Urhulumente WoBukumkani BukaThixo—Uyalawula Namhlanje

“Kunokwenzeka njani ukuba amazwe amaninzi kangaka, anamasiko nenkcubeko eyahlukahlukeneyo, amanyane? Kuthiwa iintlanga ezahlukahlukeneyo ziya kumanyaniswa kuphela kukuhlaselwa ngabantu abavela kwesinye isijikelezi-langa.”—The Age, iphephandaba laseOstreliya.

NGABA ukuhlaselwa ngabantu abavela kwenye indawo sisicombululo? Enoba oko kuya kwenza ukuba zonke iintlanga zomhlaba zimanyane okanye akunjalo, isiprofeto seBhayibhile sithetha ngentlekele ekufuphi eya kwenza iintlanga zehlabathi zimanyane. Yaye le ntlekele, eneneni, iya kubangelwa ngumkhosi ovela komnye ummandla.

UKumkani uDavide kaSirayeli wamandulo ngokuprofetayo wathetha ngemeko yeli hlabathi. Ephefumlelwe nguThixo, wabhala: “Ookumkani bomhlaba basuke bema namagosa aphakamileyo abuthene ndawonye njengamntu mnye nxamnye noYehova nomthanjiswa wakhe, besithi: ‘Masiziqhawule izibopho zabo sizilahlele kude nathi iintambo zabo!’” (INdumiso 2:2, 3; IZenzo 4:25, 26) Phawula ukuba abalawuli bomhlaba baya kubuthana ndawonye nxamnye noYehova, uMdali wendalo iphela, nomthanjiswa wakhe, okanye uKumkani wakhe onyuliweyo, uYesu Kristu. Kuya kwenzeka njani oko?

Ngokuvumelana nobalo lweBhayibhile neziprofeto ezizalisekileyo, ngowe-1914 kwasekwa uBukumkani bukaThixo ezulwini yaye uYesu Kristu enguKumkani wabo.a Ngelo xesha iintlanga zomhlaba zazinengcamango enye. Kunokuba zizithobe kulongamo loBukumkani bukaThixo obusandul’ ukumiselwa, zazibandakanyeke kukruthakruthwano lwegunya—iMfazwe Enkulu, okanye IMfazwe Yehlabathi I.

UYehova uThixo usijonga njani isenzo esinjalo esenziwa ngabalawuli behlabathi? “Lowo kanye uhleli emazulwini uya kuhleka; uYehova uya kubagculela. Ngelo xesha uya kuthetha nabo enomsindo yaye evutha kukungakholiswa uya kubaphazamisa.” Uya kwandula ke uYehova axelele uNyana wakhe, uKumkani othanjisiweyo woBukumkani, esithi: “Cela kum, ukuba ndikunike iintlanga njengelifa lakho neziphelo zomhlaba njengelifa lakho. Uya kuziqhekeza ngentonga yobukhosi yentsimbi, ngokungathi sisitya sombumbi uya kuziqhekeza zibe ziingceba.”—INdumiso 2:4, 5, 8, 9.

Iintlanga ezichasileyo ziya kutyunyuzwa okokugqibela ngentonga yobukhosi yentsimbi eArmagedon, okanye eHar–Magedon. Incwadi yokugqibela yeBhayibhile, ISityhilelo, ichaza esi siganeko siyincopho ‘njengemfazwe yemini enkulu kaThixo uSomandla,’ abaya kuthi “ookumkani bomhlaba omiweyo uphela” bahlanganiselwe ndawonye. (ISityhilelo 16:14, 16) Ziphenjelelwa ziidemon, iintlanga zomhlaba ekugqibeleni ziya kumanyana ngenxa yenjongo enye—ukulwa nxamnye noThixo uSomandla.

Ixesha laxa abantu beya kubuthana ndawonye ukuze balwe nxamnye nolongamo lukaThixo lisemnyango. Okuhlekisayo kukuba, “umanyano” lwabo aluyi kubazisela nzuzo. Kunoko, isenzo sabo siya kutshayelela uxolo ekukudala lulindelwe lwalo lonke uluntu. Njani? Kwelo dabi lokugqibela, uBukumkani bukaThixo “buya kuzityumza buziphelise zonke ezi zikumkani [zehlabathi], buze bona bume ukusa kwixesha elingenammiselo.” (Daniyeli 2:44) UBukumkani bukaThixo, kungekhona nayiphi na intlangano yabantu, buya kuba ngurhulumente oya kuzalisekisa umnqweno wabantu woxolo ehlabathini.

Umlawuli Oyintloko Worhulumente WoBukumkani

Obo buBukumkani abantu abaninzi abanyanisekileyo ababuthandazelayo, besithi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Kunokuba ibe yinto nje esentliziyweni, uBukumkani bukaThixo bungurhulumente wokwenene oye wafeza izinto ezimangalisayo ukususela ekumisweni kwabo ezulwini ngowe-1914. Makhe siqwalasele izibakala eziyintloko ezibonisa ukuba uBukumkani bukaThixo ngokwenene buyalawula namhlanje.

Okokuqala, bunabalawuli abanamandla nabanobuchule abakhokelwa nguKumkani osetroneni, uYesu Kristu. Ngowama-33 C.E., uYehova uThixo wamisa uYesu Kristu njengeNtloko yebandla lamaKristu. (Efese 1:22) Ukususela ngoko, uYesu ebesebenzisa ubuntloko bakhe, ngaloo ndlela ebonakalisa amandla akhe okulawula. Ngokomzekelo, xa elakwaYuda lathwaxwa yindlala eqatha ngenkulungwane yokuqala, ibandla lamaKristu ngokukhawuleza lathabatha inyathelo ukunceda amalungu alo. Kwalungiselelwa umsebenzi wokunikela uncedo, yaye kwathunyelwa uBharnabhas noSawule besuka kwa-Antiyokwe namalungiselelo oncedo.—IZenzo 11:27-30.

Sinokulindela okungakumbi kuYesu Kristu ngoku, ekubeni urhulumente woBukumkani elawula. Nanini na kusehla iintlekele—iinyikima, iindlala, izikhukula, iinkanyamba, izaqhwithi, okanye ugqabhuko-dubulo lwentaba-mlilo—ibandla lamaKristu lamaNgqina kaYehova linikela uncedo ngokukhawuleza kwamanye amakholwa nabanye abakwiindawo ezichaphazelekileyo. Ngokomzekelo, xa inyikima etshabalalisayo yahlasela e-El Salvador ngoJanuwari nangoFebruwari 2001, kwenziwa amalungiselelo okunikela uncedo kuyo yonke imimandla yelo lizwe, yaye amaqela amaNgqina kaYehova avela eKhanada, eGuatemala naseUnited States anikela uncedo. Iindawo zawo zokunqula ezi-3 kuquka nezindlu ezingaphezu kwama-500 zaphinda zakhiwa ngexesha nje elifutshane.

Abo Baya Kulawulwa Ngurhulumente WoBukumkani BukaThixo

Ukususela ekumiselweni kwabo ngowe-1914, uBukumkani bukaThixo basezulwini bebuhlanganisa abo baya kulawulwa bubo kubantu abasehlabathini lonke. Oku kuzalisekisa isiprofeto esibalaseleyo esabhalwa nguIsaya esithi: “Kuya kuthi ke ekupheleni kwemihla intaba yendlu kaYehova [unqulo lwakhe lokwenyaniso oluphakamileyo] imiselwe ngokuqinileyo encotsheni yeentaba, . . . kwaye ziya kuba ngumsinga ukuya kuyo zonke iintlanga.” Esi siprofeto sibonisa ukuba “izizwana ezininzi” ziya kuya kuloo ntaba zize zamkele imiyalelo nemithetho kaYehova.—Isaya 2:2, 3.

Lo msebenzi uye wabangela ukuba kuyilwe umbutho obalulekileyo wale mihla—abazalwana bamazwe ngamazwe abangaphezu kwezi-6 000 000 abangamaKristu kumazwe angaphezu kwama-230 emhlabeni. Kwiindibano zezizwe ngezizwe zamaNgqina kaYehova, abo babukeleyo badla ngokumangaliswa xa bebona uthando, uxolo nomanyano phakathi kwezihlwele ezikhulu zabantu, aboyise imiqobo yobuhlanga, izithethe nolwimi. (IZenzo 10:34, 35) Ngaba akuvumi ukuba ukuze urhulumente akwazi ukuhlanganisa amaqela eentlanga ngoxolo nangomanyano, umele abe namandla yaye azinze—aze abe ngokoqobo?

UBukumkani BukaThixo Nemfundo

Urhulumente ngamnye unemilinganiselo ekufanele abemi bayifikelele, yaye wonke ubani ofuna ukulawulwa nguloo rhulumente umele afikelele loo milinganiselo. Ngokufanayo, uBukumkani bukaThixo bunemilinganiselo abamele bayifikelele bonke abo baya kufanelekela ukulawulwa bubo. Noko ke, ukwenza abantu abaninzi kangaka nabaneemvelaphi ezahlukahlukeneyo bamkele baze benze ngokuvisisana nemilinganiselo efanayo ngokuqinisekileyo akuyondlwan’ iyanetha. Nantsi enye into engqina ukuba uBukumkani bukaThixo buyalawula—lucwangciso lwabo oluluncedo lwemfundo efikelela neguqula kungekuphela nje ingqondo kodwa kwanentliziyo.

Lo rhulumente woBukumkani uwuphumeza njani lo msebenzi unzima? Ngokusebenzisa indlela yabapostile yokushumayela “kwizindlu ngezindlu” nokufundisa umntu ngamnye iLizwi likaThixo. (IZenzo 5:42; 20:20) Iphumelela kangakanani le ndlela yokufundisa? UJacques Johnson, umfundisi ongumKatolika, wabhala kwiphephandaba laseKhanada ngemigudu yakhe yokunqanda elinye ibhinqa ekufundisiseni namaNgqina kaYehova. Wathi: “Ndandididekile yaye ndaqonda ukuba ndandizinqikele ilitye elineembovane. Ndaqalisa ukuqonda ukuba kwiinyanga eziliqela ezidluleyo la mabhinqa angamaNgqina kaYehova aye akha ulwalamano olusondeleyo nalo mama uselula olilolo. Babesondelelene naye bemnceda, benobuhlobo nolwalamano olusenyongweni. Kungekudala waba lilungu elikhutheleyo lonqulo lawo yaye kwakungekho nto ndinokuyenza ukuthintela oko.” Kanye njengokuba intliziyo yalowo owayesakuba ngumKatolika yachukunyiswa sisigidimi seBhayibhile esifundiswa ngamaNgqina kaYehova nayindlela yobuKristu abaziphatha ngayo, ngoko ke iintliziyo zabantu abaninzi ehlabathini lonke ziyachukumiseka.

Olu hlobo lwemfundo—imfundo yoBukumkani—isekelwe eBhayibhileni, yaye iphakamisa imilinganiselo yayo yokuziphatha. Ifundisa abantu ukuba bathandane yaye bahlonelane kungakhathaliseki ukuba banayiphi imvelaphi. (Yohane 13:34, 35) Kwakhona inceda abantu basamkele isiluleko esithi: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Ngokwahlukana nendlela yabo yangaphambili yokuphila baze ngovuyo baphile ngokuvisisana nemithetho nemigaqo yorhulumente woBukumkani, abantu abazizigidi baye bafumana uxolo nolonwabo ngoku nethemba lekamva eliqaqambileyo.—Kolose 3:9-11.

Esona sixhobo sibalaseleyo esisetyenziswayo esenza kubekho umanyano ehlabathini lonke leli phephancwadi, IMboniselo. Ngokusebenzisa iindlela zokuguqulela ezilungelelanisiweyo nezixhobo zokupapasha ngeelwimi ezininzi, amanqaku ayintloko kwiMboniselo apapashwa ngaxeshanye ngeelwimi ezili-135, yaye abafundi balo abangaphezu kwama-95 ekhulwini ehlabathini lonke banokufundisisa la manqaku ngeelwimi zabo ngaxeshanye.

Umbhali ongumMormon wenza uludwe lwezona ndlela zokuhambisa ivangeli eziphumelelayo ezingezizo ezecawa yakhe. Kolu ludwe wabhala IMboniselo noVukani!, ezipapashwe ngamaNgqina kaYehova njengawona maphephancwadi okuhambisa ivangeli waza wathi: “Akakho umntu onokutyhola IMboniselo okanye uVukani! ngokuthi zikhuthaza ukungabi nankathalo—ngokwahlukileyo koko, zenza ubani aphaphe nto leyo endingafane ndiyibone kwiimpapasho zezinye iinkonzo. IMboniselo noVukani! ziyahlaziya njengoko umongo wazo usekelwe kwizibakala, izinto eziphandwe kakuhle yaye zithetha ngezinto ezenzeka kweli hlabathi siphila kulo.”

Buninzi ubungqina obubonisa ukuba uBukumkani bukaThixo ngokwenene buyalawula ngokupheleleyo. Ngovuyo nangenkuthalo amaNgqina kaYehova axelela abamelwane bawo “ezi ndaba zilungileyo zobukumkani,” ebamema ukuba balawulwe bubo. (Mateyu 24:14) Ngaba ithemba elinjalo alibangeli mdla kuwe? Unokufumana iintsikelelo zokunxulumana nabo bafundiswe imilinganiselo yoBukumkani nabazabalazela ukuphila ngayo. Kwakhona, unokuba nethemba lokuphila kulawulo loBukumkani kwihlabathi elitsha elithenjisiweyo apho “kumi ubulungisa.”—2 Petros 3:13.

[Umbhalo osemazantsi]

[Umfanekiso okwiphepha 4, 5]

Ngowe-1914 iintlanga zazibandakanyeke kwimfazwe yehlabathi

[Imifanekiso ekwiphepha 6]

Umsebenzi wamatsha-ntliziyo wokunikela uncedo ububungqina bokubonakaliswa kothando lwamaKristu

[Umfanekiso okwiphepha 7]

AmaNgqina kaYehova ehlabathini lonke azuza kucwangciso lwemfundo efanayo