Ibali Lobomi
Sasebenzisa Iimeko Zethu Eziguquguqukayo Ekushumayeleni Kwiindawo Ezikude
KUBALISA URICARDO MALICSI
Xa ndaphelelwa ngumsebenzi ngenxa yokungathabath’ icala kwezobupolitika njengomKristu, mna nentsapho yam sacela uYehova ukuba asincede sicebe ikamva lethu. Emthandazweni wethu, sachaza umnqweno wethu wokwandisa ubulungiseleli bethu. Kungekudala emva koko, saqalisa ukuba ngoonothwal’ impahlana yaye saya kumazwe asemzini asibhozo akumazwekazi amabini. Ngenxa yoko, sakwazi ukushumayela kwiindawo ezikude.
NDAZALWA ngowe-1933 kwiiPhilippines kwintsapho engamalungu ePhilippine Independent Church. Onke amalungu entsapho yakowethu ali-14 ayengamalungu aloo cawa. Xa ndandineminyaka emalunga ne-12 ubudala, ndathandaza ndicela uThixo ukuba andikhokelele kunqulo lokwenyaniso. Omnye wootitshala bam, wandibhalisa kwiklasi efundisa ngonqulo, yaye ndaba ngumKatolika ozinikeleyo. Andizange ndikhe ndingayi ukuya kuvuma izono ngoMgqibelo okanye kwidini leMisa ngeCawa. Noko ke, ngokuthe ngcembe ndaqalisa ukuba namathandabuzo nokunganeliseki. Ndandikhathazwa yimibuzo ephathelele oko kwenzeka ebantwini xa besifa, isihogo nemfundiso engoBathathu Emnye. Iimpendulo ezazinikelwa ziinkokeli zonqulo zazingenantsingiselo yaye zazingandanelisi.
Ukufumana Iimpendulo Ezanelisayo
Ngoxa ndandisekholejini, ndanxulumana neqela elandenza ndabandakanyeka kwimilo, ukungcakaza, ukutshaya nezinye izinto ezingalunganga. Ngenye ingokuhlwa, ndadibana nomama womnye endandifunda naye. WayeliNgqina likaYehova. Ndambuza imibuzo endandiyibuze ootitshala bam ababesifundisa ngonqulo. Wayiphendula yonke imibuzo yam esebenzisa iBhayibhile, yaye ndaqiniseka ukuba oko wayekuthetha kwakuyinyaniso.
Ndathenga iBhayibhile ndaza ndaqalisa ukuyifunda namaNgqina. Kungekudala ndandisiya kuzo zonke iintlanganiso zamaNgqina kaYehova. Ndilandela isiluleko seBhayibhile sobulumko esithi “unxulumano olubi lonakalisa imikhwa elungileyo,” ndayeka ukunxulumana nabahlobo bam abaziphethe kakubi. (1 Korinte 15:33) Oku kwandinceda ndenza inkqubela kwisifundo sam seBhayibhile yaye ekugqibeleni ndazahlulela kuYehova. Emva kokubhaptizwa ngowe-1951, ndaba ngumlungiseleli wexesha elizeleyo (uvulindlela) okwexeshana. Kwandula ke ngoDisemba 1953, ndatshata noAurea Mendoza Cruz owaba liqabane lobomi bam bonke nelisebenza nam ngokuthembeka kubulungiseleli.
Ukuphendulwa Komthandazo Wethu
Sasifuna ngokwenene ukuba ngoovulindlela. Noko ke, umnqweno wethu wokukhonza uYehova ngokuzele ngakumbi awuzange uzaliseke ngokukhawuleza. Sekunjalo, asizange siyeke ukumcela uYehova ukuba asivulele amathuba enkonzo. Kodwa, ubomi bethu babungelula. Sekunjalo, sasilubeke phambili usukelo lwethu lokomoya, yaye xa ndandineminyaka engama-25 ubudala, ndamiselwa njengesicaka sebandla, umveleli owongamelayo kwibandla lamaNgqina kaYehova.
Njengoko ndandisenza inkqubela kulwazi lweBhayibhile yaye ndiyiqonda ngakumbi imigaqo kaYehova, ndaqonda ukuba umsebenzi wam wawungqubana nesazela sam njengomKristu ongathabath’ icala kwezobupolitika. (Isaya 2:2-4) Ndagqiba kwelokuba ndiwuyeke. Oku kwavavanya ukholo lwethu. Ndandiza kuyinyamekela njani intsapho yam? Kwakhona sathandaza kuYehova uThixo. (INdumiso 65:2) Samxelela izinto ezisixhalabisayo nesizoyikayo, kodwa samxelela nomnqweno wethu wokukhonza apho kukho imfuneko engakumbi yabashumayeli boBukumkani. (Filipi 4:6, 7) Sasingazi ukuba sasiza kuvulekelwa ngamathuba awahlukahlukeneyo!
Ukuqalisa Uhambo Lwethu
NgoAprili 1965, ndaqeshwa njengomalathisi kwisebe lokucima umlilo eVientiane International Airport, eLaos, yaye safudukela apho. Kwisixeko saseVientiane, kwakukho amaNgqina angama-24, yaye sasishumayela kamnandi nabavangeli basemazweni nabanye abazalwana basekuhlaleni abambalwa. Kamva, ndathunyelwa eUdon Thani Airport, eThailand. AmaNgqina ayengekho eUdon Thani. Iintlanganiso zeveki ngeveki sasiziqhuba zonke njengentsapho. Sasishumayela kwindlu ngendlu, senze amabuyelo size siqalise izifundo zeBhayibhile.
Sakhumbula isiluleko sikaYesu kubafundi bakhe sokuba bafanele ‘bahlale bethwala isiqhamo esininzi.’ (Yohane 15:8) Ngoko ke sazimisela ukulandela umzekelo wabo size siqhubeke sivakalisa iindaba ezilungileyo. Kungekudala savuyiswa yimiphumo yoko. Intombazana yaseThailand yamkela inyaniso yaza yaba ngudadewethu wokomoya. Amadoda amabini angamaMerika amkela inyaniso yaye ekuhambeni kwexesha aba ngabadala abangamaKristu. Saqhubeka sishumayela iindaba ezilungileyo kangangeminyaka engaphezu kwelishumi emantla eThailand. Hayi indlela okusivuyisa ngayo ukwazi ukuba ngoku kukho ibandla eUdon Thani! Enye yembewu yenyaniso esayityalayo isavelisa iziqhamo.
Noko ke, okubuhlungu kukuba, kwafuneka sifuduke kwakhona, yaye sathandazela ukuba “iNkosi yesivuno” isincede siqhubeke sisiba nenxaxheba kumsebenzi wokushumayela. (Mateyu 9:38) Sathunyelwa eTehran, ikomkhulu laseIran. Eli yayilixesha lokulawula kwabalawuli ababizwa ngokuba ziiShah.
Ukushumayela Kwimimandla Elucelomngeni
Ekufikeni kwethu eTehran, safumana abazalwana bethu bokomoya ngoko nangoko. Sasinxulumana kunye neqela elincinane lamaNgqina ali-13 aziintlanga ezahlukahlukeneyo. Kwafuneka senze uhlengahlengiso ukuze sishumayele iindaba ezilungileyo eIran. Nangona sasingachaswa ngokungqalileyo, kodwa kwakufuneka silumke.
Ekubeni abo banomdla babephangela, ngamanye amaxesha kwakuye kufuneke ukuba siqhube izifundo zeBhayibhile ezinzulwini zobusuku okanye—de kube ngentseni. Sekunjalo, hayi indlela esasivuya ngayo ukubona isiqhamo salo msebenzi wokuzibhokoxa! Iintsapho ezininzi ezingabemi bakwiiPhilippines naseKorea zamkela inyaniso yamaKristu zaza zazahlulela kuYehova.
Indawo elandelayo endasebenza kuyo kwakuseDhaka, eBangladesh. Safika apho ngoDisemba 1977. Eli yayilelinye lamazwe ekwakunzima ukushumayela kuwo. Noko ke, sasisoloko sikhumbula ukuba simele siqhubeke sishumayela. Sikhokelwa ngumoya kaYehova, sakwazi ukufumana iintsapho ezininzi ezazisithi zingamaKristu. Ezinye zazo zazinxanelwe amanzi ahlaziyayo enyaniso efumaneka kwiZibhalo Ezingcwele. (Isaya 55:1) Ngenxa yoko, saqalisa izifundo zeBhayibhile ezininzi.
Sasihlala sikhumbula ukuba injongo kaThixo kukuba “zonke iintlobo zabantu zisindiswe.” (1 Timoti 2:4) Okuvuyisayo kukuba, akukho mntu owazama ukusitsalisa nzima. Ukuze soyise nayiphi na inkcaso, sasiqiniseka ukuba sibonakalisa ubuhlobo gqitha xa sithetha nabantu. Njengompostile uPawulos, sazama ukuba “zizinto zonke kubantu bazo zonke iintlobo.” (1 Korinte 9:22) Xa sibuzwa ukuba size ngabuni, sasiye sichaze ngobubele, yaye safumanisa ukuba abaninzi babenobuhlobo.
EDhaka safumana iNgqina lasekuhlaleni saza salikhuthaza ukuba libe kunye nathi kwiintlanganiso zethu zamaKristu yaye kamva kumsebenzi wokushumayela. Yandula ke, inkosikazi yam yaqhuba isifundo seBhayibhile kunye nentsapho ethile yaza yayimemela kwiintlanganiso. Ngobubele bothando bukaYehova, yonke le ntsapho yayamkela inyaniso. Kamva, iintombi zayo ezimbini zancedisa ekuguquleleni iincwadi zokufundisisa iBhayibhile kulwimi lwesiBengali, yaye uninzi lwezalamane zayo nazo zamazi uYehova. Abanye abafundi abaninzi beBhayibhile bayamkela inyaniso. Uninzi lwabo lungabadala okanye oovulindlela.
Ekubeni iDhaka isisixeko esinabemi abaninzi, samema abanye bamalungu entsapho yethu ukuba baze kusincedisa kumsebenzi wokushumayela. Abaninzi beza kusebenza nathi eBangladesh. Sivuya gqitha yaye sinombulelo kuYehova ngethuba esiye salifumana lokushumayela iindaba ezilungileyo kwelo lizwe! Ukususela kwiziqalelo ezincinane zomntu omnye kuphela, ngoku kukho amabandla amabini eBangladesh.
NgoJulayi 1982, kwafuneka siyishiye iBangladesh. Sashiya abazalwana sinyembezana. Kungekudala emva koko, ndafumana umsebenzi e-Entebbe International Airport, eUganda, apho sasiza kuhlala khona iminyaka emine neenyanga ezisixhenxe. Yintoni esasiza kuyenza ekuzukiseni igama likaYehova elikhulu kweli lizwe?
Ukukhonza UYehova EMpuma Afrika
Ekufikeni kwethu e-Entebbe International Airport, mna nomfazi wam sathatyathwa ngemoto sasiwa kwindawo esasiza kuhlala kuyo. Njengoko sasishiya isikhululo senqwelo-moya, ndaqalisa ukushumayela kumqhubi wemoto ngoBukumkani bukaThixo. Wandibuza: “UliNgqina likaYehova?” Xa ndavumayo, lo mqhubi wathi: “Omnye wabazalwana benu usebenza kwigumbi lokwalathisa iinqwelo-moya.” Ngoko nangoko, ndamcela ukuba andise apho. Sadibana nalo mzalwana, owavuya gqitha akusibona, yaye kwenziwa amalungiselelo eentlanganiso nenkonzo yasentsimini.
Ngelo xesha kwakukho abavakalisi boBukumkani abangama-228 kuphela eUganda. Sachitha unyaka wethu wokuqala sityala imbewu yenyaniso kunye nabazalwana ababini e-Entebbe. Ekubeni abantu apho bekuthanda ukufunda, sakwazi ukuhambisa iincwadi ezininzi, kuquka namaphephancwadi. Samema abazalwana baseKampala, ikomkhulu, ukuba basincedise ekushumayeleni kwintsimi yase-Entebbe ngeempelaveki. Kwintetho yam yokuqala yesidlangalala kwakukho abantu abahlanu—kuquka nam.
Kwiminyaka emithathu eyalandelayo, saba nelona xesha livuyisayo gqitha ebomini bethu xa sibona abo sasibafundisa besamkela inyaniso yaye besenza inkqubela ngokukhawuleza. (3 Yohane 4) Kwenye indibano yesiphaluka, izifundo zethu zeBhayibhile ezithandathu zabhaptizwa. Uninzi lwazo lwathi ngenxa yokusibona singoovulindlela, nangona sasisebenza ngokusisigxina oko kwalukhuthaza ukuba lube kwinkonzo yexesha elizeleyo.
Saqonda ukuba indawo yethu yempangelo nayo inokuba yintsimi eneziqhamo. Ngenye imini, ndaya kwigosa lokucima umlilo ndaza ndathetha nalo ngethemba elisekelwe eBhayibhileni lokuphila kumhlaba oyiparadesi. Ndalibonisa kwiBhayibhile yalo ukuba abantu abathobelayo baya kuhlala ngoxolo nangomanyano, kungasayi kubakho ukubandezeleka okubangelwa bubuhlwempu, ukungabikho kwezindlu, imfazwe, ukugula okanye ukufa. (INdumiso 46:9; Isaya 33:24; 65:21, 22; ISityhilelo 21:3, 4) Ukufunda oku kwiBhayibhile yalo kwavusa umdla walo. Ngoko nangoko kwaqaliswa isifundo seBhayibhile. Laya kuzo zonke iintlanganiso. Kungekudala lazahlulela kuYehova laza labhaptizwa. Kamva lasebenza nathi kubulungiseleli bexesha elizeleyo.
EUganda kwabakho imfazwe yamakhaya izihlandlo ezibini ngoxa sasilapho, kodwa oko akuzange kusenze siyeke ukushumayela nokuya kwiintlanganiso zebandla. Amalungu entsapho asebenza kumasebe amazwe ngamazwe athunyelwa eNairobi, eKenya, kangangeenyanga ezintandathu. Abanye bethu ababesele eUganda baqhubeka neentlanganiso zethu zamaKristu nomsebenzi wokushumayela, nangona kwakufuneka silumke size siphaphe.
NgoAprili 1988, umsebenzi wam ndawugqiba yaye safuduka kwakhona. Salishiya iBandla lase-Entebbe sanelisekile ngenxa yenkqubela yokomoya apho. NgoJulayi 1997, saba nethuba lokutyelela e-Entebbe kwakhona. Ngelo xesha, abanye ababezizifundo zethu zeBhayibhile babengabadala. Hayi indlela esaba nemincili ngayo xa kwabakho abantu abali-106 kwiNtetho Yesidlangalala!
Ukufudukela Kwintsimi Engazange Ishunyayelwe
Ngaba sasiza kukwazi ukungena kwiminyango emitsha evulekileyo? Ewe, umsebenzi wam olandelayo wawuseMogadishu International Airport, eSomalia. Sazimisela ukulisebenzisa kakuhle eli thuba litsha lokusebenza intsimi ekungazange kushunyayelwe kuyo.
Ubukhulu becala umsebenzi wethu wokushumayela sasiwenza kubasebenzi abasuka kwamanye amazwe, abasebenzi bakwiiPhillipines nakwabanye abantu basemzini. Maxa wambi sasidibana nabo kwindawo yentengiso. Kwakhona sasibatyelela ngobubele emakhayeni abo. Ngokusebenzisa ubulumko, ubuchule nangokuthembela ngokupheleleyo kuYehova, sakwazi ukuxelela abanye iinyaniso zeBhayibhile, yaye oku kwathwala iziqhamo kwiintlanga ezahlukahlukeneyo. Emva kweminyaka emibini, salishiya elaseMogadishu—ngaphambi nje kokuba kuqhambuke imfazwe apho.
I-International Civil Aviation Organization yandithumela eYangon, eMyanmar. Kwakhona, savulekelwa ngamathuba amahle okunceda abo bantliziyo zinyanisekileyo ukuba bafunde ngeenjongo zikaThixo. Emva kokuba simkile eMyanmar, sathunyelwa eDar es Salaam, eTanzania. Ukushumayela iindaba ezilungileyo kwindlu ngendlu kwakulula eDar es Salaam kuba kwakukho indawo ehlala abantu abathetha isiNgesi.
Kuwo onke la mazwe sisebenze kuwo, asizange sibe nangxaki ingako ekushumayeleni, nangona kwezinye iimeko, umsebenzi wamaNgqina kaYehova wawumiselwe imiqathango. Ngenxa yomsebenzi wam, ngokuqhelekileyo owawunxulumene namasebe karhulumente okanye amazwe ngamazwe, abantu babengakuthandabuzi oko sasikwenza.
Umsebenzi wam wempangelo wawufuna ukuba mna nomfazi wam sibe ngoonothwal’ impahlana kangangeminyaka engama-30. Noko ke, umsebenzi wam sawugqala njengokuphela kwendlela yokufikelela usukelo lwethu. Usukelo lwethu lokuqala yayisoloko ikukuhambisela phambili izilangazelelo zoBukumkani bukaThixo. Siyambulela uYehova ngokusinceda sizisebenzise kakuhle iimeko zethu ezitshintshayo size sifumane ilungelo elimangalisayo lokusasaza iindaba ezilungileyo kwiindawo ezikude.
Ukubuyela Apho Sasiqale Khona
Xa ndandineminyaka engama-58 ubudala, ndagqiba kwelokuba ndithabathe umhlala-phantsi ngaphambi kwexesha ndize ndibuyele kwiiPhilippines. Ekubuyeni kwethu, sathandaza kuYehova ukuba asikhokele. Saba kwibandla elikwisiXeko saseTrece Martires, kwiphondo laseCavite. Ekufikeni kwethu, kwakukho abavakalisi boBukumkani bukaThixo abali-19 kuphela. Kwenziwa amalungiselelo omsebenzi wokushumayela suku ngalunye, yaye kwaqaliswa izifundo zeBhayibhile ezininzi. Ibandla laqalisa ukukhula. Ngesinye isihlandlo umfazi wam wayenezifundo zeBhayibhile ezili-19 mna ndandinezili-14.
Kungekudala iHolo yoBukumkani yaba ncinane kakhulu. Sathandaza kuYehova ngalo mbandela. Omnye umzalwana nomfazi wakhe bagqiba kwelokuba banikele ngomhlaba, yaye iofisi yesebe yasiboleka imali ukuze sakhe iHolo yoBukumkani entsha. Esi sakhiwo sitsha siye saba negalelo elikhulu kumsebenzi wokushumayela, yaye inani labantu abezayo landa veki nganye. Okwangoku, sihamba ngaphezu kweyure ukuya kunceda elinye ibandla elinabavakalisi abali-17.
Mna nomfazi wam siyalixabisa ilungelo esilifumeneyo lokusebenza kumazwe awahlukahlukeneyo. Xa sijonga emva kubomi bethu bokuba ngoonothwal’ impahlana, siziva saneliseke ngokunzulu ukwazi ukuba sabusebenzisa ngeyona ndlela ifanelekileyo—ukunceda abanye bafunde ngoYehova!
[Imaphu ekwiphepha 24, 25]
(Ukuba ufuna inkcazelo ehlahlelwe kakuhle, yiya kwimpapasho)
TANZANIA
UGANDA
SOMALIA
IRAN
BANGLADESH
MYANMAR
LAOS
THAILAND
PHILIPPINES
[Umfanekiso okwiphepha 23]
Ndikunye nomfazi wam, uAurea