Ukuqeqeshelwa Ukunikela Ubungqina Obucokisekileyo
“Niya kuba ngamangqina am eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.”—IZENZO 1:8.
1, 2. Wayethunywe ntoni uPetros, yaye wayethunywe ngubani?
“UYESU owayevela eNazarete . . . wasiyalela ukuba sishumayele ebantwini nokuba sinikele ubungqina obucokisekileyo bokuba nguye Lowo umiswe nguThixo ukuba abe ngumgwebi wabaphilayo nabafileyo.” (IZenzo 10:38, 42) Ngaloo mazwi, umpostile uPetros wachazela uKorneli nentsapho yakhe ngomsebenzi awunikiweyo wokushumayela.
2 Wamthuma nini uYesu? Kusenokwenzeka ukuba uPetros wayecinga ngamazwi okugqibela athethwa nguYesu kanye nje ngaphambi kokunyukela kwakhe ezulwini. Ngeso sihlandlo, uYesu waxelela abafundi bakhe abathembekileyo esithi: “Niya kuba ngamangqina am eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.” (IZenzo 1:8) Noko ke, kwixesha elithile ngaphambi koko, uPetros wayesazi ukuba njengomfundi kaYesu, kwakuza kufuneka athethe nabanye ngokholo analo kuYesu.
Ukuqeqeshwa Iminyaka Emithathu
3. UYesu wenza wuphi ummangaliso, yaye wathini kuPetros nakuAndreya?
3 Kwiinyanga eziliqela emva kokubhaptizwa kwakhe ngowama-29 C.E., uYesu washumayela kwindawo uPetros nomntakwabo uAndreya ababeloba kuyo kuLwandle lwaseGalili. Babesebenze ubusuku bonke kodwa bengabambisanga nto. Sekunjalo, uYesu wathi kubo: “Shenxelani apho kunzulu khona, nize nithobe iminatha yenu ukuba nibambise.” Bathi bakwenza oko babekuxelelwe nguYesu, “bavingcela inkitha eninzi yeentlanzi. Enyanisweni, iminatha yabo yaqalisa ukukrazuka.” Wathi akubona lo mmangaliso, uPetros waqalisa ukoyika, kodwa uYesu wamzolisa esithi: “Musa ukoyika. Ukususela ngoku uya kubambisa abantu bephila.”—Luka 5:4-10.
4. (a) UYesu wabalungiselela njani abafundi bakhe ukuba banikele ubungqina? (b) Ubulungiseleli babafundi bakaYesu babuya kwahluka njani kobakhe?
4 Ngoko nangoko, uPetros noAndreya—kunye noYakobi noYohane, oonyana bakaZebhedi—bazishiya izikhephe zabo baza balandela uYesu. Phantse iminyaka emithathu, bahamba noYesu kuhambo lwakhe lokushumayela baza baqeqeshwa njengabashumayeli. (Mateyu 10:7; Marko 1:16, 18, 20, 38; Luka 4:43; 10:9) Ekupheleni kwelo xesha, ngoNisan 14, 33 C.E., uYesu wabaxelela: “Lowo ubonisa ukholo kum, naye lowo uya kwenza imisebenzi endiyenzayo; yaye uya kwenza imisebenzi emikhulu kunale.” (Yohane 14:12) Abafundi bakaYesu babeya kunikela ubungqina obucokisekileyo njengoYesu kodwa ngomlinganiselo omkhulu. Bakuba nje befundile, bona nabo bonke abafundi bexesha elizayo babeya kunikela ubungqina kubantu “beentlanga zonke,” kude kube “sekuphelisweni kwenkqubo yezinto.”—Mateyu 28:19, 20.
5. Sinokuzuza njani kwindlela uYesu awabaqeqesha ngayo abalandeli bakhe?
5 Siphila kwixesha ‘lokupheliswa kwenkqubo yezinto.’ (Mateyu 24:3) Ngokungafaniyo nabo bafundi bokuqala, asinakuhamba noYesu size simbone xa eshumayela ebantwini. Sekunjalo, sinokuzuza kuqeqesho lwakhe ngokufunda eBhayibhileni indlela awashumayela ngayo nemiyalelo ayinika abalandeli bakhe. (Luka 10:1-11) Noko ke, kweli nqaku kuza kuqwalaselwa enye into ebaluleke gqitha uYesu awayibonakalisa kubafundi bakhe—isimo sengqondo esifanelekileyo ngomsebenzi wokushumayela.
Ukuxhalabela Abantu
6, 7. Luluphi uphawu uYesu awayenalo olwenza ukuba aphumelele ekushumayeleni, yaye sinokumxelisa njani kule nkalo?
6 Kwakutheni ukuze uYesu anikele ubungqina ngendlela ephumelelayo? Esinye isizathu ngumdla nenkxalabo enzulu awayenayo ngabantu. Umdumisi waxela kwangaphambili esithi uYesu wayeya “kuba nosizi ngesisweli nangehlwempu.” (INdumiso 72:13) Ngokwenene wasizalisekisa eso siprofeto. IBhayibhile ithi ngesinye isihlandlo: “Akubona izihlwele wazisizela, ngenxa yokuba zazihlinzekile, zilahliwe njengezimvu ezingenamalusi.” (Mateyu 9:36) Kwanaboni abaqaqadekileyo bayibona inkxalabo awayenayo ngabo yaye batsaleleka kuye.—Mateyu 9:9-13; Luka 7:36-38; 19:1-10.
7 Nathi namhlanje siya kuphumelela ukuba sibonakalisa inkxalabo efanayo ngabantu. Ngaphambi kokuya kushumayela, kutheni ungaziphi ithuba uze ucingisise nzulu ngendlela abantu abayifuna ngayo inkcazelo obaphathele yona? Cinga ngeengxaki abasenokuba bajamelene nazo eziya kuconjululwa kuphela buBukumkani. Zimisele ukuba nesimo sengqondo esakhayo kubo bonke, ekubeni ungazi ukuba nguwuphi oya kusamkela isigidimi. Kusenokwenzeka ukuba umntu oza kuthetha naye ebethandazela ukuba umntu onjengawe aze kumnceda!
Ukuqhutywa Luthando
8. Bexelisa uYesu, yintoni ebangela abalandeli bakhe bashumayele iindaba ezilungileyo?
8 Iindaba ezilungileyo uYesu awazivakalisayo zazinento yokwenza nokufezwa kokuthanda kukaYehova, ukungcwaliswa kwegama Lakhe, nokuthethelelwa kolongamo Lwakhe—ezona mbambano zibalulekileyo ebantwini. (Mateyu 6:9, 10) Ngenxa yokuba wayemthanda uYise, uYesu wazimisela ukugcin’ ingqibelelo kude kube sekupheleni nokunikela ubungqina obucokisekileyo ngoBukumkani, obuya kucombulula ezo mbambano. (Yohane 14:31) Ekubeni abalandeli bakaYesu beqhutywa yinto efanayo, bakhuthele ekushumayeleni. Umpostile uYohane wathi: “Ukumthanda uThixo kuko ukuthi, siyigcine imiyalelo yakhe,” kuquka umyalelo wokushumayela iindaba ezilungileyo nokwenza abafundi.—1 Yohane 5:3; Mateyu 28:19, 20.
9, 10. Ukongezelela ekumthandeni kwethu uThixo, luluphi olunye uthando olusiqhuba ukuba sinikele ubungqina obucokisekileyo?
9 UYesu wathi kubalandeli bakhe: “Ukuba niyandithanda, niya kuyigcina imiyalelo yam. Lowo unemiyalelo yam aze ayigcine, nguye ondithandayo.” (Yohane 14:15, 21) Ngenxa yoko, ukumthanda uYesu kufanele kusishukumisele ukuba sinikele ubungqina ngenyaniso size sigcine nezinye izinto uYesu ayalela zona. Ebudeni bexesha lokubonakala kwakhe emva kokuvuswa kwakhe, uYesu wambongoza uPetros esithi: “Yondla iimvana zam. . . . Yalusa amatakane am ezimvu. . . Yondla amatakane am ezimvu.” Yintoni efanele ikhuthaze uPetros ukuba enjenjalo? UYesu waphendula xa ngokuphindaphindiweyo wabuza uPetros: “Uyandithanda na? . . . Uyandithanda na? . . . Unomsa na ngam?” Ewe, uthando uPetros awayenalo ngoYesu, umsa awayenawo ngaye, wawuya kumenza anikele ubungqina ngokucokisekileyo, akhangele “iimvana” zikaYesu aze azaluse ngokomoya.—Yohane 21:15-17.
10 Namhlanje, asinalwalamano lusondeleyo noYesu njengokuba kwakunjalo ngoPetros. Sekunjalo, sikuqonda ngokunzulu oko uYesu wasenzela kona. Iintliziyo zethu ziqhutywa luthando olunzulu olwambangela ukuba “angcamle ukufa ngenxa yabantu bonke.” (Hebhere 2:9; Yohane 15:13) Sivakalelwa ngendlela uPawulos awaziva ngayo xa wabhala: “Uthando analo uKristu luyasinyanzela . . . Wafela bonke ukuze abo baphilayo bangabi saziphilela, kodwa baphilele yena.” (2 Korinte 5:14, 15) Sibonakalisa ukuba siluthabatha nzulu uthando uYesu awayenalo ngathi yaye nathi sibonakalisa ukuba siyamthanda ngokuthabatha nzulu umyalelo wakhe wokunikela ubungqina obucokisekileyo. (1 Yohane 2:3-5) Asifuni kurhuq’ iinyawo xa sikumsebenzi wokushumayela, ngokungathi idini likaYesu alinaxabiso lingako.—Hebhere 10:29.
Musa Ukuvumela Nantoni Na Ikuphazamise
11, 12. UYesu wayezele yiphi injongo ehlabathini, yaye wakuphepha njani ukuphazamiseka?
11 Xa uYesu wayephambi koPontiyo Pilato, wathi: “Ndizalelwe oku, yaye ndizele oku ehlabathini, ukuze ndiyingqinele inyaniso.” (Yohane 18:37) UYesu akazange avumele nantoni na ukuba imphazamise ekunikeleni ubungqina ngenyaniso. Leyo yinto uThixo awayethanda ukuba ayenze.
12 Ngokuqinisekileyo uSathana wamvavanya kule nkalo. Kungekudala emva kokuba uYesu ebhaptiziwe, uSathana wamthembisa ukumenza oyena mntu ubalaseleyo ehlabathini, ukumnika “zonke izikumkani zehlabathi nozuko lwazo.” (Mateyu 4:8, 9) Kamva, amaYuda afuna ukumenza ukumkani. (Yohane 6:15) Bambi basenokucinga ngeenzuzo ezazinokufumaneka ukuba uYesu wayesamkele eso sipho, mhlawumbi bacinge ukuba njengokumkani ongumntu, uYesu ngewayebancedile abantu. Noko ke, uYesu akazange acinge ngaloo ndlela. Eyona nto yayibalulekile kuye kukunikela ubungqina ngenyaniso.
13, 14. (a) Yintoni engazange ikwazi ukumphazamisa uYesu emsebenzini wakhe oyintloko? (b) Nangona uYesu wayelihlwempu ngezinto eziphathekayo, yintoni awayenzayo?
13 Ukongezelela, uYesu akazange aphazanyiswe kukuzifunela ubutyebi. Ngenxa yoko, akazange aphile njengesinhanha. Akazange abe nawo nomzi. Ngesinye isihlandlo wathi: “Iimpungutye zinemingxuma neentaka zezulu zineendlwana, kodwa yena uNyana womntu akanayo nendawo le yokufaka intloko.” (Mateyu 8:20) Ekufeni kukaYesu, ekuphela kwento yexabiso awayenayo ebhaliweyo yayisisambatho awenza iqashiso ngaso amajoni angamaRoma. (Yohane 19:23, 24) Noko ke, ngaba uYesu waphila ubomi obungenanjongo? Akunjalo konke konke!
14 UYesu wenza okuninzi gqitha kunoyena mntu owayebathanda gqitha abantu nowayesisinhanha. UPawulos wathi: “Niyabazi ububele obungasifanelanga beNkosi yethu uYesu Kristu, ukuba nakuba wayesisityebi waba lihlwempu ngenxa yenu, ukuze nibe zizityebi ngobuhlwempu bakhe.” (2 Korinte 8:9; Filipi 2:5-8) Nangona wayelihlwempu ngezinto eziphathekayo, uYesu wabavulela ithuba lokuba abantu abathobekileyo bafumane ubomi obungunaphakade kwiimeko ezifezekileyo. Hayi indlela esimbulela ngayo! Yaye siyawuvuyela umvuzo awufumanayo ekubeni eyona nto eyayibalulekile ebomini bakhe yayikukwenza ukuthanda kukaThixo!—INdumiso 40:8; IZenzo 2:32, 33, 36.
15. Yintoni enexabiso elingakumbi kunobutyebi?
15 AmaKristu namhlanje azabalazela ukuxelisa uYesu nawo ayakuphepha ukuphazanyiswa kukufuna ubutyebi. (1 Timoti 6:9, 10) Ayavuma ukuba ubutyebi bunokwenza ubomi bube mnandi, kodwa ayazi ukuba ikamva lawo elingunaphakade alixhomekekanga kubutyebi. Xa umKristu esifa, ubutyebi bezinto zakhe eziphathekayo abunaxabiso kanye njengokuba isambatho sikaYesu sasingenaxabiso kuye ekufeni kwakhe. (INtshumayeli 2:10, 11, 17-19; 7:12) Xa umKristu esifa, ekuphela kwento enexabiso anayo lulwalamano analo noYehova noYesu Kristu.—Mateyu 6:19-21; Luka 16:9.
Akazange Adinyazwe Yinkcaso
16. UYesu wahlangabezana njani nenkcaso?
16 Inkcaso ayizange imphazamise uYesu ekunikeleni ubungqina ngenyaniso. Kwanokwazi ukuba ubulungiseleli bakhe basemhlabeni babuya kuphela ngokufa okulidini akuzange kumdimaze. Ethetha ngoYesu, uPawulos wathi: “Ngenxa yovuyo olwalubekwe phambi kwakhe wasinyamezela isibonda sentuthumbo, elidela ihlazo, waza wahlala phantsi ngasekunene kwetrone kaThixo.” (Hebhere 12:2) Phawula ukuba uYesu ‘walidela ihlazo.’ Akazange azikhathaze ngento ecingwa ngabo babemchasile. Ingqalelo yakhe yayisekwenzeni ukuthanda kukaThixo.
17. Sinokufunda ntoni ekunyamezeleni kukaYesu?
17 Esebenzisa isifundo sokunyamezela kukaYesu, uPawulos ukhuthaza amaKristu esithi: “Mqwalaseleni ngokusondeleyo lowo uye wayinyamezela intetho enjalo yokuchasa yaboni ngokunxamnye nezilangazelelo zabo, ukuze ningadinwa nize nityhafe emiphefumlweni yenu.” (Hebhere 12:3) Liyinyaniso elokuba, kusenokuqob’ amandla ukujamelana nenkcaso okanye ukuhlekwa imihla ngemihla. Kusenokudimaza ukusoloko uxhathisa izilingo zehlabathi, mhlawumbi kuzityhafise izalamane zethu ezisikhuthazayo ukuba ‘sizenzele igama.’ Noko ke, njengoYesu sikhangele kuYehova ukuba asixhase njengokuba sizimisele ukubeka uBukumkani kuqala ebomini bethu.—Mateyu 6:33; Roma 15:13; 1 Korinte 2:4.
18. Sisiphi isifundo esihle esinokusifunda kumazwi awathethwa nguYesu kuPetros?
18 Ukungakuvumeli kukaYesu ukuphazamiseka kwabonakala xa waxelela abafundi bakhe ukuba uza kufa. UPetros wakhuthaza uYesu ukuba abe “nobubele” kuye yaye emqinisekisa ukuba ‘akayi kuba nesi siphelo.’ UYesu akazange avume ukuphulaphula nantoni na enokumenza buthathaka kwisigqibo sakhe sokwenza ukuthanda kukaYehova. Wamnikela umva uPetros waza wathi: “Suka uye emva kwam, Sathana! Usisikhubekiso kum, ngenxa yokuba ucinga, kungekhona iingcamango zikaThixo, kodwa ezabantu.” (Mateyu 16:21-23) Ngamana ngamaxesha onke singazimisela ukungaziphulaphuli iingcamango zabantu. Kunoko, kwanga singasoloko sikhokelwa ziingcamango zikaThixo.
Ukuzisa Iinzuzo Zokwenene
19. Nangona wayesenza imimangaliso, yiyiphi eyona nkalo eyayiphambili kubulungiseleli bukaYesu?
19 UYesu wenza imimangaliso emininzi ukubonisa ukuba wayenguMesiya. Wavusa nabafileyo. Izihlwele zaba nomdla kwimisebenzi yakhe, kodwa uYesu akazange eze kunceda abantu kuphela emhlabeni. Wayeze kungqinela inyaniso. Wayesazi ukuba nayiphi na inzuzo yezinto eziphathekayo yayiyokwexeshana. Kwanabo babevusiwe babeya kuphinda bafe. Kukungqinela inyaniso kuphela okwakuya kunceda abanye ukuba bafumane ubomi obungunaphakade.—Luka 18:28-30.
20, 21. AmaKristu okwenyaniso alungelelene njani kwimibandela enokuthanani nemisebenzi emihle?
20 Namhlanje, bambi baye bazama ukuxelisa imisebenzi emihle eyenziwa nguYesu ngokuvula izibhedlele okanye ukwenza eminye imisebenzi ukunceda abantu abangamahlwempu. Kwezinye iimeko, bachitha iimali ezinkulu, yaye ukunyaniseka kwabo kuyancomeka; kodwa naluphi na uncedo abalunikelayo lolokwexeshana. BuBukumkani kuphela obuya kuzisa isiqabu esingapheliyo. Ngenxa yoko, amaNgqina kaYehova agxininisa ekungqineleni inyaniso engoBukumkani kanye njengokuba uYesu wenza.
21 Kambe ke, amaKristu okwenyaniso ayayenza imisebenzi emihle. UPawulos wabhala: “Lo gama ixesha lisasivumela, masenze okulungileyo kubo bonke, ngokukodwa kwabo bahlobene nathi elukholweni.” (Galati 6:10) Kumaxesha entlekele okanye xa ubani esengxakini, siyakhawuleza ‘ukwenza okulungileyo’ kubamelwane okanye kubazalwana bethu abangamaKristu. Sekunjalo, sigxininisa kwinto efanelekileyo—ukungqinela inyaniso.
Funda Kumzekelo KaYesu
22. Kutheni amaKristu eshumayela kubamelwane?
22 UPawulos wabhala: “Yeha ke mna ukuba andizivakalisanga iindaba ezilungileyo!” (1 Korinte 9:16) Wayengengomntu ongakhathaliyo ngeendaba ezilungileyo kuba oko kwakuthetha ubomi bakhe nobabo bamphulaphulayo. (1 Timoti 4:16) Umsebenzi wethu wokushumayela siwugqala ngendlela efanayo. Sifuna ukubanceda abamelwane bethu. Sifuna ukubonakalisa uthando esinalo ngoYehova. Sifuna ukungqina ukuba siyamthanda uYesu yaye sinoxabiso ngendlela asithanda ngayo. Ngenxa yoko, sishumayela iindaba ezilungileyo yaye siphila “kungekhona kwiminqweno yabantu, kodwa ekuthandeni kukaThixo.”—1 Petros 4:1, 2.
23, 24. (a) Yintoni esiyifundayo kummangaliso weentlanzi? (b) Ngoobani namhlanje abanikela ubungqina obucokisekileyo?
23 NjengoYesu, asiphazamiseki xa abanye besigculela okanye ngomsindo bechasa isigidimi sethu. Siyafunda kummangaliso uYesu awawenza xa wayemema uPetros noAndreya ukuba amlandele. Siyabona ukuba xa sithobela uYesu, yaye ngokungathi kunjalo, sithobe iminatha yethu nakumanzi abonakala engenazintlanzi, sisenokuphuma nento. AmaKristu amaninzi angabalobi aye abambisa iintlanzi ezintle emva kokuloba ixesha elide kumanzi abonakala engenanto. Amanye aye akwazi ukufudukela kwiindawo ezineentlanzi ezininzi yaye aye abambisa iintlanzi ezininzi. Enoba yintoni na esiyenzayo, asisayi kuyeka ukuthoba iminatha yethu. Siyazi ukuba uYesu akakathi umsebenzi wokushumayela ugqityiwe naphi na apha emhlabeni.—Mateyu 24:14.
24 AmaNgqina kaYehova angaphezu kwezigidi ezithandathu axakekile kumazwe angaphezu kwama-230. IMboniselo kaFebruwari 1, 2005 iya kuba inengxelo yomsebenzi wawo wonyaka wenkonzo wama-2004. Loo ngxelo iya kubonisa intsikelelo kaYehova kumsebenzi wokushumayela. Kwixesha eliseleyo lale nkqubo yezinto, ngamana singaqhubeka sinikela ingqalelo kumazwi achukumisayo kaPawulos athi: “Lishumayele ilizwi ngokungxamisekileyo.” (2 Timoti 4:2) Ngamana singaqhubeka sinikela ubungqina obucokisekileyo de uYehova athi umsebenzi ugqityiwe.
Ukususela kulo nyaka, iNgxelo Yonyaka Wenkonzo yamaNgqina kaYehova Ehlabathini Lonke ayisayi kufumaneka kwinkupho yeMboniselo kaJanuwari 1. Kunoko, iya kufumaneka kwinkupho kaFebruwari 1.
Ngaba Unokuphendula?
• Sinokuzuza njani kuqeqesho uYesu awaludlulisela kubafundi bakhe?
• UYesu wayenasiphi isimo sengqondo ngabantu awayeshumayela kubo?
• Yintoni esiqhubayo ukuba sinikele ubungqina obucokisekileyo?
• Ziziphi iindlela esinokugxininisa ngazo ekwenzeni ukuthanda kukaThixo, kanye njengokuba uYesu wenza?
[Umfanekiso okwiphepha 15]
Siya kuphumelela kubulungiseleli bethu ukuba njengoYesu sibonakalisa inkxalabo efanayo ngabantu
[Umfanekiso okwiphepha 16, 17]
UYesu weza emhlabeni ngokuyintloko ukuze anikele ubungqina kwinyaniso
[Imifanekiso ekwiphepha 17]
AmaNgqina kaYehova agxininisa ekunikeleni ubungqina obucokisekileyo