“Simele Sithobele UThixo Njengomlawuli Kunabantu”

“LelikaYehova Idabi”

MACALA omabini entlambo imikhosi emibini esukuzanayo ijamelene ngezikhondo zamehlo. Iintsuku ezingama-40 amadoda akwaSirayeli aphelile kukoyika njengoko egculelwa nguGoliyati, ikroti lomphumi-mkhosi elingumFilisti.—1 Samuweli 17:1-4, 16.

Ngelizwi elikhulu uGoliyati ufun’ undikho kumaSirayeli esithi: “Zinyuleleni indoda, ihle ize kum. Ukuba ithe yakwazi ukulwa nam ize indixabele, simele ke sibe ngabakhonzi kuni. Kodwa ukuba mna ndithe ndayilingana ndaza ndayixabela, nani nimele nibe ngabakhonzi kuthi, nimele nisikhonze. . . . Mna ndiyazingcikiva ngale mini izintlu zedabi zakwaSirayeli. Ndinikeni indoda ndilwe nayo!”—1 Samuweli 17:8-10.

Mandulo, yayingengomnqa ukubona kubambene amadoda amabini angamakroti aphuma kumacala omabini emikhosi esukuzanayo. Kwakuphumelela umkhosi waleyo yoyisileyo. Kodwa le ndoda igculela amaSirayeli ayilojoni nje eliqhelekileyo. Yingxilimbela engurhec’ izulu—utshaba oluyindlobongela noloyikekayo. Noko ke, ngokugculela umkhosi wabantu bakaYehova, uGoliyati wayezinqikela ilitye elineembovane.

Olu ayilosukuzwano nje oluqhelekileyo lwemikhosi emibini. Kusukuzana uYehova noothixo bamaFilisti. Kunokuba abe nesibindi sokukhokela umkhosi wakhe xa kwakufuneka ujamelene neentshaba zikaThixo, uKumkani uSawule uyankwantya.—1 Samuweli 17:11.

Ityendyana Lomfana Likholosa NgoYehova

Xa kanye le mikhosi mibini ijamelene ngezikhondo zamehlo, kufika ityendyana lomfana elithanjiselwe ukuba ngukumkani wakwaSirayeli lityelele abantakwalo ababesemkhosini kaSawule. Igama lalo mfana nguDavide. Wathi akuva amazwi awayephuma emlonyeni kaGoliyati, wabuza: “Ungubani na lo mFilisti ungalukanga ukuba angcikive izintlu zedabi zoThixo ophilayo?” (1 Samuweli 17:26) Emehlweni kaDavide, uGoliyati wayemela amaFilisti noothixo bawo. Ecaphuka, efanele ke phofu, uDavide ufuna ukulwa nale ngxilimbela yomhedeni esilwela uYehova namaSirayeli. Kodwa uKumkani uSawule uthi: “Akukwazi ukuya kulo mFilisti ukuze ulwe naye, kuba wena useyinkwenkwe.”—1 Samuweli 17:33.

Hayi indlela ababengaboni ngasonye ngayo uSawule noDavide! USawule uzibonela inkwenkwana nje engumalusi efuna ukulwa nengxilimbela ekhohlakeleyo. Ukanti, yena uDavide wayebona umntu nje odelela iNkosi enguMongami uYehova. UDavide akanadyudyu kuba uqinisekile ukuba uThixo akanakumyeka angamohlwayi nabani na ogculela igama Lakhe nabantu Bakhe. Ngoxa uGoliyati wayedlisela ngamandla akhe, uDavide wayethembele kuYehova, eyijonge ngendlela uThixo awayeyijonge ngayo yonke loo nto yayiqhubeka apho.

“Ndiza Kuwe Ngegama LikaYehova”

Ukholo lukaDavide lunesiseko esiluqilima. Uyakhumbula ukuba uThixo waba ngakwicala lakhe xa kwakufuneka ehlangule izimvu zakhe kwibhere nengonyama. Lo malusi uselula uqinisekile ukuba nangesi sihlandlo uYehova akasoze amyekele kolu tshaba lomFilisti loyikekayo. (1 Samuweli 17:34-37) Exhobe ngesilingi namatye amahlanu, uDavide uya kuGoliyati.

UDavide oselula ujamelana nolu celomngeni ngamandla awanikwe nguYehova nakubeni kungekho mntu unethemba lokuba uza kuluphumelela. Ngenkalipho, uthi kulo mFilisti: “Uza kum unekrele nomkhonto nentshuntshe, kodwa mna ndiza kuwe ngegama likaYehova wemikhosi, uThixo wezintlu zedabi zakwaSirayeli, omngcikivileyo. Ngale mini uYehova uya kukunikezela esandleni sam . . . Abantu bomhlaba wonke bazi ukuba kukho uThixo ongowakwaSirayeli. Nalo lonke eli bandla liya kwazi ukuba akungakrele nangamkhonto ukusindisa kukaYehova, ngenxa yokuba lelikaYehova idabi.”—1 Samuweli 17:45-47.

Uba yintoni umphumo? Ingxelo ephefumlelweyo ithi: “UDavide, ngesilingi nelitye, wangqineka omelele kunomFilisti waza wambetha umFilisti wambulala; yaye wayengenakrele esandleni uDavide.” (1 Samuweli 17:50) Wayengaphathanga krele, kodwa wayexhaswa nguYehova uThixo.a

Konke okwenzeka kwelo dabi kwabonisa ukuba uDavide wayenokholo ngokwenene kuYehova. Xa kufuneka sikhethe phakathi kokoyika abantu nokukholosa ngamandla kaYehova asindisayo, asithandabuzi: “Simele sithobele uThixo njengomlawuli kunabantu.” (IZenzo 5:29) Ngaphezu koko, xa sijonga iimeko ezinzima esihlangabezana nazo ngendlela uYehova uThixo azijonga ngayo, siyakwazi ukusingatha nezona zibonakala ziyimiqobo engenakuthwaleka.

[Umbhalo osemazantsi]

[Ibhokisi/Umfanekiso okwiphepha 9]

WAYEMKHULU KANGAKANANI UGOLIYATI?

Eyoku-1 kaSamuweli 17:4-7 ithi uGoliyati wayeyingotyongotyo emalunga neemitha ezintathu. Ubukhulu namandla akhe zazibonakala kwisambatho sakhe sentsimbi. Sasinobunzima obungama-57 eekhilogram! Umphini womkhonto wawenziwe ngomthi, incakuba yawo yayinobunzima obuziikhilogram ezisi-7. Ngoko kusenokwenzeka ukuba uDavide wayenobunzima obungaphantsi kunobo bezixhobo awayesilwa ngazo uGoliyati!