboka linobubi” litsalela ingqalelo yethu kumazwi angaphambili kaYesu aphathelele ikhoboka elithembekileyo neliyingqondi. Ngokwenene, ‘ikhoboka elinobubi’ lacebuka kwikhoboka elithembekileyo.a Kwenzeka njani oko?

³ Ngaphambi kowe-1914, amalungu amaninzi odidi lwekhoboka elithembekileyo ayezithembise ukuba aza kudibana noMyeni ezulwini ngaloo nyaka, kodwa elo themba alizange lizaliseke. Ngenxa yesi sizathu nezinye, amaninzi adana yaye ambalwa acaphuka. Amanye kuwo aqalisa “ukubetha” ngamazwi ababesakuba ngabazalwana bawo aza azidibanisa “namanxila aziwayo,” iinkonzo zonqulo lweNgqobhoko.—Isaya 28:1-3; 32:6.

4. UYesu waqhubana njani ‘nekhoboka elinobubi’ kwakunye nabo bonke abo baye babonisa isimo sengqondo esifana nesalo?

⁴ Aba babesakuba ngamaKristu baphela ‘belikhoboka elinobubi,’ yaye uYesu wabohlwaya “ngokona kuqatha kakhulu.” Njani? Wabagatya, baza baphulukana nethemba ababenalo lokuphila ezulwini. Kodwa ke, abazange batshatyalaliswe ngokukhawuleza. Kwafuneka baqale banyamezele ixesha lokulila nokutshixiza kwamazinyo ‘ebumnyameni ngaphandle’ kwebandla lamaKristu. (Mateyu 8:12) Ukususela ngaloo minyaka yamandulo, kukho nabanye abambalwa kubathanjiswa abaye nabo babonisa isimo sengqondo esingalunganga, bezibonakalisa ‘njengekhoboka elinobubi.’ Abanye ‘bezinye izimvu’ baye baxelisa ukungathembeki kwabo. (Yohane 10:16) Zonke ezo ntshaba zikaKristu ziphelela ‘ngaphandle kubumnyama’ bokomoya.

5. Lasabela njani ikhoboka elithembekileyo neliyingqondi ngokwahlukileyo ‘kwikhoboka elinobubi’?

⁵ Noko ke, “ikhoboka elithembekileyo neliyingqondi” lavavanywa ngendlela efanayo ‘nekhoboka elinobubi.’ Noko ke, kunokuba licaphuke, lavuma ukulungiswa. (2 Korinte 13:11) Uthando lwalo ngoYehova nabazalwana balo lomelezwa. Ngenxa yoko, liye laba ‘yintsika nesixhaso senyaniso’ ebudeni bale “mihla yokugqibela” izele ziziphithiphithi.—1 Timoti 3:15; 2 Timoti 3:1.

Iintombi Ezinyulu Eziziingqondi Nezizizidenge

6. (a) UYesu wakuzekelisa njani ukuba nengqiqo kodidi lwekhoboka lakhe elithembekileyo? (b) Ngaphambi kowe-1914, amaKristu athanjisiweyo ayevakalisa siphi isigidimi?

⁶ Emva kokuba ethethe ‘ngelo khoboka linobubi,’ uYesu wenza imizekeliso emibini ukubonisa isizathu sokuba amanye amaKristu athanjisiweyo ayeza kuthembeka aze abe ziingqondi ngoxa amanye ayengazi kuba njalo.b Ezekelisa ukubaluleka kokuba nengqiqo, wathi: “Ubukumkani bamazulu buya kuba njengeentombi ezinyulu ezilishumi ezathabatha izibane zazo, zaphuma zaya kuhlangabeza umyeni. Ezintlanu zazo zazizizidenge, kwaye ezintlanu ziziingqondi. Ezizizidenge zathabatha izibane zazo kodwa azizange ziyithabathe ioli, kanti eziziingqondi zathabatha ioli ngezikhongozelo zazo nezibane zazo.” (Mateyu 25:1-4) Iintombi ezinyulu ezilishumi zisikhumbuza ngamaKristu athanjisiweyo ngaphambi kowe-1914. Ayeqikelela ukuba umyeni onguYesu Kristu wayeza kufika kungekudala. Ngenxa yoko, “aphuma” aya kumhlangabeza, evakalisa ngenkalipho ukuba “amaxesha amisiweyo eentlanga” ayeza kuphela ngowe-1914.—Luka 21:24.

7. AmaKristu athanjisiweyo ‘alala’ nini ngokomfuziselo yaye ngoba?

⁷ Ayechan’ ucwethe. Amaxesha amisiweyo eentlanga aphela ngowe-1914, yaye uBukumkani bukaThixo phantsi kukaKristu Yesu baqalisa ukulawula. Kodwa oko kwenzeka kumazulu angabonakaliyo. Emhlabeni, uluntu lwaqalisa ukuthwaxwa ‘nguyeha’ owaxelwa kwangaphambili. (ISityhilelo 12:10, 12) Kwaqala ixesha lovavanyo. Ngenxa yokungaziqondi ngokucacileyo izinto, amaKristu athanjisiweyo acinga ukuba ‘umyeni ulibele.’ Edidekile yaye echaswa lihlabathi, ayekelel’ umxakatho yaye aphantsa awuyeka umsebenzi wokushumayela esidlangalaleni. Kanye njengeentombi ezinyulu zomzekeliso, ‘anqwaleka aza alala’ ngokomoya, ngendlela abenza ngayo abo bathi bangamaKristu nabangathembekanga emva kokufa kwabapostile bakaYesu.—Mateyu 25:5; ISityhilelo 11:7, 8; 12:17.

8. Yintoni eyakhokelela kudanduluko oluthi: “Nanku umyeni!” yaye kwakulixesha lokuba enze ntoni amaKristu athanjisiweyo?

⁸ Kwathi ke ngowe-1919 kwenzeka into eyayingalindelwanga. Siyafunda: “Kanye phakathi kobusuku kwavela udanduluko, ‘Nanku umyeni! Phumani niye kumhlangabeza.’ Ngoko zonke ezo ntombi zinyulu zavuka zaza zabeka izibane zazo ngolungelelwano.” (Mateyu 25:6, 7) Kanye xa izinto zazibonakala zimfiliba, kwakufuneka ziphaphe! Ngowe-1918, uYesu, “umthunywa womnqophiso,” wafika kwitempile kaYehova yokomoya ngenjongo yokuhlola nokucoca ibandla likaThixo. (Malaki 3:1) Ngoku, kwafuneka amaKristu athanjisiweyo aphume aye kumkhawulela kwintendelezo yasemhlabeni yaloo tempile. Elo yayilixesha lawo ‘lokukhanyisa.’—Isaya 60:1; Filipi 2:14, 15.

9, 10. Ngowe-1919, kwenzeka njani ukuba amanye amaKristu abe “ziingqondi” aze amanye abe “zizidenge”?

⁹ Kodwa khawume ke! Kulo mzekeliso amanye kula mabhinqa aselula ayenengxaki. UYesu wahlabela mgama esithi: “Ezizizidenge zathi kweziziingqondi, ‘Sinikeni inxalenye yeoli yenu, ngenxa yokuba izibane zethu sele ziza kucima.’” (Mateyu 25:8) Izibane azinakukhanyisa ngaphandle kweoli. Ngenxa yoko ioli isikhumbuza iLizwi likaThixo lenyaniso nomoya wakhe oyingcwele, owenza abanquli bokwenyaniso babe ngabathwali bokukhanya. (INdumiso 119:130; Daniyeli 5:14) Ngaphambi kowe-1919, amaKristu athanjisiweyo aziingqondi aye akuhlolisisa ngenkalipho ukuthanda kukaThixo ngawo, nakuba ayebuthathaka okwethutyana. Ngenxa yoko, xa kwaphuma ilizwi elithi makakhanyise, ayesele elungile.—2 Timoti 4:2; Hebhere 10:24, 25.

¹⁰ Noko ke, abanye abathanjiswa babengakulungelanga ukuzincama okanye ukusebenza ngokuzimisela—nakuba babekufuna ngamandla ukuba kunye noMyeni. Ngoko ixesha lokuba bashumayele iindaba ezilungileyo lafika bengazilungiselelanga. (Mateyu 24:14) Bada bazama ukuthothisa amaqabane abo awayezimisele, ngokungathi kunjalo becela inxalenye yeoli yawo. Kumzekeliso kaYesu, zasabela njani iintombi ezinyulu eziziingqondi? Zathi: “Mhlawumbi isenokungasaneli ncam thina nani. Ngoko ke, yiyani kwabo bayithengisayo, nizithengele.” (Mateyu 25:9) Ngokufanayo, ngowe-1919 amaKristu athanjisiweyo nathembekileyo ala ukwenza nantoni na eyayiza kuphazamisana nokuba ngabathwali bokukhanya. Ngaloo ndlela, aluphumelela uvavanyo.

11. Kwenzeka ntoni kwiintombi ezinyulu ezizizidenge?

¹¹ UYesu uqukumbela ngelithi: “Ngoxa [iintombi ezinyulu ezizizidenge] zazisiya kuthenga, wafika umyeni, zaza iintombi ezinyulu ezazilungile zangena naye kwitheko lomtshato; lwavalwa ke ucango. Emva koko ezinye iintombi ezinyulu nazo zafika, zisithi, ‘Mnumzana, mnumzana, sivulele!’ Ekuphenduleni wathi, ‘Inene ndithi kuni, andinazi.’” (Mateyu 25:10-12) Ewe, abanye babengakulungelanga ukufika koMyeni. Ngenxa yoko, abazange baluphumelele uvavanyo, yaye baphulukana nethuba lokubakho kwitheko lomtshato wasezulwini. Oko kwakubuhlungu ngokwenene!

Umzekeliso Weetalente

12. (a) UYesu wakuzekelisa njani ukuthembeka? (b) Ngubani indoda ‘eyahambela kwenye indawo’?

¹² Emva kokwenza umzekeliso ophathelele ingqiqo, uYesu wahlabela mgama wenza omnye umzekeliso ophathelele ukuthembeka. Wathi: “Kanye kunjengaxa umntu, owayeza kuhambela kwenye indawo, wabiza amakhoboka akhe waza wawanika impahla yakhe. Elinye walinika iitalente ezintlanu, elinye ezimbini, ukanti elinye walinika enye, ngalinye ngokwamandla alo, waza waya kwenye indawo.” (Mateyu 25:14, 15) Le ndoda ikulo mzekeliso kaYesu nguye, kuba ‘wahambela kwenye indawo’ xa wenyukela ezulwini ngowama-33 C.E. Kodwa ngaphambi kokunyuka kwakhe, uYesu wayinika abafundi bakhe abathembekileyo “impahla yakhe.” Njani?

13. UYesu wawuhlahlel’ indlela njani umsebenzi waza wanika “amakhoboka” akhe igunya lokushishina?

¹³ Ebudeni bobulungiseleli bakhe basemhlabeni, uYesu wahlahl’ indlela yokushunyayelwa kweendaba ezilungileyo zoBukumkani kulo lonke elakwaSirayeli. (Mateyu 9:35-38) Ngaphambi kokuba ‘ahambele kwenye indawo,’ wawunika abafundi bakhe lo msebenzi esithi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona.” (Mateyu 28:18-20) Ngala mazwi, uYesu wawanika igunya “amakhoboka” akhe lokuba ashishine de abuye “ngalinye ngokwamandla alo.”

14. Kutheni kwakungalindelekanga ukuba wonke umntu ashishine ngendlela elinganayo?

¹⁴ Elo binzana libonisa ukuba asingawo onke amaKristu enkulungwane yokuqala awayeneemeko ezifanayo. Amanye, anjengoPawulos noTimoti ayekhululekile ukuba nesabelo ngokupheleleyo kumsebenzi wokushumayela nokufundisa. Kusenokwenzeka ukuba iimeko zamanye zazingawavumeli ngokupheleleyo ukuba abe nesabelo ngokukhululekileyo emsebenzini. Ngokomzekelo, amanye amaKristu ayengamakhoboka, amanye ekhathazwa yimpilo, amanye sele ekhulile ngeminyaka kanti amanye eneembopheleleko zentsapho. Kakade ke, ezinye iimbopheleleko zebandla zazingafunyanwa ngabo bonke abafundi. Amabhinqa athanjisiweyo namanye amadoda athanjisiweyo ayengafundisi ebandleni. (1 Korinte 14:34; 1 Timoti 3:1; Yakobi 3:1) Noko ke, enoba babekweyiphi imeko, bonke abafundi abathanjisiweyo bakaKristu—amadoda namabhinqa—bayalelwa ukuba bashishine, besebenzisa onke amathuba abanawo kubulungiseleli bamaKristu. Kwanabo baphila kule mihla benza ngendlela efanayo.

Kuqalisa Ixesha Lokuhlolwa!

15, 16. (a) Lalinini ixesha lokulungisa amatyala? (b) Ngawaphi amanye amathuba ‘okushishina’ awanikwa abo bathembekileyo?

¹⁵ Lo mzekeliso uqhubeka usithi: “Emva kwexesha elide inkosi yaloo makhoboka yeza yalungisa amatyala kunye nawo.” (Mateyu 25:19) Ngowe-1914—kwiminyaka emininzi kakhulu emva kowama-33 C.E.—uKristu Yesu weza njengoKumkani. Ngowe-1918, kwiminyaka emithathu enesiqingatha kamva, weza kwitempile kaThixo yokomoya, ezalisekisa amazwi kaPetros athi: “Lixesha lokuba umgwebo uqale ngendlu kaThixo.” (1 Petros 4:17; Malaki 3:1) Elo yayilixesha lokulungisa amatyala.

¹⁶ Amakhoboka, angabazalwana bakaYesu abathanjisiweyo, azenza ntoni “iitalente” zikaKumkani? Ukususela ngowama-33 C.E. ukuya phambili, kwanakwiminyaka yangaphambi kowe-1914, amaninzi ebesebenza nzima ‘kwishishini’ likaYesu. (Mateyu 25:16) Kwanasebudeni bemfazwe yokuqala yehlabathi, abonisa umnqweno wokukhonza iNkosi. Ngoko, yayilixesha lokunika abo bathembekileyo amanye amathuba ‘okushishina.’ Ixesha lokuphela kwale nkqubo yezinto lalifikile. Iindaba ezilungileyo zazifanele zishunyayelwe ehlabathini lonke. “Isivuno sehlabathi” sasimele sivunwe. (ISityhilelo 14:6, 7, 14-16) Kwakufuneka kuqokelelwe amalungu okugqibela odidi lwengqolowa ‘nawesihlwele esikhulu’ sezinye izimvu.—ISityhilelo 7:9; Mateyu 13:24-30.

17. AmaKristu athanjisiweyo nathembekileyo ‘angena njani kuvuyo lwenkosi yawo’?

¹⁷ Ixesha lokuvuna limyoli. (INdumiso 126:6) Yiyo loo nto, ngowe-1919 uYesu xa wayenika abazalwana bakhe abathanjisiweyo nabathembekileyo imbopheleleko engakumbi, wathi: “Ubuthembekile kwizinto ezimbalwa. Ndiza kukumisela phezu kwezinto ezininzi. Ngena kuvuyo lwenkosi yakho.” (Mateyu 25:21, 23) Ngaphezu koko, uvuyo lweNkosi njengoKumkani osandul’ ukubekwa etroneni woBukumkani bukaThixo alunakuthelekiswa nanto. (INdumiso 45:1, 2, 6, 7) Udidi lwekhoboka elithembekileyo lunandipha olo vuyo ngoku ngokumela uKumkani nokuhambisela phambili izilangazelelo zakhe emhlabeni. (2 Korinte 5:20) Uvuyo lwabo lubonakala kumazwi esiprofeto akuIsaya 61:10: “Nakanjani na ndiya kugcoba ngoYehova. Umphefumlo wam uya kuvuya ngoThixo wam. Kuba undambese ngezambatho zosindiso.”

18. Kwakutheni ukuze abanye bangakuphumeleli ukuhlolwa, yaye oko kwaba nawuphi umphumo?

¹⁸ Okulusizi kukuba, abanye abazange bakuphumelele ukuhlolwa. Sifunda oku: “Ekugqibeleni elo lalifumene italente enye leza ngaphambili lathi, ‘Nkosi bendikwazi njengomntu ongqongqo, uvuna apho ubungahlwayelanga khona uze uhlanganise apho ubungelanga khona. Ngoko ndiye ndafikelwa luloyiko ndaza ndaya kuyifihla italente yakho emhlabeni. Naku okukokwakho.’” (Mateyu 25:24, 25) Ngokufanayo, amanye amaKristu athanjisiweyo akazange ‘ashishine.’ Ngaphambi kowe-1914 akazange abelane ngokuzimisela nabanye ngethemba lawo, yaye akazange afune ukuqalisa ngowe-1919. UYesu wasabela njani koko kungabi nantlonelo? Wawohlutha onke amalungelo awayenawo. ‘Aphoswa phandle ebumnyameni, apho kuya kubakho ukulila nokutshixiza kwamazinyo.’—Mateyu 25:28, 30.

Ukuhlolwa Kuyaqhubeka

19. Ukuhlolwa kuqhubeka ngayiphi indlela, yaye yintoni azimisele ukuyenza onke amaKristu athanjisiweyo?

¹⁹ Kambe ke, uninzi lwabo babeza kuba ngamakhoboka athanjisiweyo kaKristu ebudeni bexesha lesiphelo babengekabi ngabakhonzi bakaYehova ekuqaliseni kukaYesu ukuhlola ngowe-1918. Ngaba baphoswa lilungelo lokuhlolwa? Akunjalo konke konke. Ukuhlolwa kuqale ebudeni bowe-1918 nowe-1919, ngethuba ikhoboka elithembekileyo neliyingqondi njengeqela elaphumelela ngalo uvavanyo. UmKristu othanjisiweyo ngamnye uyaqhubeka ehlolwa ade atywinwe ngokusisigxina. (ISityhilelo 7:1-3) Bekuqonda oku, abazalwana abathanjisiweyo bakaKristu bazimisele ukuqhubeka ‘beshishina’ ngokuthembekileyo. Bazimisele ukuhlala beziingqondi, begcine isixa esanelelyo seoli ukuze baqhubeke bekhanyisa ngokuqaqambileyo. Bayazi ukuba xa ngamnye wabo egqiba ikhondo lakhe lobomi ngokuthembekileyo, uYesu uya kumamkelela kwindawo yokuhlala yasezulwini.—Mateyu 24:13; Yohane 14:2-4; 1 Korinte 15:50, 51.

20. (a) Yintoni ezizimisele ukuyenza namhlanje ezinye izimvu? (b) Yintoni ayiqonda kakuhle amaKristu athanjisiweyo?

²⁰ Isihlwele esikhulu sezinye izimvu siye saxelisa abazalwana baso abathanjisiweyo. Siyayiqonda into yokuba ukwazi kwaso ngeenjongo zikaThixo kusizisela imbopheleleko enkulu. (Hezekile 3:17-21) Ngoko ke, ngoncedo lweLizwi likaYehova nomoya oyingcwele, naso sigcina isixa esaneleyo seoli ngokuthi sifundisise size siye nakwiintlanganiso. Yaye siyaqhubeka sikhanyisa, ngokuthi sibe nesabelo emsebenzini wokushumayela nokufundisa, ngaloo ndlela ‘sishishina’ kunye nabazalwana baso abathanjisiweyo. Kodwa ke, amaKristu athanjisiweyo ayiqonda kakuhle into yokuba ngawo aphathiswe iitalente. Amele aphendule ngendlela ayisebenzisa ngayo impahla yeNkosi emhlabeni. Nangona embalwa ngenani, akanakuyiphosa emagxeni esihlwele esikhulu imbopheleleko yawo. Ngenxa yeso sizathu, ikhoboka elithembekileyo neliyingqondi liyaqhubeka likhokela ekuqhubeni ishishini likaKumkani, yaye liyixabisa kakhulu inkxaso yamalungu azinikeleyo esihlwele esikhulu. Nawo ayayiqonda imbopheleleko ephathiswe abazalwana bawo abathanjisiweyo yaye akugqala njengelungelo elikhulu ukusebenza ngaphantsi kolwalathiso lwabo.

21. Sisiphi isibongozo esibhekisela kuwo onke amaKristu angaphambi kowe-1919 ukuza kuthi ga kumhla wethu?

²¹ Ngoko, nangona le mizekeliso mibini isikhanyisela ngeziganeko ezenzeka malunga nowe-1919, kodwa eneneni ibhekisela kuwo onke amaKristu okwenyaniso ebudeni bayo yonke imihla yesiphelo. Oko kutheth’ ukuthi, ngoxa isibongozo uYesu awasenza ekupheleni komzekeliso weentombi ezilishumi sibhekisela ngokuyintloko kumaKristu athanjisiweyo ngaphambi kowe-1919, kodwa eneneni sikwabhekisela nakumKristu ngamnye. Ngoko ngamana sonke singawathobela amazwi kaYesu athi: “Ngoko ke, hlalani nilindile, ngenxa yokuba ningayazi imini okanye ilixa.”—Mateyu 25:13.

[Imibhalo esemazantsi]

Ngaba Unokucacisa?

• UYesu ubahlole nini abalandeli bakhe, yaye yintoni ayifumanisileyo?

• Kutheni amanye amaKristu athanjisiweyo eye abonisa umoya ‘wekhoboka elinobubi’?

• Sinokuzibonakalisa njani siziingqondi ngokomoya?

• Ngokuxelisa abazalwana bakaYesu abathanjisiweyo nabathembekileyo, sinokuqhubeka njani ‘sishishina’?

[Ibhokisi ekwiphepha 16]

UZA NINI UYESU?

KuMateyu isahluko 24 nesama-25, uYesu uchazwe ‘esiza’ ngeendlela ezahlukeneyo. Akukho mfuneko yokuba ‘eze’ ngokoqobo. Kunoko, ‘uza’ ngengqiqo yokuba unikel’ ingqalelo eluntwini okanye kubalandeli bakhe, ingakumbi ngenjongo yokugweba. Ngoko, ngowe-1914 ‘weza’ kuqalisa ubukho bakhe njengoKumkani obekwe etroneni. (Mateyu 16:28; 17:1; IZenzo 1:11) Ngowe-1918 ‘weza’ njengomthunywa womnqophiso waza waqalisa ukugweba abo bazibanga bekhonza uYehova. (Malaki 3:1-3; 1 Petros 4:17) NgeArmagedon, ‘uza’ ngenjongo yokugweba iintshaba zikaYehova.—ISityhilelo 19:11-16.

Ukuza (okanye, ukufika) ekuthethwa ngako izihlandlo eziliqela kuMateyu 24:29-44 nesama-25:31-46 koko ‘kwembandezelo enkulu.’ (ISityhilelo 7:14) Kanti kona ukuza ekuthethwa ngako izihlandlo eziliqela kuMateyu 24:45 ukusa kwesama-25:30 kubhekisela ekugwebeni kwakhe abo bazibanga bengabafundi bakhe ukususela ngowe-1918 ukusa phambili. Ngokomzekelo, bekungayi kuba sengqiqweni ukuthi ukuvuzwa kwekhoboka elithembekileyo, ukugwetywa kweentombi ezinyulu eziziziyatha, nokugwetywa kwekhoboka elidangeleyo, elayifihlayo italente yeNkosi, bekuya kwenzeka ‘ekuzeni’ kukaYesu ngembandezelo enkulu. Oko bekuya kuthetha ukuba abathanjiswa abaninzi bebeya kufunyaniswa bengathembekanga ngelo xesha kuze kufuneke ukuba bathatyathelw’ indawo ngabanye. Kodwa ke, iSityhilelo 7:3 sibonisa ukuba onke amakhoboka athanjisiweyo kaKristu aya kube ‘etywinwe’ ngokusisigxina ngelo xesha.

[Umfanekiso okwiphepha 14]

‘Ikhoboka elingendawo’ alizange lifumane zintsikelelo ngowe-1919

[Umfanekiso okwiphepha 15]

Iintombi ezinyulu ezizizilumko zazilungile ekufikeni komyeni

[Umfanekiso okwiphepha 17]

Ikhoboka elithembekileyo liye ‘lashishina’

Ikhoboka elidangeleyo lona alenzanga njalo

[Imifanekiso ekwiphepha 18]

Abathanjisiweyo ‘nesihlwele esikhulu’ bayaqhubeka bekhanyisa