Ngaba Ukwaluka Kuthetha Ukuba Uyindoda?
KUMAZWE amaninzi amakhwenkwe aluswa eseziintsana oko kusenzelwa ukuba kuthintelwe izifo. Amanye amazwe, akanayo le nto kuthiwa lulwaluko. Akho ke namanye, njengalawo amaYuda nawamaSilamsi, apho ulwaluko lungenzelwa nje ukuthintela izifo; kunoko lungumbandela wonqulo.
Kwezinye iintlanga amakhwenkwe akaluswa de abe madala. Ngokuqhelekileyo la makhwenkwe adla ngokusiwa esuthwini, aluswe aze agcinwe kude nabantu iiveki eziliqela ade aphile. Kulo lonke eli xesha, abakhwetha bafundiswa izithethe nemithetho yobudoda. Ngaba kuyimfuneko ukuya esuthwini ukuze ube yindoda? Makhe siqwalasele oko kuthethwa yiBhayibhile ngembono kaThixo ngalo mbandela.—IMizekeliso 3:5, 6.
Imbono KaThixo Ngolwaluko
Abanye abantu bamandulo, njengamaYiputa, babesaluka ngokusika ijwabi. Kodwa yena, uAbraham akazange azalelwe kweli siko. Enyanisweni wachitha ixesha elininzi lobomi bakhe engalukanga. Ngoxa kanye wayengalukanga wazingqina eyindoda ekhaliphileyo. Ekhokela iqaqobana nje lamadoda, wawosela umkhosi wookumkani abane ababethimbe umtshana wakhe uLote. (Genesis 14:8-16) Malunga neminyaka eli-14 kamva, uThixo wayalela uAbraham ukuba aluke aze aluse nendlu yakhe iphela. Kwakutheni ukuze uThixo atsho?
Oku kwakungathethi ukuba uAbraham uphumile ebukhwenkweni wangena ebudodeni. Kaloku, wayesele eneminyaka engama-99 ubudala. (Genesis 17:1, 26, 27) UThixo wachaza isizathu soko wathi: “Nimele naluswe inyama yejwabi, yaye oko kumele kube ngumqondiso womnqophiso ophakathi kwam nani.” (Genesis 17:11) Kuloo mnqophiso ka-Abraham, uThixo waquka isithembiso sokuba “zonke iintsapho zasemhlabeni” zaziya kusikelelwa ngoAbraham. (Genesis 12:2, 3) Ngoko ke, kuThixo ulwaluko lwalungenanto yakwenza nokuba yindoda. Lwalusenzelwa ukubonisa ukuba umntu ngumSirayeli oyinzala ka-Abraham, eyayinelungelo ‘lokuphathiswa izibhengezo ezingcwele zikaThixo.’—Roma 3:1, 2.
Ethubeni, uhlanga lwakwaSirayeli lwaye alwathembeka, ngenxa yokuba lwagatya iMbewu yokwenyaniso ka-Abraham, uYesu Kristu. Ngeso sizathu, uThixo walulahla lwaza nolwaluko lwalo alwabi saba nantsingiselo kuye. Noko ke, amanye amaKristu enkulungwane yokuqala ema ngelithi ulwaluko lwaluseyimfuneko kuThixo. (IZenzo 11:2, 3; 15:5) Kwathi kwakuba njalo, umpostile uPawulos wathumela uTito ukuba ‘amise izinto ngendlela efanelekileyo,’ kumabandla awahlukahlukeneyo. Ebhalela uTito, uPawulos wachaza enye yezinto ezazimele zilungiswe esithi: “Kuba kukho abantu abaninzi abangalawulekiyo, abathetha izinto ezingeyongenelo, nabakhohlisi bengqondo, ngokukodwa abo babambelele kulwaluko. Kufuneka bavalwe imilomo, kuba babhukuqa izindlu ziphela ngokufundisa izinto ezingafanelekanga, ngenjongo yokufumana inzuzo yokunganyaniseki.”—Tito 1:5, 10, 11.
Eso siluleko sikaPawulos sisasebenza nanamhlanje. Ebeya kuba uphikisana neZibhalo nakanjani ukuba umKristu wokwenyaniso ebenokucebisa omnye umntu ukuba aluse umntwana wakhe. Kunokuba abe ‘ngugqada-mbekweni kwimicimbi yabanye abantu,’ umKristu uziyekela kubazali bomntwana izinto ezinjalo. (1 Petros 4:15) Ukongezelela, uPawulos waphefumlelwa ukuba abhale ngolwaluko lomthetho kaMoses athi: “Kukho nawuphi na umntu owabizwa alukile? Makangabi ngongalukanga. Kukho nawuphi na umntu owabizwa engalukanga? Makangaluki. Ulwaluko aluthethi nto, nokungaluki akuthethi nto, kodwa okuyinto kukugcina imiyalelo kaThixo. Nakweyiphi na imo ngamnye awabizwa ekuyo, makahlale kuyo.”—1 Korinte 7:18-20.
Kuthekani Ngokuya “Esuthwini”?
Kuthekani ukuba abazali bagqiba ekubeni oonyana babo baluswe? Ngaba bekuya kuvumelana neBhayibhile ukubasa esuthwini? Ukuya esuthwini kuquka okungakumbin kunokusikwa nje kwejwabi. Kangangeeveki eziliqela, abo baya esuthwini baza kuhlala nabakhwetha namakhankatha angamnquliyo uYehova. Inkoliso yezinto ezifundiswa esuthwini ingqubana ngokungqalileyo nemilinganiselo ephakamileyo yeBhayibhile. IBhayibhile ilumkisa ithi: “Unxulumano olubi lonakalisa imikhwa elungileyo.”—1 Korinte 15:33.
Zikho neengozi zokuya esuthwini ngokwasemzimbeni. Ngowama-2003, iSouth African Medical Journal yalumkisa ngelithi: “Nakulo unyaka ulwaluko luye lwanemiphumo ehlasimlis’ umzimba, kuthiwa bakho abafana abaye bafa abanye basuswa amalungu abo obudoda, ibe ezi ngxelo ziye zapapashwa kumajelo eendaba ehlabathini lonke. . . . Ngamafutshane, ukuya esuthwini kuyingozi kwaye abakhwetha bayafa apho.”
Ukongezelela ekonzakaleni kwelungu lobudoda, kukwakho nengozi enkulu yokomoya. Iimfundiso nezinto ezenziwa esuthwini zinxulumene nemimoya nonqulo lwezinyanya. Ngokomzekelo, xa kukho umonakalo obangelwe kukungakhathali kweengcibi nokungacoceki kweemeko abasebenzela phantsi kwazo, kudla ngokuthiwa la makhwenkwe athakathiwe okanye izinyanya ziqumbile. Ngokuphathelele unqulo lobuxoki, iBhayibhile ithi: “Musani ukubotshwa edyokhweni kunye nabangakholwayo. Kuba bunabudlelane buni na ubulungisa nokuchas’ umthetho? Okanye kunakwabelana kuni na ukukhanya nobumnyama? . . . ‘Ngoko ke phumani phakathi kwabo, nizahlule,’ utsho uYehova, ‘nento engahlambulukanga ningayichukumisi’; ‘yaye ndiya kunamkela.’” (2 Korinte 6:14-17) Ngenxa yesi siluleko, ibingayi kuba bubulumko kwaphela into yokuba abazali abangamaKristu bathumele oonyana babo esuthwini.
Yintoni Eyenza UmKristu Abe Yindoda?
Asikokwaluka nokungaluki okwenza umKristu abe yindoda. Eyona nto ibalulekileyo kumKristu kukukholisa uThixo, kungekhona ‘imbonakalo yasenyameni.’—Galati 6:12.
Noko ke, ukuze akholise uThixo, umKristu umele ‘aluke entliziyweni.’ (Duteronomi 10:16; 30:6; Mateyu 5:8) Olu lwaluko alwenziwa ngomkhonto, kodwa ngokuphepha iminqweno emibi nokuzingca, njengokucinga, ukuba xa waluswe enyameni uba bhetele kunabanye. UmKristu unokungqina ubudoda bakhe ngokunyamezela izilingo nangokuma ‘eqinile elukholweni.’—1 Korinte 16:13; Yakobi 1:12.