Imibuzo Evela Kubafundi
Ngaba igama elithi “mhlawumbi” elikuZefaniya 2:3 lithetha ukuba abakhonzi bakaThixo abamele baqiniseke ngokufumana ubomi obungunaphakade?
Le ndinyana ithi: “Funani uYehova, nonke balulamileyo bomhlaba, baqhelisele isigwebo Sakhe. Funani ubulungisa, funani ululamo. Mhlawumbi niya kufihlwa ngemini yomsindo kaYehova.” Kutheni le ndinyana isithi “mhlawumbi”?
Ukuze siqonde indlela uYehova aya kuqhubana ngayo nabo bathembekileyo eArmagedon, kuya kusinceda ukukhumbula oko kufundiswa yiBhayibhile ngokuphathelele oko uThixo aya kukwenza kwabo bafa ngaphambi kwexesha lomgwebo. Abanye baya kuvuselwa ezulwini njengezidalwa ezingenakufa, ngoxa abanye beza kuvuselwa emhlabeni benethemba lokuphila ngonaphakade kumhlaba oyiParadesi. (Yohane 5:28, 29; 1 Korinte 15:53, 54) Ukuba uYehova uyabakhumbula aze abavuze abakhonzi bakhe abanyanisekileyo abafa ngaphambi kweArmagedon, ngokuqinisekileyo uya kuqhubana ngendlela efanayo nabakhonzi bakhe abaya kube bephila ngemini yomsindo wakhe.
Amazwi aphefumlelweyo kampostile uPetros ayakhuthaza. Wabhala: “[UThixo] wagcina uNowa, umshumayeli wobulungisa ekhuselekile kunye nabanye abasixhenxe xa wazisa unogumbe phezu kwehlabathi labantu abangenabuthixo; yaye wazigwebela isohlwayo izixeko iSodom neGomora ngokuthi azifinyeze zibe luthuthu, . . . wamhlangula uLote olilungisa . . . UYehova uyakwazi ukubahlangula esilingweni abantu abanozinikelo lobuthixo, kodwa abantu abangengomalungisa ubagcinele imini yomgwebo ukuze banqunyulwe.” (2 Petros 2:5-9) Nangona uYehova wabatshabalalisayo abantu abangendawo kumaxesha adluleyo, wasindisa uNowa noLote, abamkhonza ngokuthembeka. UYehova uza kubahlangula kwakhona abantu abanozinikelo lobuthixo xa etshabalalisa abantu abangendawo eArmagedon. “Isihlwele esikhulu” sabantu abangamalungisa siya kusinda.—ISityhilelo 7:9, 14.
Kubonakala ukuba ibinzana elithi “mhlawumbi” elikuZefaniya 2:3 alisetyenziswanga ngenxa yokungaqiniseki kukaThixo ukuba unako ukubahlangula abo akholiswa ngabo. Kunoko, ukusindiswa komntu ngemini yomsindo kaYehova kuqalisa xa eqalisa ukufuna ubulungisa nolulamo. Ukusindiswa kuya kuxhomekeka ekuqhubekeni komntu efuna ululamo nobulungisa.—Zefaniya 2:3.
[Umfanekiso okwiphepha 31]
“UYehova uyakwazi ukubahlangula esilingweni abantu abanozinikelo lobuthixo”