Zuza Kweyona Mfundo Ibalaseleyo!

IBHAYIBHILE imchaza uYehova uThixo njengoMdali wazo zonke izinto, kuquka nabantu. (Genesis 1:27; ISityhilelo 4:11) NjengomYaleli Ozukileyo, wafundisa isibini sokuqala, uAdam noEva, waza wabenza bakulungela ukuhlala kumyezo omhle wase-Eden. Injongo yakhe yayikukuba aqhubeke ebafundisa aze abanyamekele ngonaphakade. (Genesis 1:28, 29; 2:15-17; Isaya 30:20, 21) Khawucinge nje ngekamva ababeza kuba nalo!

Noko ke, okubuhlungu kukuba, esi sibini saphulukana nako konke oko. Ukungathobeli kwaso kwakhokelela ekuwohlokeni kwempilo nemilinganiselo yabantu. (Genesis 3:17-19; Roma 5:12) Ibhekisela kwisizukulwana esiye sabakho emva nje kokudalwa komntu, iBhayibhile ithi: “UYehova wabona ukuba ububi bomntu bandile emhlabeni yaye zonke iingcamango zentliziyo yakhe zityekele ebubini ngalo lonke ixesha.”—Genesis 6:5.

Sele kudlule phantse iminyaka engama-4 500 ukususela oko uYehova wathi umntu utyekele ebubini, yaye ngoku imeko yabantu imbi ngakumbi. Abaninzi baphila ngokuxoka, bayeba okanye bahlasele abanye. Iingxaki zanda umhla nezolo ngoxa kwelinye icala abantu beyeka ukukhathalelana. Kaloku ulwalamano lwabantu kuquka olwamalungu eentsapho lukwintlekele. Ukanti, uThixo akanakubekw’ ityala ngezinto ezenzekayo, yaye akayekanga ukuba nenkxalabo ngeengxaki zanamhlanje. UYehova usoloko eyixhalabele impilo-ntle yabantu, yaye ukulungele ukufundisa abo bafuna ukhokelo lwakhe ukuze babe nobomi obonwabisayo. Kwiminyaka engama-2 000 eyadlulayo, wathumela uNyana wakhe, uYesu Kristu, emhlabeni ebonakalisa umdla anawo wokufundisa abantu abafuna ukuphumelela ebomini. UYesu washiya umzekelo wemfundo egqibeleleyo kuba wayefundiswa ngumYaleli Ozukileyo kangangeminyaka engenakubaleka.

UbuKristu Bokwenyaniso Buyimfundo

UYesu Kristu wamisela ubuKristu bokwenyaniso, indlela yokuphila esekelwe eluthandweni. KubuKristu bokwenyaniso, zonke iingcamango nezenzo zimele zivisisane nokuthanda kukaThixo, ukuze kuziswe imbeko nozuko kwigama lakhe. (Mateyu 22:37-39; Hebhere 10:7) UYesu wayexhaswa nguYise, uYehova, kwiimfundiso zakhe eziphathelele indlela yokuphila. KuYohane 8:29 sifunda ngendlela uYesu awaxhaswa ngayo nguThixo, kuba wathi: “Lowo undithumileyo ukunye nam; akandishiyanga ndedwa, ngenxa yokuba ndisoloko ndisenza izinto ezikholekileyo kuye.” Ewe, uYesu wayexhaswa yaye ekhokelwa nguYise ebudeni babo bonke ubulungiseleli bakhe. Abalandeli bakaYesu bokuqala babenokhokelo lokubanceda bahlangabezane neengxaki zobomi. UYehova wabafundisa esebenzisa uNyana wakhe. Ukulandela kwabo iimfundiso nomzekelo kaYesu kwabenza baba ngabantu abalunge ngakumbi. Oku kunjalo nangabafundi bakhe namhlanje.—Funda ibhokisi ethi “Impembelelo KaYesu Neemfundiso Zakhe,” kwiphepha 6.

Eyona nto yenza ubuKristu bokwenyaniso bubalasele kukuba imfundiso yabo ifikelela ingqondo neentliziyo zabantu baze baguquke. (Efese 4:23, 24) Ukucaphula nje umzekelo omnye, cinga ngoko kwafundiswa nguYesu ngendlela ubani afanele anyaniseke ngayo kwiqabane lakhe xa wathi: “Nivile ukuba kwathiwa, ‘Uze ungakrexezi.’ Kodwa mna ndithi kuni wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mateyu 5:27, 28) Ngala mazwi, uYesu wayefundisa abafundi bakhe ukuba intliziyo ifanele igcinwe icocekile yaye iingcamango neminqweno engafanelekanga, nangona zingekaphunyezwa zinokuba nemiphumo emibi gqitha. Ngaba asiyonyaniso ukuba iingcamango ezimbi zinokubangela ubani one uThixo aze abenze buhlungu abanye?

Ngoko, iBhayibhile inikela esi siluleko: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Usenokubuza, ‘Ngaba ngokwenene imfundo inokutshintsha ingqondo?’ Ukutshintsha ingqondo kuquka ukuyikhokelela kwicala elahlukileyo uze uyizalise ngemigaqo nemiyalelo ekwiLizwi likaThixo. Oku kunokwenziwa ngokwamkela imfundo uThixo ayilungiselele kwiLizwi lakhe.

Iyabaguqula Abantu

“Ilizwi likaThixo liphilile, linamandla.” (Hebhere 4:12) Lisenempembelelo enamandla ebantwini, nto leyo engqina ukuba aliphelelwa lixesha. Linokukhuthaza umntu ukuba atshintshe indlela yakhe, amkele ubuKristu bokwenyaniso aze abe ngumntu olunge ngakumbi. Le mizekelo ilandelayo ibonisa indlela eyingenelo ngayo imfundo yeBhayibhile.

UEmilia, okhankanywe kwinqaku elandulela eli, uthi: “Ukwenza kwam umgudu wokuphucula imeko yentsapho yam ndedwa kwakunganele. Xa ndaqalisa ukufunda iBhayibhile namaNgqina kaYehova, ndaqonda ukuba likho ithemba ndaza ndaqalisa ukutshintsha isimo sam sengqondo. Ndafunda ukuba nomonde ngakumbi nokuyeka ukugqajukelwa ngumsindo. Ethubeni, umyeni wam naye waqalisa ukufunda. Kwakungelula ukuba ayeke ukusela, kodwa ekugqibeleni wayeka. Oku kwasinika ithuba elitsha lokwenza umtshato wethu uphumelele. Ngoku singamaKristu onwabileyo yaye sibethelele ebantwaneni bethu imigaqo emihle yeBhayibhile.”—Duteronomi 6:7.

Imfundo yobuKristu bokwenyaniso inokunceda ubani ayeke ukuziphath’ okubi. Kwenzeka kanye oko kuManuel.a Xa wayeneminyaka eli-13 ubudala, washiya ikhaya waza waqalisa ukutshaya intsangu. Ekuhambeni kwexesha, wasebenzisa iheroin. Waba neentlobano zesini namadoda namabhinqa ukuze afumane indawo yokuhlala nemali. Maxa wambi, wayezixhasa ngokuphanga abantu. Wayesoloko ephantsi kwempembelelo yeziyobisi. Ukuba nogonyamelo kwakhe kwamenza waquqa ebuyelela entolongweni. Ngesinye isihlandlo wachitha iminyaka emine apho, waza wabandakanyeka ekuthubeleziseni izixhobo. Emva kokuba etshatile, waqhubeka esebugxwayibeni. Uthi: “Ekugqibeleni sahlala kwindlu eyayikade ihlala iinkuku. Ndisakhumbula inkosikazi yam iphekela phezu kwezitena. Imeko yethu yayimbi kangangokuba izalamane zam zakhuthaza umfazi wam ukuba andishiye.”

Yintoni eyatshintsha ubomi bakhe? UManuel uyaphendula: “Omnye umntu endimaziyo weza ekhayeni lethu waza wathetha ngeBhayibhile. Ndamamkela ukuze nje ndimbonise ukuba akakho uThixo obakhathaleleyo abantu. Ndandizigqala ndingumzekelo ongqina oko. Ndamangaliswa kukubona ukuba eli Ngqina linomonde yaye lithetha ngentlonelo, ngoko ke ndavuma ukuya kwiintlanganiso kwiHolo YoBukumkani. Nangona abanye apho babeyazi imvelaphi yam, bandibulisa ngobubele. Bandenza ndaziva ndisekhaya. Oku kwandithuthuzela gqitha. Ndachukumiseka kangangokuba ndagqiba kwelokuba ndiyeke ukubandakanyeka kwiziyobisi ndize ndifune umsebenzi ofanelekileyo. Emva kweenyanga ezine ndiqalisile ukufunda iBhayibhile, ndakufanelekela ukushumayela nebandla, yaye emva kweenyanga ezine emva koko, ndabhaptizwa njengomnye wamaNgqina kaYehova.”

Buye bamnceda njani uManuel nentsapho yakhe ubuKristu bokwenyaniso? “Ukuba ndandingazange ndiyifumane imfundo yeBhayibhile ngokuqinisekileyo ngendafa kudala. Imfundiso kaYesu engendlela yokuphila iye yayinceda intsapho yam. Abantwana bam ababini abayi kuphila ubomi endabuphila ngoxa ndandisemtsha. Ndiziva ndinelunda nombulelo gqitha kuYehova ngenxa yolwalamano oluhle endinalo ngoku nomfazi wam. Abanye endandiqhelene nabo baye bandithulel’ umnqwazi baza bandixelela ukuba bacinga ukuba le ndlela ndiyithabathileyo yeyona ilungileyo.”

Indlela yamaKristu yokuphila ayibandakanyi ukucoceka ngokuziphatha nje kuphela, kodwa nokucoceka emzimbeni. UJohn, ohlala kwindawo ethwaxwa bubuhlwempu eMzantsi Afrika, wakuqonda oku. Uthi: “Intombi yethu yayidla ngokungahlambi kangangeveki, yaye yayingasikhathazi lo nto.” Inkosikazi yakhe iyavuma ukuba indlu yabo yayingekho kwimeko entle kangako. Kodwa ngenxa yemfundo yobuKristu, izinto zaguquka. UJohn wayeka ukunxulumana nemigulukudu eyayisiba iimoto waza waqalisa ukunikela ingqalelo engakumbi kwintsapho yakhe. “Safunda ukuba njengamaKristu, sifanele sihlale sicocekile emzimbeni kuquka neempahla zethu. Ndiyawathanda amazwi akweyoku-1 kaPetros 1:16, asibongoza ukuba sibe ngcwele kuba uYehova uThixo ungcwele. Ngoku sizama ukwenza ikhaya lethu eliphantsi libukeke.”

Unokuyifumana Imfundo Ebalaseleyo

La mava akhankanywe ngasentla yinto eyenzeka umhla nezolo. Ngenxa yemfundo esekelwe eBhayibhileni, abantu abaninzi baye bafunda ukuphila ubomi obubhetele. Ngenxa yokunyaniseka nokukhuthala kwabo, bayaxatyiswa ngabaqeshi babo. Baye baba ngabamelwane nabahlobo abalungileyo, yaye banomdla kwintlalo-ntle yabanye abantu. Ekubeni bezimisele ukuphepha imikhwa emibi, ngoko banyamekela impilo yabo emzimbeni, engqondweni neemvakalelo. Kunokuba bachithe imali yabo kwizinto eziyingozi empilweni yabo, bayisebenzisa ngendlela eyingenelo kubo nakwiintsapho zabo. (1 Korinte 6:9-11; Kolose 3:18-23) Ngokungathandabuzekiyo, imiphumo yokwenza oko uYehova akubhale eBhayibhileni ibonisa ukuba ukuphila ngendlela yobuKristu bokwenyaniso yeyona ndlela iyimpumelelo ebomini, yeyona mfundo ibalaseleyo. Ngokuphathelele umntu ophila ngokuvisisana nemithetho kaThixo, iBhayibhile ithi: “Konke akwenzayo kuya kuphumelela.”—INdumiso 1:3.

Kuyakhuthaza ukwazi ukuba uThixo uSomandla, uYehova, ukulungele ukusifundisa. Uthi: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.” (Isaya 48:17) Ewe, uYehova uye wasibonisa indlela esimele sihambe ngayo ngomzekelo neemfundiso zoNyana wakhe, uYesu Kristu. Iimfundiso zakhe zatshintsha ubomi babaninzi ababemazi ngoxa wayesemhlabeni, yaye zenza okufanayo nakwabaninzi abaphila ngokuvisisana neemfundiso zakhe namhlanje. Kutheni ungaziphi ixesha lokufunda ngakumbi ngezi mfundiso? AmaNgqina kaYehova akwindawo ohlala kuyo aya kukuvuyela ukukunceda ufumane loo mfundo ixabisekileyo.

[Umbhalo osemazantsi]

[Ibhokisi/Umfanekiso okwiphepha 6]

Impembelelo KaYesu Neemfundiso Zakhe

Esebenzisa isikhundla sakhe sokuba yintloko yabaqokeleli berhafu, uZakeyu waba sisityebi ngokuphanga nokuqhatha abantu. Kodwa watshintsha indlela aphila ngayo ngokusebenzisa iimfundiso zikaYesu.—Luka 19:1-10.

USawule waseTarso wayeka ukutshutshisa amaKristu waza waguqukela kubuKristu, waba ngumpostile uPawulos.—IZenzo 22:6-21; Filipi 3:4-9.

Amanye amaKristu aseKorinte ‘ayengabahenyuzi, abanquli-zithixo, abakrexezi, amafanasini, amasela, abantu ababawayo, amanxila, abatshabhisi nabaphangi.’ Kodwa, emva kokuba efunde ngobuKristu bokwenyaniso, ‘ahlanjwa ahlambuluka, angcwaliswa aza avakaliswa engamalungisa egameni leNkosi yawo uYesu Kristu.’—1 Korinte 6:9-11.

[Umfanekiso okwiphepha 7]

IBhayibhile inokukubonisa indlela onokuphumelela ngayo