Ukubonisa Ububele Kwihlabathi Elinobutshaba
“Into enqwenelekayo kumntu wasemhlabeni bububele bakhe bothando.”—IMIZEKELISO 19:22.
1. Kutheni kunokuba nzima ukubonisa ububele?
NGABA uzigqala njengomntu onobubele? Ukuba kunjalo, ukuphila kwihlabathi lanamhlanje kusenokuba nzima. Enyanisweni, iBhayibhile ibuchaza ububele njengenxalenye ‘yesiqhamo somoya,’ kodwa kutheni kunzima kangaka ukubonisa ububele kwanakumazwe ekuthiwa ngawobuKristu? (Galati 5:22) Njengokuba siphawulile kwinqaku elingaphambili, isizathu soko seso sichazwe ngumpostile uYohane, sokuba ihlabathi lilawulwa sisidalwa somoya esingenabubele, uSathana uMtyholi. (1 Yohane 5:19) UYesu Kristu wachaza uSathana ‘njengomlawuli wehlabathi.’ (Yohane 14:30) Ngoko ke, eli hlabathi lixelisa umlawuli walo onemvukelo nokhohlakeleyo.—Efese 2:2.
2. Luluphi ucelomngeni esinokujamelana nalo ngokuphathelele ukubonisa ububele?
2 Siba buhlungu gqitha xa abanye besiphatha ngokungenabubele. Impatho elolo hlobo sinokuyifumana kubamelwane abanentiyo, kubantu esingabaziyo abangenabuhlobo, kubahlobo bethu kwanakumalungu entsapho anokwenza izinto angazicinganga. Ukuba phakathi kwabantu abakrwada nabathanda ukuthukisa kusenokusinxunguphalisa. Xa abanye bengabonisi bubele ngaloo ndlela, oko kunokusenza nathi sibe nobutshaba, size singabenzeli bubele. Oko kusenokude kubangele iingxaki ngokomoya nangokwasempilweni.—Roma 12:17.
3. Ziziphi iingxaki abajamelana nazo abantu ezenza kube nzima ukubonisa ububele?
3 Iingcinezelo zeli hlabathi nazo zinokwenza kube nzima ukubonisa ububele. Ngokomzekelo, abantu banxunguphaliswa kukoyika abanqolobi nokusetyenziswa kwezixhobo zemichiza okanye zenyukliya ngamazwe ahlukahlukeneyo. Ukongezelela, izigidi zabantu zihlwempuzekile, azifumani kutya kwaneleyo, ikhusi, impahla nonyango. Kuba nzima ukubonisa ububele xa uphelelwe lithemba.—INtshumayeli 7:7.
4. Sisiphi isigqibo esiphosakeleyo abanokufikelela kuso abanye ngokuphathelele ukubonisa ububele?
4 Omnye umntu unokugqiba kwelokuba ukubonisa ububele akubalulekanga kangako yaye kunokude kube luphawu lobuthathaka. Unokuvakalelwa kukuba uyaxhatshazwa, ingakumbi xa abanye bemphatha ngqwabalala. (INdumiso 73:2-9) Noko ke, iBhayibhile isinika ulwalathiso oluchanileyo isithi: “Impendulo, xa inobulali, isusa umsindo, kodwa ilizwi elibangela intlungu linyusa umsindo.” (IMizekeliso 15:1) Ubulali nobubele ziinkalo ezimbini zesiqhamo somoya ezihlobeneyo, yaye ziluncedo xa sijamelene neemeko ezinzima.
5. Ziziphi iinkalo esifanele sibonise ububele kuzo?
5 Ekubeni ukubonisa isiqhamo somoya kaThixo kubaluleke gqitha kuthi njengamaKristu, sifanele siqwalasele indlela esinokusibonisa ngayo esinye sezo ziqhamo—ububele. Ngaba sinokukwazi ukubonisa ububele kwihlabathi elinobutshaba? Ukuba kunjalo, ziziphi iinkalo esinokubonisa kuzo ukuba asivumeli uSathana asiyekise ukubonisa ububele, ingakumbi xa sicinezelekile? Makhe sihlolisise iindlela esinokubonisa ngazo ububele entsatsheni, emsebenzini, esikolweni, kubamelwane bethu, entsimini, nakwabo sikhonza kunye nabo.
Ukubonisa Ububele Entsatsheni
6. Kutheni kubaluleke kangaka ukubonisa ububele entsatsheni, yaye sinokububonisa njani?
6 Ukuze sifumane intsikelelo nolwalathiso lukaYehova, kubalulekile ukuba sisihlakulele ngokupheleleyo isiqhamo somoya. (Efese 4:32) Makhe sinikel’ ingqalelo kwimfuneko yokuba amalungu entsapho abonise ububele kwamanye. Ntsuku zonke indoda nomfazi bafanele baphathane ngobubele nangenyameko, benjenjalo nasebantwaneni babo. (Efese 5:28-33; 6:1, 2) Bufanele bubonakale ngokuthi lungu ngalinye lentsapho lithethe ngobubele kwelinye, abantwana bahlonele abazali, nabazali babaphathe ngendlela efanelekileyo abantwana babo. Yiba ngumntu okhawulezayo ukuncoma, ungakhawulezi ukugxeka.
7, 8. (a) Ziziphi izinto esimele siziphephe ukuba sifuna ukubonisa ububele bokwenene entsatsheni? (b) Ukuncokolisana kuba negalelo njani ekuqiniseni intsapho? (c) Ungabubonisa njani ububele entsatsheni?
7 Ukuba nobubele entsatsheni kuquka ukuthobela isibongozo sompostile uPawulos esithi: “Ngokwenene lahlani konke, ingqumbo, umsindo, ububi, yaye makungaphumi ntetho itshabhisayo, nantetho ingamanyala emlonyeni wenu.” Mihla le, iintsapho ezingamaKristu zifanele zincokolisane ngentlonelo. Ngoba? Ngenxa yokuba ukuncokolisana kubaluleke gqitha ekuqiniseni iintsapho. Xa kukho ukungavisisani, zama ukucombulula ingxaki endaweni yokudala impikiswano. Amalungu entsapho eyonwabileyo azabalazela ukuba nobubele nolwazelelelo kwamanye.—Kolose 3:8, 12-14.
8 Ububele benza ukuba sifune ukubenzela izinto ezintle abanye. Ngaloo ndlela, sibonisa ulwazelelelo size siwancede amanye amalungu entsapho. Ukuze intsapho ibe nodumo oluhle kufuneka lungu ngalinye libonise ububele. Ngenxa yoko, ayiyi kufumana intsikelelo kaThixo nje kuphela, kodwa oko kuya kumzukisa uThixo wobubele, uYehova, ebandleni nasekuhlaleni.—1 Petros 2:12.
Ukubonisa Ububele Emsebenzini
9, 10. Chaza iingxaki ezinokuvela emsebenzini, uze ugqabaze ngendlela ezinokuconjululwa ngayo ngobubele.
9 KumKristu, kusenokuba lucelomngeni ukubonisa ububele kwabo asebenza nabo. Ukungevani phakathi kwabasebenzi kusenokubangela ukuba ngamaqhinga omnye angcolise igama lakho kumqeshi wakho, nto leyo esenokukubeka esichengeni sokuphulukana nomsebenzi wakho. (INtshumayeli 4:4) Xa kunjalo, akulula ukubonisa ububele. Noko ke, ekhumbula ukuba umele abonise ububele, umkhonzi kaYehova ufanele azabalazele ukubazuza abo bangevaniyo naye. Ukuba nenkathalo kunokusinceda sikwazi ukwenza oku. Mhlawumbi unokubonisa inkathalo xa umntu osebenza naye egula okanye egulelwa ngamalungu entsapho. Kwanokufuna ukuqonda ngempilo yakhe kunokuba nemiphumo emihle. Ewe, amaKristu amele azabalazele ukuhlala enemvisiswano noxolo nabantu bonke kangangoko kunokwenzeka. Maxa wambi ukuthetha amazwi abonisa inyameko nenkathalo kunokuba luncedo.
10 Ngezinye izihlandlo, umqeshi usenokunyanzelisa iimbono zakhe kubaqeshwa bakhe aze afune ukuba bonke babe nenxaxheba kwisiganeko okanye umbhiyozo wobuzwe ongavisisaniyo neZibhalo. Xa isazela somKristu singamvumeli ukuba abe nenxaxheba, oko kusenokukhokelela kwingxabano. Ngelo xesha kusenokungabi bubulumko ukuchaza ngokweenkcukacha indlela ekuphosakele ngayo ukwenza oko kufunwa ngumqeshi. Ngapha koko, abo bangenazo iinkolelo zobuKristu basenokukubona kufanelekile ukwenza oko. (1 Petros 2:21-23) Mhlawumbi unokumchazela ngobubele isizathu sokuba wena ungenakuba nanxaxheba koko. Xa ethetha amazwi ahlabayo musa ukuphindisa kwangamazwi ahlabayo. UmKristu ufanele alandele icebiso elihle elikwabaseRoma 12:18 elithi: “Ukuba kunokwenzeka, zamani ngokusemandleni enu, ukuba noxolo nabantu bonke.”
Ukubonisa Ububele Esikolweni
11. Luluphi ucelomngeni abajamelana nalo abaselula ngokuphathelele ukubonisa ububele kwabo bafunda nabo?
11 Kunokuba lucelomngeni ngokwenene kwabaselula ukubonisa ububele kwabo bafunda nabo. Abantu abaselula badla ngokufuna ukwamkeleka kwabo bafunda nabo. Amanye amakhwenkwe aba ngqwabalala, ade axhaphaze abanye esikolweni, kuba efuna ukunconywa ngabo afunda nabo. (Mateyu 20:25) Abanye abafundi bayathanda ukuqhayisa ngobuchule abanabo ezifundweni, kwezemidlalo, nakwezinye izinto. Oko kudla ngokwenza ukuba babaphathe ngokungenabubele abanye abafundi, becinga ukuba oko kubenza bakhulu kunabanye. UmKristu oselula ufanele alumke ukuba angaxelisi abafundi abanjalo. (Mateyu 20:26, 27) Umpostile uPawulos wathi “uthando luzeka kade umsindo yaye lunobubele,” waza waphinda wathi uthando “alugwagwisi, alukhukhumali.” Ngenxa yoko, umKristu ubophelelekile ukuba angalandeli umzekelo ombi wabo bangenabubele, kodwa abambelele kwisiluleko seZibhalo xa ekunye nabo afunda nabo.—1 Korinte 13:4.
12. (a) Kutheni kusenokuba lucelomngeni kwabaselula ukubonisa ububele kootitshala babo? (b) Abaselula banokulufumana kubani uncedo xa benyanzelelwa ukuba bangabi nabubele?
12 Kwakhona abaselula bafanele babonise ububele nakootitshala babo. Abafundi abaninzi bayakunandipha ukucaphukisa ootitshala babo. Bacinga ukuba balumkile xa bengabahloneli ootitshala babo ngokwaphula imithetho yesikolo. Basenokunyanzela abanye ukuba babathelele. Xa umKristu oselula esala ukubathelela, usenokugculelwa okanye axhatshazwe. Ukujamelana neemeko ezinjalo esikolweni kwenza kube nzima ngomKristu ukubonisa ububele. Kodwa ke, khumbula ukuba kubaluleke gqitha ukuba ngumkhonzi onyanisekileyo kaYehova. Qiniseka ukuba uya kukuxhasa ngomoya wakhe ebudeni bala maxesha anzima ebomini.—INdumiso 37:28.
Ukubonisa Ububele Kubamelwane
13-15. Yintoni enokukuthintela ekuboniseni ububele kubamelwane bakho, yaye unokuhlangabezana njani nolu celomngeni?
13 Enoba uhlala endlwini, kwisakhiwo esiqeshisayo, okanye naphi na, unokucinga ngeendlela zokubonisa ububele nenkathalo ngempilo-ntle yabamelwane. Kwakhona, oku akusoloko kulula.
14 Kuthekani ukuba abamelwane bakho banomkhethe ngenxa yohlanga, ubuzwe, okanye unqulo lwakho? Kuthekani ukuba baba krwada maxa wambi okanye bangakuhoyi kwaphela? Njengomkhonzi kaYehova, kuya kuba luncedo ukubonisa ububele kangangoko kunokwenzeka. Uya kwahluka kubo, nto leyo eya kuzisa udumo lokwenene kuYehova—ongumzekelo obalaseleyo ngobubele. Ummelwane wakho usenokutshintsha isimo sakhe sengqondo ngenxa yokubonisa kwakho ububele. Usenokude adumise uYehova.—1 Petros 2:12.
15 Bunokuboniswa njani ububele? Enye indlela yokwenjenjalo, kukuba ngumzekelo ngokuvelisa isiqhamo somoya entsatsheni. Abamelwane basenokukuphawula oku. Maxa wambi, usenokumnceda ummelwane wakho ngandlel’ ithile. Khumbula ukuba ukubonisa ububele kuthetha ukuba nomdla kwimpilo-ntle yabanye.—1 Petros 3:8-12.
Ukubonisa Ububele Kubulungiseleli Bethu
16, 17. (a) Kutheni kubalulekile ukubonisa ububele xa sikubulungiseleli basesidlangalaleni? (b) Ziziphi iindlela ezahlukeneyo esinokubonisa ngazo ububele xa sisentsimini?
16 Sifanele sibonise ububele kubulungiseleli bethu bobuKristu njengoko sisenza umgudu wokufikelela abantu emakhayeni abo, emsebenzini nakwiindawo zikawonke wonke. Sifanele sikhumbule ukuba simela uYehova osoloko enobubele.—Eksodus 34:6.
17 Ziziphi ezinye iindlela esinokubonisa ngazo ububele kubulungiseleli bethu? Ngokomzekelo, xa ukubulungiseleli basesitratweni, unokubonisa ububele ngokuthi uquphe yaye ube nolwazelelelo kubantu othetha nabo. Indawo ehamba abantu isenokuphithizela, ngoko sifanele silumke singavali indlela yabo. Kwakhona, xa ushumayela kwintsimi yezoshishino, bonisa ububele ngokubetha koomofu, ukhumbule ukuba oonovenkile kufuneka bathengisele abathengi.
18. Ukuba nolwazelelelo kunayiphi indima ekuboniseni ububele kubulungiseleli bethu?
18 Xa ukubulungiseleli bendlu ngendlu, bonisa ulwazelelelo. Musa ukuhlala ixesha elide, ingakumbi xa imozulu imbi. Ngaba uyakwazi ukubona umntu xa ephelelwa ngumonde okanye ecatshukiswa bubukho bakho? Kusenokwenzeka ukuba kwindawo okuyo, amaNgqina kaYehova atyelela rhoqo. Ukuba kunjalo, bonisa ulwazelelelo ngokusoloko unobubele nobuhlobo. (IMizekeliso 17:14) Samkele isizathu sokuba umninimzi engenakukuphulaphula ngolo suku. Khumbula ukuba, omnye umzalwana okanye udade ongumKristu uya kuphinda atyelele kwelo khaya kungekudala. Ukuba udibana nomntu okrwada, zama ngamandla ukubonisa ububele. Musa ukuthethela phezulu okanye ube ntshingintshingi, kodwa thetha ngelizwi elizolileyo. UmKristu onobubele uyakuphepha ukuphikisana nomninimzi. (Mateyu 10:11-14) Mhlawumbi ngenye imini loo mntu usenokuziphulaphula iindaba ezilungileyo.
Ukubonisa Ububele Kwiintlanganiso Zebandla
19, 20. Kutheni sifanele sibonise ububele ebandleni, yaye sinokububonisa njani?
19 Kubalulekile ukubonisa ububele nakwabo sikhonza nabo. (Hebhere 13:1) Ekubeni siyinxalenye yobuzalwana behlabathi lonke, kubalulekile ukubonisa ububele omnye komnye.
20 Ukuba amabandla amabini, okanye angakumbi asebenzisa iHolo yoBukumkani enye, kubalulekile ukubaphatha ngobubele nangesidima abo bakwamanye amabandla. Ukuphikisana kwenza kube nzima ukusebenzisana xa kusenziwa uhlengahlengiso kumaxesha eentlanganiso, ekucoceni okanye ekulungiseni iholo. Yiba nobubele nolwazelelelo nakuba kusenokubakho ukungavisisani ngezimvo. Oku kuya kwenza ukuba nisebenzisane ngobubele, yaye uYehova uya kunisikelela ngokwenene ngokubonisa kwenu umdla kwimpilo-ntle yomnye nomnye.
Qhubeka Ubonisa Ububele
21, 22. Ngokuvisisana neyabaseKolose 3:12, yintoni esifanele sizimisele ukuyenza?
21 Uphawu lobubele lubanzi kangangokuba luchaphazela zonke iinkalo zobomi bethu. Ngoko lufanele lube yinxalenye ephambili yobuntu bethu bobuKristu. Sifanele siziqhelise ukubonisa ububele kwabanye.
22 Ngamana yonke imihla singabonisa ububele kwabanye, sisebenzisa amazwi ompostile uPawulos athi: “Njengabanyulwa bakaThixo, abangcwele nabathandwayo, yambathani umsa wemfesane, ububele, ukuthobeka kwengqondo, ubulali, nokuzeka kade umsindo.”—Kolose 3:12.
Ngaba Usakhumbula?
• Yintoni eyenza kube nzima ngomKristu ukubonisa ububele?
• Kutheni kubalulekile ukubonisa ububele entsatsheni?
• Luluphi ucelomngeni olukhoyo ekuboniseni ububele esikolweni, emsebenzini, nakubamelwane?
• Chaza iindlela amaKristu anokubonisa ngazo ububele kubulungiseleli basentsimini.
[Umfanekiso okwiphepha 18]
Xa bonke entsatsheni bebonisa ububele kubakho umanyano nentsebenziswano
[Umfanekiso okwiphepha 19]
Unokubonisa ububele xa umntu osebenza naye okanye intsapho yakhe ihlaselwa kukugula
[Umfanekiso okwiphepha 20]
UYehova uyabaxhasa abo bathi ngokunyaniseka babonise ububele kwanaxa begculelwa
[Umfanekiso okwiphepha 21]
Ukunceda ummelwane osweleyo kusisenzo sobubele