Ibali Lobomi

Safuna Saza Safumana Ubuncwane Obuhlala Buhleli

Kubalisa uDorothea Smith noDora Ward

Sasifuna ubuncwane obunjani? Sasingamantombazana amabini awayelangazelela ukuba nenxaxheba kwinzaliseko yomyalelo kaYesu othi: ‘Hambani niye kubenza abafundi abantu beentlanga zonke.’ (Mateyu 28:19) Makhe sikubalisele indlela eli phulo elakhokelela ngayo kubuncwane obuhlala buhleli.

UDOROTHEA: Ndazalwa ngowe-1915, kungekudala emva kokuqalisa kweMfazwe Yehlabathi I. Ndandingowokugqibela kubantwana abathathu ekhaya. Sasihlala kufuphi naseHowell, eMichigan, eUnited States. UTata wayengengomntu wecawa, uMama yena wayemoyika uThixo. Wazama ukusifundisa oko kubhalwe kwiMithetho Elishumi, kodwa wayekhathazwa kukuba mna, umntakwethu uWillis kunye nodadewethu uViola sasingahambi nayiphi na icawa.

Xa ndandineminyaka eli-12 ubudala, uMama wagqiba ekubeni ndibhaptizwe kwiCawa yaseRhabe. Ndisawukhumbula kakuhle umhla endabhaptizwa ngawo. Ndabhaptizwa kunye neemveku ezimbini ezazifunqulwe ngoonina. Ndaziva ndithotywe isidima. Umfundisi wandifefa ngamanzi entloko ethetha into endingayivayo. Xa ndithetha inyani, kwakumnyama thsu kum ngobhaptizo!

Ngenye imini ngowe-1932, seva kungena imoto ekhaya, uMama waya kuvula emnyango. Kwakumi abafana ababini ababehambisa iincwadi zecawa. Omnye wathi unguAlbert Schroeder. Wabonisa uMama iimpapasho zamaNgqina kaYehova yaye uMama wazithabatha ezo ncwadi. Wancedwa zezo mpapasho ukuze amkele inyaniso yeLizwi likaThixo.

Siqalisa Ukufuna Ubuncwane

Kamva, ndaya kuhlala nodadewethu eDetroit. Apho ndadibana nenenekazi esele likhulile elaliye kufundisa udadewethu iBhayibhile. Ezo ngxubusho zandikhumbuza inkqubo kanomathotholo eyayiqhutywa kanye ngeveki endandiyiphulaphula noMama. Kule nkqubo, uJ. F. Rutherford, owayesalathisa amaNgqina kaYehova ngelo xesha, wayenikela intetho yeBhayibhile yemizuzu eli-15. Ngowe-1937 saqalisa ukuya kwibandla lokuqala lamaNgqina kaYehova eDetroit. Ngonyaka olandelayo ndabhaptizwa.

Ekuqaleni kweminyaka yee-1940, kwenziwa isaziso sokuba amaNgqina kaYehova avula isikolo ekuza kuqeqeshwa kuso abavangeli basemazweni esibizwa ngokuba yiGiliyadi, eSouth Lansing, eNew York. Ndathi ndakuva ukuba abanye babo baphumelele kwesi sikolo basenokuthunyelwa kumazwe asemzini, ndazixelela oku, ‘Sindifanele esi sikolo!’ Ndazibekela usukelo lokuya eGiliyadi. Hayi indlela ekuya kuba lilungelo ngayo ukuya kufuna ‘ubuncwane’—oko kukuthi, abantu abafuna ukuba ngabafundi bakaYesu Kristu, kwamanye amazwe!—Hagayi 2:6, 7.

Ukufikelela Usukelo Lwam Ngokuthe Ngcembe

NgoAprili 1942, ndayeka emsebenzini, ndaya kuba nguvulindlela okanye umvangeli wexesha elizeleyo eFindlay, eOhio kunye nabanye oodade bokomoya abahlanu. Kwakungekho bandla, kodwa sasikhuthazana ngokufunda amanqaku eempapasho zethu zamaKristu njengeqela. Kwinyanga yokuqala ndinguvulindlela, ndahambisela abantu abanomdla iincwadi ezingama-95! Kwisithuba esingangonyaka onesiqingatha kamva, ndafumana isabelo sokuya kuba nguvulindlela okhethekileyo eChambersburg, ePennsylvania. Apho ndafika ndakunye nabanye oovulindlela abahlanu, ekwakukho kubo uDora Ward, udade ongumKristu ovela eIowa. Ndasebenza kunye noDora. Sabhaptizwa ngonyaka omnye, yaye sobabini sasilangazelela ukuya kwiSikolo saseGiliyadi nokuya kukhonza kumazwe asemzini njengabavangeli basemazweni.

Lwafika usuku olungalibalekiyo ekuqaleni kowe-1944! Sobabini safumana isimemo sokuya kwiklasi yesine yaseGiliyadi. Saqalisa ngoAgasti waloo nyaka. Kodwa makhe ndithi xha apha, ndiyekele uDora akubalisele ukuba sadibana njani ukuze sisebenze kunye ithuba elide kangaka sizingela ubuncwane.

Ukulangazelela Ukuqalisa Ukushumayela Ixesha Elizeleyo

UDORA: UMama wayethandazela ukwazi iLizwi likaThixo. Ngolunye usuku lwangeCawa, saphulaphula intshumayelo kaJ. F. Rutherford kunomathotholo. Yathi xa iphela loo ntetho, uMama wathi, “Le yinyaniso!” Kungekudala emva koko, sasifunda iimpapasho zamaNgqina kaYehova. Ngowe-1935, xa ndandineminyaka eli-12 ubudala, ndaya kwintetho yobhaptizo eyayinikelwa ngomnye wamaNgqina kaYehova, ndaza ndanqwenela ukwahlulela ubomi bam kuYehova. Kwiminyaka emithathu kamva, ndabhaptizwa. Ukuzahlulela nokubhaptizwa kwam kwabangela ukuba usukelo lwam luhlale luthe thaa engqondweni kwiminyaka yokugqibela ndisesikolweni. Ndandifuna ukugqiba esikolweni ukuze ndibe nguvulindlela.

Ngelo xesha iqela lamaNgqina endandikunye nalo lalihlangana njengebandla eFort Dodge, eIowa. Kwakufuneka umntu enze umgudu ukuze abekho kwiintlanganiso zamaKristu. Ngaloo maxesha, amanqaku eMboniselo ayengenayo imibuzo. Sasicelwa ukuba siye esifundweni silungiselele imibuzo esiza kuyinika umzalwana oqhuba iSifundo seMboniselo. Rhoqo ngokuhlwa ngeMivulo, mna noMama sasilungiselela imibuzo yesiqendu ngasinye, size siyinike umqhubi wesifundo ukuze akhethe afuna ukuyisebenzisa.

Ngamathub’ athile, ibandla lethu lalityelelwa ngumveleli ohambahambayo. Xa ndandineminyaka eli-12 ubudala, ndaqalisa ukushumayela kwindlu ngendlu ndincedwa ngomnye wabo bazalwana, uJohn Booth. Xa ndandineminyaka eli-17 ubudala, ndambuza indlela esizaliswa ngayo isicelo sokuba nguvulindlela, waza wandinceda. Ndandingazi ukuba siya kuqhubeka singabahlobo!

Njengovulindlela, ndandisoloko ndisebenza noDade uDorothy Aronson, umvangeli wexesha elizeleyo owayendishiya ngeminyaka eli-15 ubudala. Sasingoovulindlela kunye de wamenyelwa kwiklasi yokuqala yaseGiliyadi ngowe-1943. Emva koko, ndasebenza ndodwa njengovulindlela.

Inkcaso Ayizange Isethe Amandla

Iminyaka yee-1940 yayinzima ngokwenene kuthi ngenxa yomoya wobuhlanga owawuphenjelelwe yiMfazwe Yehlabathi II. Xa sishumayela kwindlu ngendlu, sasisoloko sigityiselwa ngamaqanda neetumato ezibolileyo, yaye ngamanye amaxesha sasixulutywa nangamatye! Sasifumana uvavanyo oluqatha xa sihambisa IMboniselo neConsolation (ngoku ebizwa ngokuba nguVukani!) esitratweni. Amapolisa, ephenjelelwa ngabachasi bonqulo, eza kuthi esisongela ngelithi ukuba sikhe saphinda sabonwa sishumayela esidlangalaleni, aza kusiphosa ngaphaya kwezitshixo.

Asizange siyeke ukushumayela, saza saya kuncinwa kwisikhululo samapolisa. Emva kokuba sikhululwe, sabuyela kwakwesa sitrato siye kuhambisa amaphephancwadi. Abazalwana abanembopheleleko basicebisa ukuba sizithethelele ngokusebenzisa uIsaya 61:1, 2. Ngenye imini kweza elinye ipolisa eliselula, ndaza ndingcangcazela ndalixelela izibhalo endandizazi ngentloko. Okumangalisayo kukuba, lasuka lathi gwiqi, landishiya apho! Yaba ngathi ndikhuselwe ziingelosi.

Usuku Endingasoze Ndilulibale

Ngowe-1941, ndaya kwindibano yeentsuku ezintlanu yamaNgqina kaYehova eSt. Louis, eMissouri. Kuloo ndibano, uMzalwan’ uRutherford wacela bonke abantwana abaneminyaka ephakathi kwemi-5 neli-18 ukuba beze ngaphambili. Amawaka abantwana athontelana ukuya apho. UMzalwan’ uRutherford wasibulisa ewangawangisa izandla ephethe itshefu. Nathi senjenjalo. Emva kwentetho yakhe eyathabatha iyure wathi: “Mabaphakame bonke abantwana abaye bavuma ukwenza ukuthanda kukaThixo nabami ngakwicala lorhulumente kaThixo onomlawuli onguKristu Yesu, yaye ngenxa yoko baye bavuma ukuthobela uThixo noKumkani wakhe.” Kwaphakama abantwana abali-15 000—ndandingomnye wabo bantwana! Isithethi songezelela ngelithi: “Ndicela nonke nina nizimisele ukuxelela abantu ngoBukumkani bukaThixo neentsikelelo obuza kuza nazo, nithi, Ewe.” Sathi, Ewe, kwaza kwalandela intswahla yezandla.

Emva koko uMzalwan’ uRutherford wakhulula incwadi ethi Childrena baza abantwana benza ungcelele ukuya kufumana iincwadi zabo eqongeni. Yayiyimincili yodwa! Nanamhlanje, abaninzi kwabo bafumana loo ncwadi basamkhonza ngenzondelelo uYehova ehlabathini lonke bethetha ngoBukumkani bukaThixo nobulungisa bakhe.—INdumiso 148:12, 13.

Emva kweminyaka emithathu ndisebenza ndodwa njengovulindlela, hayi indlela endavuya ngayo xa ndifumana isabelo sokuya kuba nguvulindlela okhethekileyo eChambersburg! Apho ndadibana noDorothea, saza saba ngabahlobo bokwenene. Sasiselula, sikhuthele yaye sinamandla. Sasifuna ngamandla ukuba nesabelo esingakumbi kumsebenzi wokushumayela. Saqalisa ukuzingela ubuncwane obuye bahlala buhleli.—INdumiso 110:3.

Kwiinyanga ezimbalwa emva kokuba singoovulindlela abakhethekileyo, sadibana nomzalwana owayephumelele kwiklasi yokuqala yaseGiliyadi, uAlbert Mann. Wayesele eza kuya kwisabelo sakhe sokushumayela kwilizwe lasemzini. Wasikhuthaza ukuba samkele nasiphi na isabelo esisithumela kwilizwe lasemzini.

Saya Sobabini Esikolweni

UDORA NODOROTHEA: Khawube nombono wendlela esavuya ngayo ukuqala kwethu ukuqeqeshelwa ubuvangeli basemazweni! Ngosuku lwethu lokuqala esikolweni, sabhaliswa nguAlbert Schroeder, laa mzalwana wanika umama kaDorothea incwadi ethi Studies in the Scriptures kwiminyaka eli-12 ngaphambili. NoJohn Booth wayekhona. Ngoku wayesisicaka esisebenza efama kwiKingdom Farm, apho sasiqhutyelwa khona isikolo. Kamva, omabini la madoda aba ngamalungu eQumrhu Elilawulayo lamaNgqina kaYehova.

KwiSikolo saseGiliyadi, safunda iinyaniso ezinzulu zeBhayibhile. Yayiluqeqesho olusemagqabini. Kwiklasi yethu sasingabafundi abali-104, kuquka umfundi wokuqala ophuma kwilizwe elingaphandle kweMerika, eMexico. Wayezama ukuphucula isiNgesi ngoxa thina sizama ukufunda iSpanish. Hayi indlela esavuya ngayo mhla uMzalwan’ uNathan H. Knorr wayesinika izabelo zokuya kumazwe asemzini! Abaninzi babelwa kuMbindi nakuMzantsi Merika; thina sabelwa eChile.

Ukufuna Ubuncwane EChile

Ukuze sikwazi ukungena eChile, kwakufuneka sifumane iincwadi zokundwendwela (visa), nto leyo eyathabatha ixesha. Ngenxa yoko, emva kokuba siphumelele ngoJanuwari 1945, saba ngoovulindlela eWashington, D.C. isithuba esingangonyaka onesiqingatha. Emva kokuba sizifumene iincwadi zokundwendwela, sahamba nelinye iqela labavangeli basemazweni abasithoba ababesiya eChile. Abasixhenxe kubo babekwiiklasi zokuqala zesikolo saseGiliyadi.

Sathi xa sifika kwikomkhulu iSantiago sadibana neqela labazalwana abangamaKristu. Omnye wabo yayinguAlbert Mann, umzalwana owayephumelele eGiliyadi nowasikhuthazayo kwiminyaka embalwa ngaphambili. Wayesele enonyaka eseChile, esebenza noJoseph Ferrari owayephumelele kwiklasi yesibini yaseGiliyadi. Safika kukho abavakalisi abangaphantsi kwe-100 eChile. Sasikulangazelela ukufuna nokufumana ubuncwane—abantu abaneentliziyo ezinyanisekileyo—kwisabelo sethu esitsha.

Sabelwa kwikhaya labavangeli basemazweni eSantiago. Sasiqala ukuhlala nentsapho enkulu yabavangeli basemazweni. Ngaphandle kweeyure ezazifuneka kumsebenzi wokushumayela, abavangeli basemazweni kwakufuneka baphekele intsapho kube kanye ngeveki. Maxa wambi sasiphoxeka. Ngenye imini sabhakela intsapho amaqebengwana esidlo sakusasa, kodwa sathi xa siwakhupha esitovini, seva ivumba elingathandekiyo. Sasisebenzise ibaking soda endaweni yebaking powder! Kukho umntu owafaka ibaking soda kwinkonkxa yebaking powder.

Noko ke, eyona nto yayibangela iintloni ziimpazamo esasizenza ngoxa sasifunda iSpanish. Intsapho enkulu esasiyiqhubela isifundo seBhayibhile yaphantse yayeka ukufunda kuba yayingayiva into esiyithethayo. Kodwa ngenxa yokuba yayisebenzisa iiBhayibhile zayo, yakwazi ukufunda inyaniso, yaye abahlanu kuloo ntsapho baba ngamaNgqina. Kuloo minyaka, kwakungekho lungiselelo lokufundisa abavangeli basemazweni abasandul’ ukuphumelela esikolweni ezinye iilwimi. Sasiphuma esikolweni siye kushumayela size sifunde olo lwimi luthethwayo kubantu esishumayela kubo.

Sasiqhuba izifundo zeBhayibhile ezininzi, yaye abanye kubantu esasibafundela babesabela ngokukhawuleza. Kwabanye kwakufuneka sibe nomonde. Emva kokuba elinye inenekazi eliselula, uTeresa Tello, liphulaphule isigidimi senyaniso lathi, “Nincede nibuye nize kundixelela izinto ezingakumbi.” Sabuyela izihlandlo ezili-12 singalifumani. Kwadlula iminyaka emithathu. Saya kwindibano eyayiqhutyelwa kwiholo ekwakubukelwa kuyo iifilimu eSantiago. Sathi xa siphuma endibanweni ngeCawa, seva umntu esikhwaza, “Senorita Dora, Senorita Dora!” Xa sijonga ngasemva, nguTeresa. Wayetyelele udadewabo ohlala ngaphaya kwesitrato waza weza kubona oko kwenzekayo kuloo holo. Hayi indlela esavuya ngayo xa siphinda simbona! Senza amalungiselelo okumqhubela isifundo seBhayibhile, yaye kungekudala emva koko wabhaptizwa. Kamva waba nguvulindlela okhethekileyo. Sithetha nje, sele kudlule iminyaka engama-45 ukususela ngoko, yaye uTeresa usenguvulindlela okhethekileyo.—INtshumayeli 11:1.

Ukufumana Ubuncwane Kwii-“Sands”

Ngowe-1959 sabelwa ePunta Arenas—okuthetha ukuba kwii-“Sands Point”—kwincopho ekunxweme olukumazantsi eChile kumgama oziikhilomitha ezingama-4 300. IPunta Arenas ngummandla ongaqhelekanga. Kwiinyanga zasehlotyeni, imini iba nde—kukhanya de kubethe eye-11:30 ebusuku. Sasisebenza iintsuku ezininzi entsimini kodwa yona imiqobo yayikho, kuba ehlotyeni kubakho imimoya ebhudlayo ephuma kwiAntarctic. Iinyanga zasebusika ziyabanda, yaye imini imfutshane.

Phezu kwazo nje ezi ngxaki, iPunta Arenas inomtsalane. Ehlotyeni, kubakho amafu anemvula nanqumla isibhakabhaka ngakwicala lasentshona. Ngamathub’ athile, awisa imvula enkulu, nize nisajonge leyo kufike umoya womise. Lithi ilanga xa livela kuloo mafu ubone umnyama othi ndijonge. Ngamathub’ athile lo mnyama uhlala ixesha elide, umana uvela njengoko ilanga liqaqamba kuloo mafu emvula.—Yobhi 37:14.

Ngelo xesha, babembalwa abavakalisi ePunta Arenas. Iintlanganiso sasiziqhuba ngokwethu kwelo bandla lincinane lasekuhlaleni. UYehova wayisikelela imigudu yethu. Kwiminyaka engama-37 kamva, saphinda satyelela kulo mmandla. Safika kukho ntoni? Amabandla akhulayo amathandathu neeHolo zoBukumkani ezintle ezintathu. Hayi indlela esavuya ngayo kuba uYehova wasivumela safumana ubuncwane bokomoya kuloo ntlabathi isemazantsi!—Zekariya 4:10.

Ubuncwane Obungakumbi Kwi-“Wide Beach”

Emva kokukhonza iminyaka emithathu enesiqingatha ePunta Arenas, sabelwa kwisixeko esilizibuko saseValparaiso. Esi sixeko sinemimandla emi kwiinduli ezingama-41 ezijikeleze itheku elivelele uLwandlekazi iPasifiki. Sanikela ingqalelo komnye wale mimandla, iPlaya Ancha, gama elo elithetha “Wide Beach.” Kwiminyaka eli-16 esayihlala apho, sabona iqela labazalwana abaselula abangamaKristu likhula ngokomoya, kangangokuba sithetha nje bangabaveleli abahambahambayo nabadala abangamaKristu kumabandla aseChile.

Emva koko sabelwa eViña del Mar. Apho sakhonza iminyaka emithathu enesiqingatha ngaphambi kokuba ikhaya labavangeli basemazweni lonakaliswe yinyikima. Sabuyela eSantiago, apho sasiqale khona ukuba ngabavangeli basemazweni kwiminyaka engama-40 ngaphambili. Izinto zazitshintshile. Kwakwakhiwe isebe elitsha, laza elidala laba likhaya labo bonke abavangeli basemazweni ababesekwelo lizwe. Kamva, elo khaya lasetyenziselwa ukuqhuba iSikolo Sokuqeqesha Abalungiseleli. Ngelo xesha, saphinda sabubona ububele bothando bukaYehova. Abahlanu babavangeli basemazweni ababekhulile ngeminyaka bafuduselwa eBheteli. Kweli laseChile, siye sakhonza kwizabelo ezahlukahlukeneyo ezili-15. Siye sayibona indlela ohambela phambili ngayo umsebenzi ukususela kubavakalisi abali-100 ukusa kwabangama-70 000! Hayi indlela ebekumnandi ngayo ukufuna ubuncwane eChile kangangeminyaka engama-57!

Siziva sisikeleleke ngokwenene kuba uYehova eye wasivumela safumana abantu abaninzi kangaka—ubuncwane bokwenene—aye uYehova waqhubeka ebasebenzisa kwintlangano yakhe. Kwiminyaka engaphezu kwama-60 sikhonza uYehova kunye, sivakalelwa ngendlela efanayo nekaKumkani uDavide owabhala wenjenje: “Hayi ukuba kuninzi kokulunga kwakho, okugcinele abo bakoyikayo!”—INdumiso 31:19.

[Umbhalo osemazantsi]

[Imifanekiso ekwiphepha 9]

UDorothea, ngowama-2002 nangowe-1943 ekumsebenzi wokushumayela

[Umfanekiso okwiphepha 10]

Ukumsebenzi wasesitratweni eFort Dodge, eIowa, ngowe-1942

[Umfanekiso okwiphepha 10]

UDora, ngowama-2002

[Umfanekiso okwiphepha 12]

UDorothea noDora ngaphandle kwekhaya labo lokuqala labavangeli basemazweni eChile, ngowe-1946