Nikela Ingqalelo Ekulungeni Kwentlangano KaYehova
“Ngokuqinisekileyo siya kwaneliswa kukulunga kwendlu yakho.”—INDUMISO 65:4.
1, 2. (a) Ukwakhiwa kwetempile kwakuza kuba nawuphi umphumo kubantu bakaThixo? (b) Liliphi igalelo awaba nalo uDavide ekwakhiweni kwetempile?
UDAVIDE ngomnye wabona bantu babalaseleyo ekuthethwe ngabo kwiZibhalo zesiHebhere. Lo malusi, owaba yimvumi, umprofeti nokumkani, wakholosa ngokupheleleyo ngoYehova uThixo. Ulwalamano olunzulu uDavide awayenalo noYehova lwamshukumisela ekubeni anqwenele ukumakhela indlu uThixo. Loo ndlu, okanye itempile, yayiza kuba liziko lonqulo lwenyaniso kwaSirayeli. UDavide wayesazi ukuba ukubakho kwale tempile kwakuza kuba luvuyo nentsikelelo kubantu bakaThixo. Ngoko wacula wathi: “Unoyolo lowo umkhethileyo [Yehova] uze umbangele asondele, ukuze ahlale ezintendelezweni zakho. Ngokuqinisekileyo siya kwaneliswa kukulunga kwendlu yakho, indawo engcwele yetempile yakho.”—INdumiso 65:4.
2 UDavide akazange avunyelwe ukuba akhe indlu kaYehova. Kunoko elo lungelo lagcinelwa unyana wakhe uSolomon. UDavide akazange ambombozele kuba ilungelo ebelinqwenela liye lanikwa omnye umntu. Eyona nto yayibalulekile kuye kukuba nje kwakhiwe itempile. Wawuxhasa ngentliziyo yakhe yonke loo msebenzi wokwakha ngokuthi anike uSolomon iplani yokwakha awayeyinikwe nguYehova. Ngaphezu koko, uDavide wahlulahlula amawakawaka abaLevi ukuze basebenze kwiinxalenye ezahlukahlukeneyo zeso sakhiwo, waza wanikela ngesixa esikhulu segolide nesilivere.—1 Kronike 17:1, 4, 11, 12; 23:3-6; 28:11, 12; 29:1-5.
3. Sisiphi isimo sengqondo abanaso abakhonzi baThixo ngamalungiselelo onqulo lwenyaniso?
3 AmaSirayeli athembekileyo awaxhasa amalungiselelo onqulo lokwenyaniso endlwini kaThixo. Nathi bakhonzi bakaYehova namhlanje, siyawaxhasa amalungiselelo onqulo enxalenye esemhlabeni yentlangano kaYehova. Ngaloo ndlela sibonisa ukuba sinesimo sengqondo esifanayo nesikaDavide. Asinawo umoya wokukhalaza. Kunoko, sinikel’ ingqalelo ekulungeni kwentlangano kaThixo. Ngaba wakha wacinga ngezinto ezininzi ezintle esinokuba nombulelo ngazo? Makhe sihlolisise ezinye zazo.
Ukuba Nombulelo Ngabo Bakhokelayo
4, 5. (a) ‘Ikhoboka elithembekileyo neliyingqondi’ liyiphumeza njani imbopheleleko yalo? (b) Athini amanye amaNgqina ngokutya kokomoya akufumanayo?
4 Sinesizathu esivakalayo sokuba nombulelo ‘ngekhoboka elithembekileyo neliyingqondi’ elimiselwe nguYesu Kristu phezu kwempahla yakhe emhlabeni. Olu didi lwekhoboka olubunjwa ngamaKristu athanjisiweyo luyakhokela ekushumayeleni iindaba ezilungileyo, lulungiselela iintlanganiso zonqulo, yaye lupapasha iincwadi zeBhayibhile ngeelwimi ezingaphezu kwama-400. Izigidi zabantu emhlabeni wonke ziyakuvuyela ukuzondla ngoku ‘kutya kokomoya okufika ngexesha elifanelekileyo.’ (Mateyu 24:45-47) Ngoko akukho sizathu sakumbombozela.
5 Kangangeminyaka uElfi osel’ ekhulile noliNgqina likaYehova uye wathuthuzelwa yaye wancedwa kukusebenzisa isiluleko seZibhalo esifumaneka kwiimpapasho zodidi lwekhoboka. Enoxabiso olunzulu uElfi wabhala wathi: “Ngendiyintoni ngaphandle kwentlangano kaYehova?” UPeter noIrmgard nabo baneminyaka bekhonza uThixo. UIrmgard uvakalisa umbulelo ngazo zonke iimpapasho eziveliswa “yintlangano kaYehova enothando nenyameko.” Phakathi kwezi mpapasho kukwakho nezo zabantu abaneziphene, njengabo bangaboniyo nabangevayo.
6, 7. (a) Amabandla asemhlabeni wonke onganyelwa njani? (b) Baye bathini abanye ngenxalenye esemhlabeni yentlangano kaYehova?
6 ‘Ikhoboka elithembekileyo’ limelwa liQumrhu Elilawulayo lamaNgqina kaYehova, iqela elincinane lamadoda athanjiswe ngomoya asebenza kwikomkhulu lehlabathi lamaNgqina kaYehova eBrooklyn, eNew York. IQumrhu Elilawulayo limisela abakhonzi bakaYehova abanamava ukuba bakhonze kwiiofisi zesebe ezongamela amabandla angaphezu kwama-98 000 emhlabeni wonke. Amadoda afanelekayo ngokweZibhalo amiselwa njengabadala nezicaka zolungiselelo kula mabandla. (1 Timoti 3:1-9, 12, 13) Abadala bayakhokela baze baluse ngothando umhlambi kaThixo abawuphathisiweyo. Enjani yona intsikelelo ekuyiyo ukuba yinxalenye yaloo mhlambi nokunandipha uthando ‘nomanyano lwabazalwana luphela’!—1 Petros 2:17; 5:2, 3.
7 Kunokuba bakhalaze, abantu abaninzi bavakalisa uxabiso ngolwalathiso lothando abalufumana kubadala. Ngokomzekelo, khawucinge nje ngoBirgit, umfazi ongumKristu okwiminyaka yama-30 ubudala. Ebutsheni bakhe wayenabahlobo abangalunganga, waza wasinda kancinane ekwenzeni ububi. Kodwa isiluleko esicacileyo sabadala esisekelwe eBhayibhileni, nokuxhaswa kwakhe ngabanye akhonza nabo kwamhlangula engozini. Uvakalelwa njani uBirgit ngoku? Uthi: “Ndinombulelo ongazenzisiyo ngokuba ndisekwintlangano emangalisayo kaYehova.” UAndreas oneminyaka eli-17 ubudala uthi: “Ngokwenene yintlangano kaYehova le, yaye izigqwesa zonke iintlangano ezikhoyo ehlabathini.” Ngaba asifanele sibe nombulelo ngokulunga kwenxalenye esemhlabeni yentlangano kaYehova?
Abo Bakhokelayo Abafezekanga
8, 9. Yintoni eyenziwa ngabantu abathile ababephila ngexesha likaDavide, yaye wasabela njani koko?
8 Kambe ke, abo bamiselweyo ukuba bakhokele kunqulo lwenyaniso abafezekanga. Bonke bayazenza iimpazamo, yaye abanye babo banobuthathaka abalwisana nabo. Ngaba kufanele kusikhubekise oku? Akunjalo. Abanye babo babephathiswe iimbopheleleko ezinkulu kuSirayeli wamandulo benza iziphoso ezinzulu. Ngokomzekelo, xa uDavide wayesemtsha ngeminyaka, wacelwa ukuba abe yimvumi yokuthomalalisa uKumkani uSawule xa ebandezelekile. Kamva uSawule wazama ukumbulala uDavide, waza wanyanzeleka ukuba ekugqibeleni abaleke ukuze asindise ubomi bakhe.—1 Samuweli 16:14-23; 18:10-12; 19:18; 20:32, 33; 22:1-5.
9 Amanye amaSirayeli enza ubuqhophololo. Ngokomzekelo, umphathi-mkhosi kaDavide uYowabhi wabulala isalamane sikaSawule uAbhinere. UAbhisalom wenza iyelenqe lokususa uDavide uyise esihlalweni njengokumkani ukuze kungene yena. Yaye uAhitofele owayengumcebisi othenjiweyo kaDavide wamenzela iyelenqe. (2 Samuweli 3:22-30; 15:1-17, 31; 16:15, 21) Kodwa uDavide akazange akhalaze enomsindo, yaye akazange alunikele umva unqulo lwenyaniso. Kunoko wenza okwahlukileyo koko. Ukubandezeleka kukaDavide kwamenza wanamathela kuYehova waza walondoloza isimo sengqondo esihle awayenaso ngethuba lokubaleka kwakhe uSawule. Ngelo xesha uDavide wacula wathi: “Ndibabale, Thixo, ndibabale, kuba usabele kuwe umphefumlo wam; yaye ndisabela esithunzini samaphiko akho lide lidlule ishwangusha.”—INdumiso 57:1.
10, 11. Yintoni eyenzekayo kuGertrud ebutsheni bakhe, yaye wathini ngokungafezeki kwabanye esikhonza nabo?
10 Namhlanje asinaso isizathu sokukhalazela ubuqhophololo entlanganweni kaThixo. UYehova neengelosi zakhe kwanabalusi bakhe bokomoya ababanyamezeli abantu abanobuqhophololo nabangendawo ebandleni lamaKristu. Sekunjalo, sonke sijamelene nokungafezeki—okwethu nokwabanye abakhonzi bakaThixo.
11 UGertrud obengumkhonzi kaYehova kangangexesha elide wayegxekwa ebutsheni bakhe kusithiwa akanguye umvakalisi woBukumkani wexesha elizeleyo, kunoko ungumkhohlisi. Wasabela njani? Ngaba oko kwamenza uGertrud wambombozela? Akunjalo. Ngaphambi nje kokufa kwakhe ngowama-2003 eneminyaka engama-91 ubudala, wathetha ngaso esi siganeko esithi: “Esi siganeko kunye nezinye ezandehlelayo kamva zandifundisa ukuba nangona abantu besenza iimpazamo, nguYehova owalathisa umsebenzi wakhe obalulekileyo, yaye usebenzisa thina bantu bangafezekanga.” Xa ejamelana nokungafezeki kwabanye abakhonzi bakaThixo, uGertrud wayethandaza kuYehova ngokusuka entliziyweni.
12. (a) Nguwuphi umzekelo ombi owamiselwa ngamaKristu athile enkulungwane yokuqala? (b) Sifanele sizimilisele entwenini iingqondo zethu?
12 Ekubeni kwanawona maKristu anyanisekileyo nazinikeleyo engafezekanga, xa umkhonzi omiselweyo esenza impazamo, masiqhubeke sisenza “zonke izinto ngaphandle kokumbombozela.” (Filipi 2:14) Bekuya kuba nemiphumo emibi gqitha ukulandela umzekelo ombi wabathile ababekwibandla lamaKristu lenkulungwane yokuqala! Ngokutsho kukaYude, abafundisi bobuxoki belo xesha ‘babegatya ubukhosi yaye betshabhisa abo bazukileyo.’ Ngaphezu koko, abo benzi bobubi babethanda ‘ukumbombozela nokukhalaza.’ (Yude 8, 16) Ngamana thina singakuphepha ukukhalaza nokumbombozela size similisele iingqondo zethu kumalungiselelo amahle esiwenzelwa ‘likhoboka elithembekileyo.’ Masikuxabise ukulunga kwentlangano kaYehova size ‘sihlale sisenza zonke izinto ngaphandle kokumbombozela.’
“Le Ntetho Iyothusa”
13. Abanye basabela njani kwiimfundiso ezithile zikaYesu Kristu?
13 Ngoxa abantu abathile ngenkulungwane yokuqala babembombozelela abakhonzi abamiselweyo, abanye babembombozelela iimfundiso zikaYesu. Njengoko kuchazwe kuYohane 6:48-69, uYesu wathi: “Lowo utya inyama yam aze asele igazi lam unobomi obungunaphakade.” Bathe bakuva la mazwi, “abaninzi kubafundi bakhe . . . bathi: ‘Le ntetho iyothusa; ngubani na onako ukuyiphulaphula?’” UYesu wayesazi ukuba “abafundi bakhe babembombozela ngako oku.” Ngaphezu koko, “ngenxa yoko abaninzi [kubo] baphindela kwizinto ezisemva ababi sahamba naye.” Kodwa asingabo bonke abafundi abambombozelayo. Phawula into eyenzekayo xa uYesu wabuza abapostile abali-12 esithi: “Ngaba nani nifuna ukumka?” Umpostile uPetros waphendula wathi: “Nkosi, siya kumka siye kubani na? Nguwe onamazwi obomi obungunaphakade; yaye sikholiwe saza safikelela ekwazini ukuba wena unguLowo Ungcwele kaThixo.”
14, 15. (a) Kutheni abanye becatshukiswa ziimfundiso ezithile zamaKristu? (b) Sinokufunda ntoni kwimeko kaEmanuel?
14 Namhlanje bakho abambalwa phakathi kwabantu bakaThixo abaye bacatshukiswa ziimfundiso ezithile zamaKristu baza bambombozelela inxalenye esemhlabeni yentlangano kaYehova. Kubangelwa yintoni oko? Ukumbombozela okunjalo kudla ngokubangelwa kukungayiqondi indlela uThixo enza ngayo izinto. UMdali uyityhila kancinane kancinane inyaniso ebantwini bakhe. Ngoko indlela esiziqonda ngayo iZibhalo iyaphuculwa ekuhambeni kwexesha. Inkoliso yabantu bakaYehova iyaluvuyela uphuculo olunjalo. Abambalwa baba ‘ngamalungisa kakhulu’ baze balugatye utshintsho. (INtshumayeli 7:16) Oku kusenokubangelwa likratshi kwanokuzingca. Nokuba siyintoni na isizathu, ukumbombozela okunjalo kuyingozi, ekubeni kusenokusitsalela ehlabathini kwakhona.
15 Ngokomzekelo, uEmanuel wayeliNgqina waza waqalisa ukugxeka ezinye zezinto awayezifunda kwiimpapasho ‘zekhoboka elithembekileyo neliyingqondi.’ (Mateyu 24:45) Wayeka ukufunda iimpapasho zamaKristu waza ekugqibeleni waxelela abadala bebandla awayekulo ukuba akasafuni ukuba liNgqina likaYehova. Kodwa ke, emva kwethuba elifutshane uEmanuel waqonda ukuba iimfundiso zentlangano kaYehova zazichanile. Waqhagamshelana namaNgqina, wayivuma impazamo yakhe, waza wabuyiselwa njengomnye wamaNgqina kaYehova. Ngenxa yoku, waphinda wonwaba.
16. Yintoni enokusinceda siphelise amathandabuzo esisenokuba nawo ngeemfundiso ezithile zamaKristu?
16 Kuthekani ukuba siziva sifuna ukumbombozela ngenxa yokuthandabuza iimfundiso ezithile zabantu bakaYehova? Kwimeko enjalo sifanele sibe nomonde. Ekuhambeni kwexesha ‘ikhoboka elithembekileyo’ lisenokukhupha impapasho ephendula imibuzo yethu ize iphelise amathandabuzo esinawo. Kububulumko ukufuna uncedo lwabadala abangamaKristu. (Yude 22, 23) Umthandazo, ufundisiso lobuqu, nokunxulumana nabanye esikholwa nabo abaqolileyo ngokomoya nako kunokusinceda siphelise amathandabuzo esinawo size siyixabise ngakumbi inyaniso yeBhayibhile esiye sayifunda entlanganweni kaYehova.
Hlala Unesimo Sengqondo Esihle
17, 18. Kunokuba simbombozele, sisiphi isimo sengqondo esifanele sibe naso, yaye ngoba?
17 Enyanisweni, abantu abangafezekanga banotyekelo lwemvelo lwesono, ngoko abanye basenokunqwenela ngamandla ukuvakalisa izikhalazo zabo ezincinane. (Genesis 8:21; Roma 5:12) Kodwa ukuba sinomkhwa wokumbombozela, siya kuba silubeka engozini ulwalamano lwethu noYehova uThixo. Ngoko sifanele siwuphephe nawuphi na umoya wokumbombozela.
18 Kunokuba simbombozele ngoko kwenzekayo ebandleni, simele sibe nesimo sengqondo esihle size silandele ikhondo lokuhlonel’ uThixo, nto leyo eya kusizisela uvuyo, isenze sibe nolungelelwano nokholo oluqinileyo. (1 Korinte 15:58; Tito 2:1-5) UYehova ulawula yonke into eyenzekayo entlanganweni yakhe, yaye uYesu uyakwazi okwenzekayo kwibandla ngalinye, njengoko kwakunjalo nangenkulungwane yokuqala. (ISityhilelo 1:10, 11) Lindela ngomonde kuThixo nakuKristu oyiNtloko yebandla. Basenokusebenzisa abalusi abaqolileyo ukuba balungise nayiphi na imeko efuna ukulungiswa.—INdumiso 43:5; Kolose 1:18; Tito 1:5.
19. De uBukumkani bulawule ngokupheleleyo, yintoni esimele sinikel’ ingqalelo kuyo okwangoku?
19 Le nkqubo ingendawo yezinto iza kuphela kungekudala, buze uBukumkani obungoMesiya bulawule ngokupheleleyo. Kodwa okwangoku, kubaluleke gqitha ukuba ngamnye wethu ahlale enesimo sengqondo esihle! Oku kuya kusinceda siphawule iimpawu ezintle abanazo abo sikhonza kunye nabo, kunokuba sinikel’ ingqalelo kubuthathaka babo. Ukunikel’ ingqalelo kwiimpawu zabo ezintle kuya kusenza sonwabe. Kunokuba sidinyazwe kukumbombozela siya kukhuthazeka yaye sakheke ngokomoya.
20. Ukuba nesimo sengqondo esihle kuya kusinceda sinandiphe ziphi iintsikelelo?
20 Kwakhona ukuba nesimo sengqondo esihle kuya kusinceda sicinge ngeentsikelelo ezininzi esizinandiphayo ngenxa yokunxulumana kwethu nenxalenye esemhlabeni yentlangano kaYehova. Yile ntlangano kuphela ehlabathini lonke enyanisekileyo kuMongami wendalo iphela. Uvakalelwa njani ngako oko nangelungelo onalo lokunqula okuphela koThixo oyinyaniso, uYehova? Ngamana isimo sakho sengqondo singafana nesikaDavide, owacula wathi: “Owu mphulaphuli wemithandazo, abantu bayo yonke inyama baya kuza kuwe. Unoyolo lowo umkhethayo uze umbangele asondele, ukuze ahlale ezintendelezweni zakho. Ngokuqinisekileyo siya kwaneliswa kukulunga kwendlu yakho.”—INdumiso 65:2, 4.
Uyakhumbula Na?
• Kutheni sifanele sibe nombulelo ngabo bakhokelayo ebandleni?
• Sifanele sisabele njani xa abazalwana abanembopheleleko besenza iimpazamo?
• Sifanele sikugqale njani ukuphuculwa kwendlela esiziqonda ngayo iZibhalo?
• Yintoni enokunceda umKristu aphelise amathandabuzo?
[Umfanekiso okwiphepha 20]
UDavide wanika uSolomon iplani yokwakha itempile waza waluxhasa ngentliziyo epheleleyo unqulo lwenyaniso
[Umfanekiso okwiphepha 23]
Abadala abangamaKristu bayakuvuyela ukusinceda ngokomoya