Imibuzo Evela Kubafundi

Wayethetha ukuthini umpostile uPawulos xa wayesithi abafazi “mabathi cwaka emabandleni”?

UPawulos wabhalela ibandla lamaKristu laseKorinte wathi: “Njengakuwo onke amabandla abo bangcwele, abafazi mabathi cwaka emabandleni, kuba akuvumelekanga ngabo ukuba bathethe.” (1 Korinte 14:33, 34) Ukuze siyiqonde kakuhle le nyewe, kuya kuba kuhle ukuba sikhe sisihle amahlongowane sifune umongo waso esi siluleko sikaPawulos.

Kweyoku-1 kwabaseKorinte isahluko 14, uPawulos wayexubusha imibandela ephathelele iintlanganiso zebandla lamaKristu. Wachaza izinto ekufanele kuxutyushwe ngazo kwezo ntlanganiso waze wachaza nendlela ezifanele ziqhutywe ngayo. (1 Korinte 14:1-6, 26-34) Ukongeza apho, wabethelela injongo yeentlanganiso zamaKristu—‘yokuba kwakheke ibandla.’—1 Korinte 14:4, 5, 12, 26.

Umyalelo kaPawulos wokuba “bathi cwaka” uvela izihlandlo ezithathu kweyoku-1 kwabaseKorinte isahluko 14. Sihlandlo ngasinye, wayewujolisa kwiqela elahlukileyo ebandleni, kodwa kuzo zonke ezi meko, isizathu siyafana—sikukuba “zonke izinto mazenzeke ngokundilisekileyo nangolungelelwano.”—1 Korinte 14:40.

Okokuqala uPawulos wathi: “Ukuba kukho abathetha ngeelwimi, mababe babini okanye bangagqithi esithathwini, yaye mabalandelelane; aze ke omnye aguqulele. Kodwa ukuba akukho mguquleli, makathi cwaka ebandleni aze azithethele noThixo ngaphakathi.” (1 Korinte 14:27, 28) Oko kwakungathethi ukuba loo mntu wayengenakuze athethe kwiintlanganiso kodwa kwakukho amaxesha awayefanele athule ngawo. Ngapha koko, injongo yeentlanganiso—yokwakhana—yayingayi kuphunyezwa xa ethetha ulwimi olungaqondwayo.

Okwesibini, uPawulos wathi: “Makuthethe abaprofeti ababini okanye abathathu, abanye ke bona betyise loo nto ithethwayo. Kodwa ukuba omnye unesityhilelo ngoxa ehleli apho, owokuqala makathi cwaka.” Oku kwakungathethi ukuba, umprofeti wokuqala wayengazukuthetha ezintlanganisweni, kunoko wayeza kuthula ngamaxesha athile. Aze lowo ufumene isityhilelo athethe nebandla, kwaye injongo yentlanganiso—yokuba “bonke bakhuthazeke”—yayiza kuphunyezwa.—1 Korinte 14:26, 29-31.

Okwesithathu, uPawulos wayebhekisa kubafazi abangamaKristu kuphela, xa weyesithi: “Abafazi mabathi cwaka emabandleni, kuba akuvumelekanga ngabo ukuba bathethe, kodwa mabathobele.” (1 Korinte 14:34) Kwakutheni ukuze uPawulos abayalele njalo oodade? Injongo yayikukugcina ulungelelwano ebandleni. Uthi: “Ukuba, ngoko, bafuna ukufunda okuthile, mababuze awabo amadoda ekhaya, kuba kulihlazo ngomfazi ukuthetha ebandleni.”—1 Korinte 14:35.

Mhlawumbi abanye oodade babebangela uxambuliswano ngezinto ezazifundiswa ebandleni. Isiluleko sikaPawulos sabanceda oodade bohlukana naloo moya wokungalungelelani baza ngokuthobeka bayiqonda indawo yabo kwilungiselelo likaYehova lobuntloko, ngokukodwa mayela nabayeni babo. (1 Korinte 11:3) Ukongezelela koko, xa bethe cwaka, oodade babeya kubonisa elubala ukuba abazami kufundisa ibandla. Xa wayebhalela uTimoti, uPawulos wabonisa ukuba yayingayi kufaneleka into yokuba umntu obhinqileyo afune ukufundisa ibandla: “Andimvumeli umfazi ukuba afundise, okanye asebenzise igunya endodeni, kodwa makathi cwaka.”—1 Timoti 2:12.

Ngaba oko kuthetha ukuba ibhinqa elingumKristu limele lithule life kwiintlanganiso? Akunjalo. Ngexesha likaPawulos, amabhinqa angamaKristu ayekhe athi, mhlawumbi eqhutywa ngumoya oyingcwele athandaze okanye aprofete ebandleni. Kwezo zihlandlo ayebonisa intlonelo ngokuthwala entloko.a (1 Korinte 11:5) Ukongezelela koko, kumhla kaPawulos nanamhlanje, oodade nabazalwana babongozwa ukuba bachazele abanye ngethemba labo. (Hebhere 10:23-25) Ngaphandle kokuba beshumayela entsimini, oodade bavakalisa ithemba labo baze bakhuthaze abanye kwiintlanganiso zebandla ngokunikela iimpendulo ezilungiselelwe kakuhle xa becelwa ukuba benjenjalo nangokusingatha izabelo kwimiboniso okanye kwiintetho zabafundi.

Ngoko ke, amabhinqa angamaKristu ‘athi cwaka’ ngokungazami ukuthabathela kuwo iimbopheleleko zamadoda kuba efuna ukufundisa ebandleni. Awabuzi mibuzo evus’ umnyele nenokucel’ umngeni igunya labo bafundisa ibandla. Xa bephumeza indima yabo efanelekileyo ebandleni, oodade abangamaKristu baba negalelo ekudaleni uxolo ekuthi ngenxa yalo ‘zonke izinto [kwiintlanganiso zebandla] zenzelwe ukwakhana.’—1 Korinte 14:26, 33.

[Umbhalo osemazantsi]