Uncedo Oluvela ‘KuThixo Onika Unyamezelo Nentuthuzelo’

KWIMINYAKA engama-2 000 eyadlulayo, umbhali weBhayibhile uPawulos wathi uYehova ‘nguThixo onika unyamezelo nentuthuzelo.’ (Roma 15:5) Ekubeni iBhayibhile isiqinisekisa ukuba uYehova akaguquguquki, sinokuqiniseka ukuba uThixo usabathuthuzela abo bamkhonzayo. (Yakobi 1:17) Phofu ke, iBhayibhile ithi uYehova ubathuthuzela ngeendlela ezahlukahlukeneyo abo bafuna intuthuzelo. Ziziphi ezinye zezi ndlela? UThixo uyabomeleza abo bacela uncedo ngomthandazo. Kwakhona, ubangela ukuba amaKristu okwenyaniso athuthuzele abo akhonza nabo. Yaye eLizwini lakhe iBhayibhile, uYehova unikela iingxelo ezifudumez’ intliziyo ezibomeleza ngokukhethekileyo abo basentlungwini yokufelwa ngabantwana. Makhe siqwalasele nganye yezi ndlela zintathu abomeleza ngazo abantu.

“UYehova Weva”

UKumkani uDavide wabhala wenjenje ngoMdali wethu uYehova: “Kholosani ngaye ngamaxesha onke, nina bantu. Phalazani intliziyo yenu phambi kwakhe. UThixo uyindawo yethu yokusabela.” (INdumiso 62:8) Kwakutheni ukuze uDavide amthembe ngolu hlobo uYehova? Ethetha ngaye siqu, uDavide wathi: “Lo uxhwalekileyo wabiza, waza uYehova weva. Yaye wamsindisa kuko konke ukubandezeleka kwakhe.” (INdumiso 34:6) Kuzo zonke iimeko ezibandezelayo awayetyhubela kuzo, wayesoloko ethandaza kuThixo ecela uncedo, yaye uYehova wayemnceda. UDavide wayesazi ngokusuka kwizinto aye watyhubela kuzo ukuba uThixo wayeza kumxhasa aze amncede.

Abazali abafelweyo kufuneka bazi ukuba uYehova uza kubaxhasa kwintlungu engathethekiyo abanayo, njengoko wenzayo kuDavide. Banokuya ‘kuMphulaphuli wemithandazo,’ benethemba lokuba uza kubanceda. (INdumiso 65:2) UWilliam, ekuthethwe ngaye kwinqaku elandulelayo wathi: “Izihlandlo ezininzi, xa ndivakalelwa kukuba kunzima ukuphila ngaphandle konyana wam, ndiye ndicele uncedo kuYehova. Usoloko endipha amandla nenkalipho ukuze ndiqhubeke ndiphila.” Ukuba nawe usoloko uthandaza kuYehova unokholo, uThixo omkhulu wamazulu uya kukuxhasa. Ngaphezu koko, uYehova uThixo uthembisa abo bazama ngamandla ukumkhonza esithi: “Kuba mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”—Isaya 41:13.

Inkxaso Yabahlobo Bokwenene

Abazali abafelwe ngumntwana bafuna ixesha lokuba bakhe babe bodwa, bazilele umntwana wabo yaye bajamelane neemvakalelo abanazo. Noko ke, ayibobulumko ukuba babe bodwa ixesha elide. Ngokutsho kweMizekeliso 18:1, “ozahlulayo” unokwenzakala. Ngoko ke, abo basentlungwini yokufelwa bafanele bakulumkele ukuba ngoonkom’ edla yodwa.

Abahlobo aboyika uThixo banokubanceda abo babandezelekileyo. IMizekeliso 17:17 ithi: “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.” Emva kokuba uLucy, ekuthethwe ngaye kwinqaku elandulelayo, efelwe ngunyana wakhe, wathuthuzelwa ngabahlobo bokwenene. Ethetha ngabahlobo bakhe abasebandleni, wathi: “Ukusityelela kwabo kwasinceda ngokwenene, ngoxa ngamathub’ athile kwakungekho nto ingako bayithethayo. Omnye wabahlobo bam wayendityelela ngeentsuku endandiziva ndililolo ngazo. Wayesazi ukuba ndisekhaya yaye ndiyalila, aze eze kukhala nam. Omnye wayendifowunela rhoqo endikhuthaza. Abanye babesimemela isidlo emizini yabo, yaye babeqhubeka besenjenjalo.”

Nangona intlungu ababa nayo abazali xa befelwe ngumntwana ingapheli ngokukhawuleza, baya kuthuthuzeleka ngokwenene xa bethandaza kuThixo yaye benxulumana nabahlobo bokwenene abangamaKristu. UYehova uye wanabazali abangamaKristu abaninzi abafelwe ngabantwana. Ewe, uYehova “uyabaphilisa abo baphuke intliziyo, uyazibopha iindawo zabo ezibuhlungu.”—INdumiso 147:3.

Ingxelo Ethuthuzelayo YeBhayibhile

Ukongezelela kumthandazo nonxulumano olwakhayo, iLizwi likaThixo elibhaliweyo lingumthombo wentuthuzelo kwabo bazilileyo. Iingxelo eziseBhayibhileni zibonisa ukuba uYesu uyakulangazelela ukususa intlungu yabazali abafelweyo yaye unamandla okubuyisela abafi ebomini. Iingxelo ezifana nezi zibathuthuzela ngokwenene abo basentlungwini yokufelwa. Makhe siqwalasele ezimbini zezi ngxelo.

ULuka isahluko 7 uchaza into eyenzekayo xa uYesu wadibana nabantu ababeye kungcwaba kwisixeko saseNayin. Babeye kungcwaba okuphela konyana womhlolokazi. Indinyana 13 ithi: “Yathi yakumbona iNkosi, yaba nosizi ngaye, yaza yathi kuye: ‘Musa ukulila.’”

Bambalwa abantu abanokuba nesibindi sokuxelela umama ofelwe ngunyana ukuba ayeke ukukhala. Kwakutheni ukuze uYesu athethe ngolu hlobo? Kungenxa yokuba wayesazi ukuba intlungu yaloo mama yayiza kuthi shwaka kungekudala. Le ngxelo ihlabela mgama isithi: ‘UYesu wasondela, wachukumisa ithala, baza bema ngxi abo babethwele, wathi: “Mfana, ndithi kuwe, Vuka!” Wavuka umfi wahlala nkqo waza wathetha, wandula ke wamnikela kunina.’ (Luka 7:14, 15) Inokuba zaphinda zehla iinyembezi kumama womfana, kodwa ke ngoku, iziinyembezi zovuyo.

Ngesinye isihlandlo, indoda egama linguYayiro yeza kucela uYesu ukuba ayincede kuba intombi yayo eneminyaka eli-12 ubudala igulela ukufa. Esandul’ ukuthetha noYesu, uYayiro waxelelwa ukuba intombi yakhe ifile. Ezi ndaba zayenza yalihlwili intliziyo kaYayiro, kodwa uYesu wathi kuye: “Musa ukuba noloyiko, kuphela bonisa ukholo.” UYesu waya ekhayeni laloo ntombi ifileyo. Wayibamba ngesandla waza wathi: “Ntombazana, ndithi kuwe, Vuka!” Kwenzeka ntoni? “Yavuka ngoko nangoko intombi yaza yahambahamba.” Benza ntoni abazali bayo? “Bathi phithi bethabatheke ngokugqithiseleyo.” UYayiro nomfazi wakhe bayanga intombi yabo bevuya ngokwenene. Yayingathi bayaphupha.—Marko 5:22-24, 35-43.

Ezi ngxelo zeBhayibhile zineenkcukacha ngovuko zibonisa into abanokukhangela phambili kuyo abazali abasentlungwini yokufelwa namhlanje. UYesu wathi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume.” (Yohane 5:28, 29) Injongo kaYehova kukuba uNyana wakhe abavuse abo bafileyo. Izigidi ezingenakubaleka zabantwana abafileyo ziya ‘kuliva ilizwi lakhe’ xa esithi: ‘Ndithi kuni, Vukani!’ Abo baselula baya kuphinda bahambe yaye bathethe. Yaye njengoYayiro nomfazi wakhe, abazali babo bantwana baya ‘kuthi phithi bethabatheke ngokugqithiseleyo.’

Ukuba ufelwe ngunyana okanye intombi, musa ukulibala ukuba uYehova unokuzijika ezo nyembezi zentlungu zibe zezovuyo, ngokumvusa. Ukuze nawe ube neli themba liqaqambileyo, thobela isibongozo somdumisi esithi: “Funani uYehova namandla akhe. Funani ubuso bakhe rhoqo. Khumbulani imisebenzi yakhe emangalisayo ayenzileyo.” (INdumiso 105:4, 5) Ewe, khonza uThixo oyinyaniso uYehova, yaye umkhonze ngendlela afuna ngayo.

Yiyiphi imiphumo oya kuyifumana ngokukhawuleza ukuba ‘ufuna uYehova’? Ukuthandaza kuThixo kuya kukomeleza, uya kuthuthuzelwa yinkxalabo enothando yabahlobo bokwenene abangamaKristu, yaye ngokufunda iLizwi likaThixo uya kuziva uhlaziyekile. Ngaphezu koko, kwixa elizayo nelingekude, uYehova uya kukwenzela ‘imisebenzi emangalisayo’ oya kuyinandipha ngonaphakade, neya kunanditshwa ngumntwana wakho ovusiweyo.

[Ibhokisi ekwiphepha 5]

“Khawuze Nela Bhinqa Lafelwa Ngabantwana Ababini”

Isibini saseNigeria esingamaNgqina kaYehova, uKehinde noBintu, safelwa ngabantwana baso ababini kwingozi yemoto. Iintliziyo zaso ziselihlwili nanamhlanje. Sekunjalo, saye somelezwa kukuthembela kuYehova, yaye siqhubeka sixelela abamelwane baso ngesigidimi sethemba esiseBhayibhileni.

Abanye baye baphawula indlela abaseluxolweni nabomelele ngayo uKehinde noBintu. Ngenye imini uNksk. Ukoli wathi komnye wabahlobo bakaBintu: “Khawuze nela bhinqa lafelwa ngabantwana ababini ngexesha elinye nelingekayeki nangoku ukushumayela isigidimi seBhayibhile. Ndifuna ukwazi ukuba lomelezwa yintoni.” Akufika uBintu, uNksk. Ukoli wathi: “Ndifuna ukwazi isizathu sokuba ungayeki ukushumayela ngalo Thixo ubulele abantwana bakho. UThixo wathabatha okuphela kwentombazana endandinayo. Ukususela ngoko, ndaphelelwa ngumdla kuThixo.” Ngokuphuma eBhayibhileni uBintu wamcacisela isizathu sokuba abantu bafe nokuba kutheni simele sibe ne themba lokuba abantu bethu esibathandayo abafileyo baza kuvuswa.—IZenzo 24:15; Roma 5:12.

Emva koko, uNksk. Ukoli wathi: “Bendisoloko ndicinga ukuba nguThixo obulalayo. Ngoku ndiyayazi inyaniso.” Wagqiba kwelokuba afunde iBhayibhile namaNgqina kaYehova ukuze afunde okungakumbi ngezithembiso zikaThixo.

[Ibhokisi ekwiphepha 6]

‘Ndifuna Ukunceda, Kodwa Andazi Ukuba Ndinganceda Njani’

Ngoxa abazali nezalamane zomntwana ofileyo ziba selusizini, abahlobo babo banokuba sengxakini. Bafuna ukuxhasa intsapho kodwa boyika ukuba ukutsho okanye ukwenza into ephosakeleyo kunokubangela intlungu engakumbi. Nanga amacebiso kwabo basenokucinga oku, ‘Ndiyafuna ukunceda, kodwa andazi ukuba ndinganceda njani.’

❖ Musa ukuhambela kude kubantu abafelweyo kuba ungazi ukuba uza kuthini okanye uza kwenzani. Ngobukho nje bakho, bayomelela. Ukuba akuyazi into omawuyithethe, ukubanga uze utsho ngokunyanisekileyo ukuba uyavelana nabo kubenza baqonde ukuba ubakhathalele. Ngaba woyika ukuba xa ulila ubenza babe buhlungu ngakumbi? IBhayibhile ithi: “Lilani kunye nabantu abalilayo.” (Roma 12:15) Ngeenyembezi zakho ubonisa ukuba ubuhlungu kunye nabo yaye oko kuyathuthuzela.

❖ Makuqale wena. Ngaba unokuyenzela isidlo nje esilula loo ntsapho? Ngaba unokuyihlambela izitya? Ngaba unokuyenzela imisetyenzana ethile? Musa ukuthi, “Nindazise xa kukho nantoni na eniyifunayo.” Nokuba oko ukuthetha unyanisekile, amazwi anjalo axelela abazali abafelweyo ukuba awunakukwazi ukubanceda kuba uxakeke gqitha. Kunoko babuze oku, “Yintoni ebeningathanda ndinincede ngayo?” uze wenze loo nto bakucela ukuba uyenze. Kodwa kulumkele ukungena kwiindawo ezingangenwayo ngabanye abantu emzini wabo okanye ufak’ impumlo kwimicimbi yabo.

❖ Kulumkele ukuthi, “Ndiyayazi indlela enivakalelwa ngayo.” Abantu bavakalelwa ngeendlela ezahlukahlukeneyo xa befelwe ngabantu ababathandayo. Nokuba nawe ukhe wafelwa ngumntwana, akuyazi indlela bona abavakalelwa ngayo.

❖ Kuza kukhe kuhambe ixesha ngaphambi kokuba babuyele kubomi babo obuqhelekileyo. Qhubeka ubanceda kangangoko unako. Kwiintsuku zokuqala, abantu bangena bephuma beze kubona loo ntsapho isentlungwini, kodwa naxa sele kudlule ixesha iseza kubafuna abantu. Zenze ufumaneke xa befuna uncedo nakwiiveki okanye kwiinyanga zasemva kwesiganeko.a

[Umbhalo osemazantsi]

[Imifanekiso ekwiphepha 7]

Iingxelo eziseBhayibhileni zibonisa ukuba uYesu unamandla okubuyisela abantwana ebomini yaye ulangazelela kanye oko