Iingelosi—Igalelo Ezinalo Ebantwini

“Emva koko ndabona enye ingelosi isihla ivela ezulwini, inegunya elikhulu . . . Yadanduluka ngelizwi elinamandla, isithi: ‘Iwile! IBhabhiloni Enkulu iwile.’”—ISITYHILELO 18:1, 2.

1, 2. Yintoni ebonisa ukuba uYehova usebenzisa iingelosi ukuphumeza injongo yakhe?

NGOXA esekuthinjweni kwisiqithi sasePatmos, umpostile uYohane owalupheleyo uboniswa umbono osisiprofeto. Ubona iziganeko ezibangel’ umdla xa “ngempefumlelo” esiba “kwimini yeNkosi.” Lo mini iqalisa ngokubekwa kukaYesu Kristu etroneni ngowe-1914 ize iye kutsho ekupheleni koLawulo lwakhe Lweminyaka Eliwaka.—ISityhilelo 1:10.

² UYehova uThixo akazange amtyhilele ngokwakhe uYohane lo mbono. Wasebenzisa indlela ethile. ISityhilelo 1:1 sithi: “Isityhilelo ngoYesu Kristu, uThixo awamnika sona, ukuba abonise amakhoboka akhe izinto ezimele zenzeke kamsinya. Yaye wathumela ingelosi yakhe waza ngayo wasinikela ngemiqondiso kwikhoboka lakhe uYohane.” UYehova, ngoYesu, wasebenzisa ingelosi ukwazisa uYohane ngezinto ezimangalisayo eziphathelele “imini yeNkosi.” Ngesinye isihlandlo, uYohane ‘wabona enye ingelosi isihla ivela ezulwini, inegunya elikhulu.’ Wawuyintoni umsebenzi wale ngelosi? “Yadanduluka ngelizwi elinamandla, isithi: ‘Iwile! IBhabhiloni Enkulu iwile!’” (ISityhilelo 18:1, 2) Le ngelosi inamandla yayinikwe ilungelo lokuvakalisa ngokuwa kweBhabhiloni Enkulu, ubukhosi behlabathi bonqulo lobuxoki. Ewe, ngokuqinisekileyo uYehova unika iingelosi umsebenzi obalulekileyo, wokuphumeza ukuthanda kwakhe. Ngaphambi kokuhlolisisa ngokweenkcukacha indima ephunyezwa ziingelosi kwinjongo kaThixo nendlela ezisichaphazela ngayo, makhe siqwalasele indlela ezabakho ngayo ezi zidalwa zokomoya.

Zabakho Njani Iingelosi?

3. Yiyiphi ingcamango ephosakeleyo abanayo abaninzi ngokuphathelele iingelosi?

³ Izigidi zabantu namhlanje ziyakholelwa ukuba zikho iingelosi. Kodwa abaninzi baneengcamango eziphosakeleyo ngazo nangemvelaphi yazo. Ngokomzekelo, abanye abantu bonqulo bacinga ukuba xa isalamane okanye umhlobo wabo esifa, uya kuThixo aze abe yingelosi. Ngaba leyo yinto efundiswa liLizwi likaThixo ngokuphathelele ukudalwa kweengelosi nenjongo yokubakho kwazo?

4. IZibhalo zithi zabakho njani iingelosi?

⁴ Eyona ngelosi inamandla negunya—ingelosi enkulu—nguMikayeli isiphatha-zingelosi. (Yude 9) Le ngelosi nguYesu Kristu. (1 Tesalonika 4:16) Kwiminyaka emininzi eyadlulayo, xa uYehova waqalisa ukudala, isidalwa sokuqala awasidalayo yaba yile ngelosi, uNyana wakhe. (ISityhilelo 3:14) Kamva, esebenzisa lo Nyana ulizibulo, uYehova wadala zonke ezinye izidalwa ezingumoya. (Kolose 1:15-17) Ebhekisela kwezi zidalwa zizingelosi njengoonyana bakhe, uYehova wabuza usolusapho uYobhi: “Wawuphi na ekusekeni kwam umhlaba? Ndixelele, ukuba uyakwazi ukuqonda. . . . Ngubani owabeka ilitye lawo lembombo, xa amakhwezi amemelela kunye ngovuyo, yaye bonke oonyana bakaThixo bakhwaza bencoma?” (Yobhi 38:4, 6, 7) Ngokucacileyo, iingelosi zadalwa nguThixo ibe zabakho kude kudala ngaphambi kokuba abantu babekho.

5. Zilungelelaniswe njani iingelosi?

⁵ Eyoku-1 kwabaseKorinte 14:33 ithi: “UThixo unguThixo, kungekhona owesidubedube, kodwa owoxolo.” UYehova walungelelanisa oonyana bakhe bomoya ngokweendidi ezintathu: (1) iiserafi, ezingabalindi kwitrone kaThixo, zivakalisa ukuba ngcwele kwakhe, zize zigcine abantu bakhe becocekile ngokomoya; (2) iikherubhi, eziphakamisa ukongama kukaYehova; (3) nezinye iingelosi ezenza ukuthanda kwakhe. (INdumiso 103:20; Isaya 6:1-3; Hezekile 10:3-5; Daniyeli 7:10) Ziziphi iindlela ezibuchaphazela ngayo ubomi babantu lo mkhosi wezidalwa zomoya?—ISityhilelo 5:11.

Yiyiphi Indima Ephunyezwa Ziingelosi?

6. UYehova wazisebenzisa njani iikherubhi kumyezo wase-Eden?

⁶ KwiGenesis 3:24 kulapho kuthethwa ngezidalwa ezingumoya okwesihlandlo sokuqala, kusithiwa: “[UYehova] wamgxotha ke umntu waza wamisa ngasempuma komyezo wase-Eden iikherubhi nencakuba yekrele enelangatye nejikajikayo ukuba iqhubeke ilinde indlela eya emthini wobomi.” Ezi kherubhi zenza ukuba uAdam noEva bangakwazi ukuphinda bangene kwikhaya labo lokuqala elingumyezo. Oku kwenzeka ekuqaleni kwembali yabantu. Yiyiphi indima eye yaphunyezwa ziingelosi ukususela ngoko?

7. Intsingiselo yegama elithi “ingelosi” kwiilwimi zantlandlolo ibonisa ukuba yiyiphi enye indima ephunyezwa ziingelosi?

⁷ Iingelosi zikhankanywa phantse izihlandlo ezingama-400 eBhayibhileni. Igama lesiHebhere nelesiGrike elithi “ingelosi” linokuguqulelwa ngothi “umthunywa.” Ngoko ke uThixo ebethetha nabantu esebenzisa zona. Njengoko kuye kwaboniswa kwiziqendu ezibini zokuqala zeli nqaku, uYehova wasebenzisa ingelosi ukudlulisa isigidimi sakhe kumpostile uYohane.

8, 9. (a) Lwabachaphazela njani uManowa nomfazi wakhe utyelelo lwengelosi? (b) Yintoni enokufundwa ngabazali ekutyelelweni kukaManowa yingelosi kaThixo?

⁸ Iingelosi zikwasetyenziselwa ukuxhasa nokukhuthaza abakhonzi bakaThixo emhlabeni. Ngokomzekelo, ngexesha laBagwebi kwaSirayeli, uManowa nomfazi wakhe owayeludlolo babemfuna ngamandla umntwana. UYehova wathumela ingelosi yakhe ukuya kuxelela umfazi kaManowa ukuba wayeza kuba nonyana. Le ngxelo ithi: “Khangela! uya kumitha, kwaye ngokuqinisekileyo uya kuzala unyana, yaye incakuba ayiyi kufika entlokweni yakhe, ngenxa yokuba umntwana lowo uya kuba ngumNaziri kaThixo ekuphumeni kwakhe esiswini; yaye nguye oya kukhokela ekusindiseni uSirayeli esandleni samaFilisti.”—ABagwebi 13:1-5.

⁹ Ekugqibeleni umfazi kaManowa wazala unyana, uSamson, owaba yindumasi kwimbali yeBhayibhile. (ABagwebi 13:24) Ngaphambi kokuba lo mntwana azalwe, uManowa wacela ukuba le ngelosi iphinde ibuye ukuze ibayalele indlela abamele bayikhulise ngayo le nkwenkwe. UManowa wabuza: “Koba luhlobo luni na ukuphila komntwana nomsebenzi wakhe?” Ingelosi kaYehova yaphinda imiyalelo eyayiyinike umfazi kaManowa. (ABagwebi 13:6-14) Kufanele ukuba oko kwamkhuthaza gqitha uManowa. Namhlanje iingelosi azibatyeleli ngalo ndlela abantu, kodwa njengoManowa, abazali bafanele bafune ulwalathiso lukaYehova xa beqeqesha abantwana babo.—Efese 6:4.

10, 11. (a) UElisha nomkhonzi wakhe bavakalelwa njani xa baberhangqwe ngumkhosi wamaSiriya? (b) Yintoni esinokuyizuza ngokuqwalasela esi siganeko?

¹⁰ Kukho omnye umzekelo obangel’ umdla wokuncedwa ziingelosi ngomhla womprofeti uElisha. UElisha wayehlala eDotan, isixeko sakwaSirayeli. Ngenye imini xa umkhonzi kaElisha wavuka ngentseni waza wajonga phandle, wabona ukuba isixeko sirhangqwe ngamahashe neenqwelo zokulwa. Ukumkani waseSiriya wayethumele umkhosi onamandla ukuya kubamba uElisha. Wenza ntoni umkhonzi kaElisha? Esoyika, mhlawumbi ephakuzela, wakhala esithi: “Awu, nkosi yam! Siza kwenza ntoni na?” Wayebona ukuba ukufa kufikile. Kodwa uElisha wathi: “Musa ukoyika, ngokuba baninzi ngakumbi abo bakunye nathi ngaphezu kwabo bakunye nabo.” Wayethetha ukuthini?—2 Kumkani 6:11-16.

¹¹ UElisha wayeqonda ukuba kukho umkhosi weengelosi owawuza kumxhasa. Noko ke, umkhonzi wakhe wayengaboni nto. Ngoko “uElisha wathandaza esithi: ‘Owu Yehova, khawuncede uvule amehlo akhe, ukuze abone.’ Ngoko nangoko uYehova wawavula amehlo omlindi, kangangokuba wabona; yaye khangela! ummandla weentaba wawuzele ngamahashe neenqwelo zokulwa zomlilo zijikeleze uElisha.” (2 Kumkani 6:17) Ngoko lo mkhonzi wakwazi ukubona umkhosi weengelosi. Ngamehlo okomoya, nathi sinokubona ukuba iingelosi zinikela uncedo zize zikhusele abantu bakaYehova phantsi kolwalathiso lukaYehova noKristu.

Inkxaso Yeengelosi Ngomhla KaKristu

12. Ingelosi uGabriyeli yamomeleza njani uMariya?

¹² Cinga ngendlela eyomelezwa ngayo intombi enyulu engumYuda uMariya xa yeva ezi ndaba: “Uya kukhawula esibelekweni sakho uze uzale unyana, umbize ngokuba nguYesu igama lakhe.” Ngaphambi nje kokuba idlulise esi sigidimi sikhwankqisayo, ingelosi uGabriyeli, eyayithunywe nguThixo, yathi kuMariya: “Musa ukoyika, Mariya, kuba ukholekile kuThixo.” (Luka 1:26, 27, 30, 31) UMariya umele ukuba wakhuthazwa waza womelezwa ngala mazwi amqinisekisa ukuba uThixo uyakholiswa nguye.

13. Iingelosi zamxhasa njani uYesu?

¹³ Ngesinye isihlandlo iingelosi zaxhasa uYesu emva kokuba exhathise izilingo ezithathu awazifumana kuSathana entlango. Ingxelo isixelela ukuba emva kolu vavanyo, “uMtyholi wamshiya, yaye, khangela! iingelosi zeza zaza zamlungiselela.” (Mateyu 4:1-11) Kwenzeka into efanayo nangobusuku bangaphambi kokufa kukaYesu. Ebuhlungu, uYesu waguqa ngamadolo waza waqalisa ukuthandaza, esithi: “‘Bawo, ukuba uyanqwena, yishenxise le ndebe kum. Noko ke, makwenzeke, kungekhona ukuthanda kwam, kodwa okwakho.’ Ngoko ingelosi evela ezulwini yabonakala kuye yaza yamomeleza.” (Luka 22:42, 43) Iingelosi zisixhasa njani namhlanje?

Inkxaso Yeengelosi Kule Mihla

14. Yiyiphi intshutshiso eye yanyamezelwa ngamaNgqina kaYehova kule mihla, ibe oko kuye kwaba nawuphi umphumo?

¹⁴ Xa siqwalasela imbali yale mihla yomsebenzi wokushumayela kwamaNgqina kaYehova, ngaba asibuboni ubungqina bokuba iingelosi zinikela inkxaso? Ngokomzekelo, abantu bakaYehova banyamezela ukutshutshiswa ngamaNazi eJamani naseNtshona Yurophu ngaphambi nasebudeni beMfazwe Yehlabathi II (1939-45). Phantsi kolawulo lwamaKatolika angamaFasi eItali, eSpeyin nasePortugal, kwafuneka benyamezele intshutshiso ixesha elide. Kangangamashumi eminyaka banyamezela intshutshiso kumazwe awayesakuba yiSoviet Union nalawo ayephantsi kwayo. Omnye umzekelo yintshutshiso eye yanyamezelwa ngamaNgqina kumazwe athile eAfrika.a Kutshanje, abakhonzi bakaYehova baye batshutshiswa ngokukrakra kwilizwe laseGeorgia. USathana uye wenza konke okusemandleni akhe ukuphelisa umsebenzi wamaNgqina kaYehova. Sekunjalo, njengentlangano, aye azinyamezela ezo ntshutshiso aza anda. Konke oku kuye kwenzeka ngenxa yokuba iingelosi ziye zaba negalelo ekukhuseleni abantu bakaYehova.—INdumiso 34:7; Daniyeli 3:28; 6:22.

15, 16. AmaNgqina kaYehova axhaswa njani ziingelosi kubulungiseleli bawo ehlabathini lonke?

¹⁵ AmaNgqina kaYehova awuthabatha nzulu umsebenzi wawo wokushumayela ngoBukumkani bukaThixo emhlabeni wonke nokwenza abafundi ngokufundisa abantu abanomdla inyaniso yeBhayibhile kuzo zonke iindawo. (Mateyu 28:19, 20) Noko ke, ayazi ukuba akanako ukuwenza lo msebenzi ngaphandle kokuxhaswa ziingelosi. Ngoko ke, oko kubhalwe kwiSityhilelo 14:6, 7 bekusoloko kuwakhuthaza. Apho sifunda la mazwi: “[Mna mpostile uYohane] ndabona enye ingelosi iphaphazela esazulwini sezulu, ineendaba ezilungileyo ezingunaphakade ukuba izivakalise njengesigidimi esichulumancisayo kwabo bahleli emhlabeni, nakuzo zonke iintlanga nezizwe neelwimi nabantu, isithi ngelizwi elikhulu: ‘Moyikeni uThixo nimzukise, kuba lifikile ilixa lokugweba kwakhe, ngoko mnquleni Lowo wenza izulu nomhlaba nolwandle nemithombo yamanzi.’”

¹⁶ La mazwi abonisa ngokucacileyo ukuba umsebenzi wokushumayela wamaNgqina kaYehova owenziwa ehlabathini lonke uxhaswa uze walathiswe ziingelosi. UYehova usebenzisa iingelosi zakhe ukwalathisa abantu abanyanisekileyo kumaNgqina akhe. Iingelosi ziye zakhokelela namaNgqina kwabo bafanelekayo. Oko sikubona kwisibakala sokuba izihlandlo ezininzi—oku kwenzeka ngokufuthi kangangokuba akunakuba yinto eyenzeka ngebhaqo—omnye wamaNgqina kaYehova edibana nomntu othile ngexesha kanye asengxakini ngalo efuna uncedo lokomoya.

Ziza Kwenza Umsebenzi Omkhulu Kakhulu Kungekudala

17. Yintoni eyenzeka kuma-Asiriya xa ahlaselwa yingelosi enye?

¹⁷ Ukongezelela ekubeni ngabathunywa nokomeleza abakhonzi bakaYehova, iingelosi zinomnye umsebenzi. Mandulo, zazidlulisela imigwebo kaThixo. Ngokomzekelo, kwinkulungwane yesibhozo ngaphambi kweXesha Eliqhelekileyo, iYerusalem yayisongelwa ngumkhosi omkhulu wamajoni ase-Asiriya. Wenza ntoni uYehova? Wathi: “Ngokuqinisekileyo ndiya kusikhusela esi sixeko ukuze ndisisindise ngenxa yam nangenxa kaDavide umkhonzi wam.” Ingxelo yeBhayibhile isixelela okwenzekayo, ithi: “Kwathi ngobo busuku ingelosi kaYehova yaphuma yaxabela ikhulu elinamashumi asibhozo anesihlanu lamawaka elalisenkampini yama-Asiriya. Ekuvukeni kwabo abantu ekuseni, kaloku, khangela bonke babefile bezizidumbu.” (2 Kumkani 19:34, 35) Imikhosi yabantu asiyonto xa ithelekiswa namandla engelosi nje enye.

18, 19. Nguwuphi umsebenzi omkhulu oza kwenziwa ziingelosi kungekudala, ibe oko kuza kubachaphazela njani abantu?

¹⁸ Sele kumbovu ukuba iingelosi ziphumeze umgwebo kaThixo. Kungekudala, uYesu uza kuza ‘neengelosi zakhe ezinamandla esemlilweni odangazelayo.’ Umsebenzi wazo iya kuba ‘kukuphindezela abo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu.’ (2 Tesalonika 1:7, 8) Oku kuya kubachaphazela gqitha abantu. Abo bangafuni kuzamkela iindaba ezilungileyo zoBukumkani bukaThixo ezivakaliswa emhlabeni wonke baza kutshatyalaliswa. Kuphela ngabo bafuna uYehova, ubulungisa nolulamo abaya “kufihlwa ngemini yomsindo kaYehova” baze bangatshatyalaliswa.—Zefaniya 2:3.

¹⁹ Simele sibe nombulelo ngento yokuba uYehova esebenzisa iingelosi zakhe ezinamandla ukuxhasa nokomeleza abakhonzi bakhe emhlabeni. Ukuqonda kwethu indima ephunyezwa ziingelosi kwinjongo kaThixo kuthuthuzela ngokwenene, ekubeni kukho iingelosi ezavukela uYehova zaza zaba phantsi kolawulo lukaSathana. Inqaku elilandelayo liza kuxubusha amanyathelo afanelwe athatyathwe ngamaKristu okwenyaniso ukuze azikhusele kwimpembelelo enamandla kaSathana uMtyholi needemon zakhe.

[Umbhalo osemazantsi]

Ufunde Ntoni?

• Zabakho njani iingelosi?

• Zazisetyenziswa njani iingelosi ngexesha lokubhalwa kweBhayibhile?

• ISityhilelo 14:6, 7 sithi yintoni umsebenzi weengelosi namhlanje?

• Nguwuphi umsebenzi omkhulu oza kwenziwa ziingelosi kungekudala?

[Umfanekiso okwiphepha 22]

UManowa nomfazi wakhe bakhuthazwa yingelosi

[Umfanekiso okwiphepha 23]

“Baninzi ngakumbi abo bakunye nathi ngaphezu kwabo bakunye nabo”