Ukutshintsha Komsongo Ube Yincwadi—Ukwenziwa KweBhayibhile Ibe Yincwadi
UKUSUSELA kwiinkulungwane ezidluleyo, abantu bebelondoloza inkcazelo ngeendlela ezininzi. Ngaphambili, ababhali babebhal’ ematyeni amakhulu, kumacwecwe amatye nawomthi, kwisikhumba nakwezinye izinto. Ngenkulungwane yokuqala, kuMbindi Mpuma, umsongo wawuyindlela eyamkelekileyo yokugcina izinto ezibhaliweyo. Kamva, kwafika incwadi, eyangena endaweni yomsongo yaza yayindlela eqhelekileyo yokugcina inkcazelo ebhaliweyo. Oku kwaba negalelo elikhulu ekusasazweni kweBhayibhile. Yayinjani le ncwadi yaye yintoni eyabangela ukuba kusetyenziswe yona?
Incwadi yamandulo yahlahl’ indlela yeencwadi zanamhlanje. Yayinamaphepha agotyiweyo aza adityaniswa. La maphepha ayebhalwe kumacala omabini aza afakwa iqweqwe ukuwakhusela. Iincwadi zamandulo zazingafani neencwadi zanamhlanje, kodwa njengenkoliso yezinto ezenziweyo, ezi ncwadi zaphuculwa ngokweemfuno zabantu.
Umthi, Umthwebeba Nesikhumba
Ekuqaleni, iincwadi zamandulo zazenziwe ngamacwecwe omthi aqatywe umthwebeba. Kwafunyanwa amacwecwe abhaliweyo awayedityaniswe kumacala awo amade xa intaba-mlilo eyadubula kwiNtaba iVesuvius ngowama-79 C.E yatshabalalisa idolophu iHerculaneum nePompeii. Ekugqibeleni, amacwecwe alukhuni athatyathelw’ indawo ngamacwecwe enziwe ngezinto ezithambileyo. NgesiLatini, ezi ncwadi zamandulo zazibizwa ngokuba ziimembranae, okanye imibhalo yesikhumba, ekubeni amaphepha ayo ayedla ngokwenziwa ngesikhumba.
Ezinye iincwadi zamandulo zazenziwe ngompampiri. Eyona mibhalo-ngqangi yaziwayo nemidala yamaKristu, eyagcinwa kwindawo eyomileyo kwimimandla ethile yaseYiputa, yayenziwe ngompampiri.a
Umsongo Okanye Incwadi Yamandulo?
Kubonakala ukuba ngokuyintloko amaKristu ayesebenzisa umsongo, ubuncinane kwade kwasekupheleni kwenkulungwane yokuqala kwiXesha Eliqhelekileyo. Ukususela ekupheleni kwenkulungwane yokuqala ukusa kweyesithathu kwiXesha Eliqhelekileyo, kwakukho ukungavisisani phakathi kwabo babekhetha incwadi yamandulo nababethanda umsongo. Ababeqhele umsongo babengazimiselanga ukuyeka into ekudala isetyenziswa. Noko ke, phawula oko kwakufuneka xa ubani eza kufunda umsongo. Umsongo wawudla ngokuyilwa ngamaphepha ancanyathelisiweyo ompampiri okanye esikhumba ukuze abe made, emva koko ayesongwa. Amagama ayebhalwa kwimihlathi engaphambili kumsongo. Xa ubani eza kufunda, wayefanele awutwabulule ukuze afumane indinyana ayifunayo. Emva kokufunda, ubani wayefanele aphinde awusonge. (Luka 4:16-20) Kwakudla ngokufuneka imisongo emibini nangaphezulu ukuze kubhalwe incwadi, nto leyo eyayingelula. Nangona ukususela kwinkulungwane yesibini amaKristu ayekhuphela iZibhalo kwiincwadi zamandulo, imisongo yaqhubek’ isetyenziswa kangangexesha elide. Sekunjalo, iingcali zikholelwa ukuba ekubeni amaKristu ayesebenzisa iincwadi zamandulo, oku kwazibangela zamkelwa ngokubanzi.
Iinzuzo zencwadi yamandulo zicacile—ininzi into onokuyibhala kuyo, kulula ukuyivula nokuyiphatha. Nangona mva phaya abaninzi baphawula indlela eluncedo ngayo incwadi, inkoliso yabo ayizange iyeke msinya ukusebenzisa umsongo. Noko ke, emva kweenkulungwane eziliqela, ngenxa yezizathu ezahlukahlukeneyo, incwadi yamandulo yathandwa ngakumbi.
Xa kuthelekiswa nomsongo, kwakubiza imali encinane ukwenza incwadi yamandulo. Ephepheni kwakubhalwa macala omabini, yaye iincwadi eziliqela zazidityaniswa kumqulu omnye. Ngokutsho kwabanye, indlela ekwakulula ngayo ukufumana indinyana efunwayo kwincwadi yamandulo kwayibangela yathandwa ngamaKristu nazezinye izifundiswa, njengamagqwetha. KumaKristu, ukufumana izibhalo zindawonye—okanye ukudwelisa iindinyana zeBhayibhile—kwakuluncedo gqitha kumsebenzi wokushumayela. Ukongezelela, incwadi yamandulo yayinoqweqwe olwaludla ngokwenziwa ngomthi, ngoko ke yayomelele kunomsongo.
Kwakhona kwakulula ukufunda iincwadi zamandulo. Ekupheleni kwenkulungwane yesithathu, amaKristu ayeneencwadi ezincinane azazenziwe ngesikhumba zeencwadi zeVangeli. Ukususela ngoko, kuye kwenziwa iincwadi ezingamawaka ezigidi zemibhalo yeBhayibhile epheleleyo okanye inxalenye yayo.
Namhlanje, kukho iindlela ezininzi ezenze kwalula ukufumana ubulumko bukaThixo obufumaneka eBhayibhileni. Obu butyebi bunokufumaneka kwiikhompyutha, kwizinto ezirekhodiweyo, nezibhaliweyo. Enoba iBhayibhile uyithand’ injani, khulisa uthando lwakho ngeLizwi likaThixo, zixhalabise ngayo imihla ngemihla.—INdumiso 119:97, 167.
[Umbhalo osemazantsi]
a Bona inqaku elithi “Imibhalo-ngqangi Yamandulo YamaKristu, kwiMboniselo yesiNgesi ka-Agasti 15, 1962, kwiphepha 501-5.
[Imifanekiso ekwiphepha 15]
Incwadi yamandulo yaba negalelo elikhulu ekusasazweni kweBhayibhile