Ukuhamba Endleleni Yokukhanya Okwandayo
“Umendo wamalungisa unjengokukhanya okuqaqambileyo okuya kukhanya ngokukhanya de kube semini emaqanda.”—IMIZEKELISO 4:18.
1, 2. Ukukhanya okwandayo okuvela kuYehova kuye kwaba nawuphi umphumo kubantu bakaThixo?
NGUBANI onokuba nobuchule bokuchaza oko kwenzekayo xa kuphuma ilanga emva kobumnyama bobusuku ngaphandle koMthombo wokukhanya, uYehova uThixo? (INdumiso 36:9) ‘Xa ukukhanya kwakusasa kubambe iziphelo zomhlaba,’ uThixo uthi, ‘umhlaba uziguqula njengodongwe ngaphantsi kwetywina, nezinto zima endaweni yazo njengakwisinxibo.’ (Yobhi 38:12-14) Xa ilanga lisiya likhanya ngakumbi, izinto ezisemhlabeni zibonakala ngokucacileyo kanye njengokuba udongwe oluthambileyo lutshintsha emva kokuba lugximfizwe ngetywina lokukrola.
2 UYehova ukwanguMthombo wokukhanya kokomoya. (INdumiso 43:3) Ngoxa ihlabathi likwintsunguzi yobumnyama, uThixo oyinyaniso uqhubeka ebakhanyisela abantu bakhe. Uyintoni umphumo woko? IBhayibhile ithi: “Umendo wamalungisa unjengokukhanya okuqaqambileyo okuya kukhanya ngokukhanya de kube semini emaqanda.” (IMizekeliso 4:18) Ukukhanya okuvela kuYehova kuqhubeka kukhanyisa indlela yabantu bakhe. Kubangela ukuba kwenziwe uhlengahlengiso entlanganweni, kwiimfundiso nakwimibandela yokuziphatha.
Ukukhanya Kukhokelela Kuhlengahlengiso Entlanganweni
3. Sisiphi isithembiso esifumaneka kuIsaya 60:17?
3 Ngomprofeti wakhe uIsaya, uYehova wathi: “Esikhundleni sobhedu ndiya kuzisa igolide, esikhundleni sentsimbi ndizise isilivere, esikhundleni somthi ubhedu, esikhundleni samatye intsimbi.” (Isaya 60:17) Kanye njengokuba ukutshintsha into exabiso liphantsi uze ufake enexabiso eliphakamileyo kubonisa inkqubela, amaNgqina kaYehova aye abona inkqubela kwindlela intlangano esebenza ngayo kweli xesha ‘lokupheliswa kwenkqubo yezinto’ okanye kule ‘mihla yokugqibela.’—Mateyu 24:3; 2 Timoti 3:1.
4. Liliphi ilungiselelo elaqaliswa ngowe-1919 yaye oku kwaba yingenelo njani?
4 Ekuqaliseni kwemihla yokugqibela, kumabandla aBafundi BeBhayibhile, njengoko amaNgqina kaYehova ayesaziwa njalo ngelo xesha, abadala nabadikoni babekhethwa ngokusebenzisa inkqubo yedemokhrasi. Noko ke, abanye abadala babengenawo umoya wokushumayela. Bambi babenganeli nje kukuba mathidala ekubeni nesabelo kumsebenzi wokushumayela kodwa babedimaza nabanye. Ukususela ngowe-1919, kwasungulwa isigxina esitsha kwibandla ngalinye—esomalathisi wenkonzo. Umalathisi wenkonzo wayenganyulwa libandla kodwa wayemiselwa ngenkqubo yobuthixo, yiofisi yesebe yabantu bakaThixo. Umsebenzi walo malathisi wenkonzo wawuquka ukulungelelanisa umsebenzi wokushumayela, ukwaba intsimi nokukhuthaza abanye ukuba babe nesabelo kubulungiseleli basentsimini. Kwiminyaka elandelayo, umsebenzi wokushumayela ngoBukumkani wakhuthalelwa ngakumbi.
5. Luluphi uhlengahlengiso olwenziwa ngeminyaka yee-1920?
5 Bonke ebandleni bahlaziywa sisibongozo esithi “Mbhengezeni, mbhengezeni, mbhengezeni uKumkani nobukumkani bakhe,” esenziwa ngowe-1922 kwiNdibano yaBafundi BeBhayibhile eyayiseCedar Point, eOhio, eUnited States. Ngowe-1927, inkonzo yasentsimini yayilungelelaniswe kakuhle kangangokuba usuku lwangeCawa lwalugqalwa njengolona suku lufanelekileyo lokushumayela kwindlu ngendlu. Yintoni eyabangela ukuba kukhethwe olo suku? Kungenxa yokuba inkoliso yabantu yayingaphangeli ngeCawa. Namhlanje amaNgqina kaYehova abonisa umoya ofanayo ngokuzama ukuya ebantwini ngamaxesha abakho ngawo ekhaya, njengeempela-veki namarhatya.
6. Sisiphi isigqibo esamkelwa ngowe-1931 yaye sawuchaphazela njani umsebenzi wokuvakalisa ngoBukumkani?
6 Emva kwemini ngeCawa ngoJulayi 26, 1931, kwabakho ihlombe elikhulu lokuvakalisa ngoBukumkani emva kokuba kwamkelwe isigqibo kwindibano eyayiseColumbus, eOhio, eUnited States, nesathi kamva samkelwa ehlabathini lonke. Inxalenye yesi sigqibo ithi: “Singabakhonzi bakaYehova uThixo abathunywe ukwenza umsebenzi egameni lakhe, yaye, sithobela umthetho wakhe, wokunikela ubungqina ngoYesu Kristu, nokwazisa abantu ukuba uYehova unguThixo oyinyaniso yaye unguSomandla; ngoko ke ngovuyo samkela yaye sithabatha igama elichazwe yiNkosi uThixo, yaye sinqwenela ukwaziwa nokubizwa ngeli gama, lithi, amangqina kaYehova.” (Isaya 43:10) Hayi indlela elo gama litsha elaliwuchaza ngokucace ngayo owona msebenzi uphambili wabo bazibiza ngalo! Ewe, uYehova wayenomsebenzi awayefuna abakhonzi bakhe bawenze. Esi sigqibo samkelwa ngehlombe elikhulu!
7. Luluphi utshintsho olwaqaliswa ngowe-1932 yaye ngoba?
7 Abadala abaninzi bazinikela ngokuzithoba kumsebenzi wokushumayela. Noko ke, kwezinye iindawo, abo babengabadala bayichasa into yokuba wonke umntu ebandleni ufanele abe nenxaxheba kubulungiseleli basesidlangalaleni. Noko ke, kwakuseza kubakho uhlengahlengiso olungakumbi. Ngowe-1932, amabandla afumana umyalelo kwiMboniselo ukuba ayeke ukunyula abadala nabadikoni. Kunoko, ayeza kunyula ikomiti yenkonzo ebunjwa ngamadoda anoxabiso ngezinto zokomoya nanenxaxheba kumsebenzi wokushumayela esidlangalaleni. Ngoko imbopheleleko yokuvelela yanikwa abo babekhuthele kubulungiseleli yaye umsebenzi waqhubela phambili.
Ukukhanya Okwandayo Kubangela Uhlengahlengiso Olungakumbi
8. Luluphi uhlengahlengiso olwenziwa ngowe-1938?
8 Ukukhanya ‘kwakukhanya ngakumbi.’ Ngowe-1938, ukunyulwa kwabadala kwayekiswa ngokupheleleyo. Zonke izicaka zebandla zazimiselwa ngokobuthixo phantsi kolwalathiso ‘lwekhoboka elithembekileyo neliyingqondi.’ (Mateyu 24:45-47) Olu tshintsho lwamkelwa phantse kuwo onke amabandla amaNgqina kaYehova yaye umsebenzi wokunikel’ ubungqina waqhubeka uvelisa isiqhamo.
9. Ngowe-1972, liliphi ilungiselelo elaqaliswayo yaye kutheni oku kwakubonakalisa inkqubela?
9 Ukususela ngo-Oktobha 1, 1972, kwenziwa olunye uhlengahlengiso ngokuphathelele ukuvelela ibandla. Kumabandla amaNgqina kaYehova asehlabathini lonke kwenziwa ilungiselelo lokuba ibe liqumrhu labadala elithabatha ukhokelo kunokuba ibandla libe nesicaka okanye umveleli omnye. Eli lungiselelo litsha liye lawakhuthaza kakhulu amadoda aqolileyo ukuba azabalazele ukufanelekela ukukhokela ebandleni. (1 Timoti 3:1-7) Ngenxa yoko, baninzi abazalwana abaye bafumana amava okunyamekela iimbopheleleko zebandla. Hayi indlela abaye bazingqina beluncedo ngayo ekwaluseni abantu abaninzi abaye bamkela inyaniso yeBhayibhile!
10. Liliphi ilungiselelo elaqaliswa ngowe-1976?
10 Amalungu eQumrhu Elilawulayo ahlulahlulwa aba ziikomiti ezintandathu yaye ukususela ngoJanuwari 1, 1976, wonke umsebenzi wentlangano nowamabandla asemhlabeni wonke waqalisa ukulawulwa zezi komiti. Kuye kwayingenelo ngokwenene ukuba zonke iinkalo zomsebenzi woBukumkani zalathiswe ‘ngabacebisi abaninzi’!—IMizekeliso 15:22; 24:6.
11. Luluphi uhlengahlengiso olwenziwa ngowe-1992 yaye kwakutheni ukuze lwenziwe?
11 Kwabakho olunye uhlengahlengiso ngowe-1992, olufana noko kwenzekayo emva kokubuya kwamaSirayeli nabanye ekuthinjweni eBhabhiloni. Ngelo xesha, abaLevi bokunyamekela inkonzo yasetempileni babembalwa. Ngoko amaNethini awayengengomaSirayeli anikwa umsebenzi ongakumbi wokuncedisa abaLevi. Ngoko ke, ngowe-1992 amanye amalungu ‘ezinye izimvu’ anikwa iimbopheleleko ezongezelelekileyo zenkonzo ukuze ancedise ikhoboka elithembekileyo neliyingqondi ekunyamekeleni iimbopheleleko ezandayo zomsebenzi wasemhlabeni. Amiselwa ukuze ancedise kwiikomiti zeQumrhu Elilawulayo.—Yohane 10:16.
12. UYehova uye walumisela njani uxolo ukuba lube ngabaveleli bethu?
12 Uye waba yintoni umphumo wako konke oku? “Ndiya kumisela uxolo lube ngabaveleli bakho nobulungisa bube ngabaphathi bakho,” utsho uYehova. (Isaya 60:17) Kukho “uxolo” phakathi kwabakhonzi bakaYehova namhlanje yaye ukuthanda ‘ubulungisa’ kuye kwaba “ngabaphathi” babo—amandla abaphembelelayo ukuba bakhonze uThixo. Balungelelaniswe kakuhle ukuze bakwazi ukuphumeza umsebenzi wabo wokushumayela ngoBukumkani nowokwenza abafundi.—Mateyu 24:14; 28:19, 20.
UYehova Ucacisa Iimfundiso Zakhe
13. Ngeminyaka yee-1920, uYehova wabanceda njani abantu bakhe ukuba bacacelwe ziimfundiso zakhe?
13 UYehova uqhubeka ecacisela abantu bakhe iimfundiso zakhe. Umzekelo woku yingxelo ekwiSityhilelo 12:1-9. Kule ngxelo kuthethwa ngezinto ezintathu zokomfuziselo—“umfazi” okhulelweyo aze emva koko azale, “inamba,” ‘nonyana, inkwenkwe.’ Ngaba uyazi ukuba nganye kwezi zinto ifanekisela ntoni? Zacaciswa kwinqaku elalinomxholo othi “Ukuzalwa Kohlanga,” kwinkupho yeMboniselo kaMatshi 1, 1925. Ingxubusho ekweli nqaku yanceda abantu bakaThixo baqonda iziprofeto ezithetha ngokuzalwa koBukumkani, yaye batsho bacacelwa kukuba kukho iintlangano ezimbini ezahlukileyo—intlangano kaYehova nekaSathana. Emva koko ngowe-1927/28, abantu bakaThixo baqonda ukuba ukubhiyozela iKrismesi nemihla yokuzalwa akusekelwanga zibhalweni yaye bayeka ukuzibhiyozela.
14. Ziziphi iimfundiso eziyinyaniso ezacaciswa ngeminyaka yee-1930?
14 Ngeminyaka yee-1930 kwaphinda kwacaciswa ezinye iimfundiso ezintathu eziyinyaniso. Kangangeminyaka, aBafundi BeBhayibhile babesazi ukuba indimbane enkulu okanye “isihlwele esikhulu,” ekuthethwa ngaso kwiSityhilelo 7:9-17 sahlukile kwabali-144 000, abaza kulawula noKristu njengookumkani nababingeleli. (ISityhilelo 5:9, 10; 14:1-5) Noko ke, kwakungacacanga kakuhle ukuba indimbane enkulu ibhekisela koobani. Kanye njengokuba izinto zibonakala kakuhle xa kusiya kukhanya ekuseni, ngowe-1935 kwacaciswa ukuba indimbane enkulu ngabo baya kusinda ‘kwimbandezelo enkulu,’ baze baphile ngonaphakade emhlabeni. Kamva, kwangaloo nyaka kwacaciswa enye into eyachaphazela abantwana besikolo bamaNgqina kaYehova kumazwe amaninzi. Ngoxa kwakugquba umoya wokuthand’ izwe ehlabathini lonke, amaNgqina aphawula ukuba ukukhahlela indwe kunentsingiselo ethile. Ngonyaka olandelayo, kwacaciswa ukuba uKristu wafela esibondeni, kungekhona emnqamlezweni.—IZenzo 10:39.
15. Wabalaseliswa nini yaye njani umbandela wobungcwele begazi?
15 Emva kweMfazwe Yehlabathi II, yayiqhelekile into yokunyanga amajoni enzakeleyo ngokuwatofela igazi, noko ke kwabakho ukukhanya okungakumbi ngokuphathelele ubungcwele begazi. IMboniselo kaJulayi 1, 1945, yakhuthaza “bonke abanquli bakaYehova abazabalazela ukufumana ubomi obungunaphakade kwihlabathi lakhe elitsha lobulungisa ukuba bahlonele ubungcwele begazi baze bavisisanise ubomi babo nolawulo lukaThixo lobulungisa ngokuphathelele lo mbandela ubalulekileyo.”
16. Yakhutshwa nini INguqulelo Yehlabathi Elitsha YeZibhalo Ezingcwele yaye ziziphi izinto ezimbini ebalasele ngazo?
16 Ngowe-1946, kwabonakala kuyimfuneko ukuba kubekho inguqulelo entsha yeBhayibhile yaye kwasetyenziswa abantu abanolwazi nabakhanyiselweyo, ngaloo ndlela le nguqulelo ayizange yonakaliswe ziimfundiso ezisekelwe kumasiko eNgqobhoko. Lo msebenzi wokuguqulela waqaliswa ngoDisemba 1947. Ngowe-1950, kwakhutshwa INguqulelo Yehlabathi Elitsha YeZibhalo ZamaKristu ZesiGrike ngesiNgesi. Ukususela ngowe-1953, kwakhutshwa imiqulu emihlanu elandelelanayo yenguqulelo yesiNgesi yeZibhalo zesiHebhere. Umqulu wokugqibela wakhutshwa ngowe-1960, emva kweminyaka eli-12 kuqaliswe umsebenzi wokuguqulela iBhayibhile. Ngowe-1961, kwakhutshwa INguqulelo Yehlabathi Elitsha YeZibhalo Ezingcwele epheleleyo. Ngoku le nguqulelo ifumaneka ngeelwimi ezininzi yaye kukho izinto ezininzi ebalasele ngazo. Inegama likaThixo, uYehova. Ngapha koko, ukuguqulelwa kwayo ngokwegama negama ukusuka kwimibhalo yamandulo kuye kwabangela ukuba abantu baqhubeke beyiqonda inyaniso kaThixo.
17. Kukuphi ukukhanya okungakumbi okwavela ngowe-1962?
17 Ngowe-1962 kwacaciswa “amagunya awongamileyo” ekuthethwa ngawo kumaRoma 13:1 nokuba amaKristu afanele awathobele ukusa kuwuphi umkhamo. Ukufundisisa ngokunzulu isahluko 13 sencwadi yamaRoma neZibhalo ezifana noTito 3:1, 2, neyoku-1 kaPetros 2:13, 17 kwenza kwacaca ukuba ibinzana elithi “amagunya awongamileyo” alibhekiseli kuYehova uThixo noYesu Kristu koko libhekisela kumagunya karhulumente.
18. Ziziphi ezinye iimfundiso ezacaciswa ngeminyaka yee-1980?
18 Kwiminyaka elandelayo, umendo wamalungisa waqhubeka ukhanya ngokukhanya. Ngowe-1985, kwacaciswa ukuba kuthetha ukuthini ukuvakaliswa kwabantu bengamalungisa “afanelwe bubomi” nokuba lilungisa njengomhlobo kaThixo. (Roma 5:18; Yakobi 2:23) Intsingiselo yeNtlokoma yamaKristu yacaciswa kakuhle ngowe-1987.
19. Kwiminyaka yakutshanje uYehova uye wabakhanyisela njani abantu bakhe ngokomoya?
19 Ngowe-1995, ukwahlulwa ‘kwezimvu’ “ezibhokhweni” kwacaca nangakumbi. Ngowe-1998, kwacaciswa umbono wetempile kaHezekile yaye loo mbono sele uzaliseka. Ngowe-1999, kwacaciswa ukuba iya kuma nini yaye njani ‘into elizothe kwindawo engcwele.’ (Mateyu 24:15, 16; 25:32) Yaye ngowama-2002, kwacaciswa ngokungakumbi ukuba kuthetha ukuthini ukunqula uThixo “ngomoya nenyaniso.”—Yohane 4:24.
20. Luluphi olunye uhlengahlengiso oluye lwenziwa phakathi kwabantu bakaThixo?
20 Ukongezelela kuhlengahlengiso oluye lwenziwa entlanganweni nakwiimfundiso zobuthixo, kuye kwakho nolunye uhlengahlengiso ngokuphathelele ukuziphatha kwamaKristu. Ngokomzekelo, ngowe-1973 ukutshaya kwagqalwa ‘njengokudyobheka kwenyama’ yaye kwakufanele kugqalwe njengesiphoso esinzulu. (2 Korinte 7:1) Kwiminyaka elishumi kamva, IMboniselo kaJulayi 15, 1983 yacacisa indlela esikugqala ngayo ukusetyenziswa kompu. Le yeminye yemizekelo yokwanda kokukhanya kwixesha lethu.
Qhubeka Uhamba Kwindlela Yokukhanya Okwandayo
21. Sisimo sengqondo esinjani esiya kusinceda siqhubeke sihamba kwindlela yokukhanya okwandayo?
21 Omnye umdala onamava uthi: “Kuba nzima ukwamkela uhlengahlengiso.” Yintoni eye yamnceda ukuba amkele izinto ezininzi ekuye kwenziwa uhlengahlengiso kuzo kule minyaka ingama-48 engumvakalisi woBukumkani? Uthi: “Kukuba nesimo sengqondo esifanelekileyo. Xa ubani engalwamkeli uhlengahlengiso uyasala njengoko intlangano ihambela phambili. Xa ndifumanisa kunzima ukuba ndamkele utshintsho oluthile, ndiye ndicinge ngamazwi awathethwa nguPetros kuYesu, athi: ‘Nkosi, siya kumka siye kubani na? Nguwe onamazwi obomi obungunaphakade.’ Ngoko ndiye ndizibuze, ‘Ndiya kumka ndiye phi—ebumnyameni behlabathi?’ Oku kuyandinceda ukuba ndibambelele ngokuqinileyo kwintlangano kaThixo.”—Yohane 6:68.
22. Singenelwa njani ngokuhamba ekukhanyeni?
22 Ngokuqinisekileyo ihlabathi esiphila kulo likwintsunguzi yobumnyama. Njengoko uYehova eqhubeka ekhanyisela abantu bakhe, umsantsa ophakathi kwabo nabantu behlabathi uya uvuleka. Singenelwa njani koku kukhanya? Eneneni, njengoko isibane esiqaqambileyo singawushenxisi umngxuma osendleleni emnyama, ukukhanya kweLizwi likaThixo akuyisusi imigibe esendleleni yethu. Noko ke, ngokuqinisekileyo ukukhanya okuvela kuThixo kuyasinceda siyiphephe loo migibe ukuze siqhubeke sihamba kwindlela yokukhanya okwandayo. Ngoko ke, masiqhubeke sinikela ingqalelo kwilizwi likaYehova lesiprofeto, “njengakwisibane esikhanya kwindawo emnyama.”—2 Petros 1:19.
Ngaba Usakhumbula?
• Luluphi uhlengahlengiso oluye lwenziwa nguYehova kwimibandela ephathelele intlangano?
• Ziziphi iimfundiso ekuye kwenziwa uhlengahlengiso kuzo?
• Luluphi uhlengahlengiso oye walubona yaye yintoni eye yakunceda ukuze ulwamkele?
• Yintoni ebangela ukuba ufune ukuqhubeka uhamba kwindlela yokukhanya okwandayo?
[Imifanekiso ekwiphepha 27]
Kwindibano eyayiseCedar Point, eOhio ngowe-1922, aBafundi BeBhayibhile bahlaziywa ukuba benze umsebenzi kaThixo
[Umfanekiso okwiphepha 29]
“INguqulelo Yehlabathi Elitsha YeZibhalo ZamaKristu ZesiGrike” eyakhutshwa ngowe-1950, nguN. H. Knorr
[Inkcazelo Ngomfanekiso okwiphepha 26]
© 2003 BiblePlaces.com