Hlakulela Iimpawu Ezinokukunceda Ngoxa Usenza Abafundi
“Hambani . . . niye kubenza abafundi abantu beentlanga zonke.”—MATEYU 28:19.
1. Bubuphi ubuchule nesimo sengqondo obabufunwa ngabanye abakhonzi bakaThixo kwimihla yamandulo?
MAXA WAMBI abakhonzi bakaYehova bamele bahlakulele ubuchule nesimo sengqondo esiya kubanceda benze ukuthanda kwakhe. Ngokomzekelo, bethobela umyalelo kaThixo, uAbraham noSara bashiya isixeko esimi kakuhle saseUre yaye ekugqibeleni kwafuneka babe neempawu nobuchule obufunekayo kubantu abahlala ezintenteni. (Hebhere 11:8, 9, 15) Ukuze uYoshuwa akhokelele amaSirayeli kwiLizwe Lesithembiso, kwafuneka abe nenkalipho, athembele kuYehova, aze awazi kakuhle uMthetho wakhe. (Yoshuwa 1:7-9) Enoba bubuphi na ubuchule uBhetsaleli no-Oholiyabhi ababesele benabo baphuculwa ngumoya kaThixo ukuze la madoda abe negalelo elinamandla ekwakheni nasekuveleleni umsebenzi wokwakhiwa komnquba.—Eksodus 31:1-11.
2. Yiyiphi imibuzo ephathelele umsebenzi wokwenza abafundi esiza kuyixubusha?
2 Kwiinkulungwane kamva, uYesu Kristu wathi xa wayethuma abalandeli bakhe: “Hambani . . . niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.” (Mateyu 28:19, 20) Akuzange nanini na ngaphambili abantu banikwe ilungelo lokwenza umsebenzi ofana nalo. Ziziphi iimpawu ezifunekayo kumsebenzi wokwenza abafundi? Sinokuzihlakulela njani ezo mpawu?
Mthande Ngokunyanisekileyo UThixo
3. Umyalelo wokuba senze abafundi usinika liphi ithuba?
3 Ukuthetha nabantu sizama ukubeyisela ukuba banqule uThixo wenyaniso kufuna ukuba simthande ngokunyanisekileyo uYehova. AmaSirayeli ayenokubonisa ukuba ayamthanda uThixo ngokuyithobela ngokusuk’ entliziyweni imiyalelo yakhe, enikela imibingelelo eyamkelekileyo, aze amdumise ngeengoma. (Duteronomi 10:12, 13; 30:19, 20; INdumiso 21:13; 96:1, 2; 138:5) Nathi njengoko sisenza abafundi, sithobela imithetho kaThixo, kodwa sikwabonisa ukuba siyamthanda ngokuxelela abanye ngaye nangeenjongo zakhe. Simele sithethe ngolweyiseko, sikhetha amagama afanelekileyo okuvakalisa indlela esivakalelwa ngayo ngethemba esilinikwe nguThixo.—1 Tesalonika 1:5; 1 Petros 3:15.
4. Kwakutheni ukuze uYesu ayoliswe kukufundisa abantu ngoYehova?
4 Ngenxa yokumthanda kwakhe ngokunyanisekileyo uYehova, uYesu wayekuvuyela gqitha ukuthetha ngeenjongo zikaThixo, uBukumkani nonqulo lwenyaniso. (Luka 8:1; Yohane 4:23, 24, 31) Eneneni, wathi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.” (Yohane 4:34) La mazwi omdumisi abhekisela kuYesu: “Ukwenza ukuthanda kwakho, Thixo wam, kundiyolisile, nomthetho wakho ungaphakathi ezibilinini zam. Iindaba ezilungileyo zobulungisa ndizixelile ebandleni elikhulu. Khangela! Imilebe yam andiyithinteli. Owu Yehova, ukwazi kakuhle oko.”—INdumiso 40:8, 9; Hebhere 10:7-10.
5, 6. Luluphi olona phawu lufunekayo xa sisenza abafundi?
5 Ngenxa yokuthanda kwabo uThixo, maxa wambi abantu abasandul’ ukufunda inyaniso yeBhayibhile bathetha ngoYehova noBukumkani bakhe ngolweyiseko kangangokude beyisele abanye ukuba bahlolisise iZibhalo. (Yohane 1:41) Ukuthanda uThixo kuyeyona nto isikhuthaza ukuba senze abafundi. Ngoko masigcine olo thando luvutha ngokufunda size sicamngce rhoqo ngeLizwi lakhe.—1 Timoti 4:6, 15; ISityhilelo 2:4.
6 Ngaphandle kwamathandabuzo ukuthanda uYehova kwanceda uYesu Kristu wangumfundisi onenzondelelo. Kodwa eso asikokuphela kwesizathu sokuba abe ngumvakalisi woBukumkani ophum’ izandla. Luluphi olunye uphawu olwanceda uYesu wanobuchule njengoko wayesenza abafundi?
Bonisa Uthando Ngokuxhalabela Abanye
7, 8. UYesu wayebagqala njani abantu?
7 UYesu wayebakhathalele abantu enomdla kubo kananjalo. ‘Esengumsebenzi kaThixo onobuchule’ ngaphambi kokuba eze emhlabeni, wayezithanda izinto ezinxulumene noluntu. (IMizekeliso 8:30, 31) Naxa wayesele esemhlabeni, uYesu wayenemfesane ngabantu ebahlaziya abo babesiza kuye. (Mateyu 11:28-30) Wabonisa uthando nemfesane kaYehova, yaye oku kwatsalela abantu kunqulo lokuphela koThixo oyinyaniso. Zonke iindidi zabantu zamphulaphula uYesu ngenxa yokuba wabonisa uthando ngokuzixhalabela iintswelo zazo.—Luka 7:36-50; 18:15-17; 19:1-10.
8 Xa enye indoda yabuza oko ifanele ikwenze ukuze izuze ilifa ubomi obungunaphakade, ‘uYesu wayijonga yaye waziva eyithanda.’ (Marko 10:17-21) Ngokuphathelele abantu abathile abafundiswa nguYesu eBhethani, sifunda oku: “UYesu wayemthanda uMarta nodade wabo noLazaro.” (Yohane 11:1, 5) UYesu wayebakhathalele abantu kangangokuba wancama ukuphumla ukuze abafundise. (Marko 6:30-34) Ukubathanda ngokunyaniseke ngolo hlobo abantu kwenza uYesu waba nobuchule bokubatsalela kunqulo lwenyaniso.
9. UPawulos wayenasiphi isimo sengqondo ngokwenza abafundi?
9 Nompostile uPawulos wayebathanda gqitha abantu awayeshumayela kubo. Ngokomzekelo, wathi kwabo baba ngamaKristu eTesalonika: “Ngenxa yokuba sinomsa ngani, kuye kwakholeka kuthi ukuba sininike, kungekuphela nje iindaba ezilungileyo zikaThixo, kodwa kwanemiphefumlo yethu, ngenxa yokuba naba ziintanda kuthi.” Ngenxa yemigudu yothando kaPawulos, abanye eTesalonika ‘balahla izithixo zabo baza baba ngamakhoboka oThixo ophilayo.’ (1 Tesalonika 1:9; 2:8) Ukuba sibathanda ngokunyanisekileyo abantu njengoYesu noPawulos, nathi sinokuvuyiswa kukubona iindaba ezilungileyo zifikelela iintliziyo zabo ‘banotyekelo olufanelekileyo ngobomi obungunaphakade.’—IZenzo 13:48.
Yiba Nomoya Wokuzincama
10, 11. Kutheni ufuneka umoya wokuzincama ngoxa sisenza abafundi?
10 Abo baphumelelayo ekwenzeni abafundi banomoya wokuzincama. Ngokuqinisekileyo abagqali ukuzifumanela ubutyebi njengeyona nto ibalulekileyo. Eneneni, uYesu wathi kubafundi bakhe: “Hayi indlela ekuya kuba nzima ngayo ngabo banemali ukungena ebukumkanini bukaThixo!” Abafundi bakhe bamangaliswa kukuva oku, kodwa uYesu wongezelela ngelithi: “Bantwana, hayi indlela ekunzima ngayo ukungena ebukumkanini bukaThixo! Kulula ngakumbi ngenkamela ukuphumela kwintunja yenaliti kunokuba isityebi singene ebukumkanini bukaThixo.” (Marko 10:23-25) UYesu wakhuthaza abalandeli bakhe ukuba baphile ngendlela elula ukuze bakwazi ukunikela ingqalelo ekwenzeni abafundi. (Mateyu 6:22-24, 33) Kutheni umoya wokuzincama usinceda ukuba sikwazi ukwenza abafundi?
11 Ukufundisa zonke izinto asiyalele zona uYesu kufuna umgudu. Ngokuqhelekileyo umntu owenza abafundi uzimisela ukuqhuba isifundo seBhayibhile nomntu onomdla veki nganye. Ukuze bandise amathuba abo okufumana abantu abanomdla, abanye abavakalisi boBukumkani baye bayiyeka imisebenzi yempangelo yexesha elizeleyo baza benza izingxungxo. Amawakawaka amaKristu aye afunda ezinye iilwimi ukuze akwazi ukushumayela kubantu abathetha ezinye iilwimi kwiingingqi ahlala kuzo. Beneenjongo zokwenza abafundi, abanye baye bashiya amakhaya abo bafudukela kweminye imimandla ukuze babe nenxaxheba engakumbi kwisivuno. (Mateyu 9:37, 38) Yonke ke le nto ifuna umoya wokuzincama. Kodwa kufuneka okungakumbi ukuze siphumelele ekwenzeni abafundi.
Yiba Nomonde Kodwa Ungachithi Ixesha
12, 13. Kutheni umonde ubaluleke kakhulu ekwenzeni abafundi?
12 Umonde lolunye uphawu olusincedayo senze abafundi. Isigidimi esisivakalisayo njengamaKristu singxamisekile, kodwa ukwenza abafundi kudla ngokufuna ixesha elininzi nomonde. (1 Korinte 7:29) UYesu akazange aphelelwe ngumonde ngumntakwabo uYakobi. Nangona kucaca ukuba uYakobi wayeqhelene kakuhle nomsebenzi kaYesu wokushumayela, yayikho into eyayimbambezela ukuba angabi nguye umfundi. (Yohane 7:5) Noko ke, kwithutyana nje eliphakathi kokufa kukaKristu nePentekoste yowama-33 C.E., kuyabonakala ukuba uYakobi waba ngumfundi, kuba iZibhalo zibonisa ukuba waya kuthandaza nonina, nabantakwabo kunye nabapostile. (IZenzo 1:13, 14) UYakobi wenza inkqubela entle yokomoya, kamva wathwaliswa neembopheleleko ezinzima kwibandla lamaKristu.—IZenzo 15:13; 1 Korinte 15:7.
13 Njengabalimi, amaKristu ahlakulela izinto ezidla ngokukhula kade—ukuqonda iLizwi likaThixo, ukuthanda uYehova, nomoya kaKristu. Le nto ke ifuna umonde. UYakobi wathi: “Yibani nomonde . . . , bazalwana, de ibe bubukho beNkosi. Khangelani! Umlimi usilinda ngomonde isiqhamo esixabisekileyo somhlaba, ade afumane imvula yokuqala nemvula yamva. Nani yibani nomonde; ziqiniseni iintliziyo zenu, ngenxa yokuba ubukho beNkosi busondele.” (Yakobi 5:7, 8) UYakobi wayebongoza amanye amakholwa ukuba ‘abe nomonde de kufike iNkosi.’ Xa abafundi benento abangayiqondiyo, uYesu wayebachazela ngomonde okanye abenzele umzekelo. (Mateyu 13:10-23; Luka 19:11; 21:7; IZenzo 1:6-8) Ekubeni ngoku iNkosi ikho, umonde ubaluleke gqitha njengoko sizimisele ukwenza abafundi. Namhlanje abo baba ngabalandeli bakaYesu bafuna ukufundiswa ngomonde.—Yohane 14:9.
14. Nakuba sinomonde, sinokulisebenzisa njani ngobulumko ixesha lethu njengoko sisenza abafundi?
14 Nakuba sinomonde, ilizwi alibi naziqhamo kubantu abaninzi esiqalisa nabo izifundo zeBhayibhile. (Mateyu 13:18-23) Ngoko ke, emva kokwenza imigudu esengqiqweni yokubanceda, ngobuchule siyayeka ukuchitha ixesha nomntu onjalo size siye kukhangela abo batyekele ekuyixabiseni inyaniso yeBhayibhile. (INtshumayeli 3:1, 6) Kakade ke, nabantu abanoxabiso banokufuna uncedo olungakumbi ukuze batshintshe indlela abazibona ngayo izinto, isimo sabo sengqondo nezinto eziza kuqala kubo. Ngoko ke, siba nomonde kanye njengokuba uYesu wayenomonde kubafundi bakhe ekwakunzima kubo ukuba nesimo sengqondo esisiso.—Marko 9:33-37; 10:35-45.
Phucula Ubugcisa Bakho Bokufundisa
15, 16. Kutheni ukuthetha ngokucacileyo nokulungiselela kakuhle kubalulekile xa sisenza abafundi?
15 Ukuthanda uThixo, ukuba nomdla ebantwini, ukuba nomoya wokuzincama nokuba nomonde kubalulekile ukuze sikwazi ukuphumelela ekwenzeni abafundi. Kufuneka siphucule nobugcisa bethu bokufundisa kuba businceda sikwazi ukucacisa izinto kakuhle nangendlela elula. Ngokomzekelo, izinto ezininzi ezathethwa nguMfundisi Omkhulu, uYesu Kristu, zazifikelela iintliziyo kuba zazilula. Kusenokwenzeka ukuba uyawakhumbula amazwi kaYesu anjengala: “Ziqwebeleni ubuncwane ezulwini.” “Musani ukukunika izinja okungcwele.” “Ubulumko bungqineka bububulungisa ngemisebenzi yabo.” “Buyiselani izinto zikaKesare kuKesare, kodwa izinto zikaThixo kuThixo.” (Mateyu 6:20; 7:6; 11:19; 22:21) Kakade ke, uYesu akazange athethe ngamabinzana amafutshane nje kuphela. Wafundisa ngokucacileyo waza wazicacisa izinto xa kuyimfuneko. Wena unokuyixelisa njani indlela kaYesu yokufundisa?
16 Eyona nto inokukunceda uthethe ngokucacileyo nangendlela elula kukulungiselela kakuhle. Umvakalisi ongalungiselelanga udla ngokuthetha gqitha. Unokufihla iingongoma eziziintloko ngamazwi amaninzi, ethetha yonke into ayaziyo ngombandela awuxubushayo. Ngokwahlukileyo, umvakalisi olungiseleleyo, ucinga ngomntu amfundisayo, acamngce ngaloo mbandela athetha ngawo, aze akuchaze ngokucacileyo oko kufunekayo. (IMizekeliso 15:28; 1 Korinte 2:1, 2) Ucinga ngoko umfundi sele ekwazi nangeengongoma afanele azicinezele ebudeni besifundo. Umvakalisi unokuba neenkcukacha ezininzi ezibangela umdla ngombandela othile, kodwa kuba efuna ukuthetha into ecacileyo ususa nayiphi na inkcazelo engeyomfuneko.
17. Sinokubanceda njani abantu baqiqe ngeZibhalo?
17 Kwakhona uYesu wanceda abantu baqiqa kunokusuka nje abaxelele izibakala. Ngokomzekelo, ngesinye isihlandlo wabuza oku: “Ucinga ntoni, Simon? Ookumkani bomhlaba bazifumana kubani iimfanelo okanye irhafu yentloko? Koonyana babo okanye kwabasemzini?” (Mateyu 17:25) Sinokukunandipha ukucacisa iBhayibhile kangangokude kufuneke sizibambe ukuze sivumele umfundi awucacise ngokwakhe umbandela oxutyushwa kwisifundo seBhayibhile. Asimele sibangxixhe ngemibuzo abantu. Kodwa ukuba sisebenzisa ubuchule, imizekeliso efanelekileyo nemibuzo esengqiqweni sinokubanceda baqonde iingongoma eziseZibhalweni nezikwiimpapasho zethu ezisekelwe eBhayibhileni.
18. Yintoni ebandakanyekileyo ekuphuculeni ‘ubugcisa bokufundisa’?
18 IZibhalo ziyathetha ‘ngobugcisa bokufundisa.’ (2 Timoti 4:2; Tito 1:9) Ubuchule obunjalo bokufundisa bubandakanya okungakumbi kunokunceda nje umntu ankqaye izibakala. Sifanele sizame ukunceda umfundi weBhayibhile aqonde umahluko phakathi kwenyaniso nobuxoki, okubi nokulungileyo nobulumko nobudenge. Njengoko sisenza oku yaye sizabalazela ukuhlakulela ukuthanda uYehova entliziyweni yomfundi, usenokusibona isizathu sokuba efanele amthobele.
Benze Ngenzondelelo Abafundi
19. Anegalelo njani onke amaKristu ekwenziweni kwabafundi?
19 Ibandla lamaKristu liyintlangano yokwenza abafundi. Xa umntu esiba ngumfundi, asiloNgqina likaYehova elimncede wafunda iBhayibhile kuphela elinesizathu sokuvuya. Xa abantu bekhangela umntwana olahlekileyo, uba mnye umntu kwelo qela odla ngokumfumana. Kodwa xa loo mntwana esisiwa kubazali bakhe, wonke umntu obekwelo phulo uyavuya. (Luka 15:6, 7) Ngokufanayo, umsebenzi wokwenza abafundi siwenza njengeqela. Onke amaKristu aba negalelo ekufuneni abo baya kuba ngabafundi bakaYesu. Xa kufika umntu omtsha kwiintlanganiso ezikwiHolo YoBukumkani, mKristu ngamnye uba negalelo ekwakheni uxabiso analo ngonqulo lwenyaniso. (1 Korinte 14:24, 25) Ngenxa yoko, onke amaKristu amele avuyiswe ngamakhulu amawaka abafundi abatsha abenziwayo nyaka ngamnye.
20. Yintoni ofanele uyenze ukuba ufuna ukufundisa abanye inyaniso yeBhayibhile?
20 AmaKristu amaninzi athembekileyo ebeya kukuvuyela ukuba nomntu amfundisa ngoYehova nangonqulo lwenyaniso. Noko ke, nakuba esenza imigudu kusenokwenzeka ukuba akakhange aphumelele. Ukuba nawe ukwimeko efanayo, qhubeka usomeleza uthando onalo ngoYehova, yiba nomdla ebantwini, ube nomoya wokuzincama, umonde, uze uzame ukuphucula ubuchule onabo bokufundisa. Ngaphezu kwako konke, wuthandazele umsebenzi owenzayo wokufundisa abantu inyaniso. (INtshumayeli 11:1) Masikuthuthuzele isibakala sokuba yonke into oyenzayo enkonzweni kaYehova inegalelo kumsebenzi wokwenza abafundi ozukisa uThixo.
Ngaba Unokuchaza?
• Kutheni ukwenza abafundi kuvavanya ukumthanda kwethu uThixo?
• Abo benza abafundi bamele babe naziphi iimpawu?
• Yintoni ebandakanywa ‘bubugcisa bokufundisa’?
[Umfanekiso okwiphepha 21]
Xa esenza abafundi, amaKristu abonisa ukuba amthanda ngokwenene uThixo
[Umfanekiso okwiphepha 23]
Kutheni simele sibe nomdla kwabanye xa sisenza abafundi?
[Umfanekiso okwiphepha 24]
Ziziphi ezinye iimpawu ezifunekayo xa sisenza abafundi?
[Umfanekiso okwiphepha 25]
Onke amaKristu avuyiswa gqitha kukubona imiphumo emihle yokwenziwa kwabafundi