Ukuphulaphula Isazela Sakho

“Zonke izinto zihlambulukile kubantu abahlambulukileyo. Kodwa kubantu abazenze inqambi nabangenalukholo akukho nto ihlambulukileyo.”—TITO 1:15.

1. UPawulos wawanceda njani amabandla aseKrete?

EMVA kwezihlandlo ezithathu zohambo lukampostile uPawulos lobuvangeli basemazweni, wabanjwa waza ekugqibeleni wathunyelwa eRoma, apho wavalelwa khona iminyaka emibini. Wenza ntoni akukhululwa? Ngaxa lithile emva kokukhululwa kwakhe, uPawulos watyelela isiqithi saseKrete ehamba noTito, awambhalela wathi: “Ndakushiya eKrete ngenjongo yokuba umise izinto ngendlela efanelekileyo, umisele namadoda amakhulu.” (Tito 1:5) Ukuphumeza kukaTito eso sabelo kwakubandakanya izazela zabanye.

2. Yiyiphi ingxaki ekwafuneka uTito ahlangabezane nayo kwisiqithi saseKrete?

² UPawulos waxelela uTito ngeemfaneleko zabadala bebandla, waza emva koko wayitsho nento yokuba kwakukho “abantu abaninzi abangalawulekiyo, abathetha izinto ezingeyongenelo, nabakhohlisi bengqondo.” Aba ‘babebhukuqa izindlu ziphela ngokufundisa izinto ezingafanelekanga.’ UTito kwakufuneka ‘aqhubeke ebohlwaya.’ (Tito 1:10-14; 1 Timoti 4:7) UPawulos wathi iingqondo nezazela zabo “zidyobhekile,” esebenzisa eli gama edlulisela ingcamango yokungcoliseka, kanye njengokuba impahla entle inokungcoliswa yidayi. (Tito 1:15) Kusenokwenzeka ukuba amanye kuloo madoda ayenemvelaphi yobuYuda, kuba ‘ayebambelele kulwaluko.’ Amabandla namhlanje akonakaliswanga ngamadoda analoo mbono; kodwa sinokufunda okuthile ngesazela kwisiluleko uPawulos awasinika uTito.

Abo Banezazela Ezidyobhekileyo

3. Wathini uPawulos xa wayebhalela uTito ngesazela?

³ Phawula imo uPawulos asikhankanya kuyo isazela. “Zonke izinto zihlambulukile kubantu abahlambulukileyo. Kodwa kubantu abazenze inqambi nabangenalukholo akukho nto ihlambulukileyo, kodwa iingqondo zabo nezazela zabo zidyobhekile. Bavakalisa esidlangalaleni ukuba bayamazi uThixo, kodwa bayamkhanyela ngemisebenzi yabo.” Ngokucacileyo, ngelo xesha abanye abantu kwakufuneka benze utshintsho ukuze “baphile elukholweni.” (Tito 1:13, 15, 16) Babengakwazi ukwahlula phakathi kwento ecocekileyo nengacocekanga, yaye oku kwakuquka izazela zabo.

4, 5. Abanye ebandleni babesilela ngayiphi indlela, yaye oku kwakubachaphazela njani?

⁴ Kwiminyaka engaphezu kwelishumi ngaphambi koko, iqumrhu elilawulayo lamaKristu lenza isigqibo sokuba ulwaluko aluseyomfuneko ukuze umntu abe ngumnquli wenyaniso, yaye lakudlulisela oko emabandleni. (IZenzo 15:1, 2, 19-29) Sekunjalo, abanye eKrete ‘babesabambelele kulwaluko.’ Babengavumelani ngokuphandle nequmrhu elilawulayo, ‘befundisa izinto ezingafanelekanga.’ (Tito 1:10, 11) Becinga ngendlela egqwethekileyo, kusenokwenzeka ukuba babekhuthaza imimiselo yoMthetho ephathelele ukutya nezithethe zococeko. Kusenokwenzeka ukuba babesongezelela koko kutshiwo nguMthetho, kanye njengokuba babesenjenjalo ababengaphambi kwabo ngomhla kaYesu, befundisa neentsomi zamaYuda nemithetho yabantu.—Marko 7:2, 3, 5, 15; 1 Timoti 4:3.

⁵ Loo ndlela yabo yokucinga yadyobha indlela ababegweba ngayo nemvo yabo ngokulungileyo nokubi. UPawulos wabhala: “Kubantu abazenze inqambi nabangenalukholo akukho nto ihlambulukileyo.” Izazela zabo zazijijeke kangangokuba zazingasakwazi kubakhokela ngokuthembeka kwindlela abenza nababejonga ngayo izinto. Ngaphezu koko, babegweba amanye amaKristu kwizinto zobuqu, izinto mKristu ngamnye awayenokuzenzela izigqibo ngendlela athanda ngayo kuzo. Kule nkalo la maKrete ayezigqala njengezingacocekanga izinto ezazingenjalo enyanisweni. (Roma 14:17; Kolose 2:16) Nangona ayesithi ayamazi uThixo, imisebenzi yawo yayingavumelani noko.—Tito 1:16.

“Zihlambulukile Kubantu Abahlambulukileyo”

6. Ziziphi iindidi ezimbini zabantu awathetha ngazo uPawulos?

⁶ Sinokungenelwa njani kumazwi uPawulos awawabhekisa kuTito? Jonga umahluko okhoyo kula mazwi: “Zonke izinto zihlambulukile kubantu abahlambulukileyo. Kodwa kubantu abazenze inqambi nabangenalukholo akukho nto ihlambulukileyo, kodwa iingqondo zabo nezazela zabo zidyobhekile.” (Tito 1:15) Ngokuqinisekileyo uPawulos wayengathethi kuthi kumKristu oziphethe kakuhle, yonke into icocekile yaye ivumelekile. Siqinisekile ngaloo nto kuba uPawulos wayicacisa kwenye ileta into yokuba abantu abahenyuzayo, abanqula izithixo nabasebenzelana nemimoya nabanye “abayi kubudla ilifa ubukumkani bukaThixo.” (Galati 5:19-21) Ngoko sifikelela kwisigqibo sokuba uPawulos wayethetha nje inyaniso ngeendidi ezimbini zabantu, abo baziphethe kakuhle nabathanda izinto zokomoya nabo bangenjalo.

7. Yintoni egatywa ngamaHebhere 13:4, kodwa nguwuphi umbuzo onokuphakama?

⁷ Akulindelekanga ukuba umKristu onyanisekileyo aphephe kuphela izinto ezalelwa ngokungqalileyo yiBhayibhile. Ngokomzekelo cinga ngala mazwi angqalileyo: “Umtshato mawubekeke phakathi kwenu nonke, nesilili somtshato masingadyojwa, kuba uThixo uya kubagweba abahenyuzi nabakrexezi.” (Hebhere 13:4) Nabantu abangengomaKristu abangazi nowathwethwa ngeBhayibhile baya kukuxelela nje kakuhle ukuba le ndinyana iyakwalela ukukrexeza. Ngokusuka kule ndinyana nakwezinye eziseBhayibhileni izicacele into yokuba uThixo akazifuni iintlobano zesini phakathi kwendoda etshatileyo okanye umfazi nomnye umntu ongenguye umyeni okanye umfazi wayo osemthethweni. Noko ke, kuthekani ngabantu ababini abangatshatanga abenza iintlobano zesini emlonyeni? Abaninzi abakwishumi elivisayo bema ngelithi esi senzo asiyongozi kuba asizontlobano zesini. Ngaba umKristu unokugqala iintlobano zesini ezenziwa emlonyeni njengento ecocekileyo?

8. AmaKristu ahluka njani kubantu abaninzi ehlabathini xa kufikwa kumba weentlobano zesini ezenziwa emlonyeni?

⁸ AmaHebhere 13:4 neyoku-1 kwabaseKorinte 6:9 ziqinisekisa ukuba uThixo akalufuni ukrexezo nohenyuzo (ipor·neiʹa ngesiGrike). Luquka ntoni ke lona uhenyuzo, ipor·neiʹa? Eli binzana lesiGrike liquka ukusetyenziswa kwamalungu esini ngendlela yemvelo okanye egqwethekileyo ngenjongo engcolileyo. Libandakanya zonke iindidi zeentlobano zesini ezingaphandle komtshato weZibhalo. Ngoko libhekisela kwiintlobano zesini ezenziwa emlonyeni, nakuba ulutsha oluninzi ehlabathini luye lwaxelelwa okanye luzixelela ukuba olu hlobo lweentlobano zesini lwamkelekile. AmaKristu okwenyaniso akasekeli ukucinga nendlela enza ngayo kwizimvo zabo “bathetha izinto ezingeyongenelo, nabakhohlisi bengqondo.” (Tito 1:10) Abambelela kwimilinganiselo ephakamileyo yeZibhalo Ezingcwele. Kunokuba azame ukuthethelela iintlobano zesini ezenziwa emlonyeni, ayaqonda ukuba iZibhalo zithi loo nto luhenyuzo, ipor·neiʹa, yaye aqeqesha izazela zawo ngokuvisisana noko.a—IZenzo 21:25; 1 Korinte 6:18; Efese 5:3.

Amazwi Ezazela Awahlukeneyo, Izigqibo Ezahlukeneyo

9. Ukuba “zonke izinto zihlambulukile,” yintoni indima yesazela?

⁹ Wayethetha ukuthini uPawulos xa esithi “zonke izinto zihlambulukile kubantu abahlambulukileyo”? UPawulos wayebhekisela kumaKristu awayevisisanisa indlela yawo yokucinga nemvo yawo yokulungileyo nokubi nemilinganiselo kaThixo, esiyifumana kwiLizwi lakhe eliphefumlelweyo. Loo maKristu ayaqonda ukuba kwimiba emininzi engagatywa ngokungqalileyo, amaKristu asenokuba nezimvo ezahlukeneyo. Kunokuba agxeke, azigqala ‘njengezihlambulukileyo’ izinto angazigatyiyo uThixo. Akalindeli ukuba bonke abanye abantu bacinge kanye njengokuba esenza ngemiba yobomi iBhayibhile enganikeli lwalathiso lungqalileyo kuyo. Makhe sihlolisise imizekelo yoko.

10. Umsitho womtshato (okanye umngcwabo) unokubangela yiphi ingxaki?

¹⁰ Kwiintsapho ezininzi iba liqabane elinye elingumKristu, elinye lingabi nguye. (1 Petros 3:1; 4:3) Oku kunokuba lucelomngeni ngeendlela ezahlukeneyo, mhlawumbi njengaxa kukho umsitho womtshato okanye umngcwabo wesalamane. Masithi mfazi uthile ongumKristu unendoda engekabi lokholwa. Esinye isalamane sale ndoda siyatshata, yaye umsitho uza kuba kwisakhiwo secawa. (Okanye kusweleke isalamane sayo mhlawumbi umzali, yaye umngcwabo uza kuba secaweni.) Esi sibini siyamenywa yaye le ndoda ifuna umfazi wayo abelapho. Isazela sale nkosikazi sithini ngokuya kwindawo enjalo? Iza kuthini? Khawucinge ngezi meko zimbini.

11. Chaza indlela omnye umfazi ongumKristu anokuqiqa ngayo xa kufuneka eye kumsitho womtshato osecaweni, nto leyo enokukhokelela kwesiphi isigqibo?

¹¹ UBoniswa ucinga ngalo myalelo weBhayibhile ubalulekileyo, ‘Phumani kwiBhabhiloni Enkulu,’ ubukhosi behlabathi bonqulo lobuxoki. (ISityhilelo 18:2, 4) Wakha walilungu lale cawa kuza kutshatelwa kuyo yaye uyazi ukuba kulo msitho bonke abakhoyo baza kucelwa ukuba benze izenzo zonqulo njengokuthandaza, ukucula okanye ezinye izimbo zonqulo. Uzimisele ukungabi nanxaxheba kwezo zenzo, engafuni kuba lapho kuba hleze anyanzeleke ukuba aphule ingqibelelo yakhe. UBoniswa lo uyamhlonela umyeni wakhe yaye ufuna ukusebenzisana naye, njengentloko yakhe engokweZibhalo; kodwa akafuni kwaphula imilinganiselo aphila ngayo yeZibhalo. (IZenzo 5:29) Kodwa ngobuchule, ucacisela iqabane lakhe ukuba enoba lona likhetha ukuya apho kodwa yena akanakukwazi. Unokutsho ukuba, xa yena Boniswa esiya apho aze angabi nanxaxheba kwizinto ezenziwa apho, loo nto inokumhlazisa umyeni wakhe, ngenxa yaloo nto ke xa engayi apho ucingela umyeni wakhe. Isigqibo sakhe simshiya enesazela esicocekileyo.

12. Omnye umntu unokuqiqa aze enze ntoni ngokuphathelele ukumenyelwa kumsitho womtshato osecaweni?

¹² NoVathiswa ukwingxaki ebufana naleyo. Uyamhlonela umyeni wakhe, uzimisele ukunyaniseka kuThixo, yaye uyasithobela isazela sakhe esiqeqeshwe ngeBhayibhile. Emva kokucinga ngeengongoma ezifana nezo acinge ngazo uBoniswa, uVathiswa uyathandaza aze ahlolisise “Imibuzo Evela Kubafundi” ekwiMboniselo kaMeyi 15, 2002. Ukhumbula ukuba amaHebhere amathathu awuthobela umyalelo wokuya kwindawo eyayiza kuba nonqulo-zithixo, kodwa ayigcina ingqibelelo yawo ngokungabandakanyeki kunqulo-zithixo. (Daniyeli 3:15-18) Ugqiba kwelokuba ahambe nomyeni wakhe kodwa angenzi nasinye isenzo sonqulo, yaye wenza ngokuvisisana nesazela sakhe. Ngobuchule kwangaxeshanye ngendlela ecacileyo uchazela umyeni wakhe oko isazela sakhe simvumela ukuba akwenze noko singayi kumvumela ukuba akwenze. UVathiswa unethemba lokuba umyeni wakhe uya kuwubona umahluko phakathi konqulo lwenyaniso nolobuxoki.—IZenzo 24:16.

13. Kutheni ingamele isiphazamise into yokuba la maKristu mabini efikelele kwizigqibo ezahlukeneyo?

¹³ Ngaba isibakala sokuba la maKristu mabini efikelele kwizigqibo ezahlukeneyo sithetha ukuba umntu angenza nantoni na ayithandayo okanye omnye kuwo unesazela esibuthathaka? Akunjalo. Ngenxa yokuba ezazi iingoma nezithethe zecawa, uBoniswa uyabona ukuba ukuya apho kunokuba yingozi kuye. Ukubandakanyeka kwakhe kwixa elidluleyo benomyeni wakhe kwimiba yonqulo kunokusichaphazela isazela sakhe. Ngoko uyaqiniseka ukuba isigqibo asenzileyo silungele yena.

14. Yintoni efanele ikhunjulwe ngamaKristu ngokuphathelele imiba yobuqu?

¹⁴ Kodwa ngaba esikaVathiswa isigqibo siphosakele? Akakho umntu onelungelo lokutsho. Akukho mntu ufanele amgxeke ngokukhetha ukuya kweso siganeko kodwa angabi nanxaxheba kuso nasiphi na isenzo sonqulo. Khumbula isiluleko sikaPawulos kwizigqibo zobuqu eziphathelele ukutya okanye ukungatyi ukutya okuthile: ‘Lowo utyayo makangamjongeli phantsi lowo ungatyiyo, nalowo ungatyiyo makangamgwebi lowo utyayo. Ukuma okanye ukuwa kwakhe kusenkosini yakhe. Eneneni, uya kwenziwa eme, kuba uYehova unako ukumenza eme.’ (Roma 14:3, 4) Ngokuqinisekileyo, akakho umKristu wenyaniso ofuna ukuphembelela nabani na ukuba atyeshele ulwalathiso lwesazela esiqeqeshiweyo kuba ukwenjenjalo kuya kufana nokutyeshela ilizwi elidlulisela isigidimi esisindisa ubomi.

15. Kutheni sifanele sicinge nzulu ngezazela neemvakalelo zabanye?

¹⁵ Ukongezelela, omabini la maKristu afanele acingisise nangezinye iinkalo ezongezelelekileyo, enye yazo ligalelo oko okuba nalo kwabanye. UPawulos wasinika esi siluleko: “Zenzeleni esi sigqibo, sokuba ningamkhubekisi umzalwana okanye nimwise.” (Roma 14:13) UBoniswa usenokuba uyazi ukuba kwibandla akulo okanye entsatsheni yakhe imiba efanayo ikhe yabangela iingxaki ezininzi ngaphambili, yaye oko akwenzayo kusenokuba negalelo ebantwaneni bakhe. Ngokwahlukileyo, uVathiswa yena usenokuba uyazi ukuba ukhetho olufana nolo alwenzileyo khange ngaphambili lubangele ngxaki kwibandla akulo okanye kwindawo ahlala kuyo. Bobabini aba dade—nathi sonke—bafanele bayazi into yokuba isazela esiqeqeshwe kakuhle sibonisa inkxalabo ngabanye. UYesu wathi: “Nabani na okhubekisa omnye waba bancinane banokholo kum, ngekumlungele kanye ukuba agangxwe ilitye lokusila entanyeni yakhe njengelo lijikeleziswa nge-esile aze atshoniswe enzulwini yolwandle.” (Mateyu 18:6) Ukuba umntu akayikhathaleli into yokukhubekisa abanye, unokuba nesazela esingahlambulukanga, njengamaKristu athile eKrete.

16. Luluphi utshintsho esinokululindela kumKristu ngokuhamba kwexesha?

¹⁶ Ukukhula komKristu ngokomoya kufanele kube yinto eqhubekayo, ifanele ibe njalo nendlela eva aze asabele ngayo kwisazela sakhe. Cinga nje ngoLwazi, osandul’ ukubhaptizwa. Isazela sakhe simxelela ukuba agatye imikhwa engqubanayo neZibhalo awayebandakanyeke kuyo ngaphambili, mhlawumbi equka ukunqula izithixo nokungahloneli ubungcwele begazi. (IZenzo 21:25) Eneneni, ngoku ngobulumko uyaziphepha izinto ezingathi ziyelelene nezo uThixo azalelayo. Kwelinye icala, iyammangalisa into yokuba abanye bagatye izinto ezithile yena acinga ukuba zamkelekile, njengeenkqubo ezithile zikamabonwakude.

17. Zekelisa indlela ixesha nokukhula ngokomoya okunokusichaphazela ngayo isazela nesigqibo somKristu.

¹⁷ Ngokuhamba kwexesha, ulwazi lukaLwazi luyakhula yaye uba nolwalamano noThixo. (Kolose 1:9, 10) Ibangela ntoni loo nto? Ilizwi elikuye liyaqeqeshwa. Ngoku uLwazi uzimisele ngakumbi ukuphulaphula isazela sakhe aze ayihlolisise kakuhle imigaqo yeZibhalo. Enyanisweni, uyaqonda ukuba ezinye izinto ‘ezibufana’ ebezigatya ngaphambili azingqubani neengcinga zikaThixo. Ngaphezu koko, ngenxa yokuthobela kwakhe imigaqo yeBhayibhile nokukulungela kwakhe ukuthobela isazela sakhe esiqeqeshwe kakuhle, uLwazi ushukunyiswa sisazela sakhe ukuba aphephe iinkqubo abevakalelwa kukuba zamkelekile. Ngokwenene, isazela sakhe siye sahlaziywa.—INdumiso 37:31.

18. Yintoni emele isivuyise?

¹⁸ Kumabandla amaninzi, kukho amaKristu angalinganiyo ngokukhula kwawo ngokomoya. Amanye asandul’ ukukholwa. Mhlawumbi izazela zawo zisathe cwaka kweminye imiba, kodwa zithethela phezulu kweminye. AmaKristu anjalo kusenokufuneka anikwe ithuba aze ancedwe aqhelane nolwalathiso lukaYehova aze aziphulaphule izazela zawo eziqeqeshwe kakuhle. (Efese 4:14, 15) Okuvuyisayo kukuba, kwakula mabandla afanayo, kusenokwenzeka ukuba bakho abanolwazi oluphangaleleyo, abanamava ekusebenziseni imigaqo yeBhayibhile nabanezazela eziqeqeshwe ngokuvisisana nendlela uThixo acinga ngayo. Kuvuyisa ngokwenene ukungqongwa ‘ngabantu abahlambuluke’ ngolo hlobo abazibona ‘njengezihlambulukileyo’ ngokomoya nangokuziphatha izinto ezamkelekileyo eNkosini. (Efese 5:10) Ngamana sonke singazibekela usukelo lokukhula ukusa kwelo nqanaba size silondoloze izazela zethu ngokuvisisana nolwazi oluchanileyo lwenyaniso nozinikelo lobuthixo.—Tito 1:1.

[Umbhalo osemazantsi]

Ungaphendula Uthini?

• Kwakutheni ukuze amanye amaKristu aseKrete abe nezazela ezidyobhekileyo?

• Kunokwenzeka njani ukuba amaKristu amabini anezazela eziqeqeshwe kakuhle enze izigqibo ezingafaniyo?

• Kufanele kwenzeke ntoni kwizazela zethu ngokuhamba kwexesha?

[Imaphu ekwiphepha 26]

(Ukuba ufuna inkcazelo ehlahlelwe kakuhle, yiya kwimpapasho)

ISisili

IGRISI

IKrete

IASIA MINOR

ISipro

ULWANDLE LWEMEDITERA

[Umfanekiso okwiphepha 28]

Ngoxa ejamelene nemeko efanayo, amaKristu amabini awahlukeneyo anokwenza izigqibo ezingafaniyo