UNowa Nomkhukula—Ngaba Wenzeka Ngokwenene?
NGABA uyalilangazelela ihlabathi apho abantu baza kuhlala ngoxolo? Ihlabathi ekungekho mfazwe, lwaphulo-mthetho nangcinezelo kulo? Ukuba kunjalo usenokukhuthazwa yingxelo osenokuba uyayazi. Leyo yingxelo yebali likaNowa ilungisa lokwenene elakha umkhombe laza lasindisa lona nentsapho yalo kumkhukula owagubungela ihlabathi lonke waza watshabalalisa abantu abangendawo.
Ambalwa amabali aziwa ngokubanzi njengeli. Ingxelo yoko kwenzeka kuNowa ifumaneka kwincwadi yeBhayibhile yeGenesis, isahluko 6 ukuya 9, likwakho nakwiKoran yaye inyambalala yabantu iyalazi emhlabeni wonke. Ngaba uMkhukula wabakho ngokwenene, okanye libali nje elaqotyolwayo ukuze likhuthaze abantu ukuba benze okulungileyo? Abefundisi bezakwalizwi nezazinzulu bebewuhl’ amahlongwane lo mbuzo kangangeenkulungwane. IBhayibhile, eliLizwi likaThixo yenza kucace ukuba uNogumbe wenzeka ngokwenene. Khawucamngce ngezi zibakala zilandelayo:
Ingxelo yeGenesis isixelela unyaka, inyanga nosuku aqala ngalo uNogumbe, ixesha nendawo owahlala kuyo umkhombe nexesha owoma ngalo umhlaba. Neenkcukacha ngendlela owawufanele wakhiwe ngayo umkhombe zicacile—iplani, ubude nobubanzi bawo nezinto owakhiwa ngazo. Ngokwahlukileyo koko, iintsomi zidla ngokungacaci.
Iingxelo ezimbini zemilibo eziseBhayibhileni ziyasixhasa isibakala sokuba uNowa wayengumntu wokwenene. (1 Kronike 1:4; Luka 3:36) Bobabini abantu ababhala le milibo uEzra noLuka babengabaphengululi abaphum’ izandla. ULuka waphanda umlibo kaYesu Kristu waya kufika kuNowa.
Umprofeti uIsaya, uHezekile, umpostile uPawulos noPetros bathetha ngoMkhukula.—Isaya 54:9; Hezekile 14:14, 20; Hebhere 11:7; 1 Petros 3:19, 20; 2 Petros 2:5.
NoYesu Kristu wathetha ngoMkhukula esithi: “Kanye njengoko kwenzekayo ngemihla kaNowa, kuya kuba njalo nangemihla yoNyana womntu: babesidla, babesela, amadoda ayetshata, amabhinqa ayetshatiswa, kwada kwayimini awangena ngayo uNowa emkhombeni, wafika umkhukula, wabatshabalalisa bonke.” (Luka 17:26, 27) Ukuba uNogumbe akazange abekho isilumkiso sikaYesu ngokuphathelele ‘imihla yoNyana womntu’ besiya kuba lilize.
Umpostile uPetros waxela kwangaphambili ukuba kwakuza kubakho “abagculeli” ababeza kuhlekisa ngoko kuthethwa yiBhayibhile. UPetros wabhala wathi: “Ngenxa yeminqweno yabo, abasiqondi isibakala sokuba . . . ihlabathi [likaNowa] langoko latshatyalaliswa xa lakhukuliswa ngamanzi kanogumbe.” Ngaba simele singasiqondi esi sibakala? Nakanye! UPetros walek’ umsundulu esithi: “Amazulu nomhlaba wangoku, zombini ziqwetyelwe umlilo yaye zibekelwe imini yomgwebo neyentshabalalo yabantu abangenabuthixo.”—2 Petros 3:3-7.
Kwakhona uThixo uza kubatshabalalisa abantu abangendawo yaye njengakumhla kaNowa bakho abantu abaza kusinda. Ukuba sixelisa uNowa nathi siya kuba phakathi kwamalungisa aya kusindela kwihlabathi elitsha.