Unokuzenza Njani Izigqibo Ngendlela Evisisana Nokuthanda KukaThixo?
INDODA ethile eUnited States yaya ebhankini iphethe itsheki yee-$25 000 (R163 000). Yayizimisele ukuyifaka le mali ebhankini ize iyisebenzise emva kwexesha elithile. Noko ke, umcebisi wabantu ebhankini wayicebisa ukuba ityale le mali kwizahlulo zamashishini, esithi ekugqibeleni iya kufumana inzala yayo. Le ndoda yagqiba ekubeni ilamkele eli cebiso. Kungekudala emva koko, ixabiso lemali yayo lehla.
Oko kwenzeka kule ndoda kubonisa ukuba akulula ukwenza izigqibo zobulumko. Kuthekani ngezinye izigqibo ezahlukahlukeneyo ekufuneka sizenze ebomini. Izigqibo ezininzi zinokuphumelela okanye zisilele—yaye zisenokuthetha ubomi okanye ukufa. Ngoko, sinokuqiniseka njani ukuba senza izigqibo zobulumko?
“Nantsi Indlela”
Suku ngalunye, senza isigqibo ngento esiza kuyitya, ngento esiza kuyinxiba, ngendawo esiza kuya kuyo, nezinye izinto. Ezinye izigqibo zisenokubonakala zingenamsebenzi, kodwa zisenokuba nemiphumo emibi. Ngokomzekelo, ukuqalisa ukutshaya kusenokukhokelela ekubeni ube likhoboka lecuba. Asifanele sikuthabathe lula ukubaluleka kokwenza izigqibo nakwizinto ezisenokubonakala zincinane.
Sinokulufumana phi ukhokelo xa sisenza izigqibo, kwanangezinto ezisenokubonakala zingenamsebenzi? Hay’ indlela ebesiya konwaba ngayo ukuba besinokufumana umntu esimthembileyo, onokusicebisa xa kufuneka senze izigqibo ezinzima! Unokumfumana umntu onjalo. Incwadi yamandulo esinokuyisebenzisa nakumhla wethu ithi: “Neendlebe zakho ziya kuva ilizwi emva kwakho lisithi: ‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.” (Isaya 30:21) Ngubani lo uthetha la mazwi? Yaye unokuqiniseka njani ukuba unokuthembela kukhokelo lwakhe?
Esi siqinisekiso singasentla sifumaneka eBhayibhileni, yaye abantu abaninzi baye bayifunda baza baqonda ukuba iphefumlelwe nguYehova uThixo uMdali. (2 Timoti 3:16, 17) UYehova uyayazi indlela esidalwe ngayo, ngoko ke ngoyena mntu unokusikhokela ngendlela efanelekileyo. Kwakhona ukubona kusengaphambili okuza kwenzeka, ekubeni ‘enguLowo uxela ukuphela kwasekuqaleni, kwakudala izinto ebezingekenziwa; Lowo uthi, “Icebo lam liya kuma.”’ (Isaya 46:10) Le yindlela umdumisi awabonisa ngayo intembelo yakhe kwiLizwi likaYehova: “Ilizwi lakho lisisibane elunyaweni lwam, nokukhanya endleleni yam.” (INdumiso 119:105) UYehova usikhokela njani kweli hlabathi lizikayo lanamhlanje? Sinokuzenza njani izigqibo ngokuvisisana nokuthanda kukaThixo?
Sebenzisa Imigaqo EseBhayibhileni
UYehova uThixo unike amaKristu imigaqo ukuze enze izigqibo ezifanelekileyo. Ukufunda imigaqo eseBhayibhileni nokuyisebenzisa kufana nokufunda olunye ulwimi uze uluthethe. Xa sele ulwazi kakuhle olo lwimi, unokuva xa ubani esaphula imigaqo yolo lwimi. Usenokungayazi kanye kanye ukuba yintoni le angayithethanga kakuhle, kodwa uya kuva ukuba ikho into engavakaliyo. Xa ufunde imigaqo eseBhayibhileni waza wayisebenzisa ebomini bakho, uya kuqonda xa wenze isigqibo esingafanelekanga.
Ngokomzekelo, cinga ngomfana ekusenokufuneka akhethe indlela afanele azilungise ngayo iinwele zakhe. Akukho mgaqo ukhethekileyo eBhayibhileni ogxeka indlela ethile yokulungisa iinwele. Kodwa, hlolisisa eminye imigaqo eseBhayibhileni. Umpostile uPawulos wabhala: “Ndinqwenela ukuba abafazi bazihombise ngesinxibo esilungiswe kakuhle, ngokuthozama nangengqondo ephilileyo, kungekhona ngezimbo zokulukwa kweenwele nokunxitywa kwegolide neeperile nezambatho zeendleko ezinkulu, kodwa ngendlela efanele abafazi abazibanga behlonela uThixo, oko kukuthi, ngemisebenzi elungileyo.” (1 Timoti 2:9, 10) Apha uPawulos uthetha ngamabhinqa, kodwa lo mgaqo uyasebenza nasemadodeni. Nguwuphi lo mgaqo? Indlela esikhangeleka ngayo ifanele ibonise ukuba sithozamile yaye sinengqondo ephilileyo. Ngoko ke, lo mfana usenokuzibuza, ‘Ngaba indlela endizilungise ngayo iinwele zam ibonisa ukuthozama okufanele kuboniswe ngamaKristu?’
Yaye nguwuphi umgaqo onokunceda umntu oselula ofumaneka kumazwi alandelayo omfundi uYakobi? “Bakrexezikazindini, anazi na ukuba ubuhlobo kunye nehlabathi bubutshaba kunye noThixo? Nabani na, ke ngoko, ofuna ukuba ngumhlobo wehlabathi uzenza utshaba lukaThixo.” (Yakobi 4:4) AmaKristu ayakucekisa ukuba ngabahlobo nehlabathi, kuba xa esenjenjalo aba ziintshaba zikaThixo. Ngaba indlela oontanga bakhe abazilungisa ngayo iinwele zabo imenza abe ngumhlobo kaThixo okanye abe ngumhlobo wehlabathi? Lo mfana ezibuza indlela afanele azilungise ngayo iinwele zakhe, unokusebenzisa imigaqo enjengale esekelwe eBhayibhileni ukuze enze isigqibo esifanelekileyo. Ewe, imigaqo yobuthixo isinceda senze izigqibo. Yaye xa siziqhelisa ukusebenzisa imigaqo eseBhayibhileni xa sisenza izigqibo, kuba lula ukuba senze izigqibo zobulumko esingayi kuzisola ngazo.
Sinokufumana imigaqo emininzi eLizwini likaThixo. Kakade ke, sisenokungawufumani umbhalo othetha ngokukhethekileyo ngemeko yethu. Sekunjalo, sinokufunda ngendlela abanye abantu abaluthobela ngayo ulwalathiso lobuthixo nendlela abanye abaye bazityeshela ngayo izilumkiso zikaThixo. (Genesis 4:6, 7, 13-16; Duteronomi 30:15-20; 1 Korinte 10:11) Ukufunda iingxelo ezinjalo nokubona imiphumo yokuthobela okanye yokutyeshela ulwalathiso, sinokuqonda ukuba imigaqo kaThixo inokusinceda ukuba senze izigqibo ezikholisa uThixo.
Umzekelo woku yincoko emfutshane kaYesu nompostile uPetros. Indoda eyayiqokelela iidrarhma ezimbini zerhafu yabuza uPetros: “Umfundisi wenu akazihlawuli na iidrarhma ezimbini zerhafu?” UPetros waphendula: “Ewe.” Kamsinya nje emva koko, uYesu wabuza uPetros: “Ookumkani bomhlaba bazifumana kubani iimfanelo okanye irhafu yentloko? Koonyana babo okanye kwabasemzini?” Xa uPetros wathi: “Kwabasemzini,” uYesu wathi kuye: “Ngokwenene, ke ngoko, oonyana bakhululekile kwirhafu. Kodwa ukuze singabakhubekisi, yiya elwandle, uphose igwegwe lokuloba iintlanzi, uze uthabathe intlanzi ethe yavela kuqala, yaye xa uvula umlomo wayo, uya kufumana ingqekembe yestateri. Yithabathe uze ubanike yona uhlawulele mna nawe.” (Mateyu 17:24-27) Nguwuphi umgaqo esiwufumanayo kule ngxelo?
Ngokubuza uthotho lwemibuzo, uYesu wanceda uPetros waqonda ukuba ekubeni enguNyana kaThixo, uYesu wayengayihlawuli irhafu. Nangona uPetros ekuqaleni wayengazange ayifumane ingongoma, ngobubele uYesu wamnceda wayifumana. Xa abanye besenza impazamo, masixelise uYesu sibaphathe kakuhle kunokuba sinikel’ ingqalelo kwiimpazamo zabo.
Ngoko, uPetros wasibona isizathu sokuba kufuneke ahlawule irhafu yentloko—kukuze angabakhubekisi abanye. Nanku omnye umgaqo esinokuwufunda kule ngxelo. Ukucingela isazela sabanye kubalulekile kunokwenza izinto kuba sinelungelo lokuzenza.
Yintoni esikhuthaza ukuba senze izigqibo eziya kubonisa ukuba siyazihlonela izazela zabanye? Kukuthanda abamelwane bethu. UYesu Kristu wafundisa ukuba ukuthanda abamelwane bethu njengokuba sizithanda ngumthetho obalulekileyo olandela lowo wokuthanda uThixo. (Mateyu 22:39) Noko ke, siphila kwihlabathi elizingcayo, yaye kuba singafezekanga sisenokuba nomoya wokuzingca. Ngoko ke, ukuthanda ummelwane njengokuba uzithanda, kufuna ukuba ubani aguqule indlela acinga ngayo.—Roma 12:2.
Abantu abaninzi baye batshintsha baza basihlonela isazela sabanye xa besenza izigqibo, enoba zizigqibo ezinzulu okanye zizinto nje ezingenamsebenzi. UPawulos wabhala: “Kambe ke, nabizelwa enkululekweni, bazalwana; kuphela nje musani ukuyisebenzisa le nkululeko ukuvulela inyama ithuba, kodwa khonzanani ngokuqhutywa luthando.” (Galati 5:13) Sinokukwenza njani oku? Cinga ngentwazana eyafudukela ezilalini ukuze incede abantu ukuba bafunde iLizwi likaThixo. Njengokuba yayishumayela, yaphawula ukuba iimpahla zayo, nangona zazindilisekile ngokwendlela ekunxitywa ngayo ezidolophini, abantu babengathethi kakuhle ngendlela eyayinxiba ngayo. Nakuba yayinxiba yaye izilungisa ngendlela endilisekileyo, yagqiba ekubeni inxibe iimpahla ezingekho sefashonini “ukuze ilizwi likaThixo lingatshabhiswa.”—Tito 2:5.
Ukuba wawukuloo ndawo, ngaba ngewawusabele ngendlela efanayo ngendlela ozilungisa ngayo okanye ngeminye imibandela yobuqu? Qiniseka ukuba uYehova ngewayekholisiwe nguwe xa wawenze isigqibo esibonisa ukuba usixhalabele isazela sabanye.
Yiba Nembono Ephangaleleyo
Ngaphandle kwemigaqo yeBhayibhile nesazela sabanye, yintoni esifanele sicinge ngayo xa sisenza izigqibo? Nangona indlela yamaKristu iyimixawuka yaye imxinwa, uThixo usinike inkululeko. (Mateyu 7:13, 14) Kufuneka sicinge indlela izigqibo zethu eziya kusichaphazela ngayo ngokomoya, ngokwasengqondweni, ngokweemvakalelo nangokwasempilweni.
Mhlawumbi ubucinga ngokuphangela. Mhlawumbi akukho nto iphosakeleyo ngendlela oyiyo lo msebenzi. Uza kukwazi ukuya kwiintlanganiso nakwiindibano. Lo msebenzi uhlawula imali engaphaya kwaleyo ubuyilindele. Umqeshi wakho uyabuxabisa kakhulu ubugcisa onabo yaye ufuna ukubusebenzisa. Ngaphezu koko, uyawuthanda umsebenzi wakho. Ngaba kufanele kubekho into ekuthintelayo ukuba uwamkele loo msebenzi? Noko ke, kuthekani ukuba uphawula into yokuba uza kuzinikela kakhulu kulo msebenzi. Uyaxelelwa ukuba akusayi kunyanzelwa ukuba usebenze ixesha elongezelelekileyo. Kodwa ukuze uwugqibe umsebenzi othile, ngaba uza kuzibhokoxa ngaphezu kokuba kuyimfuneko? Ngaba uza kusoloko usebenza ixesha elongezelelekileyo? Ngaba oko kuza kukwenza ungahlali nentsapho yakho kuze ekugqibeleni kukwenze uphoswe zizinto zokomoya nto leyo engafanele yenzeke?
Makhe sihlolisise isigqibo uJim awasenzayo ngomsebenzi wakhe. Wayezibhokoxa gqitha emsebenzini ukuze afumane isikhundla esiphezulu. Ekugqibeleni waba ngumphathi wale nkampani kwiOrient, waba ligosa eliyintloko neliphetheyo eUnited States, waza wasebenza njengelungu lequmrhu labalathisi eYurophu. Noko ke, xa imeko yezoqoqosho yajongisa umetyiso ezantsi eJapan, wayiqonda indlela ekulilize ngayo ukusukela imali negunya. Imali awasebenza nzima ukuze ayifumane yakhawuleza yaphela. Wayevakalelwa kukuba uphila ubomi obungenanjongo. Wazibuza: ‘Ndiza kube ndisenza ntoni kwiminyaka elishumi ezayo?’ Wandula ke waphawula ukuba inkosikazi nabantwana bakhe babephila ubomi obunenjongo. Ukutyhubela iminyaka, bebenxulumana namaNgqina kaYehova. UJim naye wafuna ukuphila ubomi obunenjongo. Ngoko ke, waqalisa ukufunda iBhayibhile.
Kungekudala uJim waphawula ukuba indlela awayephila ngayo yayimphazamisa ekuphileni ubomi obunenjongo njengomKristu. Njengokuba ngalo lonk’ ixesha wayehamba eAsia, eUnited States naseYurophu, wayengenalo ixesha elaneleyo lokufunda iBhayibhile nelokunxulumana nabazalwana. Wazibuza: ‘Ngaba ndiza kuphila ubomi ebendikade ndibuphila kwiminyaka engama-50 edluleyo, okanye ndiza kuba nendlela entsha yokuphila?’ Emva kokuba ethethe noYehova ngalo mbandela waza wacingisisa ngemiphumo yexesha elide yesigqibo sakhe, wagqiba kwelokuba ayiyeke yonke eminye imisebenzi ashiye nje omnye ukuze afumane ixesha lezinto zokomoya. (1 Timoti 6:6-8) Isigqibo awasenzayo samvuyisa, samnika ithuba lokuba axakeke yimisebenzi yobuKristu.
Ukwenza izigqibo kubalulekile enoba zizigqibo ezinzulu okanye ezingenamsebenzi. Isigqibo osenzayo namhlanje sinokukwenza uphumelele okanye usilele, sisenokuthetha ukuphila okanye ukufa kwixesha elizayo. Unokwenza izigqibo zobulumko ukuba ucinga ngemigaqo yeBhayibhile, ngezazela zabanye, nemiphumo yezenzo zakho. Izigqibo ozenzayo mazivisisane nokuthanda kukaThixo.
[Umfanekiso okwiphepha 13]
Izigqibo ezibonakala zingenamsebenzi zinokuba nemiphumo ebuhlungu
[Umfanekiso okwiphepha 14]
Imigaqo yeBhayibhile inokumnceda njani ukuba enze izigqibo zobulumko?
[Umfanekiso okwiphepha 15]
UYesu wayenolwazelelelo xa wayethetha noPetros