“Ngaba Ligama Elingafanele Libizwe”?

ELONA litye lesikhumbuzo lide eUnited States yiGateway Arch emi ngakumlambo iSt. Louis, eMissouri, lizimitha ezili-192. Kufutshane nalo kukho isakhiwo secawa esingesidanga kangoko esibizwa ngokuba yiOld Cathedral.

Xa ichaza indlela eyakhiwe ngayo indledlana engena kwesi sakhiwo secawa incwadana ethi The Story of the Old Cathedral ithi: “Ivaranda yayo ihonjiswe ngonxantathu omhle, embindini wakhe kubhalwe igama likaThixo elingafanele libizwe ngoonobumba abakhulu besiHebhere.” Bayabonakala emfanekisweni oonobumba abane besiHebhere יהוה (YHWH) abamela igama likaThixo.

Xa kwakhiwa le ndlu yecawa ngowe-1834, ibhunga lecawa lalinemvo yokuba aba nobumba besiHebhere bane babekwe kwindawo ababeza kubonakala kuyo. Ngoko ke, kutheni ‘lingafanele libizwe’ igama likaThixo?

INew Catholic Encyclopedia ichaza isiganeko esenzeka kwinkulungwane yesithandathu Ngaphambi kweXesha Eliqhelekileyo emva kokubuya kwamaYuda ekuthinjweni. Ithi: “Igama elithi Yahweh lagqalwa njengelingcwele kakhulu layeka ukusetyenziswa kwaza endaweni yalo kwasetyenziswa elithi ADONAI [Nkosi] okanye ELOHIM [Thixo]. . . . Ekuhambeni kwexesha eyona ndlela ichanileyo yokubiza uYahweh yalibaleka.” Ngenxa yoko, ekubeni abantu babengafane balisebenzise igama likaThixo ekugqibeleni babengasayazi indlela elalibizwa ngayo.

Nangona singenakuqiniseka ngeyona ndlela elalibizwa ngayo, eyona nto ibalulekileyo kukuba ukusebenzisa igama likaThixo kusisondeza kuye. Ubungathanda abahlobo bakho bakubize “mhlekazi” okanye “nkosazana” okanye ubungathanda bakubize ngegama lakho? Nditsho nokuba bebengakwazi ukulibiza kakuhle ngenxa yokuba bethetha olunye ulwimi, sekunjalo ubuya kufuna bakubize ngalo, akunjalo? Kukwanjalo nakuThixo. Ufuna sisebenzise igama lakhe uYehova.

NgesiXhosa uThixo ubizwa ngokuba “nguYehova.” Ngaba akufanele abo bamthandayo uThixo bambize ngegama lakhe ukuze basondele kuye? IBhayibhile ithi: “Sondelani kuThixo, naye uya kusondela kuni.”—Yakobi 4:8.