Yintoni Eyenza Ubomi Bube Nenjongo Yokwenene?
XA UJESSE, umfundi wesikolo samabanga aphakamileyo oneminyaka eli-17 ubudala, wabuzwa injongo yobomi, waphendula wathi, “Zonwabise kangangoko unako, lo gama nje usaphila.” USuzie wayenembono eyahlukileyo. Wathi: “Enyanisweni ndikholelwa ukuba injongo yobomi iyiloo nto okhetha ukuba ubomi bakho bube yiyo.”
Ngaba wakha wazibuza ngenjongo yobomi? Ngaba kukho injongo enye yabantu bonke? Okanye ngaba uSuzie unyanisile—ukuba ubomi buyiloo nto ngamnye wethu akhetha ukuba bube yiyo? Akukhathaliseki enoba abantu bahambele phambili kangakanani na kwezenkcubeko, siziva silangazelela ukwazi injongo yobomi. Ngamaxesha athile ebomini bethu, uninzi lwethu luye luzibuze, ‘Kutheni silapha nje?’
Inzululwazi yale mihla iye yakufumanisa kunzima ukuphendula loo mbuzo. Oku kuye kwaphumela entwenini? UDavid P. Barash, unjingalwazi wenzululwazi ngokusebenza kwengqondo nezilwanyana wathi: “Ukuphila akuhambisani nenkqubo yendaleko.” Kwiingcali zebhayoloji ezikholelwa kwindaleko, izidalwa eziphilayo zinenjongo enye kuphela: ukuphila nokuzala. Ngenxa yoko, uNjingalwazi Barash uthi: “Kulo mmandla wendalo omkhulu ongenantsingiselo nongenankathalo ngabantu, yimbopheleleko yabantu ukwenza ubomi bethu bube nenjongo ngokwenza ukhetho olukhululekileyo, olusengqiqweni nolunenjongo.”
Umthombo Wentsingiselo Nenjongo Yobomi
Ngaba yile kuphela injongo yobomi—ukuba ngamnye wethu enze oko akuthandayo? Kunokuba isishiye kwesinomhlwa kweli hlabathi lingenantsingiselo okanye injongo, iBhayibhile kudala yatyhila ukuba silapha ngenjongo. Asikhange sibekho ngempazamo. Sixelelwa ukuba, uMdali wachitha iminyaka emininzi elungiselela umntu umhlaba. Ayikho into eyayekelwa kumabona-ndenzile. Waqinisekisa ukuba yonke into “ilunge gqitha.” (Genesis 1:31; Isaya 45:18) Ngoba? Kwakungenxa yokuba uThixo wayenjongo ngomntu.
Sekunjalo, okubangel’ umdla kukuba, uThixo akazange amisele kwangaphambili ikamva lomntu ngamnye, ngokuthi angenelele okanye ngokusebenzisa indlela asidale ngayo. Nangona sisenokuphenjelelwa yimizila yethu yemfuza, ubukhulu becala sizilawula ngokwethu izenzo zethu. Sonke sikhululekile ukuzikhethela indlela esifuna ukuphila ngayo.
Nangona sinokuzikhethela indlela esifuna ukuphila ngayo, ibiya kuba yimpazamo ukumbekela ecaleni uMdali kwizicwangciso zethu. Eneneni, abaninzi baye bafumanisa ukuba eyona njongo yokwenene ebomini inxulumene nokuba nolwalamano noThixo. Unxulumano olubalulekileyo phakathi kukaThixo nenjongo yethu ebomini zibalaseliswe kwigama likaThixo, uYehova, ngokoqobo elithetha ukuthi, “Ubangela Kubekho.” (Eksodus 6:3; INdumiso 83:18) Oku kuthetha ukuba, ngokuthe ngcembe uzalisekisa nayiphi na into ayithembisayo yaye usoloko ekwenza oko anenjongo yokukwenza. (Eksodus 3:14; Isaya 55:10, 11) Khawufan’ ucinge. Igama likaYehova lisisiqinisekiso kuthi sonke sokuba ungoyena Mthombo ohlala uhleli wobomi obunenjongo.
Ukwazi ukuba kukho uMdali kunegalelo elikhulu kwindlela ubani abujonga ngayo ubomi. ULinet, oneminyaka eli-19 ubudala uthi: “Ukubona zonke izinto ezimangalisayo uYehova azidalileyo nenjongo yazo, kundibonisa ukuba nam ndadalwa ngenxa yenjongo ethile.” UAmber wongezelela esithi: “Xa abantu besithi abazi enoba uThixo ukho, oko kundenza ndibe nombulelo ngenxa yokuba ndisazi ukuba ukho. Ubungqina bokuba uYehova ukho bubonakala kwizinto azidalileyo.” (Roma 1:20) Kakade ke, ukuvuma ukuba uMdali ukho yenye into, kodwa ukuba nolwalamano olunenjongo kunye naye kukwayenye.
Ubuhlobo NoThixo
Nalapha, kwakhona iBhayibhile inokusinceda. Izahluko zayo zokuqala zisinika ubungqina obucacileyo bokuba uYehova uThixo nguBawo onothando. Ngokomzekelo, akazange adale uAdam noEva waza akabachazela ukuba ungubani. Kunoko, wayesoloko enxibelelana nabo. Akazange abashiye e-Eden waza wabayeka ukuba bazibonele ngoxa exakeke zezinye izinto. Kunoko, wabanika umyalelo ongqalileyo ngeyona ndlela ibalaseleyo yokuphila. Wabanika umsebenzi owanelisayo, waza walungiselela ukuba baqhubeke befunda. (Genesis 1:26-30; 2:7-9) Ngaba le ibingayi kuba yinto onokuyilindela kumzali olungileyo nonothando? Ngoku khawucinge ngoko kuthethwa koku. UDenielle uthi: “Ukwazi ukuba uYehova wadala umhlaba waza wasenza sakwazi ukuvuyela indalo, kundibonisa ukuba ufuna sonwabe.”
Ngaphezu koko, njengaye nawuphi na ubawo olungileyo, uYehova ufuna abantwana bakhe babe nolwalamano olusondeleyo naye. Ngenxa yoko, IZenzo 17:27 ziyasiqinisekisa zisithi: ‘Akakude kuye ngamnye wethu.’ Oko kwenza wuphi umahluko? UAmber uthi: “Ukwazi uYehova kuye kwandinika intembelo yokuba andindedwa. Enoba kukwiyiphi na imeko, ndisoloko ndinomntu endinokuya kuye.” Ngaphezu koko, njengoko usiya umazi uYehova, uya kufumanisa ukuba unobubele, usesikweni yaye ulungile. Unokuthembela kuye. UJeff uthi: “Xa uYehova waba ngumhlobo osondeleyo, ndaqonda ukuba akakho omnye onokundinika uncedo xa ndilufuna.”
Okubuhlungu kukuba, kuye kwathethwa izinto ezimbi ngoYehova. Ebesoloko ebekw’ ityala ngokubandezeleka kwabantu okuninzi nangeengxaki ezibangelwa kukuziphatha okubi kwabantu bonqulo. Uye wabekw’ ityala ngezinye zezona zenzo zenkohlakalo kwimbali yabantu. Kodwa iDuteronomi 32:4, 5 iyacacisa: “Zonke iindlela zakhe zisesikweni. . . . Bona bazonakalisile ngokwabo; abangobantwana bakhe, bazizisele isiphako ngokwabo.” Ngoko ke, sinembopheleleko yokuba izinto sizihlole ngokwethu.—Duteronomi 30:19, 20.
Ukuzaliseka Kwenjongo KaThixo
Noko ke, enoba sigqiba ngelithini, ayikho into eya kuthintela uThixo ekuyizalisekiseni ngokupheleleyo injongo yakhe ngalo mhlaba nangabantu. Ngapha koko, sifanele sikhumbule ukuba unguMdali. Ngoko ke, iyintoni loo njongo? UYesu Kristu wabhekisela kuyo kwiNtshumayelo yakhe yaseNtabeni xa wathi: “Banoyolo abo banomoya wobulali, kuba baya kuwudla ilifa umhlaba.” Kamva, waxelela umpostile wakhe uYohane ukuba uThixo uzimisele ‘ukonakalisa abo bawonakalisayo umhlaba.’ (Mateyu 5:5; ISityhilelo 11:18) Ngenxa yokuba uYesu wayekunye noThixo ebudeni bokudala, uyazi ukuba ukususela ekuqaleni yayiyinjongo kaThixo ukuba intsapho engabantu efezekileyo ihlale emhlabeni ngonaphakade eparadesi. (Genesis 1:26, 27; Yohane 1:1-3) Yaye uThixo akatshintshi. (Malaki 3:6) UThixo uyasithembisa esithi: “Ngokuqinisekileyo kanye njengoko ndicinge ngako, koba njalo; kube kanye njengoko ndigqibe ngako.”—Isaya 14:24.
Kulo mhla wethu, uYehova sele eqalile ukwakha iziseko zehlabathi elimanyeneyo elisekelwe, kungekhona ekubaweni nasekuzingceni njengoko linjalo ihlabathi lethu lanamhlanje, kodwa elisekelwe kuthando ngoThixo nangommelwane. (Yohane 13:35; Efese 4:15, 16; Filipi 2:1-4) Eli lihlabathi elinomdla kwinkqubela nelinabantu abanomdla wokwenene wokuzalisekisa injongo yabo—ukushumayela iindaba ezilungileyo zoBukumkani bukaThixo obuzayo ngaphambi kokuba le nkqubo yezinto iphele. (Mateyu 24:14; 28:19, 20) Kumazwe angaphezu kwama-230, amaKristu angaphezu kwezigidi ezithandathu sele enqula kunye ngothando nangomanyano nabazalwana bezizwe ngezizwe.
Yenza Ubomi Bakho Bube Nenjongo
Ukuba ufuna ubomi bakho bube nenjongo ngakumbi, ufanele wazi ukuba uYehova uThixo uyakumema ukuba unxulumane nabantu bakhe—‘uhlanga lwakhe olunobulungisa’—ngoku. (Isaya 26:2) Usenokuba uyazibuza, ‘Bunjani ubomi bala maKristu? Ngaba ngokwenene ndifuna ukuba yinxalenye yawo?’ Phulaphula oko abanye abantu abaselula bakuthethayo:
UQuentin: “Ibandla likhusi lam kweli hlabathi. Ukuqonda ukuba uYehova uyinxalenye yobomi bam kundenza ndibone ukuba ukho yaye ufuna ndonwabe.”
UJeff: “Ibandla yeyona ndawo ndinokuya kuyo ukuze ndifumane ukhuthazo. Abazalwana noodadewethu balapho, banikela inkxaso nendumiso. Ngokwenene bazizalamane zam.”
ULinet: “Uvuyo lokubona ubani esamkela inyaniso yeBhayibhile aze enze isigqibo sokukhonza uYehova alunakuthelekiswa nanto. Oku kundenza ndaneliseke gqitha.”
UCody: “Ubomi bam ngebungenantsingiselo ngaphandle kukaYehova. Ngendibhadula njengabanye abaninzi ndizama izinto ezahlukahlukeneyo ukuze ndifumane ulonwabo, sekunjalo ndingalufumani. Kunoko, uYehova uye wandinika elona lungelo likhulu lokuba nolwalamano naye, yaye oko kwenza ubomi bam bube nenjongo.”
Kutheni ungazenzeli uphando? Uya kufumanisa ukuba ngokusondela kuMdali wakho, uYehova uThixo, uya kufumana injongo yokwenene yobomi.
[Imifanekiso ekwiphepha 31]
Ukuba nolwalamano noThixo kwenza ubomi bethu bube nenjongo
[Inkcazelo Ngomfanekiso okwiphepha 29]
NASA photo