Imibuzo Evela Kubafundi
Ngaba kwakungeyonto iphosakeleyo ngoYakobi ukuzenza uEsawu, njengokuba sisiva kwiGenesis 27:18, 19?
Kusenokwenzeka ukuba uqhelene neli bali. Ixhego elinguIsake laxelela unyana walo uEsawu ukuba aye kuzingela inyamakazi esenzela ukuba ‘adle, kuthi ngco kuye, ukuze amsikelele phambi koYehova engekafi.’ Wathi akuyiva into ethethwe ngumyeni wakhe, uRebheka walungiselela ukutya okunencasa waza wayalela uYakobi oku: “Wothi ke wena ukuse [ukutya] kuyihlo, adle, ukuze akusikelele engekafi.” Waya ke uYakobi kuyise nokutya, enxibe iingubo zikaEsawu neemfele zamatakane eebhokhwe entanyeni yakhe nasezandleni. Xa wabuzayo uIsake ukuba “Ungubani na nyana wam?” UYakobi waphendula: “NdinguEsawu izibulo lakho.” UIsake wamkholelwa waza wamsikelela.—Genesis 27:1-29.
IBhayibhile ayisixeleli ngokweenkcukacha ukuba kwakutheni ukuze uRebheka noYakobi benze le nto, kodwa ibonisa ukuba le yayiyimeko yongxamiseko. Kwelinye icala, iLizwi likaThixo alikugwebi phofu lingakuqhwabeli nezandla okwenziwa nguRebheka noYakobi, ngaloo ndlela, le ngxelo ayimiseli mzekelo wokuqhatha nokuxoka. Noko ke, ikho inkcazelo encinane esiyifumana eBhayibhileni ngesi siganeko.
Okokuqala, le ngxelo ikwenza kucace ukuba uYakobi wayekufanelekela ukusikelelwa nguyise; kodwa kwakungenjalo ngoEsawu. Ngaphambilana, uYakobi walithenga ngokusemthethweni ilungelo lobuzibulo kwiwele lakhe elalingenaluxabiso ngalo, nelalithengisa ngesidlo ukuze nje lihluthe. UEsawu “wabudela ubuzibulo.” (Genesis 25:29-34) Ngoko ke, xa wayesiya kuyise, uYakobi wayefuna intsikelelo eyayilunge kuye.
Okwesibini, xa uIsake wafumanisayo ukuba unike uYakobi iintsikelelo, akazange afune ukukuguqula oko. Kunokwenzeka ukuba wakhumbula oko uYehova wayekuthethe kuRebheka ngaphambi kokuba la mawele azalwe: “Elikhulu liya kukhonza elincinane.” (Genesis 25:23) Licacile nelokuba xa uYakobi wayeza kuya kwaHaran, uIsake wayandisa intsikelelo awayemnike yona ngaphambili.—Genesis 28:1-4.
Okokugqibela, simele sikhumbule ukuba uYehova wayekwazi yaye enomdla kuko konke okwakusenzeka. Intsikelelo kaIsake yayihambisana nesithembiso sikaThixo kuAbraham. (Genesis 12:2, 3) Ukuba uThixo wayengafuni le ntsikelelo ifunyanwe nguYakobi, ngewayengenelele ngandlel’ ithile. Kunoko, uYehova wamqinisekisa ngale ndlela uYakobi: “Zize ngokuqinisekileyo zizisikelele ngawe nangembewu yakho zonke iintsapho zomhlaba.”—Genesis 28:10-15.