Uthando LukaMama Lubonisa Indlela UThixo Anothando Ngayo

“Umfazi angalulibala na usana lwakhe, angavakalelwa ngonyana wesisu sakhe? Nokuba bona abafazi banokulibala, kodwa mna andiyi kukulibala.”—ISAYA 49:15.

UMAMA uyalugona usana lwakhe olubomvu xa eluncancisa. Lo ngumbono omhle nothandekayo. Omnye umama ekuthiwa nguPam uthi: “Xa ndandiqala ukufunqula umntwana wam wokuqala ndaziva ndimthanda yaye ndinembopheleleko yokunyamekela ubomi bakhe.”

Oku kubonakala kusisibakala esingenakukhanyelwa, kodwa abaphandi baye baqinisekisa ukuba uthando lukamama luyayichaphazela indlela umntwana akhula ngayo. Uxwebhu olupapashwe yiWorld Health Organization Programme on Mental Health luthi: “Uhlolisiso luye lwabonisa ukuba iintsana eziye zalahlwa kwesinomhlwa zaza zahlukana nabazali bazo ziye zingonwabi, zidandatheke maxa wambi zide zinxunguphale.” Kwaolu xwebhu lubonisa ukuba abantwana abathandwayo besebancinane baba krelekrele kunabo baye balahlwa.

Ngokuphathelele uthando lukamama, uAlan Schore ongunjingalwazi wezigulo zengqondo kwiSikolo Samayeza iUCLA eUnited States uthi: “Ulwalamano lokuqala umntwana aba nalo nonina luba ngumzekelo njengoko lumqeqeshela indlela aza kuqhubana ngayo nabanye abantu kwixesha elizayo.”

Okubuhlungu kukuba ukudandatheka, ukugula nezinye izinto ezibuhlungu zinokumenza umama amtyeshele umntwana wakhe okanye ade ‘alulibale usana lwakhe.’ (Isaya 49:15) Ayiqhelekanga into yokuba umama alibale usana lwakhe. Ngokuqhelekileyo oomama bayabathanda abantwana babo. Abaphandi baye bafumanisa ukuba xa oomama bebeleka, bavelisa idlala ekuthiwa yioxytocin, elibenza babe nenimba lize libe nendima ephambili nasekuveliseni ubisi. Eli dlala liveliswa ngamadoda namabhinqa kucingelwa ukuba lilo elenza ukuba abantu babe nothando novelwano.

Imvelaphi Yothando

Abantu abakhuthaza inkolelo yendaleko bafundisa ukuba uthando lokungazingci oluphakathi komama nomntwana lwazivelela kuba lwalubanceda. Ulindixesha iMothering Magazine okwi-Internet uthi: “Inxalenye yokuqala yengqondo yethu ivela kwizirhubuluzi apho zikhoyo iimvakalelo zethu. Yile nxalenye yobuchopho emenza umzalikazi abe nenimba ngomntwana wakhe.”

Abaphandi bayavuma ukuba ingqondo inendima ephambili kwindlela esivakalelwa ngayo. Ngaba ivakala isengqiqweni into yokuba uthando lukamama ngomntwana wakhe lwenzeka ngengozi?

Khawuqwalasele le nkcazelo yeBhayibhile. IBhayibhile ithi abantu benziwe ngomfanekiso kaThixo okuthetha ukuthi bayakwazi ukubonisa iimpawu zakhe. (Genesis 1:27) Olona phawu lubalaseleyo lukaThixo luthando. Umpostile uYohane wabhala wathi: “Lowo ungenaluthando akamazi uThixo.” Kutheni kunjalo nje? “Kuba uThixo uluthando.” (1 Yohane 4:8) Phawula ukuba le ndinyana yeBhayibhile ayithi nje uThixo unothando. Kunoko ithi uThixo uluthando. UnguMthombo wothando.

IBhayibhile iluchaza ngolu hlobo uthando: “Uthando luzeka kade umsindo yaye lunobubele. Uthando alunakhwele, alugwagwisi, alukhukhumali, aluziphathi ngokungandilisekanga, alufuni ezalo izilangazelelo, alucaphuki. Alunanzondo. Alubi nemihlali ngentswela-bulungisa, kodwa luvuyisana nenyaniso. Luthwala izinto zonke, lukholelwa izinto zonke, luthemba izinto zonke, lunyamezela izinto zonke. Uthando aluze lutshitshe.” (1 Korinte 13:4-8) Ngaba kusengqiqweni ukukholelwa ukuba olu phawu luhle kangaka lwazivelela?

Lukwenza Uzive Njani?

Njengokuba ufunde ngendlela oluchazwe ngayo uthando kwiziqendu ezingaphambili, ngaba uyakulangazelela ukuthandwa ngalo ndlela? Kungokwemvelo ukuvakalelwa ngaloo ndlela. Kutheni kunjalo nje? Ngenxa yokuba “siyinzala kaThixo.” (IZenzo 17:29) Sadalwa ngohlobo lokuba sive xa sithandwa size sikwazi nokulubonisa. Sinokuqiniseka ukuba uThixo usithanda ngokwenene. (Yohane 3:16; 1 Petros 5:6, 7) Isibhalo esicatshulwe ekuqaleni kweli nqaku sibonisa ukuba uThixo usithanda kakhulu ngaphezu kokuba kunjalo ngomama kumntwana wakhe.

Kusenokwenzeka ukuba uyazibuza: ‘Ukuba uThixo ulumkile, unamandla yaye unothando kutheni engakuphelisi ukubandezeleka? Kutheni evumela abantwana bafe, abantu baqhubeke becinezelwa nomhlaba usonakaliswa? Le yimibuzo esengqiqweni efuna ukuphendulwa kakuhle.

Enoba bathini abantu abangakholelwayo kubukho bukaThixo zinako ukufumaneka iimpendulo ezanelisayo kule mibuzo. Izigidi zabantu kumakhulu amazwe ziye zayifumana impendulo yale mibuzo ngokufunda iBhayibhile namaNgqina kaYehova. Abapapashi beli phephancwadi bayakukhuthaza ukuba wenjenjalo. Njengokuba uya umazi ngakumbi uThixo ngokufunda ngaye kwindalo nakwiLizwi lakhe, uza kuqonda ukuba akakho kude yaye sinokumazi. Uza kuqonda ukuba uThixo ‘akakude kuye ngamnye wethu.’—IZenzo 17:27.

[Amagama acatshulweyo akwiphepha 8]

UThixo usithanda kakhulu ngaphezu kwendlela amthanda ngayo umama umntwana wakhe