Konke Ukubandezeleka Sele Kuza Kuphela
“NguLiwa, ugqibelele umsebenzi wakhe.”—DUTERONOMI 32:4.
1, 2. (a) Kutheni uvuyiswa nje lithemba lokuphila ngonaphakade? (b) Yintoni ebangela abanye bangazikholelwa izithembiso zikaThixo zekamva elimangalisayo?
NGABA ukhe ucinge ngokuphila eParadesi? Mhlawumbi uba nomfanekiso ngqondweni wakho uzula kulo mhlaba mhle kangaka njengoko ufunda ngezinto ezingapheliyo eziphila kuwo. Okanye ucinga ngovuyo oluya kubakho xa sele usebenza nabanye niguqula umhlaba wonke ukuze ube yipaki. Mhlawumbi ucinga ngobuchule oya kubufunda kumsebenzi wobugcisa, wokuzoba iiplani zokwakha, umculo nezinye izinto ongenakuze ube nexesha lokuzenza zonke kobu bomi buxakekileyo banamhlanje. Enoba kuyintoni na, uya kuvuyiswa lithemba lokuphila obo bomi iBhayibhile ithi ‘bubomi benene’—ubomi uYehova awayenenjongo yokuba sibuphile ngonaphakade.—1 Timoti 6:19.
2 Kumele kuchulumancise gqitha ukwabelana nabanye ngeli themba leBhayibhile? Noko ke, abaninzi abafuni nokuva ngelo themba. Bathi yintsom’ emini, iphupha nje labantu abakhohliseka lula. Banokude bangakholelwa ukuba uThixo uthembisa ubomi obungunaphakade eParadesi. Kubangelwa yintoni oko? Bambi bakhathazwa kukugqugqisa kobungendawo. Bakholelwa ukuba, bebungayi kubakho ubungendawo nokubandezeleka ukuba uThixo ebekho, engusomandla yaye enothando. Bathi, akakho uThixo onokunyamezela ubungendawo—ukuba ke ukho, umele ukuba akanamandla okanye akasikhathalelanga. Abanye bayavumelana nale ngcamango. USathana uye waphumelela ukumfamekisa iingqondo zabantu.—2 Korinte 4:4.
3. Nguwuphi umbuzo onzima esinokunceda abantu bafumane impendulo yawo, ibe kutheni sinokukwazi nje thina?
3 Thina maNgqina kaYehova, sinelungelo elikhethekileyo lokunceda abantu abakhohliswa nguSathana nabubulumko beli hlabathi. (1 Korinte 1:20; 3:19) Siyasiqonda isizathu sokuba abaninzi bengazikholelwa izithembiso zeBhayibhile. Kukuba abamazi uYehova. Mhlawumbi abalazi igama lakhe okanye intsingiselo yalo, ibe basenokuba abazazi kangako iimpawu zakhe okanye ukugcina kwakhe izithembiso. Sisikelelwe ngokwenene ngokwazi ezi zinto. Maxa wambi simele sicingisise ngeendlela esinokubanceda ngazo abo ‘basebumnyameni ngengqondo’ bafumane iimpendulo kwimibuzo enzima abazibuza yona njengothi, “Kutheni uThixo evumele ubungendawo nokubandezeleka?” (Efese 4:18) Siza kuqala ngokuqwalasela indlela esinokuwuphendula ngayo lo mbuzo ngendlela eyanelisayo. Emva koko siza kuxubusha indlela ezibonakala ngayo iimpawu zikaYehova kwindlela aye wawusingatha ngayo lo mba wobungendawo.
Indlela Efanelekileyo Yokuwuphendula
4, 5. Yintoni ekusenokufuneka siqale siyenze xa umntu ebuza isizathu sokuvumela kukaThixo ukubandezeleka? Cacisa.
4 Siphendula sithini xa umntu ebuza isizathu sokuvumela kukaThixo ukubandezeleka? Mhlawumbi sikhawuleza sichaze iinkcukacha, siqala koko kwenzeka e-Eden. Kusenokuba kuhle oko kwezinye iimeko. Noko ke, kukho into esimele siyiphaphele. Kusenokufuneka siyitshayelele kakuhle impendulo yethu. (IMizekeliso 25:11; Kolose 4:6) Makhe sixubushe iingongoma ezintathu eziseBhayibhileni ekusenokufuneka sizicacise ngaphambi kokuphendula.
5 Okokuqala, ukuba loo mntu ukhathazwa bubungendawo beli hlabathi, usenokuba uye wehlelwa yinto embi okanye yenzeka kwisalamane okanye kumhlobo wakhe. Ngoko, kunokuba kuhle ubonise uvelwano kuqala. Umpostile uPawulos wacebisa amaKristu wathi: “Lilani kunye nabantu abalilayo.” (Roma 12:15) ‘Uvelwano’ lunokumchukumisa umntu. (1 Petros 3:8) Xa ebona ukuba simkhathalele, usenokusiphulaphula.
6, 7. Kutheni simele simncome nje umntu obuza izinto zokomoya ezimkhathazayo?
6 Okwesibini, sisenokumncoma ngokubuza lo mbuzo. Abanye bavakalelwa kukuba ukuzibuza loo mibuzo kubangelwa kukungabi nalukholo okanye ukungamhloneli kwabo uThixo. Kusenokwenzeka ukuba oko bakuxelelwa ngabefundisi. Noko ke, le mibuzo ayinanto yakwenza nokungabi nalukholo. Ngapha koko, nabantu ababethembekile ngamaxesha okubhalwa kweBhayibhile bayibuza le mibuzo. Ngokomzekelo, umdumisi uDavide wabuza: “Kutheni, Yehova, uqhubeka umele kude? Kutheni uqhubeka uzifihlile ngamaxesha okubandezeleka?” (INdumiso 10:1) Nomprofeti uHabhakuki wabuza: “Kuya kude kube nini na Yehova, ndikhalela uncedo, ungeva? Kuya kude kube nini na ndicela ukuba undincede kugonyamelo, ungandisindisi? Kutheni undenza ndibone okwenzakalisayo, uze uqhubeke ujonga inkathazo? Kutheni kukho ukuphanga nogonyamelo phambi kwam, yaye kutheni kusibakho ukuxabana, ibe kutheni kuqhubeka imbambano?”—Habhakuki 1:2, 3.
7 La ngamadoda awayethembekile emhlonela gqitha uThixo. Ngaba akhalinyelwa ngokubuza le mibuzo? Kunokuba enjenjalo, uYehova wabona kufanelekile ukuba ibhalwe kwiLizwi lakhe. Namhlanje, umntu okhathazwa kukwesamela kobungendawo usenokuba ulambile ngokomoya—ufuna iimpendulo ezifumaneka eBhayibhileni kuphela. Khumbula ukuba, uYesu wabancoma abo balambileyo ngokomoya, okanye “bayiphapheleyo intswelo yabo yokomoya.” (Mateyu 5:3) Lilungelo elingathethekiyo ukunceda abanjalo bafumane olo yolo lwathenjiswa nguYesu.
8. Ziziphi iimfundiso ezididayo eziye zenza abantu bakholelwa ukuba nguThixo unobangela wokubandezeleka, ibe sinokubanceda njani?
8 Okwesithathu, kusenokufuneka simncede aqonde ukuba asingoThixo obangela ubungendawo obugqugqise ihlabathi. Abaninzi bafundiswe ukuba nguThixo olawula eli hlabathi siphila kulo, nokuba wazimisela kwangaphambili izinto ezisehlelayo, yaye asinakuziqonda izizathu zokubangela kwakhe ukubandezeleka. Ezi mfundiso zibubuvuvu. Ziyamnyelisa uThixo yaye zimenza unobangela wobungendawo nokubandezeleka okukhoyo. Kusenokufuneka sisebenzise iLizwi likaThixo ukuze siyiphendule kakuhle le mibuzo. (2 Timoti 3:16) AsingoYehova olawula le nkqubo yezinto yonakeleyo; nguSathana uMtyholi. (1 Yohane 5:19) UYehova akalimiseli kwangaphambili ikamva labantu; ngamnye umnika inkululeko nelungelo lokuzikhethela phakathi kokulungileyo nokubi, okufanelekileyo nokuphosakeleyo. (Duteronomi 30:19) UYehova zange waba ngunobangela wobungendawo; ubuthiyile ubungendawo yaye ubakhathalele abo babandezeleka ngokungekho sikweni.—Yobhi 34:10; IMizekeliso 6:16-19; 1 Petros 5:7.
9. Ziziphi ezinye izixhobo ezilungiselelwe “likhoboka elithembekileyo neliyingqondi” ukuze sincede abantu baqonde isizathu sokuvumela kukaYehova uThixo ukubandezeleka?
9 Xa sewuyitshayelele ngolo hlobo impendulo yakho, kunokuba lula ukuba abantu basiphulaphule isizathu sokuvumela kukaThixo ukubandezeleka. Into enokukunceda uphendule le mibuzo, ziimpapasho ezilungiselelwe “likhoboka elithembekileyo neliyingqondi.” (Mateyu 24:45-47) Ngokomzekelo, kwiNdibano YeSithili ‘Yokuthobela UThixo’ yowama-2005/06, kwakhululwa iphecana elinomxholo othi Konke Ukubandezeleka Sele Kuza Kuphela! Ukuba eli phecana likho ngolwimi lwakho, kutheni ungalifundi ukuze ulazi? Nencwadi ethi Yintoni Ngokwenene Efundiswa YiBhayibhile?, efumaneka ngeelwimi ezili-157, inaso isahluko esixubusha lo mbuzo ubalulekileyo. Zisebenzise kakuhle ezi zixhobo. Ziyicacisa kakuhle imbambano eseZibhalweni yolongamo lwendalo iphela eyaphakanyiswa e-Eden nesizathu sokuba uYehova ayisingathe ngaloo ndlela. Njengoko uxubusha nomntu ngalo mbandela, khumbula ukuba loo mntu umvulela kuvimba wolwazi olubalulekileyo. Lo vimba uza kumnceda azi uYehova neempawu zakhe ezimangalisayo.
Gxininisa Iimpawu ZikaYehova
10. Yintoni eyenza kube nzima kwabanye ukuqonda isizathu sokuvumela kukaThixo ukubandezeleka, ibe yintoni ekufuneka bayazi ukuze bancedakale?
10 Njengoko unceda abantu baqonde isizathu sokuvumela kukaYehova ukuba abantu bazilawule ngaphantsi kukaSathana, zama ukutsalela ingqalelo yabo kwiimpawu ezimangalisayo zikaYehova. Abaninzi bayazi ukuba uThixo unamandla; baqhelile ukuva kusithiwa nguThixo uSomandla. Kodwa basenokungasiqondi isizathu sokuba angasebenzisi lo mandla akhe ngoku ukuphelisa ukungabikho kokusesikweni nokubandezeleka. Basenokuba abazazi ezinye iimpawu zikaYehova, njengokuba ngcwele kwakhe, ukuba sesikweni, ubulumko nothando. UYehova uzisebenzisa ngendlela elungeleleneyo negqibeleleyo ezi mpawu. Ngenxa yoko iBhayibhile ithi: “Ugqibelele umsebenzi wakhe.” (Duteronomi 32:4) Ungaziveza njani ezi mpawu xa uphendula imibuzo edla ngokubakho xa kuthethwa ngalo mbandela? Makhe siqwalasele imizekelo embalwa.
11, 12. (a) Kwakutheni ukuze uAdam noEva bangasuke baxolelwe emva kokuba bonile? (b) Kutheni uYehova engayi kusinyamezela ngonaphakade isono?
11 Ngaba uYehova wayengamele kusuka nje abaxolele uAdam noEva? Ukuxolela kwakungangeni ndawo kule meko. Ekubeni babefezekile, uAdam noEva balugatya ngabom ulongamo lukaYehova bekhetha ukuva ngoSathana. Aba bavukeli zange babonise nencinane inguquko. Noko ke, xa abantu bebuza isizathu sokuba uYehova engazange asuke abaxolele, basenokuba babuza isizathu sokuba uYehova engazange ayekelele kwimilinganiselo yakhe abamkele ubukho besono nemvukelo. Impendulo yalo mbuzo ibandakanya uphawu olubaluleke gqitha kuYehova—ubungcwele bakhe.—Eksodus 28:36; 39:30.
12 IBhayibhile ithetha ngokuphindaphindiweyo ngobungcwele bukaYehova. Kodwa okulusizi kukuba, bambalwa abantu abalwaziyo olu phawu kweli hlabathi lonakeleyo. UYehova ucocekile, unyulu yaye akanakuba nasono. (Isaya 6:3; 59:2) Uye walungiselela ukucanyagushelwa kwesono, ukuze sisitshulwe neengcambu, kodwa akanakuze asinyamezele ngonaphakade. Ukuba ebenokusinyamezela ngonaphakade isono, besingayi kuba nalo ithemba lekamva. (IMizekeliso 14:12) Ngexesha elifanelekileyo, uya kwenza yonke indalo iphinde ibe ngcwele. Oko kuya kubanjalo, kuba kukuthanda kwaLowo Ungcwele.
13, 14. Kwakutheni ukuze uYehova angabatshabalalisi abavukeli base-Eden?
13 Ngaba uYehova wayengamele asuke abatshabalalise abo bavukeli base-Eden aze adale abanye? Wayenawo amandla okwenjenjalo; ibe kungekudala uza kuwasebenzisa ukubhangisa bonke ubungendawo. Abanye basenokubuza, ‘Kwakutheni ukuze angababhangisi ngoxa babesebathathu kuphela aboni kwindalo yonke? Ngaba oko kwakungayi kukuthintela ukusasazeka kwesono—nayo yonke intlungu esehlabathini?’ Kwakutheni ukuze uYehova angenzi ngalo ndlela? IDuteronomi 32:4 ithi: “Zonke iindlela zakhe zisesikweni.” UYehova akagungqi kokusesikweni. Enyanisweni, “uYehova ngumthandi wokusesikweni.” (INdumiso 37:28) Ngenxa yokuthanda okusesikweni, akazange abatshayele abo bavukeli. Wayebayekela ntoni?
14 Imvukelo kaSathana yavusa amathandabuzo ngokukufanelekela kukaThixo ukulawula. Ngenxa yokuthanda okusesikweni, uYehova wanika uSathana ithuba lokungqina ezo zimangalo zakhe. Ukuba wayebabulele kwangoko abo bavukeli, nto leyo babeyifanele, oko kwakungayi kuphumeza okusesikweni. Kwakuya kubonisa nje kuphela ukuba uYehova unamandla, nto leyo uSathana wayengayithandabuzi. Enye into, uYehova wayeyichazile injongo yakhe kuAdam noEva. Kwakufuneka bazale abantwana bazalise umhlaba, bawoyise, babe nobukhosi kuyo yonke indalo esemhlabeni. (Genesis 1:28) Ukuba uYehova wayesuke wabatshabalalisa uAdam noEva, lo njongo yakhe ngabantu yayiya kuphelela emoyeni. Ekubeni ethanda okusesikweni wayengenakukuvumela oko, kuba injongo yakhe ihlala izaliseka.—Isaya 55:10, 11.
15, 16. Sinokubanceda njani abantu abacinga ukuba banezabo “izicombululo” kucelomngeni lwase-Eden?
15 Ngaba ukho umntu owayenokuba nesicombululo esodlula eso sikaYehova? Abanye abantu basenokuza nezabo “izicombululo” kule mvukelo yase-Eden. Ngaba oko bekungayi kuthetha ukuba bathi bona ngebabeyicombulule bhetele? Basenokutsho kungekhona kuba bengendawo, nto nje abamqondi uYehova nobulumko bakhe obumangalisayo. Ebhalela amaKristu aseRoma, umpostile uPawulos wagxininisa ubulumko bukaThixo, kuquka ‘imfihlelo engcwele’ ephathelele injongo kaYehova yokusebenzisa uBukumkani bukaMesiya ukukhulula uluntu oluthembekileyo aze angcwalise igama lakhe. Wayevakalelwa njani uPawulos ngobulumko bukaThixo owayila le njongo? Lo mpostile waqukumbela incwadi yakhe ngala mazwi: “KuThixo, osisilumko yedwa, makube luzuko ngoYesu Kristu ngonaphakade. Amen.”—Roma 11:25; 16:25-27.
16 UPawulos wayesazi ukuba uYehova ‘usisilumko yedwa’—ngoyena ubalaseleyo ngobulumko kwindalo iphela. Yiyiphi ke enye indlela ebhetele umntu ongafezekanga ebenokusingatha ngayo ingxaki—singasathethi ke ngocelomngeni lukaSathana kuThixo? Ngoko ke, simele sincede abanye nabo bamhlonele uThixo ‘olumkileyo entliziyweni.’ (Yobhi 9:4) Okukhona sibuqonda ubulumko bakhe kokukhona siya kuba nentembelo ngakumbi ukuba indlela yakhe yeyona ibhetele.—IMizekeliso 3:5, 6.
Ukuqonda Olona Phawu Lubalaseleyo LukaYehova
17. Ukwazi uthando lukaYehova ngakumbi kunokubanceda njani abo bakhathazwa kukuvumela kwakhe ukubandezeleka?
17 “UThixo uluthando.” (1 Yohane 4:8) Ngalo mazwi ahlab’ umxhelo iBhayibhile ichaza olona phawu lubalaseleyo lukaYehova, olona phawu lunomtsalane kunazo zonke nolulolona luthuthuzela abo bakhathazwa bubungendawo obugqugqisileyo. UYehova ebesoloko ebonisa uthando kuyo nantoni na ayenzayo ukulungisa umonakalo ongathethekiyo obangelwa sisono kwindalo yakhe. Ngothando wanika inzala enesono ka-Adam noEva ithemba, walungiselela indlela yokuba isondele kuye ukuze ikwazi ukuba nolwalamano oluhle naye. Ngothando walungiselela intlawulelo eyayiza kwenza abantu bazixolelwe ngokupheleleyo izono baze babuyiselwe emfezekweni, kubomi obungunaphakade. (Yohane 3:16) Olu thando lwenze wanomonde ebantwini, baza abaninzi bafumana ithuba lokugatya uSathana bekhetha ukulawulwa nguYehova.—2 Petros 3:9.
18. Luluphi ulwazi esiye sasikelelwa ngalo, ibe yintoni eza kuxutyushwa kwinqaku elilandelayo?
18 Ethetha nabantu kwisikhumbuzo sokuhlasela kwabanqolobi, omnye umfundisi wathi: “Asazi ukuba kutheni uThixo evumela ubungendawo nokubandezeleka kuqhubeke.” Yabuhlungu noko ke leyo. Singatsho ke ukuba yintsikelelo ukuwazi lo mbandela! (Duteronomi 29:29) Ekubeni uYehova elumkile, enokusesikweni nothando, siyazi ukuba kungekudala uza kukuphelisa konke ukubandezeleka. Eneneni, uthembisa ukwenjenjalo. (ISityhilelo 21:3, 4) Noko ke, kuthekani ngabo baye bafa ukutyhubela iinkulungwane? Ngaba indlela uYehova awasingatha ngayo imvukelo yase-Eden ibashiya bengenathemba? Nakanye! Ngenxa yothando uye walungiselela ukuba bavuswe. Oku kuza kuxutyushwa kwinqaku elilandelayo.
Unokuphendula Njani?
• Sinokumphendula njani umntu ofuna ukwazi isizathu sokuvumela kukaThixo ukubandezeleka?
• UYehova wabubonisa njani ubungcwele nokusesikweni kwakhe kwindlela awayisingatha ngayo imvukelo yase-Eden?
• Kutheni simele sincede abantu balwazi ngakumbi uthando lukaYehova?
[Umfanekiso okwiphepha 21]
Zama ukunceda abo bakhathazwa kukubandezeleka okusehlabathini
[Imifanekiso ekwiphepha 23]
UDavide noHabhakuki ababethembekile bambuza imibuzo enyanisekileyo uThixo