Ibali Lobomi
Ukwazi Okulungileyo Uze Ukwenze
KUBALISA UHADYN SANDERSON
UYesu wakha wathi kubapostile bakhe: “Ukuba niyazazi ezi zinto, ninoyolo ukuba nithi nizenze.” (Yohane 13:17) Ewe, sinokukwazi okulungileyo, kodwa ingxaki ibe kukukwenza! Noko ke, emva kokuphila iminyaka engaphezu kwama-80, ibe kuloo minyaka engama-40 ndiyichithe kwinkonzo yobuvangeli basemazweni, ndiqinisekile ukuba amazwi kaYesu ayinyaniso. Ukwenza oko uThixo akuthethayo kukhokelela kulonwabo. Makhe ndikuchazele isizathu sokuba nditsho njalo.
NGOWE-1925, xa ndandineminyaka emithathu ubudala, abazali bam baya kuphulaphula intetho yeBhayibhile kwidolophu yakuthi iNewcastle, eOstreliya. Le ntetho yayinomxholo othi, “Izigidi Eziphilayo Ngoku Azisayi Kuze Zife,” yenza umama waqiniseka ukuba uyifumene inyaniso, yaye waqalisa ukuya kwiintlanganiso zamaKristu rhoqo. Noko ke, utata wakhawuleza waphelelwa ngumdla. Waluchasa unqulo lukamama olutsha waza wamsongela ngokuba uza kumshiya ukuba akalulahli. Umama wayemthanda utata ibe wayefuna ukuba sihlale sonke njengentsapho. Sekunjalo, wayesazi ukuba eyona nto ibalulekileyo kukuthobela uThixo, yaye wayezimisele ukwenza oko kulungileyo kuye. (Mateyu 10:34-39) Utata wasishiya ibe emva koko ndandimbona manqaphanqapha.
Xa ndicinga ngokwenzekayo, ndiye ndimothulel’ umnqwazi umama ngokunyaniseka kwakhe kuThixo. Isigqibo sakhe sabangela ukuba mna nodadewethu omdala, uBeulah, sibe nenxaxheba kumsebenzi owanelisayo kunye nebandla likaYehova. Safunda nento ebalulekileyo—xa sisazi okulungileyo, simele sizabalazele ukukwenza.
Iimvavanyo Zokholo
ABafundi beBhayibhile, njengoko amaNgqina kaYehova ayebizwa njalo ngelo xesha, benza umgudu ukunceda intsapho yakowethu. Umakhulu weza kuhlala nathi waze naye wamkela inyaniso yeBhayibhile. Yena nomama babesoloko behamba kunye kumsebenzi wokushumayela, ukundiliseka nokuba nobuhlobo kwabo kwabenza bahlonelwa ngabantu.
Sekunjalo, abazalwana abangamaKristu abakhulileyo bandinyamekela baza bandinika uqeqesho olubalulekileyo. Kungekudala ndafunda ukusebenzisa iqweqwe lokunikela ubungqina ukuze ndinikele intshumayelo elula emakhayeni abantu. Ndandidlala neentetho zeBhayibhile ezirekhodiweyo kwigramafowuni ndize ndibe kumngcelele wabo baphethe iiplacards kwizitalato ezikhulu zedolophu. Oku kwakunzima, ekubeni ndandinengxaki yokoyika abantu. Noko ke, ndandikwazi okulungileyo yaye ndandizimisele ukukwenza.
Emva kokuba ndigqibile esikolweni, ndasebenza ebhankini, nto leyo eyayiquka ukuya kumasebe eebhanki akulo lonke elaseNew South Wales. Nangona ayembalwa amaNgqina kuloo mmandla, uqeqesho endalufumanayo lwandinceda ndahlala ndinokholo olomeleleyo. Umama wayendibhalela iileta ezikhuthazayo ezazindomeleza ngokomoya.
Ezo leta zaba luncedo kanye ngexesha elifanelekileyo. Kwaqalisa iMfazwe Yehlabathi II, yaye ndayalelwa ukuba ndibhalisele ukuya emkhosini. Umphathi webhanki wayenenzondelelo ecaweni yakhe ekwangumphathi womkhosi wasekuhlaleni. Xa ndamxelela ukuba njengomKristu andithabathi cala kwezopolitiko, wasuka wandixelela ukuba mandikhethe phakathi konqulo lwam nomsebenzi. Izinto zaba mbi kakhulu xa ndaya kwindawo ekubhaliswa kuyo abaya emkhosini. Umphathi wam wayekhona yaye wayejonge ngomdla njengoko ndandisiya kwitafile yokubhalisa. Xa ndingazange ndivume ukutyobela amaphepha, amagosa avutha ngumsindo. Kwakunzima, kodwa ndazimisela ukwenza okulungileyo. UYehova wandinceda ndahlala ndizolile ndaze ndabambelela kwisigqibo sam. Xa kamva ndafumanisa ukuba ezinye iindlavini zindifun’ esiqwini, ndingaphozisanga maseko ndapakisha izinto zam ndaya kukhwela uloliwe ndayishiya loo dolophu.
Emva kokubuyela eNewcastle, ndavela phambi kwenkundla yamatyala kunye nabanye abazalwana abasixhenxe abangazange bavume ukuya emkhosini. Ijaji yasigweba iinyanga ezintathu entolongweni sisebenza nzima. Nangona kwakunzima entolongweni, ukwenza okulungileyo kwandizisela iintsikelelo. Emva kokukhululwa kwethu, omnye umzalwana endandivalelwe naye esiseleni, uHilton Wilkinson, wandimema ukuba ndize kumsebenzela kwindawo yakhe yokufota. Apho ndadibana, noMelody, owaba ngumfazi wam, nowayesebenza apho njengomamkeli-zindwendwe. Kungekudala emva kokuba ndikhululwe, ndabhaptizwa ndifuzisela ukuzahlulela kwam kuYehova.
Ukuzibekela Usukelo Lwenkonzo Yexesha Elizeleyo
Emva kokuba sitshatile noMelody, sazivulela indawo yethu yokufota eNewcastle. Kungekudala saba nomsebenzi omninzi kangangokuba wawusiqoba ibe ulwalamano lwethu noYehova lwalusengozini. Kanye ngelo xesha, uTed Jaracz, owayekwiofisi yesebe lamaNgqina kaYehova eOstreliya ngoko nolilungu leQumrhu Elilawulayo ngoku, wathetha nathi ngosukelo lwethu lokomoya. Emva kwaloo ngxubusho naye, sagqiba ekubeni silithengise ishishini lethu size siphile ubomi obulula. Ngowe-1954 sathenga ikharavani encinane, safudukela kwisixeko saseBallarat eVictoria, saza saqalisa ukuba ngoovulindlela, okanye abashumayeli bexesha elizeleyo.
Njengoko sasisebenza nebandla elincinane laseBallarat, uYehova wayisikelela imigudu yethu. Kwiinyanga nje ezili-18, inani labantu abaza kwiintlanganiso laphindaphindeka lisuka kubantu abali-17 laya kutsho kwabangama-70. Emva koko ndafumana isimemo sokuba ngumveleli wesiphaluka, eMzantsi Ostreliya. Kwiminyaka emithathu elandelayo, sasityelela amabandla kwisixeko saseAdelaide nakwimimandla evelisa iwayini neziqhamo zesitrasi ephahle uMlambo iMurray. Oko kwabutshintsha gqitha ubomi bethu! Sasonwabile sikhonza kunye nabazalwana noodade abanothando. Lo yayingumvuzo wokwenene wokwenza oko sasikwazi ukuba kulungile!
Isabelo Sobuvangeli Basemazweni
Ngowe-1958 saxelela iofisi yesebe laseOstreliya ukuba sifuna ukuya kwiNdibano YeZizwe Ngezizwe ‘Yokuthanda KukaThixo’ kwisiXeko saseNew York ekupheleni kwaloo nyaka. Yasiphendula ngokusithumelela iifomu zesikolo saseGiliyadi sabavangeli basemazweni esiseUnited States. Ekubeni sasisele siyigabhule iminyaka engama-30 ubudala, sasicinga ukuba sele sibadala kakhulu ukuba singaya eGiliyadi. Sekunjalo, sayithumela ifomu yethu ibe sabizelwa kwiklasi yama-32. Sathi sisephakathi kwezo zifundo zethu, safumana isabelo sobuvangeli basemazweni—eIndiya! Nangona ekuqaleni sasixhalabile, sasifuna ukwenza okulungileyo ibe sasamkela isabelo sethu.
Ngenye intseni, ngowe-1959, safika eBombay (ngoku eyiMumbai) sihamba ngenqanawa. Amakhulu abasebenzi ayelele ngaphandle ezibukweni. Kwakunuka nje ivumba elingaqhelekanga. Ekuphumeni kwelanga, seva indlela esasiza kutshiswa ngayo lilanga. Kaloku sasingekaze sabuva ubushushu obungako ngaphambili! Samkelwa sisibini esingabavangeli basemazweni, uLynton noJenny Dower, ababengoovulindlela nathi eBallarat. Basisa kwiofisi yesebe neliKhaya leBheteli yaseIndiya, kwisakhiwo esincinane esinemigangatho emibini kufuphi nombindi wesixeko. Apho kwakuhlala abasebenzi baseBheteli abathandathu. UMzalwan’ uEdwin Skinner, owayengumvangeli wasemazweni eIndiya ukususela ngowe-1926, wasicebisa ukuba sithenge iisutikheyisi ezimbini ezinkulu ngaphambi kokuba siye kwisabelo sethu. Kwakuqhelekile ukubona abantu bephethe zona koololiwe baseIndiya yaye zasinceda kakhulu kumsebenzi wokuhambahamba esawenzayo kamva.
Emva kokuhamba ngololiwe iintsuku ezimbini, safika kwindawo esasithunyelwe kuyo iTiruchchirappalli, isixeko esikumazantsi eMadras (ngoku eyiTamil Nadu). Apho sasebenza kunye noovulindlela abakhethekileyo abathathu ababeshumayela kubantu abangama-250 000. Apho abantu babesokola kuphilwa ubomi obuphantsi. Ngesinye isihlandlo sasinemali engaphantsi kwee-R26 kuphela. Kodwa xa loo mali yaphelayo, uYehova akazange asishiye. Omnye umntu esasifunda naye iBhayibhile wasiboleka imali yokuhlawula irente yendawo efanelekileyo yokuqhubela iintlanganiso. Ngesinye isihlandlo xa ukutya kwethu kwakushokoxekile, ngobubele omnye ummelwane wasiphathela ukutya okuphekwe ngekheri. Ndandikuthanda oko kutya, kodwa kwakuqhwetha gqitha kangangokuba kwandenza ndakhutywa!
Entsimini
Nangona babekho abantu abathetha isiNgesi eTiruchchirappalli, abaninzi babethetha isiTamil. Ngoko ke, senza umgudu wokufunda ukushumayela ngolo lwimi. Abemi balapho abaninzi bakuxabisa gqitha oko.
Sasikuthanda gqitha ukushumayela kwindlu ngendlu. AmaIndiya ngabantu abanobubele, yaye abaninzi babesimema ukuze sifumane okusiwa phantsi kwempumlo. Ekubeni iqondo lobushushu lalidla ngokuba ngama-40 ngokukaCelsius, sasibuxabisa gqitha ububele babo. Ngaphambi kokuchaza isigidimi sethu, kwakufuneka siqale sincokole sichaze imvelaphi. Abaninimzi babedla ngokusibuza oku nenkosikazi yam: “Nivela phi? Ninabo abantwana? Kutheni ningenabo nje?” Babedla ngokusixelela ukuba bangasithumela kugqirha onokusinceda! Ezo ncoko zazisinika ithuba lokuba sizazise size sichaze nokubaluleka komsebenzi wethu wokufundisa abantu iBhayibhile.
Abantu abaninzi esasishumayela kubo babengamaHindu—unqulo oluneenkolelo ezahlukileyo kubuKristu. Kunokuba sibe sixubusha ngeemfundiso zamaHindu ezintsonkothileyo, sasishumayela iindaba ezilungileyo zoBukumkani bukaThixo—ibe oko kwakusiba nemiphumo emihle. Kwiinyanga nje ezintandathu, baba malunga nama-20 abantu ababesiza kwiintlanganiso ezaziqhutywa kwikhaya lethu labavangeli basemazweni. Omnye wabo babesiza yayiyinjineli yokwakha uNallathambi. Yena nonyana wakhe, uVijayalayan, kamva banceda abantu abamalunga nama-50 bakhonza uYehova. UVijayalayan waya kusebenza nakwisebe laseIndiya okwexesha elithile.
Ukuhlala Sisendleleni
Sasineenyanga ezingaphantsi kwezintandathu eIndiya xa ndacelwa ukuba ndibe ngumveleli wesithili osisigxina kwelo lizwe. Oku kwakuquka ukuhamba lonke elaseIndiya, ndilungiselela iindibano futhi ndisebenza namaqela awahlukahlukeneyo athetha iilwimi ezisithoba. Lo msebenzi wawungeyondlwan’ iyanetha. Sapakisha iimpahla zethu nezinye izinto esiza kuzisebenzisa ebudeni beenyanga ezintandathu kwiitranki ezintathu nakwiisutikheyisi ezinkulu ezimbini saza sahamba ngololiwe ukusuka kwisixeko saseMadras (ngoku eyiChennai). Ekubeni esi sithili sasigubungela ummandla oziikhilomitha ezimalunga nama-6 500, sasisoloko sisendleleni. Ngesinye isihlandlo, saqukumbela indibano emazantsi esixeko saseBangalore ngeCawa. Emva koko sasinga emantla eDarjeeling phantsi kweentaba zeHimalaya sisiya kuqhuba enye indibano kwiveki elandelayo. Uhambo lokuya eDarjeeling lwaluthabatha iikhilomitha ezingama-2 700 yaye kwafuneka sihambe ngoololiwe abahlanu abahlukahlukeneyo.
Kumsebenzi wethu wokuhambahamba sasikunandipha ukubonisa imifanekiso eshukumayo ethi The New World Society in Action. Le mifanekiso yanceda abantu baqhelana nomsebenzi wokushumayela owenziwa ngabakhonzi bakaYehova ehlabathini lonke. Kwakudla ngokuza amakhulukhulu abantu kule miboniso. Ngesinye isihlandlo, sasibukelise elinye iqela labantu ababesecaleni kwendlela. Ngoxa le mifanekiso yayidlala, kwabakho amafu kwaza kwabangathi kuza kubakho uqhwithela. Ekubeni ngesinye isihlandlo esinye isihlwele sabantu sakhe senza isiphithiphithi xa le mifanekiso yacima sisabukele, ndagqiba kwelokuba ndiyiyeke iqhubeke idlala kodwa ndiyibonise ngokukhawuleza. Okuvuyisayo kukuba, le mifanekiso yabukelwa yagqitywa ngaphandle kokuphazamiseka emva koko kwaqalisa ukuchaphaza.
Kwiminyaka elandelayo, mna noMelody satyelela iindawo ezininzi zaseIndiya. Ekubeni mmandla ngamnye unokutya okwahlukileyo, abantu abanxiba ngendlela eyahlukileyo, iilwimi ezingafaniyo neendawo ezintle ngokwahlukileyo, kwakubangathi sisuka kwelinye elizwe siye kwelinye. Ngokwenene indalo kaYehova inezinto ezintle ezahlukahlukeneyo! Oku kunjalo nakwizilwanyana zaseIndiya. Ngesinye isihlandlo, xa sasimise intente kwihlathi eliseNepal, sabona ingwe enkulu entle. Ukuyibona komeleza umnqweno wethu wokuphila eParadesi, apho ekugqibeleni kuya kubakho uxolo phakathi kwabantu nezilwanyana.
Ukunceda Amabandla Ahambisane Nentlangano
Ngaloo minyaka, abazalwana eIndiya babemele bancedwe balandele ngokusondeleyo ulwalathiso lwentlangano kaYehova. Kwamanye amabandla, amadoda ayehlala kwelinye icala aze amabhinqa ahlale kwelinye. Iintlanganiso zazingafane ziqale ngexesha. Kwenye ilokishi, kwakukhaliswa intsimbi ukubiza abavakalisi boBukumkani beze kwiintlanganiso. Kwezinye iindawo, abavakalisi babejonga ixesha elangeni aze mvakalisi ngamnye afike ngexesha acinga ukuba iintlanganiso zimele ziqale ngalo. Iindibano notyelelo lwabaveleli abahambahambayo zazingabikho rhoqo. Abazalwana babekulungele ukwenza okufanelekileyo kodwa babefanele baqeqeshwe.
Ngowe-1959, intlangano kaYehova yaseka iSikolo Sobulungiseleli SoBukumkani. Olu qeqesho lwalusenziwa ehlabathini lonke lwanceda abaveleli beziphaluka, oovulindlela abakhethekileyo, abavangeli basemazweni nabadala bamabandla ukuba bayifeze ngempumelelo imbopheleleko yabo. Xa esi sikolo saqalisa eIndiya ngoDisemba 1961, ndaba ngumhlohli. Ngokuthe ngcembe, uqeqesho lweso sikolo lwaba yinzuzo kumabandla akwelo lizwe yaye enza inkqubela ngokukhawuleza. Bakuba abazalwana beyazile indlela efanelekileyo yokwenza izinto, umoya kaThixo wabakhuthaza ukuba bayenze.
Iindibano ezinkulu nazo zakhuthaza zaza zamanyanisa abazalwana. Eyona ibalaseleyo kwezo ndibano yiNdibano Yezizwe Ngezizwe ‘Yeendaba Ezilungileyo Ezingunaphakade’ eyayiseNew Delhi ngowe-1963. AmaNgqina asuka kulo lonke elaseIndiya ahamba amawaka eekhilomitha ukuya kuloo ndibano, abaninzi besebenzisa imali yabo yonke. Ekubeni kwakukho iindwendwe ezingama-583 ezivela kumazwe angama-27, yayisisihlandlo sokuqala ukuba amaNgqina asekuhlaleni ahlanganisane kunye nabazalwana abatyeleleyo abaninzi.
Ngowe-1961, mna noMelody samenywa ukuba sibe yinxalenye yentsapho yaseBheteli yaseBombay, apho kamva ndaba lilungu leKomiti yeSebe. Emva koko kwalandela ezinye izabelo. Kangangeminyaka emininzi, ndaba ngumveleli wamasebe kwimimandla eseAsia nakuMbindi Mpuma. Ekubeni kwinkoliso yala mazwe umsebenzi wokushumayela wawubekelwe imiqathango, abavakalisi babefanele ‘balumke njengeenyoka ukanti babe msulwa njengamahobe.’—Mateyu 10:16.
Ulwando Neenguqu
Xa sasifika eIndiya, ngowe-1959, kwakukho abavakalisi abakhutheleyo abali-1 514. Namhlanje elo nani lande laya kufikelela ngaphezu kwama-24 000. Ukuze kunyanyekelwe olu lwando, safuduka izihlandlo ezibini kwiBheteli entsha eBombay okanye kufuphi nakhona. NgoMatshi 2002, intsapho yaseBheteli yaphinda yafuduka—ngesi sihlandlo ifudukela kwisakhiwo esitsha esikufuphi naseBangalore, kumazantsi eIndiya. Esi sisakhiwo sezi mini esihlala amalungu aseBheteli angama-240, amanye awo aguqulela iincwadi ezisekelwe eBhayibhileni kwiilwimi ezingama-20.
Nangona mna noMelody sasikulindele ngolangazelelo ukufudukela eBangalore, impilo enkenenkene yasinyanzela ukuba sibuyele eOstreliya ngowe-1999. Ngoku singamalungu entsapho yaseBheteli eSydney. Nangona sayishiyayo i-Indiya, sisabathanda ngokwenene abahlobo nabantwana bethu bokomoya abalapho. Kuvuyisa gqitha ukufumana iileta ezivela kubo!
Xa sijonga emva kwiminyaka engaphezu kwama-50 yenkonzo yexesha elizeleyo, mna noMelody siziva sisikeleleke gqitha. Ngaphambili, sasifota abantu ngaloo ndlela silondoloza imifanekiso yabo ephepheni, kodwa ukulondoloza abantu bephila kwinkumbulo kaThixo lolona khetho luhle. Isigqibo sethu sokubeka uThixo kuqala ebomini bethu, siye sasenza sanamava angenakuthelekiswa nanto! Ngokwenene, ukwenza oko uThixo athi kulungile kubangela ulonwabo!
[Iimaphu ezikwiphepha 15]
(Ukuba ufuna inkcazelo ehlahlelwe kakuhle, yiya kwimpapasho)
INDIA
New Delhi
Darjeeling
Bombay (Mumbai)
Bangalore
Madras (Chennai)
Tiruchchirappalli
[Imifanekiso ekwiphepha 13]
UHadyn noMelody ngowe-1942
[Umfanekiso okwiphepha 16]
Intsapho yaseBheteli eIndiya, ngowe-1975