ILizwi LikaYehova Liphilile
Iimbalasane Zencwadi KaHoseya
UNQULO lokwenyaniso luya lufiphala kubukumkani basentla bezizwe ezilishumi zakwaSirayeli. Ngoxa kusalawula uYerobhoham II, uSirayeli uchumile ngezinto eziphathekayo, kodwa emva kokufa kwakhe, konke oko kufana nephupha nje. Kugquba izidubedube nokungazinzi kwezobupolitika. Abane kookumkani abathandathu abalawula emva kwakhe bayabulawa. (2 Kumkani 14:29; 15:8-30; 17:1-6) Ngeli xesha, uHoseya sele eneminyaka engama-59 engumprofeti ukususela ngowama-804 B.C.E.
Indlela awavakalelwa ngayo uYehova ngolu hlanga lwakwaSirayeli luphambukileyo iboniswa ngokucacileyo koko kwenzeka kumtshato kaHoseya. Isigidimi sikaHoseya sibhenca indlela awayekreqe ngayo uSirayeli kunye nemigwebo ekuprofetwe ngayo nxamnye naye nobukumkani bakwaYuda. Konke oku wakubhala kule ncwadi ibizwa ngegama lakhe, esebenzisa ulwimi oluthantamisayo namazwi abukhali nangqalileyo. Ekubeni le ncwadi iyinxalenye yeLizwi likaThixo eliphefumlelweyo, isigidimi sayo siphilile yaye sinamandla.—Hebhere 4:12.
“YIYA UZITHABATHELE UMFAZI WOBUHENYU”
UYehova uthi kuHoseya: “Yiya, uzithabathele umfazi wobuhenyu.” (Hoseya 1:2) UHoseya wenza kanye oko yaye uGomere umzalela unyana. Ngokuqinisekileyo abantwana ababini abazalwa nguGomere emva kwalo nyana bayimigqakhwe. Amagama abo nguLo-ruhama noLo-ami, magama lawo athetha ukuba uYehova akawenzeli nceba amaSirayeli yaye ubalahlile abantu bakhe abanganyanisekanga.
UYehova uvakalelwa njani ngabantu bakhe abanemvukelo? Uthi kuHoseya: “Phinda umthande, umfazi othandwa liqabane ekrexeza, njengoko kunjalo ngemeko yothando lukaYehova ngoonyana bakaSirayeli ngoxa bephethukela kwabanye oothixo.”—Hoseya 3:1.
Iimpendulo Kwimibuzo YeZibhalo:
1:1—Kutheni uHoseya ebakhankanya bobane ookumkani ababelawula kwaYuda ngexesha lobulungiseleli bakhe ngoxa ethetha ngomlawuli omnye kuphela wakwaSirayeli? Kungenxa yokuba ngookumkani abakumnombo wenzala kaDavide kuphela ababegqalwa njengabalawuli bokwenene babantu abanyulwe nguThixo. Ookumkani bangasentla babengekho kumnombo wendlu kaDavide, yayingabakwaYuda ababekuloo mnombo.
1:2-9—Ngaba ngokwenene uHoseya wathabatha umfazi wobuhenyu? Ewe, kuba lo mfazi watshatwa nguHoseya wakrexeza ekugqibeleni. Akukho nto ithethwa ngulo mprofeti ebonisa ukuba ezi zinto wayezithetha ngobomi bakhe zaziliphupha okanye umbono.
1:7—Indlu kaYuda yayenzelwa nini inceba yaza yasindiswa? Oku kwenzeka ngowama-732 B.C.E., ngemihla kaKumkani uHezekiya. Ngelo xesha, uYehova waziphelisa izoyikiso ezazisenziwa yiAsiriya kwiYerusalem ngokuthumela ingelosi ukuba itshabalalise imikhosi yaseAsiriya eli-185 000 ngobusuku nje obunye. (2 Kumkani 19:34, 35) Ngaloo ndlela uYehova wamhlangula uYuda, kungekhona “ngesaphetha okanye ngekrele okanye ngemfazwe, ngamahashe okanye ngabakhweli-mahashe,” kodwa wasebenzisa ingelosi.
1:10, 11—Ekubeni ubukumkani basentla bakwaSirayeli baphanza ngowama-740 B.C.E., oonyana bakaSirayeli ‘baqokelelana ndawonye ngomanyano’ ngayiphi indlela noonyana bakaYuda? Abaninzi kubukumkani basentla bafudukela kwaYuda ngaphambi kokuba abemi balapho bathinjelwe eBhabhiloni ngowama-607 B.C.E. (2 Kronike 11:13-17; 30:6-12, 18-20, 25) Xa abathinjwa abangamaYuda babuyela kwilizwe labo ngowama-537 B.C.E., babekunye nenzala yabo babephuma kubukumkani basentla bakwaSirayeli.—Ezra 2:70.
2:21-23—Yintoni eyaxelwa kwangaphambili ngala mazwi kaYehova: “Ngokuqinisekileyo ndiya kumhlwayela [uYizereli] njengembewu yam emhlabeni, ndimenzele inceba”? Igama lezibulo likaHoseya awalizalelwa nguGomere yayinguYizereli. (Hoseya 1:2-4) Intsingiselo yeli gama, ekukuba “UThixo Uya Kuhlwayela Imbewu,” sisiprofeto sokuba uYehova wayeza kuhlanganisa intsalela ethembekileyo ngowama-537 B.C.E. aze ayihlwayele njengembewu kwaYuda. Ilizwe elahlala liyinkangala kangangeminyaka engama-70 kwakuza kufuneka livelise iinkozo, iwayini eswiti neoli. Ngendlela ebumbongo, esi siprofeto sabonisa ukuba ezi zinto zimnandi zaziza kucela umhlaba ukuba uvelise izondlo, uze umhlaba ucele imvula ezulwini. Amazulu wona ayeza kucela amafu anemvula kuThixo. Konke oku kwakuza kwenzelwa ukuba abo babuyileyo bentsalela banyanyekelwe ngokwaneleyo. Umpostile uPawulos noPetros balatha kuHoseya 2:23 xa bethetha ngokuhlanganiswa kwentsalela yoSirayeli wokomoya.—Roma 9:25, 26; 1 Petros 2:10.
Oko Sikufundayo:
1:2-9; 3:1, 2. Khawucinge indlela awazincama ngayo uHoseya ngokuhlala nomfazi awayetshate naye, kuba nje ethobela uThixo! Sikulungele kangakanani ukuncama izinto esizithandayo ngenxa yokuba sifuna ukwenza ukuthanda kukaThixo?
1:6-9. UYehova umthiyile umntu okrexeza ngokomoya, kanye njengalowo ukrexeza ngokoqobo.
1:7, 10, 11; 2:14-23. Oko uYehova wakuxela kwangaphambili ngoSirayeli noYuda kwazaliseka. Ilizwi likaYehova lisoloko lizaliseka.
2:16, 19, 21-23; 3:1-4. UYehova ukulungele ukubaxolela abo baguquka ngokunyanisekileyo. (Nehemiya 9:17) Ngokufanayo noYehova, sifanele sibe nenceba novelwano xa sisebenzisana nabanye.
“UYEHOVA UBABEK’ ITYALA”
“UYehova ubabek’ ityala abemi beli lizwe.” Benze ntoni? “Kuba akukho nyaniso nabubele bothando nakwazi uThixo kweli lizwe.” (Hoseya 4:1) Abantu bakwaSirayeli abawexukileyo babandakanyeke ekuqhatheni nasekuphalazeni igazi yaye bayakrexeza ngokomoya nangokoqobo. Kunokuba bafune uncedo kuThixo, “babiza eYiputa; baya eAsiriya.”—Hoseya 7:11.
UYehova uvakalisa umgwebo wakhe esithi: “USirayeli makaginywe.” (Hoseya 8:8) Ubukumkani bakwaYuda abukho msulwa. UHoseya 12:2 uthi: “UYehova umbek’ ityala uYuda, kwanoYakobi uyamphendulisa ngeendlela zakhe; uya kumbuyekeza ngokwezenzo zakhe.” Kodwa ngokuqinisekileyo uza kubuyiselwa, kuba uThixo uthi: “Ndiya kumkhulula esandleni seShiyol; ekufeni ndiya kumkhulula.”—Hoseya 13:14.
Iimpendulo Kwimibuzo YeZibhalo:
6:1-3—Ngubani owayesithi: “Yizani, sibuyele kuYehova”? Kusenokwenzeka ukuba amaSirayeli angathembekanga ayekhuthazana ukuba abuyele kuYehova. Ukuba kunjalo, ayesenza ngathi aguqukile, exoka. Ububele bawo bothando babubobexeshana, yaye “bunjengamafu akusasa nanjengombethe omka ekuseni.” (Hoseya 6:4) Kwelinye icala, isenokuba nguHoseya owayethetha la mazwi ecela abantu ukuba babuyele kuYehova. Nokuba yayingubani na, abemi ababengalawuleki bezizwe ezilishumi zakwaSirayeli kwakufuneka baguquke ngokunyanisekileyo baze babuyele kuYehova.
7:4—USirayeli owayekrexeza wayefana njani ‘neziko elibaswayo’? Olu faniso lubonisa ukuba iminqweno engendawo yayendele ezintliziyweni zabo.
Oko Sikufundayo:
4:1, 6. Ukuba sifuna ukuthandwa nguYehova, simele siqhubeke sifunda ngaye size sisebenzise oko sikufundayo.
4:9-13. Abo baziphethe kakubi ngokwesini baze baqhubeke nonqulo olungahlambulukanga baya kuphendula kuYehova.—Hoseya 1:4.
5:1. Abo bakhokela abantu bakaThixo bafanele balukhabe ngaw’ omane uwexuko. Ukuba abakwenzi oko, basenokulukuhlela abanye kunqulo lobuxoki, ngaloo ndlela babe ‘sisibatha nomnatha’ kubo.
6:1-4; 7:14, 16. Ukuguquka nje ngomlomo kukuhanahanisa nokudlala ngexesha. Ukuze uThixo amenzele inceba umenzi-bubi, umele aguquke ngokunyanisekileyo, abonakale ukuba ubuyele kwinto ‘ephezulu,’ oko kukuthi, kunqulo olunemilinganiselo ephakamileyo. Ufanele enze ngokuvisisana nemilinganiselo kaThixo ephakamileyo.—Hoseya 7:16.
6:6. Ukwenza isono kubonisa ukuba akumthandi ngokunyanisekileyo uThixo. Enoba ungazincama kangakanani na ngokomoya, oko akukuthetheleli ukuba wenze isono.
8:7, 13; 10:13. Umgaqo othi “loo nto ayihlwayelayo umntu, uya kuvuna kwayona” wangqineka uchanile kwimeko kaSirayeli owayekrexeza.—Galati 6:7.
8:8; 9:17; 13:16. Oko kwaprofetwa ngobukumkani basentla kwazaliseka xa ikomkhulu lalapho iSamariya lathinjwa yiAsiriya. (2 Kumkani 17:3-6) Sinokuqiniseka ukuba uThixo uya kukwenza aze akuphumeze oko akuthethileyo.—Numeri 23:19.
8:14. Esebenzisa amaBhabhiloni, ngowama-607 B.C.E. uYehova wathumela “umlilo kwizixeko [zakwaYuda],” etshabalalisa iYerusalem nelizwe lakwaYuda njengoko kwakuxelwe kwangaphambili. (2 Kronike 36:19) Ilizwi likaThixo alisokuze lisilele.—Yoshuwa 23:14.
9:10. Nangona ayezinikele kuThixo oyinyaniso, amaSirayeli ‘aya kuBhahali wasePehore, yaye aqhubeka ezahlulela kwinto enezothe.’ Kububulumko ukufunda kumzekelo wabo ombi size silumkele ukukubetha ngoyaba ukuzahlulela kwethu kuYehova.—1 Korinte 10:11.
10:1, 2, 12. Sifanele simnqule uThixo ngentliziyo engenaluhanahaniso. Xa ‘sihlwayela imbewu ngobulungisa, sivuna ngokuvumelana nobubele bothando bukaThixo.’
10:5. IBhete-aven (ethetha “iNdlu Yeentlungu”) ligama lesinyeliso eyathiywa ngalo iBheteli (“iNdlu kaThixo”). Xa kwathinjwa isithixo esilithole saseBhete-aven, abemi baseSamariya basizilela ngenxa yokuba sasingasekho kunye nabo. Akukho ngqiqweni ukuthembela kwisithixo esingaphiliyo esingenakukwazi nokuzikhusela.—INdumiso 135:15-18; Yeremiya 10:3-5.
11:1-4. UYehova usoloko ebaphatha ngothando abantu bakhe. Ukuzithoba kuThixo akucinezeli.
11:8-11; 13:14. Ilizwi likaYehova elingokubuyisela abantu bakhe kunqulo lokwenyaniso ‘alizange libuyele kuye ngaphandle kwemiphumo.’ (Isaya 55:11) Ngowama-537 B.C.E., bakhululwa ekuthinjweni eBhabhiloni yaza intsalela yabo yabuyela eYerusalem. (Ezra 2:1; 3:1-3) Nantoni na uYehova ayithethe ngabaprofeti bakhe iya kwenzeka nakanjani na.
12:6. Sifanele sizimisele ukuba nobubele bothando nokusesikweni, size sihlale sithembele kuYehova.
13:6. AmaSirayeli ‘anela zaza zaphakama iintliziyo zawo. Kungenxa yoko le nto amlibalayo [uYehova].’ Kufuneka sikulumkele ukuziphakamisa.
“IINDLELA ZIKAYEHOVA ZITHE TYE”
UHoseya unesi sibongozo: “Buya, Sirayeli, uze kuYehova uThixo wakho, kuba ukhubekile ngesiphoso sakho.” Ucela abantu ukuba bathi kuYehova: “Sixolele isiphoso sethu; uze wamkele okulungileyo, yaye siya kunikela njengembuyekezo amathole eenkomo aziinkunzi, amazwi emilebe yethu.”—Hoseya 14:1, 2.
Umenzi-bubi oguqukileyo ufanele eze kuYehova, amkele iindlela zakhe, aze anikele indumiso kuye. Ngoba? “Kuba iindlela zikaYehova zithe tye, yaye amalungisa aya kuhamba ngazo.” (Hoseya 14:9) Sivuyiswa kukuba abaninzi “ngokuqinisekileyo baya kuza begubha kuYehova nasekulungeni kwakhe ekupheleni kwemihla”!—Hoseya 3:5.
[Umfanekiso okwiphepha 15]
Ubomi bentsapho kaHoseya buzekelisa indlela uYehova awawaphatha ngayo amaSirayeli
[Umfanekiso okwiphepha 17]
Ukuphanza kweSamariya ngowama-740 B.C.E., kwathetha isiphelo sobukumkani bezizwe ezilishumi zakwaSirayeli