Iingelosi—Zingoobani?

UKUMKANI ophethe ubukhosi obunamandla akayikholelwa into ayibonayo. Amadoda amathathu aphoswe kwiziko lomlilo aphuma engenawo nomtshithi! Ahlangulwe ngubani? Ethetha nala madoda mathathu, lo kumkani uthi: “Makabongwe [uThixo wenu], othumele ingelosi yaza yabahlangula abakhonzi bakhe abakholose ngaye.” (Daniyeli 3:28) Ukumkani owayelawula eBhabhiloni kwiminyaka engaphezu kwamawaka amabini awadlulayo wazibonela ngawakhe amehlo indlela ehlangula ngayo ingelosi. Izigidi zabantu ababephila mandulo zazikholelwa kwiingelosi. Namhlanje abantu abaninzi abakholelwayo ukuba iingelosi zikho, bavakalelwa kukuba ngandlel’ ithile ziyabuchaphazela ubomi babo. Zingoobani iingelosi, yaye zazivela phi?

IBhayibhile ithi iingelosi zingumoya, njengokuba uThixo enguMoya. (INdumiso 104:4; Yohane 4:24) Kukho inkitha yeengelosi ebalelwa kumawaka. (ISityhilelo 5:11) Zonke ‘zomelele ngamandla.’ (INdumiso 103:20) Nakubeni iingelosi zineempawu ezifanayo nezabantu yaye zinenkululeko yokuzikhethela njengabantu, zadalwa ngendlela eyahlukileyo ebantwini. UThixo wazidala ngaphambi kokuba adale umntu—kwanangaphambi kokuba adale uMhlaba. IBhayibhile ithi xa uThixo ‘waseka umhlaba, amakhwezi [iingelosi] amemelela kunye ngovuyo, yaye bonke oonyana bakaThixo bakhwaza bencoma.’ (Yobhi 38:4, 7) Ekubeni iingelosi zadalwa nguThixo, zibizwa ngokuba ngoonyana bakaThixo.

UThixo wayezidalela ntoni iingelosi? Zinayiphi indima, ukuba ikho, kubomi babantu? Ngaba ziyabuchaphazela ubomi bethu namhlanje? Ekubeni zinelungelo lokuzikhethela, ngaba zikho ezalandela uSathana uMtyholi zaza zaziintshaba zikaThixo? Iimpendulo ezichanileyo zale mibuzo zifumaneka eBhayibhileni.