Ngaba Uhlala Udandathekile?
PHANTSE ubomi bakhe bonke, uLena ebenengxaki yokuzijongela phantsi. Uthi: “Ukuxhatshazwa ngokwesini kangangeminyaka ngoxa ndandisemncinane, kwandenza ndazijongela phantsi. Ndandiziva ndingento yanto.” USimone naye xa ekhumbula ixesha awayeselula ngalo uthi, “Ndandidandathekile ndiziva ndingento yanto.” Ithande ukuxhaphaka namhlanje into yokudandatheka kwabantu ngenxa yeemvakalelo ezinjalo. Elinye iziko abafowunela kulo abakwishumi elivisayo ukuze bafumane uncedo, lithi phantse isiqingatha sabo bafowunayo sithi “sisoloko siziva singento yanto.”
Ngokutsho kwezinye iingcali, ukuziva ungungantweni kuye kwenzeke xa abantu besenziwa ngabanye ukuba bazive bengento yanto. Ubani unokuvakalelwa ngaloo ndlela xa esoloko engxoliswa, egxekwa kabukhali okanye exhatshazwa. Enoba sisiphi isizathu, oku kunokumtheza amandla kuze kumshiye edandathekile. Uhlolisiso lwakutshanje lwezonyango lufumanise ukuba abantu abazijongela phantsi badla ngokungazithembi okanye bangabathembi abanye, baze ke bengaqondanga bonakalise ulwalamano nobuhlobo babo nabanye. Ingxelo yolu hlolisiso ithi, “enyanisweni babangela kanye imeko abayoyikayo.”
Abantu abavakalelwa ngaloo ndlela badla ngokuba ngamaxhoba oko iBhayibhile ikubiza ngokuba ‘ziingcamango zabo eziphazamisayo.’ (INdumiso 94:19) Bavakalelwa kukuba abasoloko bezenza kakuhle izinto. Xa izinto zingahambi kakuhle, bakhawuleza bazibek’ ityala. Nangona abanye besenokubancoma ngezinto abaziphumezileyo, sekunjalo baziva befana nomntu onobuqhetseba onokubhenceka nanini na. Bekholelwa ukuba abanakuze bonwabe, abaninzi bawela kwindlela yokuziphatha eyonakalisayo abavakalelwa kukuba abanamandla okuyilungisa. ULena, okhankanywe ngaphambilana, waba nengxaki yokutya eyayibangelwa kukuzijongela phantsi, yaye uyavuma esithi, “Ndandivakalelwa kukuba akukho nto ndinokuyenza ngaloo meko.”
Ngaba abo ‘banezi ngcamango ziphazamisayo’ baya kuhlala bevakalelwa ngale ndlela ubomi babo bonke? Ngaba ikho into enokwenziwa ukulwa nezi mvakalelo? IBhayibhile inemigaqo namacebiso asebenzisekayo aye anceda abaninzi bayoyisa le ngxaki. Yiyiphi eminye yale migaqo, yaye iye yabanceda njani abo banale ngxaki ukuba bafumane ulonwabo ebomini? Inqaku elilandelayo liza kusityebisela.