UYehova Ubanika “Umoya Oyingcwele Abo Bamcelayo”
“Ukuba ke ngoko nina, ningendawo nje, niyakwazi ukunika abantwana benu izipho ezilungileyo, wobeka phi na ke yena uYihlo osezulwini ukubanika umoya oyingcwele abo bamcelayo!”—LUKA 11:13.
1. Kunini apho silufuna ngamandla uncedo lomoya oyingcwele?
‘LE YONA ingaphaya kwamandla am. Ngumoya oyingcwele kuphela onokundinceda kwesi isilingo!’ Ngaba wakha wavakalelwa njalo? Kuye kwanjalo kumaKristu amaninzi. Mhlawumbi watsho emva kokuva ukuba unesifo esoyikisayo. Okanye xa wawufelwe liqabane obutshate nalo ixesha elide. Mhlawumbi kuxa wehlelwa yinto eyabutshintsha ngokupheleleyo ubomi bakho wasala udandathekile. Kumaxesha anjalo ebomini, usenokuba wavakalelwa kukuba sele uphila nje ngomoya oyingcwele kaYehova okunika “amandla angaphaya koko kuqhelekileyo.”—2 Korinte 4:7-9; INdumiso 40:1, 2.
2. (a) Ziziphi izilingo ajamelana nazo amaKristu okwenyaniso? (b) Yiyiphi imibuzo eza kuxutyushwa kweli nqaku?
2 AmaKristu okwenyaniso aya ejamelana neengcinezelo ezingakumbi nenkcaso yehlabathi lanamhlanje elingoyiki Thixo. (1 Yohane 5:19) Ukongezelela, abalandeli bakaKristu bahlaselwa nguSathana uMtyholi ngokwakhe, kuba ulwa imfazwe engathethekiyo nabo “bagcina imiyalelo kaThixo nabanomsebenzi wokungqinela uYesu.” (ISityhilelo 12:12, 17) Yiloo nto ke eyenza siwufune ngendlel’ engazange ibonwe umoya kaThixo. Yintoni esinokuyenza ukuqinisekisa ukuba sihlala siwufumana kangangoko siwufuna umoya oyingcwele kaThixo? Ibe kutheni siqinisekile nje ukuba uYehova uzimisele ukusinika amandla esiwafunayo xa silingwa? Iimpendulo zale mibuzo sizifumana kwimizekeliso emibini kaYesu.
Thandaza Ngokungapheliyo
3, 4. Nguwuphi umzekeliso owenziwa nguYesu, ibe wathi udibana njani nokuthandaza?
3 Omnye wabafundi bakaYesu wakha wamcela oku: “Nkosi, sifundise ukuthandaza.” (Luka 11:1) Ukuphendula, uYesu wabenzela imizekeliso emibini nefanayo abafundi bakhe. Owokuqala ngowendoda efikelwa lundwendwe, ngoxa owesibini uphathelele ubawo ophulaphula unyana wakhe. Makhe siqwalasele ngamnye kule mizekeliso.
4 UYesu wathi: “Ngubani na kuni ongathi enomhlobo, aye kuye ezinzulwini zobusuku aze athi kuye, ‘Mhlobo, ndiboleke izonka ezithathu, kuba ndisandul’ ukufikelwa ngumhlobo wam eseluhambeni yaye andinanto ndingayibeka phambi kwakhe’? Aze lowo ungaphakathi athi ukuphendula, ‘Musa ukundikhathaza. Ucango sele lutshixiwe, nabantwana bam abaselula bakunye nam esililini; andinakuvuka ndize ndikunike nantoni na.’ Ndiyanixelela, Nangona engayi kuvuka aze amnike nantoni na ngenxa yokuba engumhlobo wakhe, ngokuqinisekileyo ngenxa yozingiso lwakhe lwenkalipho uya kuvuka aze amnike ezo zinto azifunayo.” Wandula ke uYesu wachaza indlela odibana ngayo lo mzekeliso nokuthandaza wathi: “Ngako oko ndithi kuni, Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa. Kuba wonk’ ubani ocelayo uyamkela, nalowo ufunayo uyafumana, nalowo unkqonkqozayo uya kuvulelwa.”—Luka 11:5-10.
5. Yintoni esiyifundiswa ngumzekeliso wendoda ezingisayo ngokuphathelele isimo sengqondo sethu xa sithandaza?
5 Lo mzekeliso wendoda ezingisayo usibonisa kakuhle isimo sengqondo esimele sibe naso xa sithandaza. Phawula ukuba uYesu uthi le ndoda ifumana oko ikufunayo ‘ngenxa yozingiso lwayo lwenkalipho.’ (Luka 11:8) Amazwi athi ‘uzingiso lwenkalipho’ avela isihlandlo esinye eBhayibhileni. Aguqulelwe kwigama lesiGrike ngokoqobo elithetha “ukungabi nazintloni.” Idla ngokungavakali kamnandi into yokuthi umntu akanazintloni. Noko ke, xa umntu engenazintloni okanye ezingisa kwinto entle, iba yinto encomekayo leyo. Kunjalo ke nangomntu ofikelwe lundwendwe kulo mzekeliso. Akanazintloni ngokuzingisa kwakhe koko akufunayo. Ekubeni uYesu emenza umzekelo omhle lowo ufikelwe lundwendwe, nathi simele sizingise kwimithandazo yethu. UYehova ufuna ‘siqhubeke sicela, siqhubeke sifuna, siqhubeke sinkqonkqoza.’ Yena ke uya “kubanika umoya oyingcwele abo bamcelayo.”
6. Yayijongwa njani into yokwamkela iindwendwe ngomhla kaYesu?
6 UYesu akasibonisi nje indlela esimele sithandaze ngayo—ukuzingisa ngenkalipho—kodwa usibonisa nesizathu sokwenjenjalo. Ukuze sisiqonde kakuhle esi sifundo, simele sinikele ingqalelo kwindlela ababekujonga ngayo ukwamkela undwendwe abo babephulaphule loo mzekeliso. Iingxelo ezininzi zeBhayibhile zibonisa ukuba kumaxesha okubhalwa kwayo, ukunyamekela iindwendwe kwakugqalwa njengento ebalulekileyo, ngakumbi kubakhonzi bakaThixo. (Genesis 18:2-5; Hebhere 13:2) Kwakulihlazo ukungamkeli ndwendwe. (Luka 7:36-38, 44-46) Sicinga ngoko, makhe siphinde sihlolisise eli bali likaYesu.
7. Kutheni umamkeli zindwendwe okulo mzekeliso kaYesu engenazintloni ngokuvusa umhlobo wakhe?
7 Umamkeli zindwendwe okulo mzekeliso ufikelwa lundwendwe ezinzulwini zobusuku. Uziva enyanzelekile ukuba alulungiselele ukutya, kodwa ‘akananto angayibeka phambi kwalo.’ Yimeko yongxamiseko le kuye! Uvakalelwa kukuba umele afumane iqhekeza lesonka nakanjani na. Ngoko uya kumhlobo wakhe aze engenazintloni amvuse. Uthi kuye: “Mhlobo, ndiboleke izonka ezithathu.” Uyazingisa de akufumane oko akufunayo. Uthi ke esakuba ezifumene ezi zonka, aqale azive engumamkeli zindwendwe ofanelekileyo.
Okukhona Ufuneka Kokukhona Ucelwa Ngakumbi
8. Yintoni eya kwenza sizingise ekuthandazeleni umoya oyingcwele?
8 Yintoni eboniswa ngulo mzekeliso ngemfuneko yokuzingisa emthandazweni? Le ndoda yazingisa icela isonka kuba yayivakalelwa kukuba imele isifumane nakanjani na ukuze ibe ngumamkeli zindwendwe. (Isaya 58:5-7) Yayingayi kuphumeza nto ngaphandle kweso sonka. Ekubeni siqonda ukuba nakanjani na simele sibe nomoya kaThixo ukuze siphumeze ubulungiseleli bethu njengamaKristu okwenyaniso, nathi sihlala sithandaza kuThixo, sicela umoya wakhe. (Zekariya 4:6) Asinakuphumeza nto ngaphandle kwawo. (Mateyu 26:41) Ngaba uyayibona ingongoma ebalulekileyo ekulo mzekeliso? Ukuba sivakalelwa kukuba siwufuna ngamandla umoya kaThixo, siya kuzingisa nakanjani na siwucela.
9, 10. (a) Yenza umzekelo obonisa isizathu sokuzingisa xa sicela umoya kaThixo. (b) Nguwuphi umbuzo esimele sizibuze wona, futhi ngoba?
9 Ukuze usiqonde esi sifundo namhlanje, cinga ngelungu lentsapho elisuka ligule ezinzulwini zobusuku. Ngaba ubuya kumvusa ugqirha ucele uncedo? Kakade ubungayi kumvusa xa kungekho nto ingako. Kodwa, ubungayi kuba nantloni ukumvusa ukuba lihlaselwe yintliziyo. Ngoba? Kaloku le yimeko yongxamiseko. Uyaqonda ukuba kufuneka uncedo lomntu onobuchule nakanjani na. Ukungaluceli uncedo kungaphumela ekufeni kwakhe. Nawo ke, amaKristu okwenyaniso akwimeko yongxamiseko. Kaloku, uSathana uzulazula “njengengonyama egqumayo,” efuna ukusiqwenga. (1 Petros 5:8) Kufuneka sifumane umoya kaThixo nakanjani na ukuze sihlale siphila ngokomoya. Ukungaluceli uncedo kuThixo kungaphumela ekufeni. Ngoko, simele sizingise ngenkalipho sicele umoya oyingcwele kuThixo. (Efese 3:14-16) Yiloo nto kuphela eya kusinceda sihlale sinamandla ‘okunyamezela de kuse ekupheleni.’—Mateyu 10:22; 24:13.
10 Ifuneka ngamandla into yokuba sikhe sizibuze oku, ‘Eneneni, ndizingisa kangakanani emthandazweni?’ Khumbula ukuba, xa siqonda kakuhle ukuba siyalufuna uncedo lukaThixo, siya kuzingisa ngakumbi ekuthandazeleni umoya oyingcwele.
Yintoni Eyenza Sibe Nentembelo Xa Sithandaza?
11. UYesu wawudibanisa njani umthandazo nomzekeliso wobawo nonyana?
11 Lo mzekeliso kaYesu ubethelela isimo sengqondo somntu othandazayo—umntu okholwayo. Wona owesibini ubonisa isimo sengqondo somphulaphuli womthandazo—uYehova uThixo. UYesu wabuza: “Eneneni, nguwuphi na uyise phakathi kwenu oya kuthi, ukuba unyana wakhe ucela intlanzi, asuke amnike inyoka esikhundleni sentlanzi? Okanye athi ukuba ucela iqanda, asuke amnike unomadudwane?” Wandula uYesu wacacisa indlela osebenza ngayo lo mzekeliso wathi: “Ukuba ke ngoko nina, ningendawo nje, niyakwazi ukunika abantwana benu izipho ezilungileyo, wobeka phi na ke yena uYihlo osezulwini ukubanika umoya oyingcwele abo bamcelayo!”—Luka 11:11-13.
12. Umzekeliso woyise ophulaphula isicelo sonyana wakhe ukubonisa njani ukuzimisela kukaYehova ukuphulaphula imithandazo yethu?
12 Ngalo mzekelo wobawo ophulaphula unyana wakhe, uYesu ubonisa indlela avakalelwa ngayo uYehova ngabo bathandaza kuye. (Luka 10:22) Okokuqala, phawula umahluko okhoyo kule mizekeliso. Ngokwahlukileyo kumntu okumzekeliso wokuqala owayengafuni ukunceda xa ecelwa, uYehova ufana nomzali onenyameko ozimisele ukuphulaphula isicelo somntwana wakhe. (INdumiso 50:15) Ebonisa indlela uYehova azimisele ngayo ukusinceda, uYesu uhlabela mgama ebonisa umahluko phakathi kobawo ongumntu nobawo omkhulu wasezulwini. Uthi ukuba ubawo ongumntu, nakuba ‘engendawo’ ngenxa yesono awasizuza ilifa, uyakwazi ukunika unyana wakhe isipho esilungileyo, kobeka phi na ke kuBawo wethu wasezulwini, onesisa ukuyinika umoya oyingcwele intsapho yakhe, abo bamnqulayo!—Yakobi 1:17.
13. Yintoni esinokuqiniseka ngayo xa sithandaza kuYehova?
13 Yintoni esiyifundayo thina koku? Simele siqiniseke ukuba xa sicela umoya oyingcwele kuBawo wethu wasezulwini, uhlala ekulungele ukusinika. (1 Yohane 5:14) Xa sizingisa sithandaza kuye, uYehova akanakuze abe ngathi uthi: “Musa ukundikhathaza. Ucango sele lutshixiwe.” (Luka 11:7) Ngokwahlukileyo, uYesu wathi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa.” (Luka 11:9, 10) Ewe, uYehova ‘uya kusiphendula ngemini yokumbiza kwethu.’—INdumiso 20:9; 145:18 (iBhayibhile yesiXhosa yowe-1996).
14. (a) Yiyiphi ingcamango ephosakeleyo abanayo abanye abajamelene nezilingo? (b) Xa sisesilingweni, kutheni simele sithandaze kuYehova sinengqiniseko?
14 Lo mzekeliso wobawo onothando ubethelela nento yokuba ukulunga kukaYehova kungaphaya kokulunga kwakhe nawuphi na umzali ongumntu. Ngoko, akukho namnye kuthi omele avakalelwe kukuba izilingo ajamelana nazo zibangelwa kukuba uThixo engakholiswa sithi. Lutshaba lwethu oluphambili uSathana, ofuna sicinge ngaloo ndlela. (Yobhi 4:1, 7, 8; Yohane 8:44) KwiZibhalo akukho kwanto ibonisa ukuba simele sicinge oko. UYehova akasilingi “ngezinto ezimbi.” (Yakobi 1:13) Akasiniki silingo sifana nenyoka okanye unomadudwane. UBawo wethu wasezulwini ubanika “izinto ezilungileyo abo bamcelayo.” (Mateyu 7:11; Luka 11:13) Enyanisweni, okukhona sikuqonda ukulunga kukaYehova nokuzimisela kwakhe ukusinceda, kokukhona siya kuthandaza siqinisekile. Njengoko sisenjenjalo, nathi siya kutsho amazwi afana nalawo omdumisi owathi: “Enyanisweni uThixo uvile; unikele ingqalelo kwilizwi lomthandazo wam.”—INdumiso 10:17; 66:19.
Indlela Osinceda Ngayo Umoya Oyingcwele
15. (a) Sisiphi isithembiso esenziwa nguYesu ngokuphathelele umoya oyingcwele? (b) Yiyiphi enye indlela esincedwa ngayo ngumoya oyingcwele?
15 Ngaphambi nje kokufa kwakhe, uYesu wasiphinda isiqinisekiso awasenza kule mizekeliso yakhe. Ethetha ngomoya oyingcwele, wathi kubapostile bakhe: “Ndiza kumcela uBawo yaye uya kuninika omnye umncedi wokuba kunye nani ngonaphakade.” (Yohane 14:16) Ngoko uYesu wathembisa ukuba umncedi, okanye umoya oyingcwele wawuya kuba nabalandeli bakhe kwixesha elizayo, kuquka namhlanje. Yiyiphi enye indlela ephawulekayo esixhaswa ngayo ngumoya oyingcwele? Umoya oyingcwele usinceda sikwazi ukunyamezela izilingo ezahlukahlukeneyo. Njani? Kwincwadi eyayisiya kumaKristu aseKorinte, umpostile uPawulos owayejamelene nezilingo, wachaza indlela awancedwa ngayo ngumoya kaThixo. Makhe siqwalasele nje kancinane oko wakubhalayo.
16. Imeko yethu inokufana njani naleyo kaPawulos?
16 Okokuqala, uPawulos wabaxelela inyaniso abazalwana bakhe ukuba wayekhathazwa ‘liliva enyameni,’ uhlobo oluthile lwesilingo. Emva koko wathi: “Ndayibongoza izihlandlo ezithathu iNkosi ukuba lisuke kum.” (2 Korinte 12:7, 8) Nakuba uPawulos wambongozayo uThixo ukuba asuse loo nkxwaleko, zange iphele. Kusenokwenzeka ukuba nawe ukwimeko efanayo namhlanje. NjengoPawulos, usenokuba uye wathandaza ngokuzingisileyo nangengqiniseko, ucela uYehova ukuba asuse isilingo okuso. Kodwa, phezu kwezibongozo eziphindaphindiweyo, loo ngxaki ayikapheli. Ngaba oko kuthetha ukuba uYehova akayiphenduli imithandazo yakho ibe nomoya wakhe awukuncedi? Nakanye! (INdumiso 10:1, 17) Phawula amazwi alandelayo ompostile uPawulos.
17. UYehova wayiphendula njani imithandazo kaPawulos?
17 Ephendula imithandazo kaPawulos, uThixo wathi: “Ububele bam obunganifanelanga bukulingene; kuba amandla am enziwa agqibelele kubuthathaka.” Yena ke uPawulos waba sele esithi: “Ke ngoko, ngokuchulumanca okukhulu, ndiza kuqhayisa ngobuthathaka bam, ukuze amandla kaKristu ahlale njengentente phezu kwam.” (2 Korinte 12:9; INdumiso 147:5) Ngoko, uPawulos waqonda ukuba ngoKristu, iphiko likaThixo elinamandla lalimkhusela njengentente. Nanamhlanje, uYehova uyiphendula ngendlela efanayo imithandazo yethu. Ubagubungela ngamaphiko akhe abakhonzi bakhe.
18. Yintoni esinceda sikwazi ukunyamezela izilingo?
18 Kakade ke, intente ayiyithinteli imvula ingani okanye umoya ungabhudli, kodwa iyabakhusela abantu kwezo zinto. Ngokufanayo, ikhusi ‘lamandla kaKristu’ aluthinteli ukuba singehlelwa zizilingo nobunzima. Kodwa, lisikhusela ngokomoya kwizinto eziyingozi zeli hlabathi nakwiintolo zomlawuli walo, uSathana. (ISityhilelo 7:9, 15, 16) Ngoko ke, enoba ujamelene nesilingo ‘esingasukiyo kuwe,’ unokuqiniseka ukuba uYehova uyabazi ubunzima otyhubela kubo yaye uyasiva ‘isandi sesikhalo sakho.’ (Isaya 30:19; 2 Korinte 1:3, 4) UPawulos wathi: “UThixo uthembekile, yaye akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza nendlela yokuphuma ukuze nikwazi ukusinyamezela.”—1 Korinte 10:13; Filipi 4:6, 7.
19. Yintoni ozimisele ukuyenza, yaye ngoba?
19 Yinyaniso ukuba, le ‘mihla’ ikhoyo yeli hlabathi lingahloneli Thixo ‘yeyamaxesha amanqam ekunzima ukujamelana nawo.’ (2 Timoti 3:1) Nakuba kunjalo, abakhonzi bakaThixo bamele bakwazi ukujamelana nala maxesha. Kutheni bemele bakwazi nje? Kungenxa yenkxaso nekhusi lomoya oyingcwele kaThixo, uYehova abanika wona ngokuzithandela kangangoko bewufuna bonke abo bazingisayo bewucela ngengqiniseko. Kwanga singahlala sithandazela umoya oyingcwele yonk’ imihla.—INdumiso 34:6; 1 Yohane 5:14, 15.
Ubuya Kuphendula Uthini?
• Yintoni esimele siyenze ukuze sizuze umoya oyingcwele kaThixo?
• Kutheni siqiniseka nje ukuba uYehova uya kuyiphendula imithandazo yethu xa sicela umoya oyingcwele?
• Umoya oyingcwele usinceda njani sinyamezele izilingo?
[Umfanekiso okwiphepha 21]
Yintoni esinokuyifunda kumzekeliso kaYesu womamkeli zindwendwe ozingisayo?
[Umfanekiso okwiphepha 22]
Ngaba uyazingisa ucela umoya oyingcwele kaThixo?
[Umfanekiso okwiphepha 23]
Yintoni esiyifundayo ngoYehova kumzekeliso wobawo onothando?