Bazali—Nifuna Babe Nekamva Elinjani Abantwana Benu?

“Nina bafana kwanani zintombi ezinyulu . . . Mabalidumise igama likaYehova.”—INDUMISO 148:12, 13.

1. Yintoni exhalatyelwe ngabazali ngokuphathelele abantwana babo?

NGABA ukho umzali ongalixhalabelanga ikamva labantwana bakhe? Ukususela ekuzalweni kosana—okanye nangaphambi koko—abazali baqalisa ukuxhalaba ngentlalo-ntle yalo. Ngaba luza kuba sempilweni? Ngaba luza kukhula kakuhle? Njengoko umntwana ekhula, ziyanda nezinto ezixhalabisa abazali. Eneneni, abazali bafuna abantwana babo baphumelele.—1 Samuweli 1:11, 27, 28; INdumiso 127:3-5.

2. Kutheni abazali abaninzi namhlanje benqwenela ukuba abantwana babo baphile ubomi obutofotofo xa sele bekhulile?

² Noko ke, kwihlabathi lanamhlanje kunzima ukuba abazali banike abantwana babo okona kulungileyo. Abazali abaninzi baye batyhubela ebunzimeni—kwiimfazwe, kwiingxwabangxwaba zezobupolitika, kubunzima bezoqoqosho, kwiimbandezelo, njalo njalo. Ngoko banqwenela ukuba abantwana babo bangatyhubeli kubunzima obufanayo. Kumazwe ahambele phambili kwezoqoqosho, abazali basenokubona oonyana neentombi zabahlobo nezalamane zabo beqhuba kakuhle kwimisebenzi yempangelo yaye kubonakale ngathi izinto zibahambela kakuhle ebomini. Ngaloo ndlela, baziva benyanzelekile ukuba benze konk’ okusemandleni ukuze xa abantwana babo sele bekhulile baphile ubomi obutofotofo nobunqabisekileyo.—INtshumayeli 3:13.

Ukukhetha Ubomi Obanelisayo

3. Yintoni eye yakhethwa ngamaKristu?

³ Njengabalandeli bakaYesu Kristu, amaKristu akhethe ukuzahlulela kuYehova. Aye athobela amazwi kaYesu athi: “Ukuba nabani na ufuna ukundilandela, makazincame, athabathe isibonda sakhe sentuthumbo imihla ngemihla aze aqhubeke endilandela.” (Luka 9:23; 14:27) Ewe, ubomi bomKristu buquka ukuzincama. Noko ke, asibobomi bobuhlwempu nonxunguphalo. Ngokwahlukileyo koko, bubomi obanelisayo ngenxa yokuba bubandakanya ukupha yaye uYesu wathi, “kunoyolo ngakumbi ukupha kunokwamkela.”—IZenzo 20:35.

4. UYesu wabongoza abalandeli bakhe ukuba bafune ntoni?

⁴ Ngexesha likaYesu, abantu babephila ebunzimeni. Ngaphandle kokuzama iindlela zokuziphilisa, kwakufuneka banyamezele ulawulo olungqwabalala lwamaRoma nengcinezelo yezithethe zonqulo lwaloo mihla. (Mateyu 23:2-4) Sekunjalo, bathi abantu abaninzi bakuva ngoYesu bayeka yonk’ into—kuquka imisebenzi yokuziphilisa—baba ngabalandeli bakhe. (Mateyu 4:18-22; 9:9; Kolose 4:14) Ngaba abo bafundi babelibek’ esichengeni ikamva labo? Phawula la mazwi kaYesu: “Wonk’ ubani oshiye izindlu okanye abantakwabo okanye oodade okanye uyise okanye unina okanye abantwana okanye imihlaba ngenxa yegama lam uya kwamkela izihlandlo ezininzi ngakumbi yaye uya kudla ilifa ubomi obungunaphakade.” (Mateyu 19:29) UYesu wabaqinisekisa abalandeli bakhe ukuba uYise osemazulwini uyazazi iintswelo zabo. Ngenxa yoko wababongoza esithi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:31-33.

5. Abanye abazali bavakalelwa njani ngesiqinisekiso sikaYesu sokuba uThixo uya kubanyamekela abakhonzi bakhe?

⁵ Izinto azahlukanga kuyaphi namhlanje. UYehova uyazazi iintswelo zethu yaye abo babeka izilangazelelo zoBukumkani kwindawo yokuqala ebomini babo, ingakumbi abo bangenelela ubulungiseleli bexesha elizeleyo, baqinisekile ukuba uya kubanyamekela. (Malaki 3:6, 16; 1 Petros 5:7) Noko ke, iingqondo zabanye abazali ziyabethabethana xa kufikwa kule nkalo. Bangathanda ukubona abantwana babo beqhubela phambili enkonzweni kaYehova, mhlawumbi ekuhambeni kwexesha bangenelele ubulungiseleli bexesha elizeleyo. Kodwa kwangaxeshanye, xa bekhangela imeko yehlabathi yezoqoqosho neyengqesho namhlanje, bavakalelwa kukuba kubalulekile ukuba abantwana baqale bafumane imfundo esemgangathweni ukuze bakwazi ukufumana umsebenzi ohlawula umvuzo oncumisayo okanye babe nento abaqamele ngayo. Xa becinga ngemfundo esemgangathweni ke abo bazali bacinga ngemfundo ephakamileyo.

Ukulungiselela Ikamva

6. Ibinzana elithi “imfundo ephakamileyo” elisetyenziswe kweli nqaku libhekisela entwenini?

⁶ Inkqubo yemfundo yahlukile kwilizwe ngalinye. Ngokomzekelo, eUnited States, kwizikolo zikawonke-wonke umntu ufumana imfundo esisiseko kangangeminyaka eli-12. Emva koko, abafundi basenokukhetha ukuya eyunivesithi okanye ekholeji iminyaka emine okanye ngaphezulu baze bafumane isidanga okanye bafundele ukufumana izidanga ezongezelelekileyo njengesobugqirha, ubugqwetha, ubunjineli, njalo njalo. Xa sithetha ‘ngemfundo ephakamileyo’ kweli nqaku, sibhekisela kwimfundo yaseyunivesithi. Kwelinye icala, kukho izikolo zokufundela ubugcisa apho umntu aqeqeshwa ithutyana nje elifutshane aze afumane iphepha lesiqinisekiso okanye idiploma yokwenza umsebenzi othile.

7. Yiyiphi impembelelo efunyanwa ngabafundi kwizikolo zamabanga aphezulu?

⁷ Utyekelo olukhoyo namhlanje lolokuba imfundo yamabanga aphezulu iqeqesha abafundi ukuba bakwazi ukuya kumaziko emfundo ephakamileyo. Ngenxa yoko, kwizikolo ezininzi zamabanga aphezulu kunikelwa ingqalelo ekhethekileyo kwizifundo zeakhademikhi ezinceda abafundi bafumane amanqaku aphezulu kwiimviwo zokungena eyunivesithi, kunokuba baqeqeshelwe ukufumana umsebenzi. Abafundi abakumabanga aphezulu namhlanje baphenjelelwa ngootitshala, abacebisi nangabanye abafundi ukuba bazabalazele ukufunda kwezona yunivesithi ziphambili, nto leyo eya kubenza bafumane izidanga eziya kubanceda bafumane imisebenzi ehlawula imali eninzi.

8. Luluphi ukhetho abajamelene nalo abazali abangamaKristu?

⁸ Yintoni ke ngoko abafanele bayenze abazali abangamaKristu? Kakade, bayafuna ukuba abantwana babo baphumelele esikolweni yaye bafunde ubugcisa obuya kubanceda bakwazi ukuzinyamekela kwixa elizayo. (IMizekeliso 22:29) Kodwa ngaba bafanele bayeke abantwana babo baphenjelelwe ngumoya wokhuphiswano lwezinto eziphathekayo nempumelelo? Bababekela usukelo olunjani abantwana babo enoba kungezinto abazithethayo okanye abazenzayo? Abanye abazali basebenza nzima baze bagcine imali eya kubanceda bathumele abantwana babo kumaziko emfundo ephakamileyo xa befikelela kwelo nqanaba. Abanye baxolele nokuzifak’ ematyaleni ukuze bafundise abantwana babo. Noko ke, isigqibo esinjalo asizondleko nje ngokubhekisele emalini kuphela. Ziziphi iindleko ezibandakanyekileyo ekufuneni imfundo ephakamileyo?—Luka 14:28-33.

Iindleko Zokufuna Imfundo Ephakamileyo

9. Yintoni enokuthethwa ngeendleko zemfundo ephakamileyo namhlanje?

⁹ Xa sicinga ngeendleko, sidla ngokucinga ngemali. Kwamanye amazwe, iindleko zemfundo ephakamileyo zihlawulwa ngurhulumente, ngenxa yoko abafundi abafanelekayo abayihlawuleli imfundo yabo. Noko ke, kwiindawo ezininzi imfundo ephakamileyo iziindleko yaye iya isiba ziindleko ngakumbi. Inqaku leNew York Times lithi: “Imfundo ephakamileyo yayifudula igqalwa njengeluncedo kwinkqubela-phambili. Kodwa ngoku ibhenca umahluko okhoyo phakathi kwezityebi nabantu abahlelelekileyo.” Ngamany’ amazwi, abantu abafumana imfundo ephakamileyo esemgangathweni zizityebi nabantu abadumileyo, kuba bathumela abantwana babo kumaziko emfundo ephakamileyo ukuze nabo babe zizityebi zeli hlabathi yaye badume. Ngaba abazali abangamaKristu bafanele babekele abantwana babo usukelo olunjalo?—Filipi 3:7, 8; Yakobi 4:4.

10. Imfundo ephakamileyo inxulumene njani nokuhambisela phambili le nkqubo yezinto?

¹⁰ Kwanakwiindawo apho imfundo ephakamileyo ingahlawulelwayo, kusenokubakho iimbopheleleko ezithile. Ngokomzekelo, iThe Wall Street Journal ithi kwelinye ilizwe elikuMzantsi-mpuma weAsia, urhulumente “unenkqubo ayisebenzisayo esikolweni enjongo yayo ikukubeka abona bafundi babalaseleyo emanqwanqweni.” Ukuba ‘semanqwanqweni’ eneneni kuthetha ukuya kwawona maziko emfundo aphambili ehlabathini—iOxford neCambridge eziseNgilani, ii-Ivy League eziseUnited States namanye amaziko. Kutheni urhulumente welo lizwe elungiselele inkqubo enjalo? Le ngxelo ithi: “Isizathu kukuba urhulumente ufuna ukwandisa ubutyebi beli lizwe.” Kusenokwenzeka ukuba aba bafundi abahlawuli nepeni emdaka ngemfundo yabo kodwa bayahlawula ngokuzibhokoxa ekuhambiseleni phambili le nkqubo yezinto. Nangona le iyindlela yokuphila enqwenelekayo ehlabathini, ngaba leyo yindlela abazali abangamaKristu abafuna abantwana babo baphile ngayo?—Yohane 15:19; 1 Yohane 2:15-17.

11. Zithini iingxelo ngokuphathelele ukusetyenziswa kakubi kotywala nokuziphatha okubi ngokwesini kwabafundi baseyunivesithi?

¹¹ Enye inkalo esimele siyiqwalasele yindlela abaphila ngayo abafundi. Iiyunivesithi neekholeji zidume ngezinto ezimbi—ukusetyenziswa kakubi kweziyobisi notywala, ukuziphatha okubi, ukunganyaniseki, ukudlala ngabafundi abafikayo besenziswa izinto ezingenangqondo, njalo njalo. Cinga nje ngokusetyenziswa kakubi kotywala. Lithetha ngokuzinkcinkca ngotywala, oko kukuthi, ukusela ngenjongo yokunxila, iphephancwadi iNew Scientist lithi: “Malunga nabafundi abangama-44 ekhulwini [kwiiyunivesithi zaseUnited States] bazinkcinkca ngotywala kanye ngeeveki ezimbini.” Le yingxaki eqhelekileyo nakulutsha lwaseBritani, eOstreliya, eRashiya nakwezinye iindawo. Mayela nokuziphatha okubi ngokwesini, into abancokola ngayo abafundi baseyunivesithi “kukuzifumanela umntu,” yaye ngokutsho kwengxelo yeNewsweek, “oku kubhekisela ekufumaneni umntu aza kudibana naye ngeso sihlandlo sinye—baphuzane okanye babe neentlobano zesini—kungekho njongo yakwakha buhlobo emva koko.” Uphando lubonisa ukuba ngabafundi abamalunga nama-60 ukusa kuma-80 ekhulwini ababandakanyeka kolu hlobo lokuziphatha. Omnye umphandi uthi: “Abafundi basekholeji abaninzi bayakwenza oku.”—1 Korinte 5:11; 6:9, 10.

12. Ziziphi iingxaki abajamelene nazo abafundi basekholeji?

¹² Ngaphandle kokuhlala kwezo meko zimaxongo, kukho nengxaki yomsebenzi omninzi wesikolo neemviwo. Ngokuqhelekileyo, abafundi kufuneka bafunde, benze nomsebenzi wabo wesikolo abawenzela ekhaya ukuze baphumelele. Abanye kusenokufuneka babe nomsebenzi wesingxungxo ngoxa befunda. Konke oku kufuna ixesha elininzi yaye kuyabaqoba. Baya kulifumana phi ke ixesha namandla okwenza izinto zokomoya? Xa sele bediniwe, yintoni abaza kuyityeshela? Ngaba izilangazelelo zoBukumkani ziya kuqhubeka zikwindawo yokuqala okanye ngaba ziya kubekelwa bucala? (Mateyu 6:33) IBhayibhile ibongoza amaKristu isithi: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha, ngenxa yokuba imihla ingendawo.” (Efese 5:15, 16) Kulusizi kuba abanye baye baphulukana nokholo ngenxa yokungabi naxesha nokudinwa okanye kuba beye babandakanyeka kwihambo engavumelaniyo neZibhalo ekholeji!

13. Yiyiphi imibuzo abazali abangamaKristu abafanele bacingisise ngayo?

¹³ Kakade ke, ukuziphatha okubi neengcinezelo azikho kwiikholeji nakwiiyunivesithi kuphela. Noko ke, ulutsha oluninzi lwehlabathi lugqala ihambo enjalo njengenxalenye yemfundo yaye aluboni nto iphosakeleyo kuloo nto. Ngaba abazali abangamaKristu bafanele bathumele abantwana babo kwiindawo abazaziyo ukuba zinjalo babahlalise apho iminyaka emine okanye ngaphezulu? (IMizekeliso 22:3; 2 Timoti 2:22) Ngaba iingenelo asenokuzifumana umntwana zibaluleke kangangokude achanatywe kwimeko enjalo? Yaye okona kubaluleke ngakumbi, yintoni oluyifundiswayo ulutsha ngezinto ezimele zize kuqala ebomini balo?a (Filipi 1:10; 1 Tesalonika 5:21) Abazali bafanele bacingisise nzulu ngale mibuzo yaye bakuthandazele oku, bacingisise nangengozi yokusa abantwana babo kwisikolo esikwesinye isixeko okanye ilizwe.

Yiyiphi Enye Into Enokwenziwa?

14, 15. (a) Nangona kukho ingcamango exhaphakileyo namhlanje, sisiphi isiluleko seBhayibhile esisebenzayo? (b) Yiyiphi imibuzo abanokuzibuza yona abaselula?

¹⁴ Ingcamango exhaphakileyo namhlanje yeyokuba ukuze ulutsha luphumelele kufuneka lufumane imfundo yaseyunivesithi. Noko ke, kunokuba enze into eyenziwa ngumntu wonke, amaKristu athobela isilumkiso esiseBhayibhileni esithi: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Yintoni uThixo athanda ukuba abantu bakhe bayenze, abadala nabaselula, kule mihla yokugqibela yexesha lesiphelo? UPawulos wabongoza uTimoti wathi: “Hlala uthe qwa, nyamezela ububi, yenza umsebenzi womvangeli, bufeze ngokupheleleyo ubulungiseleli bakho.” Ngokuqinisekileyo loo mazwi ayasebenza kuthi sonke namhlanje.—2 Timoti 4:5.

¹⁵ Kunokuba sithabatheke ngumoya wokuthand’ izinto eziphathekayo zeli hlabathi, kufuneka sonke ‘sihlale sithe qwa’—sinikele ingqalelo kwimisebenzi yethu yokomoya. Ukuba uselula, zibuze: ‘Ngaba ndenza konke okusemandleni ukuze “ndibufeze ngokupheleleyo ubulungiseleli bam,” ndize ngaloo ndlela ndifaneleke njengomlungiseleli weLizwi likaThixo? Ngaba ikho into endiyenzayo ukuze ndibuphumeze “ngokupheleleyo” ubulungiseleli bam? Ngaba ndikhe ndakucinga ukungenela inkonzo yexesha elizeleyo?’ Le mibuzo ilucelomngeni, ngokukodwa xa ubona olunye ulutsha luthe phithi lusukelo lokuzingca, ‘luzifunela izinto ezinkulu’ olucinga ukuba ziya kulwenza lube nekamva eliqaqambileyo. (Yeremiya 45:5) Ngoko ke, abazali abangamaKristu abalumkileyo bayabakhuthaza yaye bayabaqeqesha abantwana babo ngokomoya ukususela ebusaneni.—IMizekeliso 22:6; INtshumayeli 12:1; 2 Timoti 3:14, 15.

16. Abazali abangamaKristu banokubakhuthaza njani abantwana babo ngokomoya?

¹⁶ Oyena umdala kubafana abathathu abanina wabo ubengumlungiseleli wexesha elizeleyo kangangeminyaka emininzi uthi: “Umama wayesoloko ebabek’ esweni abantu esinxulumana nabo. Sasinganxulumani nabo sasifunda nabo esikolweni kunoko sasinxulumana nabantu ababenosukelo oluhle lokomoya ebandleni. Umama wayesoloko ememela kwikhaya lethu abo bakwinkonzo yexesha elizeleyo—abavangeli basemazweni, abaveleli abahambahambayo, amalungu entsapho yaseBheteli noovulindlela. Ukubaphulaphula xa bebalisa amava abo nokubona indlela ababonwabe ngayo kwasenza sanqwenela ukungenela inkonzo yexesha elizeleyo.” Hayi indlela ekuvuyisa ngayo namhlanje ukubona aba bafana bathathu bekwinkonzo yexesha elizeleyo—omnye ukhonza eBheteli, omnye sele evela kwiSikolo Sokuqeqesha Abalungiseleli yaye omnye unguvulindlela!

17. Abazali banokubancedisa njani abantwana babo ekukhetheni izifundo nomsebenzi? (Funda ibhokisi ekwiphepha 29.)

¹⁷ Ngaphandle kokubakhuthaza ngokomoya, abazali bamele babancedise beselula abantwana babo ekukhetheni izifundo abaza kuzifunda esikolweni nomsebenzi wobugcisa abaceba ukufumana uqeqesho kuwo. Omnye umfana oseBheteli ngoku, uthi: “Bobabini abazali bam babengoovulindlela ngaphambi kokuba batshate nasemva koko yaye bazama konke okusemandleni ukuba bakhuthaze yonke intsapho ukuba ibe nomoya wobuvulindlela. Xa sikhetha izifundo zesikolo okanye sisenza izigqibo ezichaphazela ikamva lethu, babesoloko besikhuthaza ukuba senze ukhetho oluya kusivulela ithuba lokufumana umsebenzi wesingxungxo size sibe ngoovulindlela.” Kunokuba bakhethe izifundo zeakhademikhi ezilungiselelwe imfundo yaseyunivesithi, abazali nabantwana bafanele bajonge izifundo ezinokuba luncedo kumsebenzi wobuthixo.b

18. Yiyiphi imisebenzi abanokucinga ngayo abaselula?

¹⁸ Uphando lubonisa ukuba kumazwe amaninzi, abona bantu bafunwa kakhulu, ngamagcisa kumsebenzi wezandla nabantu abanokwenza imisebenzi eqhelekileyo, kungekhona abo bafumene izidanga eyunivesithi. IUSA Today ithi “kumashumi eminyaka ezayo abasebenzi abangama-70%, baya kuba ngabantu abafumene isidanga okanye uqeqesho lobugcisa kumaziko nje aqhelekileyo kungekhona abo bafumene isidanga ekholeji emva kokufunda iminyaka emine.” Kuninzi lwala maziko kunikelwa nje uqeqesho olufutshane kumsebenzi weofisi, wokulungisa iimoto, wokulungisa iikhompyutha, wokufakela imibhobho yamanzi, wokulungisa iinwele neminye imisebenzi emininzi. Ngaba le yimisebenzi ethandwayo? Ngokuqinisekileyo! Mhlawumbi ayikho kumgangatho ophezulu njengoko abanye besenokucinga kodwa umntu uyakwazi ukuzixhasa nokufumana ixesha lokwenza ezinye izinto, nto leyo iyingenelo kwabo bagqala inkonzo kaYehova njengowona msebenzi ubalulekileyo.—2 Tesalonika 3:8.

19. Yiyiphi eyona ndlela iqinisekileyo yokufumana ulonwabo nolwaneliseko?

¹⁹ IBhayibhile ibongoza isithi: “Nina bafana kwanani zintombi ezinyulu . . . mabalidumise igama likaYehova, kuba ligama lakhe lodwa eliphakame ngokungenakufikeleleka. Isidima sakhe siphezu komhlaba nezulu.” (INdumiso 148:12, 13) Xa kuthelekiswa nezikhundla nemivuzo efumaneka ehlabathini, ngokuqinisekileyo ukukhonza uYehova ixesha elizeleyo yeyona ndlela iqinisekileyo yokufumana ulonwabo nolwaneliseko. Hlala ukukhumbula oko iBhayibhile isiqinisekisa ngako: “Intsikelelo kaYehova—yiyo etyebisayo, yaye akongezi ntlungu kuyo.”—IMizekeliso 10:22.

[Imibhalo esemazantsi]

Ngaba Unokuchaza?

• AmaKristu abeka ithemba lawo entwenini ukuze abe nekamva elinqabisekileyo?

• Luluphi ucelomngeni abajamelene nalo abazali abangamaKristu ngokuphathelele ikamva labantwana babo?

• Yintoni emele iqwalaselwe xa kucingwa ngemfundo ephakamileyo?

• Abazali banokubanceda njani abantwana babo ukuze bazibekele usukelo lokukhonza uYehova?

[Ibhokisi ekwiphepha 29]

Ixabiseke Kangakanani Imfundo Ephakamileyo?

Abantu abaninzi abaya eyunivesithi banethemba lokufumana isidanga esiya kubenza bafumane umsebenzi osisigxina ohlawula umvuzo oncumisayo. Noko ke, ingxelo karhulumente ibonisa ukuba kubantu abaya ekholeji, bamalunga nekota abafumana isidanga kwisithuba seminyaka emithandathu—okuthetha ukuthi bambalwa gqitha abaphumelelayo. Sekunjalo, ngaba ukufumana isidanga kuthetha ukuba umntu uza kuwufumana umsebenzi ngokuqinisekileyo? Phawula oko kudizwa luphando lwakutshanje.

“Ukuya [kwiyunivesithi] yaseHarvard okanye eDuke akusosiqinisekiso sokufumana umsebenzi obhetele nohlawula imali eninzi. . . . Akukho nto ingako ziyaziyo iinkampani ngomntu oselula oze kufuna umsebenzi. Isidanga (saseIvy League) sinokutsal’ ingqalelo yomqeshi. Kodwa undoqo koko umntu asilelayo okanye akwaziyo ukukuphumeza.”—INewsweek, kaNovemba 1, 1999.

“Nangona imisebenzi yanamhlanje ifuna ubuchule obungakumbi kunangaphambili . . . , ubuchule obufunekayo kule misebenzi bobo umntu abufumana kumabanga aphezulu—izibalo, ukulesa nokubhala kwibanga lesixhenxe . . . , kungekhona ekholeji. . . . Akuyomfuneko ukuba abafundi baye ekholeji ukuze bafumane umsebenzi kodwa kufuneka babe nolwazi ngezifundo ezisisiseko ezifundiswa kumabanga aphezulu.”—IAmerican Educator, Spring 2004.

“Iikholeji ezininzi zisesemva gqitha xa kufikelelwa kumba wokuqeqeshela abafundi ukusebenza emva kokuba bephumelele ekholeji. Amaziko aqeqeshela ubugcisa . . . ayathandwa. Abantu abafunda kula maziko banda ngama-48% ukususela kowe-1996 ukusa kowama-2000. . . . Kwangaxeshanye, iidiploma ezibiza imali engaphaya kwengqondo nezifunyanwa emva kokufunda ixesha elide ziphelelwe lixabiso.”—ITime, kaJanuwari 24, 2005.

“IU.S. Department of Labor iqikelela ukuba ngonyaka wama-2005 umfundi omnye kwabathathu kubafundi abafumene izidanga emva kokufunda iminyaka emine ekholeji akayi kufumana umsebenzi waloo nto ayifundeleyo.”—IThe Futurist, July/August 2000.

Ngenxa yoku, abahlohli abaninzi bayakuthandabuza ukubaluleka kwemfundo ephakamileyo namhlanje. Ingxelo yeFuturist ithi: “Abantu sibafundisela ilize.” Ngokwahlukileyo koko, phawula oko iBhayibhile ikutshoyo ngoThixo: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo. Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.”—Isaya 48:17, 18.

[Umfanekiso okwiphepha 26]

Bazibekela ecaleni izilangazelelo zabo zobuqu baza balandela uYesu

[Umfanekiso okwiphepha 31]

Abazali abangamaKristu abalumkileyo babamisela umzekelo omhle ngokomoya abantwana babo ukususela ebusaneni