Ibali Lobomi
Isizathu Sokuba Ndikunandiphe Ukwenza Abafundi
Kubalisa uPamela Moseley
Ngowe-1941 kwakugquba imfazwe kulo lonke elaseNgilani xa nomama saya kwindibano yamaNgqina kaYehova eyayiseLeicester. UJoseph Rutherford wanikela intetho ekhethekileyo yabantwana. Emva kokubhaptizwa kwethu nomama kuloo ndibano, ndabona ukuba bavuya gqitha abo basincedayo sakhula ngokomoya. Ngoko ndandingayiqondi indlela ekuvuyisa ngayo ukwenza abafundi bakaYesu Kristu.
SAQALA ukwenza inkqubela yokuba ngabafundi kunyaka ongaphambi kwalowo. Lusathe thaa nangoku usuku oloyikekayo ngoSeptemba 1939 ukuqhambuka kweMfazwe Yehlabathi II. Ndabona iinyembezi zisihla kumama njengoko wayebuza, “Kutheni lungekho nje uxolo ehlabathini?” Abazali bam babesemkhosini kwiMfazwe Yehlabathi I ngoko babeyazi kakuhle intlungu yayo. Umama waya kubuza kumfundisi wecawa yamaTshetshi eBristol. Ekuphela kwento awayithethayo yile: “Kudala zikho iimfazwe ibe ziya kuhlala zikho.”
Zange kube kudala, ekhaya kwafika umama osele ekhulile, owayeliNgqina likaYehova. Nakuye umama wabuza: “Kutheni lungekho nje uxolo ehlabathini?” Elo Ngqina lachaza ukuba iimfazwe ziyinxalenye yomqondiso wokuba siphila ekuqoshelisweni kwale nkqubo yezinto inogonyamelo. (Mateyu 24:3-14) Ngokukhawuleza intombi yalo yaqalisa ukusifundela iBhayibhile. Bobabini babephakathi kwabo babevuya ukubhaptizwa kwethu. Yintoni le ivuyisa abantu kangaka xa besenza abafundi? Kamva, ndayifumana impendulo. Makhe ndikubalisele ngezinto endiye ndazifunda kwiminyaka engaphezu kwama-65 ndisenza abafundi.
Ukuzuza Uvuyo Lokufundisa
Ndaqala ukushumayela ngoBukumkani eBristol ndiseneminyaka eli-11 ubudala. Omnye umzalwana wandinika igramafoni nekhadi lokunikela ubungqina wathi: “Wena uza kuya kuzo zonke izindlu ezikweliya cala lesitrato.” Ndasuka ndatshona khona, ndihamba ndedwa. Enyanisweni, ndandisoyika. Ndandifika ndidlale intetho eshicilelweyo yeBhayibhile, emva koko ndibonise umninimzi ikhadi, elichazela abantu ukuba banokuzifumanela uncwadi lweBhayibhile.
Ekuqaleni kweye-1950, kwagxininiswa into yokufunda izibhalo ngokuthe ngqo eBhayibhileni xa sityelele emzini. Ekubeni ndineentloni, ekuqaleni kwaba nzima ukuncokola nomntu endingamaziyo ndicacisa iindinyana zeBhayibhile. Kodwa, ndade ndakwazi ukwenjenjalo. Lelo xesha kanye endaqala ngalo ukunandipha ubulungiseleli. Abanye abantu babecinga ukuba singabathengisi nje beencwadi, kodwa xa sifunda iindinyana zeBhayibhile size sizicacise, batsho basazi njengabafundisi beLizwi likaThixo. Oku kwaba mnandi gqitha kangangokuba ndafuna ukuba nenxaxheba ngakumbi. Ngoko ngoSeptemba 1955, ndaba nguvulindlela othe ngxi.
Ukuzingisa Kunomvuzo
Esinye sezifundo zokuqala endazifundayo kukuba ukuzingisa kunomvuzo. Kwesinye isihlandlo, ndashiya iphephancwadi IMboniselo kwelinye ibhinqa, uViolet Morice. Ukubuya kwam, lavula ucango genge, lasonga izandla laza laphulaphula ngenyameko njengoko ndicacisa iZibhalo. Rhoqo ndifika kulo, lalibonakala linomdla wokwenene. Kodwa ndathi ndakucela ukuba lamkele isifundo seBhayibhile, lathi: “Andinakulunga. Ndakuthi abantwana bakukhula ndiqale ndicinge ngaloo nto.” Ndaphoxeka ndamanzi. IBhayibhile ithetha ‘ngexesha lokufuna nexesha lokulahlekelwa.’ (INtshumayeli 3:6) Ndagqiba ekubeni ndingancami.
Kwadlula nje inyanga ndabuyela kuViolet saza saxubusha izibhalo ezithile. Zange kube kudala, sabe sesiqhuba isifundo seBhayibhile iveki nganye emnyango kwakhe. Ekugqibeleni wathi: “Ndicinga ukuba kuya kuba bhetele xa sifundela endlwini.” UViolet waba ngudadewethu nomhlobo wokwenene. Naye, wabhaptizwa waba liNgqina likaYehova.
Ngenye imini uViolet wothuswa kukuva ukuba umyeni wakhe uthengise umzi wabo ngoxa engazi waza wamshiya. Into evuyisayo kukuba, kwangaloo mini wancedwa lelinye iNgqina elingumhlobo wafumana omnye umzi. Ngenxa yombulelo kuYehova, wagqiba ekubeni abe nguvulindlela ubomi bakhe bonke. Ndathi ndakubona indlela ancedwa ngayo ngumoya kaYehova wazondelela unqulo oluyinyaniso, ndasiqonda isizathu sokuba abantu bavuye xa besenza abafundi. Ewe, lo yayiza kuba ngumsebenzi wobomi bam bonke.
Ngowe-1957, mna noMary Robinson sathunyelwa ukuya kuba ngoovulindlela kummandla wamashishini eRutherglen eGlasgow, eSkotlani. Sasishumayela kwimozulu eyahlukeneyo, kodwa sifumana umvuzo woko. Ngenye imini ndadibana noJessie. Ndakunandipha gqitha ukufunda iBhayibhile naye. Umyeni wakhe, uWally wayeliKomanisi ekuphepha ukudibana nam. Wathi akufunda iBhayibhile waza waqonda ukuba buBukumkani bukaThixo kuphela obuya kunceda abantu, wachulumanca gqitha. Bobabini baba ngabenzi babafundi.
Intsabelo Yokuqala Ingakukhohlisa
Kamva sanikwa isabelo esitsha ePaisley, eSkotlani. Ngenye imini xa sasishumayela, elinye inenekazi landivalela ngaphandle lingafuni nokuva. Kodwa laphuma kwangoko laya kundikhangela lifuna ukucela uxolo. Ukubuya kwam kwiveki elandelayo, lathi: “Kwasuka kwangathi ndivalele uThixo ngaphandle. Ndaziva ndinyanzelekile ukuba ndiye kukukhangela.” Igama lakhe yayinguPearl. Lachaza ukuba laliphoxwe ngabahlobo nezalamane zalo kangangokuba lalithandaze kuThixo licela umhlobo wokwenene. Lathi: “Nako wena ufika emnyango. Ndiye ndaqonda ukuba nguwe loo mhlobo wokwenene.”
Kwakungelula ukuba ngumhlobo kaPearl. Wayehlala enkcochoyini yenduli, ngoko kwakufuneka ndinyuke ngeenyawo ukuya kwakhe. Xa ndandiye kwakhe ndiye kumlandela ukuya kwiintlanganiso isihlandlo sokuqala, kwakusina kubhudla nomoya owaphantsa ukumka nam. Ndayilahla phaya iambrela yam ngenxa yokukrazuka. Kwiinyanga nje ezintandathu emva kokuba endivalele ngocango ngaphandle, uPearl wabhaptizwa.
Kungekudala, umyeni wakhe waqalisa ukufunda iBhayibhile, ibe zange kube kudala waya nam kubulungiseleli bendlu ngendlu. Njengesiqhelo kwakusina loo mini. Wathi: “Ungakhathazeki, ndiqhele ukuma emvuleni kangangeeyure ndibukele ibhola, ndingakwenza oko ngenxa kaYehova.” Ndihlala ndikothulel’ umnqwazi ukuzimisela kwabantu baseSkotlani.
Emva kweminyaka ndimkile apho, kwaba mnandi gqitha ukubuyela kwam ndifika inkoliso yabo ndafunda nabo ibambelele elukholweni. Yiloo nto ke evuyisayo ngokwenza abafundi. (1 Tesalonika 2:17-20) Ngowe-1966, emva kweminyaka esibhozo ndinguvulindlela eSkotlani, ndabizwa kwiSikolo seBhayibhile seWatchtower saseGiliyadi ndaqeqeshelwa ukuba ngumvangeli wasemazweni.
Ukushumayela Kwelinye Ilizwe
Ndasiwa eBolivia, kwidolophu eshinyene ngamahlathi iSanta Cruz, ekwakukho ibandla labantu abamalunga nama-50. Loo dolophu yandikhumbuza ubundlobongela baseNtshona njengokuba buboniswa kwifilimu zaseHollywood. Xa ndikhangela ngasemva, ndivakalelwa ukuba bendingumvangeli wasemazweni oqhelekileyo. Zange khe ndihlaselwe ziingwenywa, lihlokondiba elinogonyamelo, ndilahleke entlango, okanye ndaphukelwe yinqanawa elwandle. Ukanti, bendisoloko ndisonwatyiswa kukwenza abafundi.
Elinye lamanenekazi okuqala endafunda nawo iBhayibhile eSanta Cruz nguAntonia. Kwakunzima gqitha kum ukufundisa ngeSpanish. Unyana ka-Antonia oselula wakha wathi: “Mama, kutheni esithetha kakubi nje iSpanish, wenzela ukuba sihleke?” Nabo uAntonia nentombi yakhe uYolanda baba ngabafundi. UYolanda wayenomhlobo, ofundela ubugqwetha, uDito, naye owafunda iBhayibhile waza waya kwiintlanganiso. Kuye ndafunda into ethile ngokufundisa inyaniso yeBhayibhile: Maxa wambi kufuneka ukhe uthi nje ukusiqinisa nokuba kukancinane isandla.
Wathi akuqalisa ukungabikho xa siza kufunda, ndathi: “Dito, uYehova akasinyanzeli ukuba sixhase uBukumkani bakhe. Umele uzikhethele.” Wathi akuthi yena ufuna ukukhonza uThixo, ndathi: “Kule ndlu yakho unemifanekiso yenkokeli eququzelela imvukelo. Ngaba umntu ofika apha ayibone unokucinga ukuba wena ukhetha uBukumkani bukaThixo?” Yayifuneka noko into yokuqinisa isandla kuloo meko.
Kwiiveki nje ezimbini, kwabakho imvukelo kwadubulana abafundi baseyunivesithi namapolisa. UDito wakhwaza umhlobo wakhe wathi: “Masiphume apha!” Yena wathi: “Unotshe! Le yimini ekudala siyilindele,” watsho ebamba umbayimbayi ekhwela phezu kophahla lweyunivesithi. Kanye yena waba phakathi kwabahlobo bakaDito abasibhozo abafayo ngaloo mini. Nawe unokuyicinga indlela endivuya ngayo xa ndibona uDito, ekunokwenzeka ukuba naye ngewayefile ukuba wayengazange akhethe ukuba ngumKristu wokwenene.
Ukubona Umoya KaYehova Usebenza
Ngenye imini ndadlula phambi kwenye indlu, ndicinga ukuba sesingenile kuyo, xa ndakhwazwa libhinqa lalapho. Igama lalo yayinguIgnacia. Laliwazi amaNgqina kaYehova, kodwa inkcaso ekrakra yomyeni walo—isigantsontso sepolisa uAdalberto—yenza alakwazi ukwenza inkqubela yokomoya. Lalifuna ukwazi iimfundiso eziliqela nezisisiseko zeBhayibhile, ngoko ndafunda nalo iBhayibhile. Nakuba uAdalberto wayefuna ukusiphelisa eso sifundo seBhayibhile, ndakwazi ukuthetha naye ixesha elide ngeminye imibandela. Baba buyaqalisa ke ubuhlobo bethu.
Cinga nje indlela endavuya ngayo kukubona uIgnacia esiba lilungu lebandla elithandekayo, enyamekela abaninzi xa befuna uncedo ngokwenyama nangokomoya. Ethubeni, umyeni wakhe nabantwana babo abathathu baba ngamaNgqina. UAdalberto wathi akuyiqonda eyona ntsingiselo yeendaba ezilungileyo, wanehlombe gqitha. Wabuyela kwisikhululo samapolisa wancokola namanye kangangokuba wafumana imirhumo engama-200 yeMboniselo noVukani!
UYehova Uyakhulisa
Emva kokushumayela iminyaka emithandathu eSanta Cruz, ndathunyelwa kwisixeko esilikomkhulu laseBolivia, iLa Paz, apho ndachitha khona iminyaka engama-25. Ekuqaleni kweye-1970, babeli-12 abasebenzi abakwisebe lamaNgqina kaYehova eLa Paz. Njengoko wawusanda umsebenzi wokushumayela, kwafuneka izakhiwo ezikhulu kwaza kwakhiwa isebe elitsha kwisixeko esasikhula ngokukhawuleza iSanta Cruz. Ngowe-1998, isebe lafuduselwa apho, ibe ndabizwa ndalilungu labasebenzi balapho, esele bengaphezu kwama-50 ngoku.
Ngowe-1966, kwakukho ibandla elinye eSanta Cruz kodwa ngoku sele engaphezu kwama-50. AmaNgqina ayengama-640 ngoko eBolivia phantse ali-18 000 ngoku!
Into evuyisayo kukuba isabelo sam eBolivia siye sathwala iziqhamo. Noko ke, ndihlala ndikhuthazwa ngamanye amaKristu athembekileyo ezinye iindawo. Sonke siyavuya xa sibona indlela uYehova awusikelela ngayo umsebenzi wokushumayela ngoBukumkani. Kuvuyisa ngokwenene ukuba nenxaxheba kulo msebenzi wokwenza abafundi.—Mateyu 28:19, 20.
[Umfanekiso okwiphepha 13]
Xa ndandinguvulindlela eSkotlani
[Imifanekiso ekwiphepha 15]
Ndikhonza kwiofisi yesebe laseBolivia; (umfanekiso omncinane) abo baphumelele kwiklasi yama-42 eGiliyadi