UYesu Kristu Ufanele Akhunjulwe Njani?

UYesu Kristu “ngokuqinisekileyo wayengomnye wabona bantu banempembelelo wakha waphila.”—“The World Book Encyclopedia.”

ABANTU abadumileyo ngokuqhelekileyo badla ngokukhunjulwa ngoko bakwenzileyo. Ngoko ke kutheni abantu abaninzi bekhumbula ukuzalwa kukaYesu kunezinto awazenzayo? Kuyo yonke iNgqobhoko, abantu abaninzi banokuzikhumbula iziganeko ezinxulumene nokuzalwa kwakhe. Bangaphi abakhumbula iimfundiso zakhe ezibalaseleyo kwiNtshumayelo yaseNtabeni nabazabalazela ukuzisebenzisa?

Liyinyaniso elokuba, ukuzalwa kukaYesu kwakuyinto ephawulekayo, kodwa abafundi bakhe bokuqala bagxininisa ngokungakumbi koko wakwenzayo noko wayekufundisa. Ngokuqinisekileyo uThixo wayengenanjongo yokuba ukuzalwa kukaKristu kube yeyona nto ibalulekileyo kunobomi bakhe njengendoda eqolileyo. Sekunjalo, iKrismesi iye yabalaseliswa ngaphezu kukaKristu ngenxa yamabali okuZalwa kwakhe.

Omnye umbuzo okhathazayo ngulowo uphathelele indlela iKrismesi ebhiyozelwa ngayo. Ukuba uYesu ebenokubuyela emhlabeni namhlanje, ebeya kucinga ntoni ngorhwebo olwenziwa ngokuphandle olunxulumene neKrismesi? Kwiminyaka engamawaka amabini eyadlulayo, uYesu waya etempileni eYerusalem. Wacatshukiswa ngabananisi bemali nabathengisi ababesebenzisa imisitho yonqulo yamaYuda njengethuba lokuzuza imali. Wathi: “Zisuseni ezi zinto apha! Musani ukuyenza indlu yokurhweba indlu kaBawo!” (Yohane 2:13-16) Licacile elokuba, uYesu akazange ayamkele into yokuba urhwebo ludityaniswe nonqulo.

AmaKatolika anyanisekileyo amaninzi aseSpeyin achaza indlela ekuwaxhalabisa ngayo ukwanda kokunxulunyaniswa kweKrismesi norhwebo. Sekunjalo, umkhwa onjalo wezorhwebo ubonakala ungenakuphepheka, xa ucinga ngemvelaphi yezinto ezininzi ezenziwa ngeKrismesi. Intatheli uJuan Arias uthi: “Abo bangamaKristu bagxeka into yokuba iKrismesi isenziwa ngendlela ‘yobuhedeni’ kwanokuba isisihlandlo sokuzonwabisa norhwebo kunokuba ibe sesonqulo, ngokuqhelekileyo abaqondi ukuba kwanemvelaphi yombhiyozo wokuZalwa kukaYesu . . . sele ibandakanya izinto ezininzi zomsitho wobuhedeni [welanga] wamaRoma.”—El País, Disemba 24, 2001.

Kwiminyaka yakutshanje, iintatheli ezininzi zaseSpeyin neentyilalwazi ziye zathetha ngeemvelaphi zobuhedeni zezithethe zemisitho yeKrismesi, kuquka nendlela enxulumene ngayo norhwebo. Ngokuphathelele usuku lokubhiyozelwa kweKrismesi, iEnciclopedia de la Religión Católica ithetha ngokuphandle isithi: “Isizathu sokuba iCawa yamaRoma yagqiba kwelokuba ibeke olu suku njengelokubhiyoza kubonakala ukuba ngumkhwa wayo wokwenza ukuba imisitho yobuKristu ithabathel’ indawo eyobuhedeni. . . . Siyazi ukuba eRoma ngelo xesha, abahedeni bamisa uDisemba 25 njengosuku lokubhiyozela inatalis invicti, ukuzalwa ‘kwelanga elingoyiswayo.’”

IEnciclopedia Hispánica ngokufanayo ithi: “Usuku lukaDisemba 25 lokubhiyozelwa kweKrismesi alusekelwanga kubalo oluchanileyo losuku lokuzalwa kukaYesu kodwa kunoko, lusekelwe kwimisitho eyenziwa yaba yeyobuKristu njengaleyo yaxa ilanga likude kwi-ikhweyitha nto leyo eyayibhiyozelwa eRoma.” AmaRoma ayekubhiyozela njani ukuphuma kwelanga ebusika? Ngokwenza izidlo ezikhulu, iziyunguma nangokuphana izipho. Ekubeni amagosa ecawa ayemathidala ukuwuphelisa lo msitho odumileyo, bawenza “owobuKristu” ngokuwubiza ngokuthi kukuzalwa kukaYesu kunokuba ibe kukuzalwa kwelanga.

Ekuqaleni, kwinkulungwane yesine neyesihlanu, kwakunzima ukuba kuyekwe ukunqulwa kwelanga nezithethe ezazihambisana nako. “Ingcwele” engumKatolika uAugustine (354-430 C.E.), waziva ebophelelekile ukuba abongoze amanye amakholwa ukuba angalubhiyozeli usuku lukaDisemba 25 njengoko abahedeni besenjenjalo bezukisa ilanga. Nanamhlanje, amasiko anxulumene nemisitho yamaRoma amandulo kubonakala ukuba asenempembelelo enkulu.

Umsitho Wokuzonwabisa Nokurhweba

Ukutyhubela iinkulungwane, izinto ezininzi ziye zaba negalelo elikhulu ekwenzeni iKrismesi ibe ngowona mbhiyozo udumileyo ehlabathini wokuzonwabisa nokurhweba. Kwakhona, izithethe zeminye imisitho yasebusika, ingakumbi leyo ibhiyozelwa emntla Yurophu, ngokuthe ngcembe zazinxulunyaniswa nemibhiyozo eyaqala eRoma.a Yaye kwinkulungwane yama-20, abathengisi nabarhwebi abavunyiweyo ngemincili baye bakhuthaza nasiphi na isithethe esiya kuba yingeniso enkulu.

Uye waba yintoni umphumo? Ukubhiyozelwa kokuzalwa kukaKristu kuye kwayinto ebalaseleyo kunentsingiselo yako. Kwiimeko ezininzi, uKristu akakhankanywa kwaukukhankanywa kumasiko eKrismesi. Iphephandaba laseSpeyin iEl País lithi: “[IKrismesi] ngumsitho wentsapho owenziwa ehlabathini lonke, yaye wonk’ ubani uyibhiyozela ngendlela yakhe.”

La mazwi abonisa umkhwa okhulayo eSpeyin nakwamanye amazwe amaninzi ehlabathini lonke. Ngoxa imibhiyozo yeKrismesi isiba nobugocigoci obuninzi, ulwazi ngoKristu luyancipha. Enyanisweni, imisitho yeKrismesi ubukhulu becala iye yabuyela kwinto eyayikade iyiyo ngexesha lamaRoma—iziyunguma, izidlo ezikhulu nokuphana izipho.

Sizalelwe Umntwana

Ukuba izithethe zeKrismesi azinxulumananga kangako noKristu, amaKristu okwenyaniso afanele akukhumbule njani ukuzalwa nobomi bukaKristu? Kwiinkulungwane ezisixhenxe ngaphambi kokuba uYesu azalwe, uIsaya waprofeta ngaye esithi: “Sizalelwe umntwana, sinikwe unyana; yaye ukuphatha njengenkosana kuya kuba segxalabeni lakhe.” (Isaya 9:6) Kwakutheni ukuze uIsaya athi ukuzalwa kukaYesu nendima awayeza kuba nayo kwixesha elizayo kwakuza kubaluleka gqitha? Kungokuba uYesu uza kuba ngumlawuli onamandla. Uza kubizwa ngokuba yiNkosana yoXolo, yaye uxolo aluyi kuphela okanye ulawulo lwakhe. Ngaphezu koko, ulawulo lukaYesu luya kuxhaswa “ngokusesikweni nangobulungisa.”—Isaya 9:7.

Ingelosi uGabriyeli yaphinda amazwi kaIsaya xa yayichazela uMariya ngokuzalwa kukaYesu. Yaxela kwangaphambili isithi: “Yena uya kuba mkhulu, abizwe ngokuba nguNyana wOyena Uphakamileyo; yaye uYehova uThixo uya kumnika itrone kaDavide uyise, kwaye uya kulawula njengokumkani phezu kwendlu kaYakobi ngonaphakade, yaye ubukumkani bakhe abuyi kuba nasiphelo.” (Luka 1:32, 33) Licacile ke elokuba, eyona ntsingiselo eyintloko yokuzalwa kukaYesu inxulumene nomsebenzi uKristu aza kuwenza njengoKumkani omiselweyo woBukumkani bukaThixo. Ulawulo lukaKristu lunokuba yinzuzo kubo bonke abantu, kuquka wena, izalamane nabahlobo bakho. Eneneni, iingelosi zathi ukuzalwa kwakhe kwakuya kuzisa “uxolo emhlabeni kwabo [uThixo] akholiswa ngabo.”—Luka 2:14, Today’s English Version.

Ngubani namhlanje ongakulangazeleliyo ukuphila kwihlabathi elinoxolo nokusesikweni? Kodwa ukuze sifumane uxolo oluya kuziswa lulawulo lukaKristu, sifanele sikholise uThixo size sibe nolwalamano oluhle naye. UYesu wathi inyathelo lokuqala lokuba nolwalamano olunjalo kukufunda ngoThixo noKristu. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.

Xa sinolwazi oluchanileyo ngoYesu, asisayithandabuzi indlela ebeya kuthanda simkhumbule ngayo. Ngaba ebeya kufuna simkhumbule ngokutya, ukusela nangokuphana izipho ngosuku olunye nelomsitho wamandulo wobuhedeni? Oko kubonakala kuyinto engenakwenzeka. Ngobusuku bangaphambi kokufa kwakhe, uYesu waxelela abafundi bakhe into ayifunayo. “Lowo unemiyalelo yam aze ayigcine, nguye ondithandayo. Lowo undithandayo uya kuthandwa nguBawo, yaye nam ndiya kumthanda.”—Yohane 14:21.

AmaNgqina kaYehova aye azifundisisa nzulu iZibhalo Ezingcwele, eziye zawanceda aqonda imiyalelo kaThixo nekaYesu. Aya kukuvuyela ukukunceda ukuba uqonde loo miyalelo ibalulekileyo ukuze ukhumbule uYesu ngendlela afanele akhunjulwe ngayo.

[Umbhalo osemazantsi]

[Ibhokisi/Imifanekiso ekwiphepha 6, 7]

Ngaba IBhayibhile Ayikukhuthazi Ukwenza Izidlo Ezikhulu Nokuphana Izipho?

Ukuphana Izipho

IBhayibhile iyakuvumela ukuphana izipho, uYehova ngokwakhe ubizwa ngokuba nguMniki waso “sonke isipho esilungileyo naso sonke isipho esigqibeleleyo.” (Yakobi 1:17) UYesu wathi abazali abalungileyo baya kunika abantwana babo izipho ezilungileyo. (Luka 11:11-13) Abahlobo namalungu entsapho kaYobhi banika uYobhi izipho emva kokuba ephilile. (Yobhi 42:11) Noko ke, ezo zipho akazange azifumane ngosuku olukhethekileyo lombhiyozo. Bamnika ngokuphuma entliziyweni.—2 Korinte 9:7.

Iimbutho Zentsapho

Iimbutho zentsapho zinokwenza lukhulu ekumanyaniseni amalungu entsapho, ingakumbi ukuba akasahlali kunye. UYesu nabafundi bakhe baya kwitheko lomtshato eKana, alithandabuzeki elokuba le yayiyimbutho enkulu yentsapho nabahlobo. (Yohane 2:1-10) Yaye kumzekeliso kaYesu wonyana wolahleko, uyise wabhiyozela ukubuya konyana wakhe ngokwenza isidlo esikhulu sentsapho, kuso ekwakuculwa yaye kusenziwa umngqungqo.—Luka 15:21-25.

Ukunandipha Isidlo Esimnandi

Izihlandlo ezininzi iBhayibhile ithetha ngabakhonzi bakaThixo benandipha ukutya okumnandi nentsapho, abahlobo okanye abanye abanqula nabo. Xa iingelosi ezintathu zatyelela uAbraham, wazilungiselela isidlo esasiquka inyama yenkomo, ubisi, ibhotolo namaqebengwana abusazinge. (Genesis 18:6-8) USolomon wachaza ‘ukudla, ukusela nokuba nemihlali’ njengesipho esivela kuThixo.—INtshumayelo 3:13; 8:15.

Ngokucacileyo, uThixo ufuna sinandiphe ukutya okumnandi kunye nabahlobo nentsapho, yaye uyakuvumela ukuphana izipho. Sinamathuba amaninzi okwenjenjalo ngalo naliphi na ixesha enyakeni.